Sɛɛ ˗a bia ɔ Lagɔ ˈa ˈtɩtɩ a ˗tɩtɩɩ ˈnɩ?

Zoova yiaˈa ˗pa ˈɔ ˈKämanɔɔ ˈmö ghlɛnɩ nzɩ ɔ ˈkä mäˈä ˈpɩwʋ a yɔlɔylʋ ˈwuë ˈyli bhɩa. Wɛlɩ ˈlɛ sɛ yɩ ˗bhöä teɲii ˈmäna ˈwʋ a za, ˗a yɩbhä ˗a ˈki nɩkpaa ˈwuë ˈɲɛ nzɩ wa ˈki yɩbhlɩnɩ. ˗Sɩbhä Zezwii yɩbhää nɩɩ ˈɔ ˈwʋ˗bhlinɩwaa nɩ ˈɲɛ Lagɔ ˈa ˈKämanɔɔ a wɛlɩɩ nɩkpaa ˈwuë. (Matie 28:19, 20) Sɛɛ Zoova ˈa Bhlɩnɩwaa zʋ ɔ Zezwii ˈa wɛlɩ ˈlɛ ˈklʋkpamö ˈnɩ?

1. Sɛɛ Matie 24:14 ˈmö a wɛlɩɩ ˈwlʋnɩ ɔ zɩˈɛ ˈyli ˈnɩ?

Zezwii nʋ a˗a nɩɩ, “˗mä bhlɩɩ a këtiea ˈwuë ˈwʋ Lagɔ a ˈtɩtɩ a ˗tɩtɩɩ, yɩ yi ˗mä ghlɛ.” (Matie 24:14) Zoova ˈa Bhlɩnɩwaa, ˈmänasɛ wa nʋmöä libho ˈla ˗wʋ kää dɛsɛ. Dʋdʋkpäta ˈwuë ˈwʋ, ˗a bianɩ ˗mä Lagɔ ˈa ˈtɩtɩ a ˗tɩtɩɩ gbɩ a 1000 ˈmö ˈn yɩ kä ˗gömö! Libho ˈla ˈnɩɛ muënɩ zaa, ˗a ˈkʋ nʋ a dɔˈwʋ, ˗a kä ˗a ˈkä ˈyli yɔwʋ ˈtɛmanɩ ˈn ˗a käˈɛ ˗a ˈkä ˈwlu ˗gïganɩ. Zoova ˗nɩɲɩ kwänɩ, ˗aaa bhɛnɩ ˗a ˈkä libho ˈla nʋ.

2. Sɛɛ ˗a ˈtɛmanɩ ɔ ˈyli yɔwʋ nzɩ ˗a ˈkä nɩkpa lagɔwɛlɩɩ ˈɲɛ ˈnɩ?

Bhlɩɩ a këtiea ˈwuë ˈwʋ, mää nɩkpa ˗wʋä ˗mä ˗a bianɩɛ lagɔwɛlɩɩ. Tɛkäklɩtɩɛwaa a saa, ˗mä “ˈligbïï ˈmö” ˗mä ˗a möä ˈn ˗a ɲɛɛ nɩkpa lagɔwɛlɩɩ. (Nʋnʋlii 5:42) Saˈa ˗sɩbhä ˗a zʋä ˈn ˗a ɲɛɛ nɩkpa a miniɲwɩ ˈylʋböö ˈwuë ˈmö lagɔwɛlɩɩ. Zlɩ ˗mɛmɛɛ ˈmö, ˗aa ghlɩnɩ ˗lɛ nɩkpaa ˈwa ˈligbïï ˈmö. Nza ˗a bhɛmöˈɛ nɩkpabhë a ˈyila ˈklʋ a lagɔwɛlɩbiabiu. ˈTɛɲɩ ˈwuë ˈmö, ˗a tɛlɩ ˈkwädlɩ sɛ ˗a ˈkä Zoova a ˗gömö a wɛlɩɩ ˈn ˈsaa ɔ ˈkää zɩkö ˈyli ˈwälanɩ a wɛlɩɩ nɩkpa ˈɲɛ.

3. ˗Wa kä ɔ wa ˈkä Lagɔ ˈa ˈtɩtɩ a ˗tɩtɩɩ bia ˈnɩ?

˗Tiamö a Klɩtɩɛwaa ˈwuë, wa kä wa ˈkä Lagɔ ˈa ˈtɩtɩ a ˗tɩtɩɩ nɩkpa ˈɲɛ. Libho ˈla ˗a ˈnuä yɔlʋ ˈwʋ plɛnɩ. ˈSaa ˈwuë ˗a bhɛnɩɛ mö ˗a nʋä ˈn ˗a ɲɛɛ nɩkpa lagɔwɛlɩɩ. Ɛˈɛ ˗bhö ɲɩasɛ, maa ˗a ˗yi sɛ nɩɩ yɩ bhɛnɩ yɩ ˈkä nɩkpa puë. (Zɛlɩ 1 Timotee 4:16 ˈmö.) Libho ˈla ˗a nʋä, wa ˗nɩɲɩɛ wʋ za ˈpɛnɩ. Biblë lɛ nɩɩ: “ˈMötɛɛnɔ ˈla n ˈɲaɲɩɛ, a ˗nɩɩɛ wʋ ˈwlumö ˈpɛnɩ zaa, a ˗kä libho ˈla nʋʋ, ˗bɛ nɩ taɲɩ ˈpɛnɩ.” (Matie 10:7, 8) Lagɔwɛlɩbiabiu ˗lɛ lagɔbʋbɔbʋbʋ a ke ˗mämaa, ˈn wʋ zʋˈɛ Zoova ˈmäna dlɩ zɛmö. Zaa, ˈn nɩkpɛ ˗nɩɲɩ ˈyukwli ˗pʋnɩ aˈbhë ˗kë, ˗a bia ˗abhlɩ ˈkwädlɩ lagɔwɛlɩɩ ˈyize.

