Lagɔwɛlɩbiabiʋ a ˈwluyɩbhäyɩbhʋ -wʋ -nʋɲɩɛ -li a -lii ˈwlu
1. -A -kä lagɔwɛlɩ biaa möä yi, ˈsaa kä ɔ ˈŋlɩ ˈn -a yɩbhä ɔ ˈwlu ˈnɩ?
1 ˈYlɩ -bhlʋ ˈmö Zezwii -ɲɛ ˈɔ ˈwʋ-bhlinɩwaa 70 ˈsɔ ˈwlu wa ˈyɩbhää ˈwë ˈn wa yiɛ lagɔwɛlɩ biaa mö. (Lwiikö 10:1-11) Ɔ ˈkʋä swɩ ɲɛmʋ ˈmö ˈpä a za ˈn ɔ yuëë ligba nɩɩ, waˈa-a -bhlʋ -bhli ˈn Zoova -ɔ -lɛ “ˈLagblɛlowli,” ɔ -wuëˈɛ -gömö. Sɛ wa ˈkää libho nʋ ˈn ɔ yuë -sɩbhä sʋlʋnɩ, ˈn ɔ yuë “ˈsɔ ˈsɔ ˈsɔ” tie. Sɛ -bhlʋ -kpɔ ˈla -sɩbhä zɩˈɛ, -aˈa lagɔwɛlɩbiabiʋ a ˈwluyɩhhäyɩbhʋ—paɲɩɛ swɩ ɲɛmʋ ˈmö ˈn wʋ sʋlʋnɩɲɩɛ sɛ -a ˈkää sasɛ lagɔwɛlɩ bia ˈn sɛ -a ˈkää ˈwlugïganɩ.
2. Minitia -zɩmö lagɔwɛlɩbiabhiʋ a ˈwluyɩbhäyɩbhʋ kä ɔ wʋ ˈkä -sɛ ˈnɩ?
2 Zɩˈɛ, minitia 10 ɛ käˈɛ minitia 15 lagɔwɛlɩbiabiʋ a ˈwluyɩbhäyɩbhʋ sɛɛ. Minitia ˈla ˈmö, wa gïganɩ -zɩkpö ˈwlu, wa ˈdlɩnɩ ˈpɩɩ -yɩɲɩ ˈmö wa ˈkää lagɔwɛlɩ biaa mö ˈn wa bhibhee. Maa yɩ ˈnaa ˈkäa -sɩbhä -wʋ. Tɛɛnɩ Avlilɩ a ˈcʋ ˈmö, lagɔwɛlɩbiabiʋ a ˈwluyɩbhäyɩbhʋ ˈnaa ˈkäa minitia ngbï ɛ ˈkäˈɛ minitia ngbiˈsɔ yɛˈmö bhlɩ. ˈN wa -kä lagɔzɩkpa a ˈwluyɩbhäyɩbhʋ zɛmö bhɩɛ ˈwë, wa -kä lagɔwɛlɩ biaa möä yi, lagɔwɛlɩbiabiʋ a ˈwluyɩbhäyɩbhʋ ˈnɩˈa bhɛnɩ wʋ ˈkä minitia ˈla ˈwʋ ghlɛ. Ɛˈɛ -bhö ɲɩasɛ, maa -sɩkaa wa ˈbhöä lagɔwɛlɩ ˈyukwli -pʋnɩɛ. ˈN lagɔwɛlɩbiabiʋ a ˈwluyɩbhäyɩbhʋ ˈnɩ ˈmö ˈbhʋɔ, -wa ˈkää lagɔwɛlɩ bia ˈmö, yi -mä ˈtɛɲɩ a -bɛ -sɛ. Ɛˈɛ -bhö daˈa yɩ ˈwuë mɩ, maa ˈyiosɛwa ɛ -käˈɛ lagɔwɛlɩbiawaa, -wa tɛɛ lagɔwɛlɩbiabiʋ ˈwë, ˈn wa yiɛ -lɛ lagɔwɛlɩbiabiʋ a ˈwluyɩbhäda yii, ˈtikïyie ˈwʋ a ˈyize wa ˈkää ˈmö ˈlɩbhänɩ.
