ˈCɩɛcɩɛ-kïbhëa 11
Päpägböö -nyɛ dlɩwʋkälii ˈsɔ -yɩɛ Lagɔ dlɩ yɔwʋ nɛnɩ
Päpägböö -nyɛ dlɩwʋkälii ˈsɔ a -mii nɩ bhä nɛnɩ ˈnɩ? (1)
Klɩtiɛwaa yi bhä dlɩ ˈwʋ -kä nɩɩ, Lagɔ ta ˈmö ɔ -wʋ bhä? (2)
ˈSaa ˈkä bhä ˈnglɩ ˈn -Tiamö a Klɩtiɛwaa nɩ -sɛ bhä Nowɛlɩ, Paakö -nyɛ Zavie ˈsɔ, ˈn -wa ˈbhliˈɛ ˈwa gwälɩzlɩ ˈwʋ ˈnɩ? (3, 4)
-Wa yɛɛ ˈku ˈwë bhɛnɩ bhä wa ˈkä -wa -bhölɩɛ -lizoku ˈwlu nʋ -a? (5)
Klʋwaa ˈklʋ Zezwii ˈkunɩ bhä ? (6)
Lagɔ a dlɩ yɔwʋ nɛnɩmanɩ nɛnɩmanɛ kä bhä dɛsɛ -a? (7)
1. Dlɩwʋkälii -nyɛ nɩkpa a päpägböö ˈwuë ˈsɔ, mɩɩ ˈnɩɛ zokuu glɩnɩ. Maa, -yɩ ˈbhöönɩɛ -mä ˈfʋ a lagɔgligbïï ˈmö, ˈn -mii Biblë ˈnɩɛ ˈcɩa, mɩɩ ˈnɩɛ Lagɔ dlɩ yɔwʋ nɛnɩ.—Matie 15:6.
2. Ta ˈmö -wʋwʋɛ: Zoova ˈmö Ta ɔ -wʋ bhä -a? Yɩ sɛ zɛmö nɩɩ, nɩkpa ta wa -bhliɛ Lagɔ -bhlʋ. Nˈnn! Zoova mɔɔ -lɛ Dɩba mɔ. Mɔɔ -lɛ “ɔ ˈyize -tiamö a Lagɔ.” (Zaah 17:3; Maakö 12:29) Zezwii mɔɔ -lɛ Lagɔ ˈa tɛkäyuu, zaa Lagɔ mɔɔ glɩnɩɛ ˈɔ ˈwukpëlea. (1 Kɔlɛɛtɩ a -nʋa 11:3) Dɩba mɔ ˈghïliɛ tenyii mɔ ziiiɛ yuu ˈwʋ. (Zaah 14:28) Lagɔ ˈa ˈwugɔmʋʋ nɩ -bhö nɩkpɛ, maa Lagɔ ˈa ˈmötɛɛnɔɔ -muë.—Genèse 1:2; Tietiewaa a wɛlɩɩ 2:18.
3. Nowɛlɩ, Paakö -nyɛ Zavie ˈsɔ: -Waˈaa Zezwii Desablë a ylɩ a 25 ˈmö gwälɩ. Maa Ɔtɔɔblë a tɛɛtɛɛdɔˈwʋ a sɛ ɔ gwëlioo. ˈYlʋba a ˈtɛnyɩ -bhlʋ ˈmö, dɛ wïlagänɩwa tɩɩɛ ˈwa wïlaa sabʋsɛ ˈpɩwʋ a ˈtɛnyɩ ˈmö, ɔ gwëlioo. (Lwiikö 2:8-12) Zezwii ˈnɩɛ -bhlɛ tɛkäsɛ Klɩtiɛwaa ˈdɩ ˈnyɛ nɩɩ, wa nɩ ˈbhli ɔ gwälɩzlɩ ˈwʋ nʋ. Maa sɛˈɛ ɔ ˈnyɛɛ ˈɔ ˈwʋ-bhlinɩwaa ˈdɩ nɩɩ, wa dila nɩ bhlinɩ -lɛ ɔ kwie a da. (Lwiikö 22:19, 20) -Mä bhlaˈmö a ˈfʋ a lagɔgligbïï ˈmö, -mä Nowɛlɩ, Paakö -nyɛ Zavie ˈsɔ a päpägböö ˈbhöönɩɛ. Sɛ tɛkädɔˈwʋ a Klɩtiɛwaa nɩ -sɛ Nowɛlɩ, Paakö -nyɛ Zavie ˈsɔ, -sɩbhä zɩɛ a Klɩtiɛwaa ˈzʋmöä.
