Sɛɛ Biblë bhɛnɩ ɔ ɛ -kaa kwänɩ ˈnɩ?

ˈSAA -N ˈKÄ Ɔ NƲ ˈNƖ?

ˈPänɩɛ -ka wɛlɩ ˈlɛ dlɩ kɛ: Sabʋsɛ, Daviidɩ -wʋ -mä glɔ ˈmö dɛɛ -bhlʋ mö dɔˈwʋ. Maa ˈyuylukwëa a za, yio a -yio ˈmö ɔˈɔ bhli dɔˈwʋ -wʋ. Ɔ yiɛ sɛ yɩbhlɩmanɩ nɩɩ, ɔ yɛ tʋʋ. ˈYio ˈmö ɔ dlʋnɩɛ -kamä kɛ ˈn ɔ yiɛ käböbɛyɩ plɛnɩ.

ˈN -nmö -käa Daviidɩ a ˈbhle ˈmö -wʋ, sɛ -n ˈkäa ɔ zʋ ˈnɩ?

ˈPÄÄ -KÄ ˈTIKÏYIE ˈWƲ DLƖ!

-N bhɛnɩ -n ˈkä -lii a ˈki a -bɛ nʋ:

1. -N ˈkä nimï ˈyɩbhä nzɩ wa -kamö ˈyio pänɩ.

2. -N ˈkä tlɔsɩ ˈwʋ ˈlibhï.

3. -N ˈkä nɛmö -këë, maa -n yi -kamä ˈyio ˈwʋ ˈsibhë.

ˈLɩlɩlɩ a dɔˈwʋ, kïbhëa a TANAA ˈnɩɛ -tiawʋ nɛnɩ.

Kïbhëa a ˈSƆNAA nɛnɩ a ˈkä TƐKÄNAA ˈwʋ zi. Ɛˈɛ -bhö ɲɩasɛ, maa -n -kä tlɔsɩ käˈmö -su, -wʋ -yimö kwänɩ -n ˈkä -naˈa ˈyio ˈwʋ ŋla.

Sa -bhlʋ -kpɔ ˈla -sɩbhä Biblë bhɛnɩˈɛ ɛ -kamö kwänɩ!

ˈBɔgʋ ˈla -wʋä -sɩbhä a sɛ -wʋ bhɛnɩ wʋ -kamö

• -su, -n -kä -mä -naˈa zɩkpaa ˈmö wɛlɩ ghlɩ.

• kwänɩ -n ˈkä mɔ -n glɩnɩɛ -tiamö -yi nzɩ -n ˈkä nɩkpɛ a -nɩkpɛ zʋ.

• sɛɛ -n ˈkää zɩkpa a -zɩkpa ghlɩ sʋlʋnɩ.

ˈPƖWƲ A DƐSƐKÄKÏBHÏ A ZƐMÖSƐNA

Sɛ -a ˈmaa ˈkäa bhïlabhïlasɛ ˈcɩɛ, nimï -a yɩbhä ˈyize.

• -Mɔ -bhɛ ɔ zlɩ ˈnɩ?

• ˈSaa wa ˈlibhï ɔ ˈwʋ ˈn wa yi ɔ -zɛlɩ -bhɛ ˈnɩ?

-A -käa ˈkädɩ ˈzʋ, mäˈä ˈpɩwʋ a -lii -yɩ -binɩɲɩɛ a za, nimï -a yɩbhäˈɛ.

• -Yɩ kä ɔ ˈŋlɩ ˈn -lizoku ghlɩɲɩ ɔ ˈnɩ?

• ˈSaa kä ɔ ˈŋlɩ ˈn nɩkpa ku ɔ ˈnɩ?

ˈN yɩ zɛmösɛna -käa -mä Biblë ˈmö -wʋ ˈna?

Nɩkpa a -bɛ lɛ nɩɩ, Biblë wälɛ wälɛ dɩ -ɲɛ -dɔdɔnini ˈsɔ ɛ yie ˈwʋ, ɛ ˈtɛɲɩ yɛ ˈplɩ ˈn -n ˈkɛ ˈmö ˈnʋ a dɔˈwʋ, ˈmö yɩ ˈtɛɛ teɲii. Biblë mɛɛ kä ɔ gbʋ -a, maa sɛɛ nɩkpa ˈnʋä Biblë ˈmö ma-a kä ɔ gbʋ -a? Wa ˈnuë -kamä sasɛ dlɩ -gömö -sɛsɛnɩ a za-a ɔ ˈnɩɩ?

A yɩɛ -ka. Nɩkpa a -bɛ a dɔˈwʋ, Biblë lɛ nɩɩ Lagɔ mɔɔ ˈkämanɩɛ mäˈä ˈpɩwʋ a nɩkpa ˈwuë -gömö. Maa, yɩ yi ɔ -tiamö -sɩbhä -wʋ -a? Mäˈä ˈpɩwʋ a -lii ˈwuë bidibibi yɩ -wʋä. Saa ˈwuë yɔlɔylʋ, ˈlɩbhägu, ˈkwie, ˈpʋa, dʋdʋ tɩtlɛnɩ ˈn -sɩbhä a -lii -mimii. Lagɔ -ɔ glɩnɩɛ -wawʋ a ˈyize, yi ɔ ˈsaa a -lii a nimï -wʋ -a?

-N yɩbhä ɔ -n ˈkä nimïyɩbhäkïbhëa ˈla a zɛmösɛna yɩbhlɩnɩ -a? -Ɔ ˈkämanɩɛ mäˈä ˈpɩwʋ a nɩkpa ˈwuë -gömö a dɔˈwʋ, sɛɛ Biblë gbää -yimö zuzu -gömö -sɛ!

ˈLɩlɩlɩ a dɔˈwʋ, -n ˈyɩ ˈylɩmö nɩɩ, blosu nɩ ˈmö a ˈdɩmözʋwɛlɩɩ ˈwuë, -mä Biblë ˈmö -mä yɩ ˈbhöönɩɛ. Zoova ˈa Bhlɩnɩwaa kɩ dlɩ ˈwʋ nɩɩ, Biblë, ˈbɔgʋ -mʋɲɩ ˈdɩmözʋwɛlɩɩ wa bhɛnɩɛ wa ˈkä dlɩ ˈtɛɛnɩ ˈmö ɛ glɩnɩɛ. Ɛˈɛ -bhö ɲɩasɛ, maa “Lagɔ ˈa ˈbɔgʋʋ ˈmö a wɛlɩɩ ˈwuë [...] ˈSaa -wʋä gbëaa ˈmö, ˈmö yɩ sʋlʋnɩɛ nɩkpɛ, -waa nɛmöä lagɔsɛ, ˈwa ˈɲiɲlolii ˈmö yɩ pää ˈpɩwʋ, nɩkpa yɩ zlɔmanɩɛ ˈmö, ˈsaa nɛnɩɛ Lagɔ dlɩ yɔwʋ ʼmö yɩ sʋlʋnɩɛ nɩkpa.” (2 Timotee 3:16, 17) Wa ˈcɛlɩɛ ˈbɔgʋ nɩ -lɛ yɛ ˈmö gwälɛ. Maa wʋ ˈmö a ˈdɩmözʋwɛlɩɩ kä -aa -li a -lii ˈmö. Zaa -n kä -n ˈkʋ ˈmö zɛlɩ.