ˈCƖƐCƖƐKÏBHË 18
ˈSaa wa yɩbhlɩnɩ ɔ ˗tiamö a Klɩtɩɛwaa ˈmö ˈnɩ?
Nɩkpa a miniɲwii lɛ nɩɩ Klɩtɩɛwaa wa glɩnɩɛ. Maa ˈwa ˗lii wa kää dlɩ ˈwʋ ˈnɩɛ ˗bhʋlʋ glɩnɩ, ˈn ˈwa ˈpäpägböö ˈnɩɛˈɛ ˗bhʋlʋ glɩnɩ. Zaa, sɛɛ ˗a ˈkä ɔ ˗tiamö a Klɩtɩɛwaa yɩbhlɩnɩ ˈnɩ?
1. ˈSaa wa la bhä Klɩtɩɛyi ˈnɩ?
Wa ˗kä Klɩtɩɛwa nʋʋ, ˗wa glɩnɩɛ Zezwii Klii ˈa ˈwʋ˗bhlinɩwaa ˈmö wa laa ˗sɩbhä. (Zɛlɩ Nʋnʋlii 11:26 ˈmö.) Zaa, sɛɛ Klɩtɩɛwaa ˈkä ɔ tula nɩɩ Zezwii a ˈwʋ˗bhlinɩwaa wa glɩnɩɛ ˗tiamö ˈnɩ? Zezwii lɛ nɩɩ: “ˈNa wɛlɩɩ n ˈɲaɲɩɛ, sɛɛ yɩ gbää, a ˗kä ˗sɩbhä nɛmöö, a yi ˗tiamö na ˗nʋä glɩnɩ.” (Zaa 8:31) Mii sɛɛ zɛmö nɩɩ, ˗tiamö a Klɩtɩɛwaa kä wa ˈkä ˈsaa Zezwii ˈcɩa a˗a ˈklʋkpamö ˈzʋ. Zezwii ˈa ˈcɩawɛlɩɩ ˈwuë, Lagɔ ˈa wɛlɩɩ ˈmö yɩ ˗glɛ a˗a ˈwʋ. Zaa, ˗tiamö a Klɩtɩɛwaa ˈa ˈsaa wa ˈtɛɛnɩɛ dlɩ kä yɩ ˈkä Biblë ˈwʋ ˗glɛ.—Zɛlɩ Lwiikö 24:27 ˈmö.
2. Sɛɛ ˗tiamö a Klɩtɩɛwaa tula ɔ nɩɩ wa ˗wawanɩ ˈnɩ?
Sɛˈɛ Zezwii ˈɲɛɛ ˈɔ ˈwʋ˗bhlinɩwaa ˈdɩ nɩɩ: “Sɛ n ˗waaɲɩɛ, a nɩ ˗wawanɩ ˗sɩbhä.” (Zaa 15:12) Sɛɛ Zezwii tula ɔ nɩɩ ɔ ˗wa a˗a ˈɔ ˈwʋ˗bhlinɩwaa ˈnɩ? Ɔ ˗ɲʋa ˈsɔ, wa ˗bhlinɩ a˗a ˈkwädlɩ ˈwʋ, ɔ pʋa a˗a swɩ ɲɛmʋ ˈmö ˈn ɔ kwänuë a˗a. ˈN ɔ yiˈɛ wa ˈwlumö ˈku. (1 Zaa 3:16) Saa ˗bhlʋ ˗kpɔ ˈla, ˗sɩbhä ˗tiamö a Klɩtɩɛwaa kää wa ˈkä tula nɩɩ wa ˗wawanɩ, ˗maa wa nɩ tɩ gla ˈklʋ ˗wanɩ. ˗Mä ˈwa nʋnʋlii ˈmö ˈn ˗mä ˈwa bhïlawɛlɩɩ ˈmö, wa kä wa ˈkä tula nɩɩ wa ˗wawanɩ ˗tiamö.
3. Libho a ˗mu ˗tiamö a Klɩtɩɛwaa nʋ ɔ ˈnɩ?
Zezwii ˈɲɛ a˗a ˈɔ ˈwʋ˗bhlinɩwaa libho. Ɔ lɛ nɩɩ: “A nɩ mö, ˈpɩwʋ mää Lagɔ ˈkämanɩɛ a ˈMänatɩtɩɩ, a ˈkɩ saa ˈwuë bia.” (Lwiikö 9:2) Tɛkäklɩtɩɛwaa, ˗mä ˈwa lagɔbïdi ˈmö a ˈyize ˗mä waˈaa Lagɔ ˈa wɛlɩɩ bianɩ, ˗maa wa biani a˗a nɩkpabhë a ˈyila ˈklʋ ,ˈn ˗mä ˈligbï ˈmö. (Zɛlɩ Nʋnʋlii 5:42; 17:17 ˈmö.) Zɩˈɛ, ˗sɩbhä ˗tiamö a Klɩtɩɛwaa biamöä saa ˈwuë Biblë ˈmö a gbëawɛlɩɩ, dɛɛ wa bhɛnɩɛ wa ˈkä nɩkpa ghlɩ. Sɛ wa kää nɩkpa a ˗wawʋ dlɩ zɛmö a za, nza wa libhïä ˈwa ˈtɛɲɩ ˗ɲɛ ˈwa ˈmötɛɛnɔɔ ˈsɔ ˈwʋ, ˈn wa ɲɛɛ ˈmänasɛ nɩkpa Biblë ˈmö a wɛlɩɩ ˗yɩ ˈtɛmanɩɛ dlɩ ˈwʋ, ˈn ˗yɩ pää swɩ ɲɛmʋ ˈmö.—Maakö 12:31.