3. Sɛɛ lagɔwɛlɩbiabiʋ a ˈwluyɩbhäyɩbhʋ kä ɔ ˈwʋ ˈkä ˈwlugïganɔɔ nzɩ wʋ ˈkä lagɔwɛlɩbiawa sasɛ kwänɩ ˈnɩ?
3 Sɛɛ lagɔwɛlɩbiabiʋ a ˈwluyɩbhäyɩbhʋ ˈkää lagɔwɛlɩbiawa kwänɩ, wʋ nɩ nuo -sɩbhä. Lagɔzɩkpö -mimii ˈmö, lagɔwɛlɩbiazɩkpö ˈnɩɛ da -bhlʋ -kpɔ ˈwluyɩbhänɩ, -bhʋlʋbhlʋ yɩ yɩbhää ˈwlu. -Sɩbhä lagɔzɩkpö ˈla ŋwaa ˈwʋ. -Sɩbhä a za, lagɔwɛlɩbiabiʋ a ˈwluyɩbhäda -ɲɛ dɛɛ wa ˈkää lagɔwɛlɩ bianɩɛ mö ˈsɔ ˈnaa ˈkäa dɛ ˈtlʋnɩ. Lagɔwɛlɩbiawa bhɛnɩ wa ˈkä ˈwʋpäpanɩsɛ ˈwlugïganɔɔ. Yɩ yiɛ ˈŋlɩ -kä, lagɔwɛlɩbiazɩkpa a ˈwʋdɩdɩɲɔ yi lagɔwɛlɩbiawa sasɛ ˈyli zʋnɩ. ˈYukugänɩwa a -zɩkpa kä a ˈkä ˈsaa ˈkää -mä wa bɛyɩ a dɔˈwʋ nɛnɩ ˈylɩmö. Lagɔwɛlɩbiawa ˈwuë kä wa ˈkä dɛ wa ˈkää lagɔwɛlɩbiaa mö ˈn -mɔ wa -ɲɛ ˈkää ˈwʋ-bhlinɩ -yi ˈwë, ˈn bhibhebhibhiʋ ˈkäa gbëbhlenɩ.
4. Sɛɛ lagɔzɩkpa ˈmö a ˈwluyɩbhäyɩbhɩ -miˈla kää dɛsɛ, ˈsaa kä ɔ ˈŋlɩ ˈn lagɔwɛlɩbiabiʋ a ˈwluyɩbhäyɩbhʋ kämöˈɛ wʋbhlɩ -sɩbhä dɛsɛ ˈnɩ?
4 Sɛɛ lagɔzɩkpa ˈmö a ˈwluyɩbhäyɩbhɩ -miˈla kää dɛsɛ -sɩbhä lagɔwɛlɩbiabiʋ a ˈwluyɩbhäyɩbhʋ kämöˈɛ dɛsɛ: Ɛˈɛ -bhö ɲɩasɛ, maa wʋ ˈkä -wa ˈkää lagɔwɛlɩ biaa mö kwänɩ a za wa nʋä . Lagɔzɩkpa ˈmö a -nʋa ˈwuë ˈnɩɛ -kä wa ˈkä ˈwluyɩbhäyɩbhʋ ˈla ˈwʋ yi. Maa mii ˈnɩɛ zɛmö sɛ nɩɩ, ˈwluyɩbhäyɩbhɩ -miˈla mii kää dɛsɛ mii ziɛ lagɔwɛlɩbiabiʋ a ˈwluyɩbhäyɩbhʋ ˈwʋ. -Aˈa ˈwluyɩbhäyɩbhɩ -miˈla ˈwuë a saa -sɩbhä Zoova ˈgïlaa lagɔwɛlɩbiabiʋ a ˈwluyɩbhäyɩbhʋ sɛ nzɩ wʋ -kaɲɩ kwänɩ -a ˈkä ˈdɩ ˈmö ˈzʋzʋnɩ, -a ˈkä -wawanɩ ˈyize, -li a -lii a nʋnʋ dɔˈwʋ -a ˈkä ˈyli yɔwʋ ˈtɛɛ. (Eb. 10:24, 25) -Sɩbhä a za -ɔ ˈkää ˈwluyɩbhäyɩbhʋ -su kä ɔ ˈkä ɔɲɩ ˈwlugïganɩ sasɛ nzɩ wɛlɩ ˈwuë ɔ ˈkää bhïla ˈkä Zoova ˈa ˈŋlɩ ˈghlimanɩ ˈn yi ˈkä -wa yɩbhää ˈwlu -li a -lii ˈwlu nʋ. -Lii kä yɩ ˈkä -sɩbhä -wʋ, maa lagɔwɛlɩbiawa ˈwuë -wa ˈkää lagɔwɛlɩ biaa mö, kä wa ˈkä ˈyli yɔwʋ ˈtɛmanɩ nzɩ wa ˈkä ˈwluyɩbhäyɩbhʋ ˈla ˈwʋ yi.