ˈCƖƐ ˗LII ˗MIMII

4. Teɲii ˗a ˈtɛmanɩɛ ˈyli yɔwʋ ˗a ˈkä nɩkpaa a kii ˈwuë lagɔwɛlɩɩ ˈɲɛ

VIDEO: “˗Mä ˈyuku ˈyuku a ˗gwlɩ ˈmö a lagɔwɛlɩbiabiu” (7:33)

• Sɛɛ Zoova ˈa Bhlɩnɩwaa ˈtɛmanɩɛ ˈyli yɔwʋ ˗mä lagɔwɛlɩbiabiu ˈmö, ˈsaa yɩ nʋmö ɔ ˈwlu ˈnɩ?

Zɛlɩ Matie 22:39 ˈn Ghlɔɔmö a ˗nʋa 10:13-15 ˈmö, ˈn a nɩ yɩlɩ nimïyɩbhäkïbhï ˈlɛ yɔwʋ:

• Sɛɛ ˗aˈa lagɔwɛlɩbiabiu tula ɔ nɩɩ, ˗a ˗waa nɩkpaa ˈwuë ˈnɩ?

• ˗Wa bia Lagɔ ˈa ˈtɩtɩ a ˗tɩtɩɩ, sɛɛ Zoova yɩlʋa ɔ ˈwʋ ˈnɩ? —ˈYɩ gbɛlʋ 15 ˈylɩmö.

5. ˗A ˗ɲɛ Lagɔ ˈsɔ libhoo ˗a nʋnɩɛ ˈgämö

˗Lii a ˗bɛ tula nɩɩ, Zoova mɔ ˗gänɩɛ ˗aˈa lagɔwɛlɩbialibhoo ˈyuku. A yɩɛ, ˗mä Nuvɛlɩ Zelaadɩ, ˗aa lagɔdaayu ˗bhlʋ ˗ɔ paa Pɔɔlʋ, ɔ ˗wʋ ˈylɩkäsɛ ˈligbë ˈmö a lagɔwɛlɩbiabiu ˗bhɛ dɔˈwʋ, ˈn ɔ yiɛ ˈŋlɔ ˗bhlʋ ghlɩ. ˗Lɛ a zlɩ ˈla ˈmö, ˈzɛkpɔsaa, ˈŋlɔ ˈla ˗wʋä Lagɔ bhibhe dɔˈwʋ, Lagɔ ˈa ŋlɩɩ Zoova, ˈmö ɔ ˗dɩɛ ˈŋlɩ. ˗Mä ˈɔ bhibhebhibhiuu ˈmö, sɛˈɛ ɔ ˈɲɛɛ Lagɔ ˈdɩ nɩɩ, nɩkpɛ nɩ yi ɔ ˈkɔ ˈylɩmö. Pɔɔlʋ lɛ nɩɩ: “ˈGïle ta ˈplɩɛ, n yiɛ ŋlɔ ˈla ˈa ˗gbëlea gbɔtɔ.”

Zɛlɩ 1 Kolɛɛtɩ a ˗nʋa 3:9 ˈmö, ˈn a nɩ yɩlɩ nimïyɩbhäkïbhë ˈlɛ yɔwʋ:

• Nuvɛlɩ Zelaadɩ a lagɔdaayu ˈla a wɛlɩɩ a sɛ a ˗nɩ, sɛ yɩ tula ɔ nɩɩ, Zoova mɔ ˗gänɩɛ ˗tiamö lagɔwɛlɩbialibhoo ˈyuku ˈnɩ?

Zɛlɩ Nʋnʋlii 1:8 ˈmö, ˈn a nɩ yɩlɩ nimïyɩbhäkïbhë ˈlɛ yɔwʋ:

• ˗Mä lagɔwɛlɩbialibhoo ˈmö, ˗yɩ kä ɔ ˈŋlɩ ˈn ˗a kä ɔ ˗a ˈkä Zoova dlɩ ˈtɛɛnɩ nzɩ ɔ ˗kaɲɩ kwänɩ ˈnɩ?

˗N ˗yi a˗a bhä sɛ ˗a?