ˈCƖƐ ˗LII ˗MIMII
Nɩkpa wa glɩnɩɛ ˗tiamö a Klɩtɩɛwaa, ˈn nɩkpa ˗waaa ˈzʋä Zezwii ˈa ˈcɩawɛlɩɩ ˈklʋkpamö, ˗waaa ˗gänɩɛ ˈɔ gbäpöö, sɛɛ ˗n ˈkʋaa yɩbhlɩnɩ, ˈyi ˈylɩmö.
4. Biblë ˈmö a gbëawɛlɩɩ ˈmö wa tɛlɩɛ sɛ
Tɛkäklɩtɩɛwaa ˗wa a˗a teɲii Lagɔ ˈa wɛlɩɩ.
Nɩkpa ˗mumuë ˗wa gbä Klɩtɩɛwaa wa glɩnɩ, Biblë ˈmö a gbëawɛlɩɩ ˈnɩɛ wa dɔˈwʋ dɛsɛ ˗kä. ˈZʋ ˗lɛ VIDEO, ˈn a nɩ yɩlɩ nimïyɩbhäkïbhë ˈlɛ yɔwʋ.
Lagɔgligbï ˗mimii ˗lɛ nɩɩ Zezwii a ˗nʋä yɩ glɩnɩ. Maa, ˗mä ˈwa nʋnʋlii ˈmö, nɩkpa ˗wa yɩbhää wa ˈkä Zezwii ˈa ˈcɩawɛlɩɩ ˗gänɩ, sɛ wa ˈkuanʋa ɔ swɩ yɔwʋ ˈnɩ?
Zezwii ˈcɩa a˗a Lagɔ ˈa gbëawɛlɩɩ nɩkpa ˈwuë. Zɛlɩ Zaa 18:37 ˈmö, ˈn a nɩ yɩlɩ nimïyɩbhäkïbhë ˈlɛ yɔwʋ:
Sɛɛ Zezwii gbää a dɔˈwʋ, sɛɛ ˗a ˈkä ɔ Klɩtɩɛwaa ‘˗wa ˗waa gbëawɛlɩɩ’ yɩbhlɩnɩ ˈnɩ?
5. Wa bia Biblë ˈmö a gbëawɛlɩɩ
Tɛkäklɩtɩɛwaa bia a˗a lagɔwɛlɩɩ ˈn.
Zezwii ˈkää ˗mä zlɩ ˈmö möä yii, ɔ ˈɲɛ ˈɔ nʋa libho. Libho ˈla, ˈmö wa nʋä ˗bhlɛ zɩˈɛ ˈyize. Zɛlɩ Matie 28:19, 20 ˈmö ˈn Nʋnʋlii 1:8 ˈmö, ˈn a nɩ yɩlɩ nimïyɩbhäkïbhë ˈlɛ yɔwʋ:
Dɛɛ lagɔwɛlɩbialibho ˈla ˈkä ɔ ghlɛ, ˈn ˗zlɩmɛ wʋ ˈkä ɔ ˈbhlenɩ ˈnɩ?
6. ˈSaa wa ˈcɩa ˈmö wa ˗gänɩɛ
Nɩkpɛ ˗bhlʋ wa laa Tɔmö, ˈsaa kä ɔ ˈŋlɩ ˈn ɔ kɩ ɔ dlɩ ˈwʋ nɩɩ ɔ yɛ ˗tiamö a lagɔgligbëa ghlɩ ˈnɩ? ˈZʋ ˗lɛ VIDEO, ˈn a nɩ yɩlɩ nimïyɩbhäkïbhï ˈlɛ yɔwʋ.
˗Mä video ˈlɛ ˈmö, ˈsaa ˈsunɩ a˗a ɔ ˗mä Tɔmö ˈn ɔ yi bhä ˈɔ lagɔgligbëa ˗gömö panɩ ˈnɩ?
˗Yɩ kä ɔ ˈŋlɩ ˈn ɔ kɩ ɔ dlɩ nɩɩ ɔ yɛ gbëawɛlɩɩ ghlɩ ˈnɩ?
˗Aˈa nʋnʋlii kää dɛsɛ yɩ ˈkä ˗aˈa ŋli a wɛlɩɩ ˈwʋ zi. Zɛlɩ Matie 7:21 ˈmö, ˈn a nɩ yɩlɩ nimïyɩbhäkïbhë ˈlɛ yɔwʋ:
Zezwii a dɔˈwʋ, ˗mä ˗aˈa bhïlawɛlɩɩ ˈmö ˗a ˗kä nɩɩ ˗a ˈtɛɛnɩ Lagɔ dlɩɩ, mii kä ɔ teɲii dɛsɛ ˈnɩɩ, ˗maa ˗a ˗kii ˗mä ˗aˈa nʋnʋlii ˈmö tula mii kä ɔ teɲii dɛsɛ ˗a?