5. (a) -Ɔ -suä -mä -zɩkpa ˈmö a lagɔwɛlɩbia libho, ˈsaa ɔ kä bhä ɔ ˈkä nʋ lagɔwɛlɩbiabiʋ a ˈwluyɩbhäyɩbhʋ a dɔˈwʋ ˈnɩ? (b) ˈSaa ˈkä ɔ ˈŋlɩ -kä ˈn lagɔdaayu ŋlʋyu ˈkä ɔ lagɔwɛlɩbiabiʋ a ˈwluyɩbhäyɩbhʋ -su ˈnɩ?
5 -Ɔ ˈKää ˈwluyɩbhäyɩbhʋ -su, sɛ ɔ kää ɔɲɩ ˈwlugïganɩ: Ɔ ˈkäa ɔɲɩ sasɛ ˈwlugïganɩ a za, -ɔ ˈkää ˈwluyɩbhäyɩbhʋ -su, wa nɩ ˈɲɔ -pa ˈdɩ. Sɛ -bhlʋ -kpɔ ˈla -sɩbhä wa kä wa ˈkä ˈzʋ lagɔwɛlɩbiabiʋ a ˈwluyɩbhäyɩbhʋ a dɔˈwʋ. Lagɔwɛlɩbiazɩkpö -kä -bhʋlʋbhlʋ ˈyɩ dɛ ˈwluyɩbhää, -zɩkpa ˈla a ˈwʋdɩdɩwaa ɛ ˈkäˈɛ ˈwa ˈyliwʋwaa, mʋa -suä ˈwluyɩbhäyɩbhʋ. ˈN lagɔwɛlɩbiazɩkpö -kä dɛ -bhlʋ ˈwluyɩbhää, -ɔ -suä -mä -zɩkpa ˈmö a lagɔwɛlɩbia libhoo bhɛnɩ ɔ ˈkä lagɔdaayu -mɔmɔ -lɛ -sɛ -ɔ ˈkä ˈwluyɩbhäyɩbhʋ ˈla -su. -Mumuë -wa -suä lagɔzɩkpa ˈmö a lagɔwɛlɩbia libhoo, lagɔwɛlɩbiazɩkpö a ˈwʋdɩdɩwaa ˈmö wa ˈɲɛɛ -bhʋlʋbhlʋ ˈylɩdɩdɩɛ ˈn wa mɩanɩɛ -mumu -mä Lagɔ ˈa ˈKämanɔɔ a -budu ˈmö a tabhlo ˈklʋ. -Ɔ -suä lagɔwɛlɩbiabiʋ kä ɔ ˈkä nɩkpa -wa -yiɛ ˈcɩasɛ ˈn wa -yiˈɛ -lii ˈwlugïganɩsɛ, -lɛ -sɛ. Ɛˈɛ -bhö ɲɩasɛ, maa -lɛ a dɔˈwʋ yɩ yi ˈklʋkpamö -kä. ˈN zlɩ -mɛmɛ ˈmö ˈyukugänɩɲɔ nɩ -lɛ wʋ, ˈn ˈɔ ˈyliwʋɲɔ ˈnɩˈɛ -lɛ wʋ, ˈn lagɔdaayu -ɔ badizee -ɔɔɔ gbʋ yɔwʋ -kä ˈnɩ -lɛ wʋ, -ɔ -suä lagɔwɛlɩbiabiʋ a libho bhɛnɩ ɔ ˈkä lagɔdaayu ŋlʋyu -ɔ yɛɛ -mä lagɔwɛlɩ ˈmö -jɩbhɛnɩ ˈdɩ ˈɲɛ nzɩ ɔ ˈkä -lɛ a ˈwluyɩbhäyɩbhʋ ˈla -su.—ˈYɩ kïbhëa ˈylɩmö -a nʋä “ˈN lagɔdaayu ŋlʋyu -kä lagɔwɛlɩbiabiʋ a ˈwluyɩbhäyɩbhʋ -suä yi.”
