Zezwii ˈa ˈkwie a ˈwʋligbanɩzlɩ a za, -n -wʋ bhä -naɲɩ ˈwlu gïganɩ dɔˈwʋ -a?

Zezwii ˈa ˈgbëbhlenɩpaakö, dɛsɛ ɛ kä a-a teɲii. Ɛˈɛ -bhö ɲɩasɛ, maa ˈɔ ˈkwie a ˈtɛɲɩ yɛ a-a ghlɛ ˈwë, ˈn ɔ yɩbhäˈɛ ɔ -ɲɛ ˈɔ ˈwʋ-bhlinɩwaa ˈsɔ wa ˈkä Paakö a lilea ˈgämö linɩ. Nzɩ ɔ ˈkä bhäla -lu -mumuu sɛ ˈgïla, wa ˈkää ˈylʋbö ˈwuë ˈmö -bhɛ, -muu -lɛ lagɔlilea. Yɩ za, ɔ yiɛ Piɛlɩ -ɲɛ Zaah ˈsɔ tiee, wa ˈkä -budukïbhëa ˈwlu gïganɩ, mää wa ˈkää linɩ. (Lk 22:7-13; ˈyɩ tɛkäkpʋ ˈklʋ a foto ˈylɩmö.) Yɩ ligbaɲɩ nɩɩ Zezwii ˈa ˈkwie a ˈwʋligbanɩzlɩ -ɛ ˈkää Maasɩ a ˈylɩ 27 ˈwʋ bhli a za, -a kä -a ˈkä sasɛ -aɲɩ ˈwlu gïganɩ. -Mä lagɔzɩkpöö ˈmö, -wa ˈkää bhïlabhuluu -bhɛ, ˈfɔlɔ -ɲɛ duvɛɛ ˈsɔ, ˈn -lii -mimi, wa kɩ -kamä ˈwlu gïganɩ ˈwë. Zaa, sɛɛ -a ˈkä ɔ bhʋlʋbhlʋ ˈzʋ, nzɩ -a ˈkä ˈmö -bhɩɔ Zezwii ˈa ˈkwie a ˈwʋligbanɩzlɩ?

Sɛɛ -a ˈkää Zezwii ˈa ˈkwie dlɩ kɛ ˈpänɩ. Zezwii ˈa ˈkwie a ˈwʋligbanɩzlɩ a ˈtɛɲɩ ˈmö, Biblë a gbɛlɩ wa -sɛɛ -lɛ, -a nɩ zeli ˈmö ˈn -a nɩ ˈpäni dlɩ kɛ. Blosu wa laa Examinons les Écritures chaque jour ˈmö, Biblë a gbɛlɩ ˈla -wʋ -mä. Biblë -ɛ ˈwlʋä ˈlili ˈwʋ wa laa Traduction du monde nouveau, dɛ wa ˈzʋä Appendice B12-A, Appendice B12-B. Biblë a gbɛlɩ -yɩ -sɛsɛnɩɛ sasɛ Zezwii a -gömö a wɛlɩɩ ˈmö, -sɩbhä a -nɩɩ a -bhɛ -wʋ -mä. (-A nɩ yɩlɩˈɛ -mä -aˈa ˈwluyɩbhäyɩbhʋʋ a ˈbɔgʋ ˈmö, Avlilɩ 2020 a -nʋ.) ˈBɔgwɩ wa laa Index des publications des Témoins de Jéhovah, ɛ -käˈɛ Guide de recherche pour les Témoins de Jéhovah, ˈligbë ˈmö a -nʋa -kä ˈwa Biblë a ˈcɩɛcɩʋ -bhɛɛ yi, wa bhɛnɩ wa ˈkä -mä yɩlɩ. -Yɩ kää ˈŋlɩ ˈn Zezwii ˈa ˈkwie kää dɛsɛ, yɩ -wʋ -mä ˈbɔgwɩ ˈla ˈmö.

-A nɩ wäzɩ nɩkpa. Zezwii ˈa ˈkwie a ˈwʋligbanɩzlɩ a ˈtɛɲɩ ˈmö, -a nɩ ˈtɛmanɩ ˈyli yɔwʋ -a ˈkä nɩkpa a -bɛ wäzɩ. -Muë -a yɩbhää -a ˈkä wäzɩ, -a nɩ ˈpʋa ˈwʋ dlɩ: -Muë -a ˈcɩaa Biblë, -muë -a möä ˈylɩmöä ˈyize, -aˈa -yiyiwaa, ˈn -aˈa -kosu yɔwʋ a -nʋa. -Waa bia lagɔwɛlɩɩ ˈn ˈcwɩ gbʋplʋ yiɛ ˈplɩ, ˈyukugänɩwaa kä wa ˈkʋa wäzɩmö. -Mɔ -a wäzɩɛ ˈnɩ -mä -aˈa pɩɔ ˈyli -wʋ, -a nɩ ˈɲɔ ˈdɩ nɩɩ, ɔ nɩ mö -mä jw.org ˈklʋ, tɛkäkpʋ ˈklʋ a dɛɛ wa ˈzʋä -MUË -A GLƖNƖƐ. Ɔ -kä -mä plɛ, dɛ wa ˈzʋä “Zezwii ˈa ˈkwie a ˈwʋligbanɩzlɩ,” ɔ nɩ pɩɛnɩ -lɛ ˈwʋ. -Mä ˈɔ pɩɔ ˈyli a ˈgïle wa ˈkää ˈwluyɩbhäyɩbhʋ ˈla ˈmö -bhɛ, ˈn dɛɛ wa ˈkʋä -bhɛnɩ, ɔ yi ˈylɩmö.

-A -kä -aɲɩ ˈwlu gïganɩ dɔˈwʋ -wʋ, -lii -mi -a bhɛnɩ ɔ -a ˈkäˈɛ nʋ ˈnɩ?