4. Gwälɩzlɩ a ˈwʋbhlizlɩ: Nɩkpa ˈsɔ -waˈaa Zoova a bʋbɔbʋbɔwa glɩnɩ, wa ˈyize a gwälɩzlɩ a ˈwʋbhlizlɩ a gbʋ ˈmö Biblë bhïlaa. (Genèse 40:20-22; Maakö 6:21, 22, 24-27) Tɛkädɔˈwʋ a Klɩtiɛwaa nɩ ˈbhli ˈwa gwälɩzlɩ ˈwʋ. Ɛˈɛ -bhö nyɩasɛ, maa -mä bhlaˈmö a ˈfʋ a lagɔgligbïï ˈmö -mä gwälɩzlɩ a ˈwʋbhlizlɩ -nyɛ ɛ päpägböö ˈsɔ ˈbhöönɩɛ. ˈYlʋba a zila ˈwuë ˈmö, -tiamö a Klɩtiɛwaa li ˈmäna, wa ˈnyɛnyɛnɩ -lii.
5. -Wa yɛɛ ˈku ˈwë a nganɔ: Nɩkpa -wa yɛɛ ˈku ˈwë ˈnɩɛ bhɛnɩ wa -kanyɩ -lu nʋ ˈlɩlɩlɩ, ˈn waˈaaˈɛ -lu yi ˈlɩlɩlɩ. -Aaa bhɛnɩ -a kʋä kwänɩ, ˈn waˈaaˈɛ bhɛnɩ wa -kanyɩ -lizoku ˈwlu nʋ. (Psaume 146:4; Ecclésiaste 9:5, 10) ˈNyɛpɛnyɛpɛnyɔ ˈku ɔ kuë, zaa nɩkpɛ -kä ˈku ˈwë, ɔˈɔɔˈa käbödɛ -bhölɩnɩ. (Ezékiel 18:4) Maa zuzukuzoku mɩɩ yiiɛ nɩkpa ˈa -muë yɛ ˈkuä a sa. Nza nɩkpa ˈa päpägböö ˈwuë -yɩ kää -wa yɛɛ ˈku ˈwë a nganɔ gwë, ˈn wa bhïlanɩɛ -gäzɛ ˈwlu ˈmö, -sɩbhä a -lii ˈwuë ˈnɩɛ nɛnɩ.—Isaïe 8:19.
6. Klʋwaa: Zezwii ˈnɩɛ klʋwaa ˈklʋ ˈkunɩ. Maa -lɛ su kïbhë -bhlʋ klʋ, -lɩbhä ɔ ˈkunɩɛ. -Mä Glɛkö gbʋ ˈmö a kïbhëa wa -sɛ zɛmö wa Laa “klʋwaa” -mä Biblë a -bɛ ˈmö, sɛˈɛ a sɛɛ zɛmö nɩɩ, su kïbhë -bhlʋ. -Mä bhlaˈmö a ˈfʋ a lagɔgligbïï ˈmö -mä klʋwaa ˈbhöönɩɛ. Bhlaˈmö a Klɩtiɛwaa nɩ -sumö klʋwaa, za wa naˈɛ bʋbɔmö. Yɩ ˈwuë ˈmö ˈa dɔˈwʋ, yɩ nɛnɩ bhä -a ˈkä klʋwaa Lagɔ bʋbɔnɩ -a?—Deutéronome 7:26; 1 Kɔlɛɛtɩ a -nʋa 10:14.
7. Dlɩwʋkälii -nyɛ päpägböö ˈsɔ a yi ˈtatinɩ dɔˈwʋ, yɩ yi ˈmö ˈtɛɛ. A -lowluwa -nyɛ a ˈbhɩa ˈsɔ sɛ wa kää tɛlɩ wa kanyɩ -mä ˈsunɩ, nzɩ a tiˈa kɛˈmö -sɛ. Maa Lagɔ -nyɛ nɩkpa ˈsɔ a dɔˈwʋ, -a ˈkä Lagɔ dlɩ yɔwʋ nɛnɩmanɩ mii kä dɛsɛ.—Proverbes 29:25; Matie 10:36, 37.
[ˈFoto yɔwʋ ˈa wɛlɩkïbhëa, kpʋ 22]
Lagɔ ˈnɩɛ ta mö -wʋ.
[ˈFoto yɔwʋ ˈa wɛlɩkïbhëa, kpʋ 23]
Nowɛlɩ, Paakö -nyɛ Zavie ˈsɔ, -mä bhlaˈmö a ˈfʋ a lagɔgligbïï ˈmö yɩ ˈbhöönɩɛ.
[ˈFoto yɔwʋ ˈa wɛlɩkïbhëa, kpʋ 23]
-Aaa -kä -a ˈkä -wa yɛɛ ˈku ˈwë a nganɔ ku ˈmö -kä, nzɩ -a ˈkʋäˈɛ bʋbɔ.