7. ˗Wawanɩ wa ˗wawanɩɛ
Tɛkäklɩtɩɛwaa ˗wawanɩ a˗a teɲii.
Klɩtɩɛwaa ˗mumuë yɛ ɔ tɛkäsɛ ˈwa zɩkpaa dlɩ ˗sɛ wa lagɔdaayuë a za ˗a? ˈZʋ ˗lɛ VIDEO, ˈn a nɩ yɩlɩ nimïyɩbhäkïbhï ˈlɛ yɔwʋ.
˗Mä video ˈlɛ ˈmö, ˗yɩ kä ɔ ˈŋlɩ ˈn Lɔyɩdɩ ˗bhɩɔ a˗a bhä ˈmö ɔ ˈkä ˈɔ zɩkpaa dlɩ ˗sɛ, ˗daayu Jowanɩsɔnɩ a za ˈnɩ?
Zaa ˗na dɔˈwʋ, sɛ ɔ ˈzʋä tula ɔ nɩɩ ˗tiamö a Klɩtɩɛyi ɔ glɩnɩɛ ˗a?
Zɛlɩ Zaa 13:34, 35 ˈmö, ˈn a nɩ yɩlɩ nimïyɩbhäkïbhï ˈlɛ yɔwʋ:
Nɩkpaa ˗wa ˗lɛ ˗tiamö Zezwii ˈa ˈwʋ˗bhlinɩwaa (˗tiamö a Klɩtɩɛwaa), nɩkpaa wa ˗ɲɛ ˈnɩɛ ku ˈwʋ ˗gbɔ ˈn ˗waaa wa bhlɩɩ ˈmö a ˗nʋa glɩnɩɩ, sɛ wa libhuë ɔ ˈwʋ ˈnɩ?
Tʋ ˗kä bhlii, ˈsaa wa nʋ ɔ wa ˈbhɩa ˈwlu ˈnɩ?
NƖKPA ˗MUMUË LƐ NƖƖ: “Klɩtɩɛwaa yɛ ˗lizoku a ˗bɛ nʋ zaa, sɛ wa bhɛnɩ ɔ wa ˈkä ˗tiamö a lagɔgligbë glɩnɩ ˈnɩ?”
Sɛ wa ˈkää ˗tiamö a Klɩtɩɛwaa yɩbhlɩnɩ a dɔˈwʋ, Biblë a gbɛlʋ ˗mu ˗n bhɛnɩ ɔ ˗n ˈkä ˈmö zɛlɩ nzɩ ˗n ˈkɩ tula ˈnɩ?
DƐSƐKÄKÏBHÏ
˗Tiamö a Klɩtɩɛwaa, ˈsaa Biblë ˈcɩaa ˈmö wa ˗gänɩɛ. Wa ˗wawanɩ teɲii, wa bhɛnɩ aˈbhë wa ˈkä waɲɩ dlɩ ˗sɛ wa lagɔdaayuë a za, ˈn wa biaˈɛ Biblë ˈmö a gbëawɛlɩɩ.
ˈWʋligbanɩkïbhï
˗Tiamö a Klɩtɩɛwaa a ˈsaa wa kää dlɩ ˈwʋ, ˈsaa yɩ ˗glɛ ɔ ˈwʋ ˈnɩ?
˗Wʋwʋsaa a ke ˗ma wa yɩbhlɩnɩ ɔ ˗tiamö a Klɩtɩɛwaa ˈmö ˈnɩ?
Libho a ˗mu ˗tiamö a Klɩtɩɛwaa nʋ ɔ ˈnɩ?
YILII YƆWƲ
Lagɔgligbë ˗bhlʋ ˈmö a ˗nʋa ˗wa ˈtɛmanɩɛ ˈyli yɔwʋ wa ˈkä Zezwii ˈa gbäpöö ˗ɲɛ ˈɔ ˈcɩawɛlɩɩ ˈsɔ ˗gänɩ, ˈcɩɛ wa dɛ.
Sɛɛ bhlaˈmö a sɛlɩŋlɔ ˗bhlʋ ghlɩ ɔ “˗tiamö a lagɔdaayuëa” ˈnɩ?
˗Lizoku ˗kä wa lagɔdaayuë ghlɩ, sɛɛ ˗tiamö a Klɩtɩɛwaa kwänuëë, ˈyi ˗sɩbhä ˈylɩmö.
Sɛ wa ˈkä Zezwii ˈa ˈwʋ˗bhlinɩwaa yɩbhlɩnɩ, ɔ bhïlii. Zɩˈɛ, ˗tiamö a Klɩtɩɛwaa ˗ɲɛ tɛkäklɩtɩɛwaa ˈsɔ, sɛ wa tulaa nɩɩ Zezwii a ˗nʋa wa glɩnɩɛ, ˈyi ˈylɩmö.
« À quoi se reconnaît le christianisme authentique ? » (La Tour de Garde, 1er mars 2012)