6. ˈSaa kä ɔ ˈŋlɩ ˈn wa -sɛɛ -lɛ ɔ ˈkä lagɔwɛlɩbiabiʋ a ˈwluyɩbhäyɩbhʋ -su kä bhä ɔ ˈkä sasɛ ɔɲɩ ˈwlugïganɩ ˈnɩ?
6 -Mä -aˈa lagɔlibho a -suku ˈmö ˈn -aˈa lagɔlibho a ˈwluyɩbhäyɩbhʋ ˈmö, wa -kaɲɩ libho ˈɲɛɛ, ˈyli -a zʋnuë ˈn -a gïganɩɛ sasɛ -aaɲɩ ˈwlu. -Aa glaˈmö a nɩkpa -mumuë wa ˈɲɛɛ -sɩbhä a libho wabhlɩ, wa -kä ˈwluyɩbhäyɩbhʋ ˈwʋ mö dɔˈwʋ -wʋ, lɩbhä wa ˈpäa ˈsaa wa ˈkä ˈmö -sɛnɩ dlɩ ˈwʋ. -Ɔ ˈkää lagɔwɛlɩbiabiʋ a ˈwluyɩbhäyɩbhʋ -su, kä ɔ ˈkä sasɛ ɔɲɩ ˈwlugïganɩmö. -Sɩkaa a dɔˈwʋ, ˈwluyɩbhäyɩbhʋ ˈnɩa ˈmö ˈbhʋɔ za, -wa ˈkʋä -suu kä wa ˈkä sasɛ waɲɩ ˈwlugïganɩ. -Lɛ a dɔˈwʋ, wʋ bhɛnɩ wʋ ˈkä nɩkpa kwänɩ ˈn wʋ ˈnaa ˈkäˈɛ ˈwʋ ˈgïle yɛˈmö bhlɩ. Ɔ ˈkäˈɛ sasɛ ɔɲɩ ˈwlugïganɩ mɩɛ nɩɩ, ˈpɩɩ -yiɲɩ ˈmö wa ˈkää lagɔwɛlɩbiaa ˈmö ɔ -yii ˈkɩ.
7. -Lii -mi a gbʋ -ɔ -suä lagɔwɛlɩ a ˈwluyɩbhäyɩbhʋ bhɛnɩ bhä ɔ ˈkä bhïla ˈnɩ?
