Zezwii ˈa ˈkwie a ˈwʋligbanɩzlɩ a za -n -wʋ bhä -naɲɩ ˈwlugïganɩ dɔˈwʋ -a?

ˈYlʋba wa laa 33 a ˈcʋ wa laa Niza a ˈylɩ 13 ˈmö, Zezwii -yi a-a sɛ nɩɩ, ˈɔ ˈgbëbhlenɩzlɩ ɔ -ɲɛ ˈɔ ˈwʋ-bhlinɩwaa ˈkää mäˈä dʋdʋ ˈwʋ -sɛɛ nzɩ wa ˈkɔ ˈlɩbhä ɔ ˈkä ˈkuu mɛɛ. ˈƆ ˈgbëbhlenɩ pakö ˈmö ɔ -ɲʋa ˈsɔ ˈkää ˈgämö -sɛnɩ, ˈn ɔ ˈkäa kaa lagɔlile -a -lɛ gbalele sɛ ˈgïla. ˈKi a mii kää saˈa teɲii dɛsɛ a dɔˈwʋ, a kä a ˈkä sasɛ ˈwlugïganɔɔ. -Sɩbhä a za ˈn ɔ yiɛ Piɛlɩ -ɲɛ Zaah ˈsɔ tie wa ˈkä -lii ˈwlugïganɩɛ mö. (Lwiikö 22:7-13) Tɛɛnɩ ˈa -lɛ a ˈtɛɲɩ ˈla ˈmö, klɩtɩɛwaa ˈwuë, -wa gbää wa ˈkä Zezwii a ˈkwie a zlɩ ˈwʋligbanɩɩ, wa kä wa ˈkä waɲɩ ˈwlugïganɩ. (Lwiikö 22:19) Zezwii ˈa ˈkwie a ˈwʋligbanɩzlɩ -ɛ ˈkää Avlilɩ a ˈylɩ 3 ˈwʋ bhli, -a -kä -aaɲɩ ˈwlugïganɩɛ yi, -lii a -mii kä ɔ dɛsɛ, -a kä ɔ -a ˈkä nʋ ˈnɩ ?

ˈSaa ˈyukugänɩwaa kää wa ˈkä nʋ:

• ˈYukugänɩwaa nɩ -bhɛ nzɩ Lagɔ ˈa ˈKämanɔɔ a -budu ɛ ˈkäˈɛ dɛ -mäma dɛ -gää kɛ wa ˈkä -lɛ Zezwii ˈa ˈkwie a ˈwʋligbanɩzlɩ a za ˈwluyɩbha. -Lɛ kä a ˈkä ˈmö ˈghlii nzɩ -fʋfʋ ˈkä -lɛ plɛnɩ, -lɩbhä kä a ˈkä sasɛ ˈwʋ lɩɩ ˈn -klikpï a -bɛ kä yɩ ˈkä -lɛ -wʋ. ˈYlɩ ˈla ˈnɩɛ -bhlɛ ghlɛ ˈn wa kää -lɛ ˈwlugïganɩ.

• Bhïlaɲɔ -ɔ -yiɛ sasɛ bhïla sɛ, wa kä wa ˈkɔ -lɛ -sɛ. -Ɔ ˈkää ˈwluyɩbhäyɩbhʋʋ -su -ɲɛ lagɔdaayuea -wa ˈkää lagɔlilea ˈwlumö bhibhe wa nɩ -sɛ mʋä -lɛ.

• Da -bhlʋ -kpɔ lagɔzɩkpö a -bɛ -kä -lɛ ˈwluyɩbhänɩɛ yi, ˈyukugänɩwa nɩ zʋnɩ -lɛ a libho ˈla ˈyli. ˈGïle -mɛɛ ˈmö lagɔzɩkpö ˈkää -bhʋlʋbhlʋ ˈwluyɩbhäyɩbhʋ tɛɛ ˈn ˈgïle -mɛɛ ˈmö wa ˈkää zɛmö bhɩɛ wa kä wa ˈkɛ sasɛ -dɩ. Dɛ tobï ˈkää plɛnɩ, dɛɛ yɩ ˈnɩgbö, dɛɛ yɩ ˈkaä -mä ˈwlʋnɩ wa nɩ bhïla yɩ wɛlɩɩ.

• -Wa ˈkää nɩkpa päla -ɲɛ -wa ˈkää lagɔlilea ˈpïla ˈsɔ wa nɩ -sʋa -lɛ, ˈn sɛ wa ˈkää ˈwa libho ˈmö nʋnʋnɩɩ, wa nɩ gïganɩ -sɩbhä ˈwlu.

• Wa kä wa ˈkä lagɔlilea ˈyli zʋnɩ, -dɔkwɩɩ, duvɛɛ -ɲɛ ˈkɔpɩ -yɩɲɩ ˈmö wa ˈkɛɛ pälɩ ˈsɔ, yɩ -ɲɛ ˈtebhle a tebhle ˈn lekwi wa ˈkaa ˈklʋ lʋlʋ ˈsɔ nɩ kä ˈklʋkpamö.

ˈSaa lagɔwɛlɩbiawa kää wa ˈkä nʋ:

• Wa kä wa ˈkä waɲɩ ˈwlugïganɩ wa ˈkä Zezwii ˈa ˈkwie a ˈwʋligbanɩzlɩ a nɩkpawäzɩkpɩ nɩkpa a -bɛ ˈɲɛ.

• Nɩkpaa -n ˈkää wäzɩɩ: -n ˈcɩaa lagɔwɛlɩ, -na -lowluwa, -naˈa -suku ˈmö a -nʋa, -naˈa libho ˈmö a -nʋa, -ɲɛ -naˈa -yiyiwa -mumuë ˈsɔ, ˈcɛlɩ ˈwa ˈŋlɩ.

• Biblë ˈa gbɛlɩ wa -sɛɛ -lɛ -a ˈkää ˈmö zɛlɩ Zezwii ˈa ˈkwie a ˈwʋligbanɩzlɩ a ˈtɛɲɩ ˈmöö, -a kä -a ˈkɩ ˈmö zɛlɩ, -a ˈkɩ dlɩ kɛ ˈpänɩ.

• Zezwii ˈa ˈkwie a ˈwʋligbanɩzlɩ, lagɔwɛlɩbiawaa kä wa ˈkä paa yi nzɩ wa ˈkä nɩkpaa -wa ˈkaä yi, päla.