ˈDimasɩ a ylɩ ˗mɛmɛɛ ˈmö a ˈwluyɩbhäyɩbhʋ ˈwʋ, sɛɛ ˗a ˈkää lagɔwɛlɩɩ bia mö ˗a cɩɛɛ. ˗N yɛ ɔ tɛkäsɛ ˈwluyɩbhäyɩbhɩ ˈla ˈwʋ ˈmämö ˗a? Sɛ wa ˈcɩaɲɩɛ ˗mä, sɛɛ ˗n pä ɔ yɩ dɔˈwʋ dlɩ ˈnɩ?

6. Sɛɛ Lagɔ gbää ˗a nɩ bia ˈɔ wɛlɩɩ ˗sɩbhä ˗a zʋä ˈklʋkpamö

Tɛkäklɩtɩɛwaa a ˈtɛɲɩ ˈmö Zezwii ˈa ˈwʋ˗bhlinɩwaa, ˈwa ˗gblɩwaa yɩbhä a˗a wa ˈkä ˈwa lagɔwɛlɩbialibhoo ˈnigba. Tɛkäklɩtɩɛwaa, wa gwɩ a˗a ˈwa lagɔwɛlɩbialibhoo ˈwʋ. Wa tula a˗a ˗lɛ nɩkpabhë a ˈyila ˈklʋ nɩɩ, “Lagɔ ˈa ˈtɩtɩ a ˗tɩtɩɩ, ˗tiawɛlɩɩ yɩ glɩnɩɛ.” (Filiipö 1:7) ˗Sɩbhä Zoova ˈa Bhlɩnɩwaa ˈzʋmöä zɩˈɛ.a

VIDEO: ˗Wa yɛ Lagɔ ˈa ˈtɩtɩ a ˗tɩtɩɩ nimï plɛ ˗lɛ ˗zijlituwaa ˈyila ˈklʋ (2:28)

Zɛlɩ Nʋnʋlii 5:27-42 ˈmö, ˈn a nɩ yɩlɩ nimïyɩbhäkïbhë ˈlɛ yɔwʋ:

• ˗Yɩ kä ɔ ˈŋlɩ ˈn ˗a ˈnɩ ˗sɛ ɔ ˗aˈa lagɔwɛlɩbialibhoo kɛˈmö ˈnɩ?—Yɩlɩ ˗mä gbɛlɩ 29, 38, ˈn 39 ˈmö.

DƐSƐKÄKÏBHÏ

Zezwii lɛ nɩɩ, ˈɔ ˈwʋ˗bhlinɩwaa nɩ bia Lagɔ ˈa ˈtɩtɩ a ˗tɩtɩɩ ˗mä ˗gwlɩ ˈwuë ˗gömö. Zoova mɔɔ kwänɩɛ ˈɔ bʋbɔbʋbɔwaa ˈn wa nʋä libho ˈla.

ˈWʋligbanɩkïbhï

• Sɛɛ Zoova a ˗nʋa bia ɔ Lagɔ ˈa ˈtɩtɩ a ˗tɩtɩɩ ˗mä bhlɩɩ ˈwuë ˗gömö ˈnɩ?

• Sɛɛ ˗aˈa lagɔwɛlɩbiabiu tula ɔ nɩɩ ˗a ˗waa nɩkpaa ˈwuë ˈnɩ?

• ˗Na dɔˈwʋ, lagɔwɛlɩbiabiu bhɛnɩ bhä wʋ ˈkä nɩkpɛ ˈmäna dlɩ zɛmö ˈzʋ ˗a? ˗Yɩ kä ɔ ˈŋlɩ ˈnɩ?

YILII YƆWƲ

Sɛɛ Zoova a Bhlɩnɩwaa biaa lagɔwɛlɩɩ ˗mä ˗gwlɩ ˈkädɩ ˈmö, yi ˈylɩmö.

Nɩkpabhë a ˈyila ˈklʋ a lagɔwɛlɩbiabiu ˗mä Palii a ˗glɔ ˈmö (5:11)

Sɛɛ Zoova a Bhlɩnɩwaa ˈtɛmanɩ ɔ ˈyli yɔwʋ ˈn wa kwänɩ ɔ ˗wa möä ˗guä ˈnɩ?

˗Wa möä ˗guä a glaˈmö a ˗nʋa ˗wa ˗pʋnɩɛ ˈyukwli, wa ˗wʋä lagɔwɛlɩɩ ˈɲɛ dɔˈwʋ (5:59)

˗Aa lagɔdaayu ˗bhlʋ ˈkwädlɩ a lagɔlibhoo nɛnɩ a˗a dlɩ yɔwʋ, ˗a nɩ ˗pʋnɔ ˈyukwli ɔ ˈkä ˈmö ˗sɛnɩ.

Lagɔlibhoo n ˗sɛ ˗lɛ a za na ˈwuë ˈmäna (6:29)

˗Aa lagɔdaayuë ˈplɩɛ ˈwlu ˗mä ˗zijlituwaa ˈyila ˈklʋ, sɛ yɩ kää ˈŋlɩ ˈn lagɔwɛlɩbialibhoo yiɛ ˈyukusɛ mö, ˈyi ˈylɩmö.

« Les prédicateurs se défendent devant les tribunaux » (Le Royaume de Dieu en action !, chapitre 13)