7 -Yiɲɩ gbʋ wa ˈkää bhïla: ˈPɩɩ -yiɲɩ ˈyli wa bianɩɛ lagɔwɛlɩ ˈnɩɛ ˈwlʋnɩ za, -mi wa ˈkää -lɛ lagɔwɛlɩbiabiʋ a ˈwluyɩbhäyɩbhʋ ˈwʋ bhïlaa, sasɛ libhonʋɲɔ -ɔ ˈnɛɛ’ ˈnɩɛ -dɩ. Ylɩ -mä zɩple ˈmö, kïbhëa a nʋä “-Mä -aa lagɔwɛlɩbiabiʋ a ˈwluyɩbhäyɩbhʋ ˈwʋ a -li -yɩɲɩ gbʋ -n bhɛnɩɛ -n ˈkä bhïlaa” bhɛnɩ yɩ -kaˈmö kwänɩ. ˈLɩlɩlɩ a dɔˈwʋ lagɔwɛlɩbiabiʋ a ˈwluyɩbhäyɩbhʋ, kä nimïyɩbhäkïbhï -ɲɛ yɩ zɛmösɛna ˈsɔ ˈmö. Zlɩ -mɛmɛ ˈmö lagɔwɛlɩbiawa bhɛnɩ wa ˈkä sasɛ waɲɩ ˈwlugïganɩ nzɩ wa ˈkä ˈylimötulanɩlu -bhɛ, wa bhɛnɩˈɛ wa ˈkä video -wʋ ˈbhöönɩɛ -mä jw.org ˈklʋ tula. ˈN -ɔ ˈkää lagɔwɛlɩbiabiʋ a ˈwluyɩbhäyɩbhʋ -su -kä ɔɲɩ ˈwlugïganɩ dɔˈwʋ -wʋʋ, -wa ˈkää -lɛ a zlɩ ˈla ˈmö lagɔwɛlɩ biaa möö, sɛ ɔ ˈkʋä swɩ ɲɛmʋ ˈmö ˈpää ˈn sɛ ɔ ˈkʋä sɛ wa bhɛnɩɛ wa ˈkä gbä sʋlʋnɩ, ɔ kä ɔ ˈkɩ dlɩ ˈwʋ ˈpä.
8. ˈDimasɩ a ˈylɩ gbʋplʋsɛ -ɲɛ ˈdimasɩ ˈmö ˈsɔ, -mä lagɔwɛlɩbiabiʋ a ˈwluyɩbhäyɩbhʋ ˈwʋ, -li -mii a gbʋ wa bhɛnɩ ɔ wa ˈkä bhila ˈnɩ?
8 ˈYlɩ gbʋplʋsɛ, lagɔwɛlɩbiawaa La Tour de Garde -ɲɛ Réveillez-vous ! ˈsɔ ˈmö wa biaa. -Wa biaa lagɔwɛlɩ ˈylɩ gbʋplʋsɛɛ, wa ˈnɩɛ ˈdimasɩ a ylɩ -miˈla ˈmö biamö. Zaa, ˈwa ˈligbë ˈmö a lagɔwɛlɩ a ˈcɩɛcɩʋ ˈmö, sɛ wa ˈkää peliodikïa bia a ˈsaa wa ˈyɩ a-a ˈylɩmöö, wa bhɛnɩ wa ˈkɩ ˈwʋ dlʋ. -Sɩbhä a za, -ɔ -suä lagɔwɛlɩbiabiʋ a ˈwluyɩbhäyɩbhʋ, sɛɛ -a -kä lagɔwɛlɩɩ ˈɲɛɛ yi a sɛ -a bhɛnɩɛ -a ˈkä gbä -yɩ ˈcɛlɩɛ -lɛ Lagɔ ˈa ˈKämanɔɔ a libho a kpʋ -gömö ɔ kä ɔ ˈkɩ ˈylɩmö nzɩ ɔ ˈkä -mä yɩ glaˈmö a -bhlʋ -sɛ. Dɛ a -wʋä a ˈtɩtɩ -mimii -ɲɛ ˈsaa ˈplɩɛ -mä ˈwʋʋ ˈsɔɔ, sɛ a ˈkiɛ ˈmö ghlɛnɩ a ˈkä peliodikïa biaa, a bhɛnɩ a ˈkɩ dlɩ kɛ ˈpänɩ, a bhɛnɩˈɛ a ˈkä gwlɛnɩzlɩ ˈmö ghlɛnɩ. Nɩkpɛ a ˈɲɛɛ peliodikïa , sɛ a ˈkää bhïla nzɩ ɔ kaɲɩ ˈwʋ ˈsɔnadɔˈwʋ ˈyukwli -pʋnɩɩ, a bhɛnɩ a ˈkä -sɩbhä sɛtɛlɩ. Peliodikïa a ˈkää bia, -wa kiɛ tɛkäsɛ nɩkpa ˈɲɛɛ, -ɔ -suä lagɔwɛlɩbiabiʋ a ˈwluyɩbhäyɩbhʋ bhɛnɩ ɔ ˈkuë nimï ˈyɩbhä sɛ wa zʋä. ˈN ɔ bhɛnɩˈɛ ɔ ˈkʋä nimï ˈyɩbhä wa ˈɲɛɛ peliodikïa a ˈsaa ˈplɩɛ ˈwʋ a ˈtɩtɩ a -tɩtɩ wa ˈkɩ -sɛ. -Mä ˈcʋ ˈmö a lagɔbɔgwɩ -a ˈkää bia a dɔˈwʋ, -ɔ -suä lagɔwɛlɩbiabiʋ a ˈwluyɩbhäyɩbhʋ bhɛnɩ ɔ ˈkä ˈdimasɩ ˈmö sɛ -bhlʋ -kpɔ ˈla ˈzʋ. Lagɔbɔgwɩ wa ghlɛnɩɛ ˈmö ˈn wa ˈcɩaa nɩkpa Biblë, bloswi wa laa Lagɔ ˈa ˈtɩtɩ a -tɩtɩɩ! -ɲɛ -A -pʋnɩ Lagɔ ˈyukwli ˈsɔ ˈn lagɔbɔgʋʋ wa laa Qu’enseigne la Bible -a bhɛnɩ -a ˈˈkɩ zila ˈwuë ˈmö nɩkpa ˈɲɛ, zaa, sɛ wa ˈkää ˈbɔgwɩ ˈlɛ nɩkpa ˈɲɛɛ, -ɔ -suä lagɔwɛlɩbiabiʋ a ˈwluyɩbhäyɩbhʋ nɩ bhïla ˈtikïyie ˈwʋ yɩ gbʋ.
9. Lagɔwɛlɩbiabiʋ -wʋ -wʋä ˈwʋ dɛ a ˈtɛɲɩ ˈmö -li -mi a gbʋ a ˈkä ɔ bhïla ˈdimasɩ a ˈylɩ gbʋplʋsɛ -ɲɛ ˈdimasɩ ˈmö ˈsɔ ˈnɩ?
9 ˈN ɛ -kä lagɔwɛlɩbiabiʋ -wʋ -wʋä ˈwʋ dɛ a ˈtɛɲɩ möö, ˈylɩ gbʋplʋsɛ -ɲɛ ˈdimasɩ ˈmö ˈsɔ, sɛ wa ˈkää nɩkpawäzɩkpɩ -ɲɛ peliodikïa ˈn lagɔbɔgwɩ kpɩ ˈgamö ˈɲɛnɩ, -ɔ -suä lagɔwɛlɩbiabiʋ a ˈwluyɩbhäyɩbhʋ nɩ bhïla yɩ wɛlɩ. ˈN nɩkpɛ -kʋä sasɛ ˈyukwli -pʋnɩ a sɛ wa ˈkää ˈzʋʋ, ɔ bhɛnɩ ɔ ˈkäˈɛ yɩ wɛlɩ bhïlamö. Wa bhɛnɩˈɛ wa ˈkäˈɛ sɛ -mäma zʋ, mɩɛ nɩɩ, ˈwa ˈsaa wa ghlɩɛ -mä lagɔwɛlɩbiabiʋ -wʋ -wʋä ˈwʋ dɛ ˈmö, wa ˈkä yɩ ˈtɩtɩ ˈɲɛɲɛnɩ wa ˈkä ˈylimötulanɩ nɩɩ, -sɩbhä a lagɔwɛlɩbiabiʋ kä dɛsɛ.
10, 11. Lagɔwɛlɩbiabiʋ a ˈwluyɩbhäyɩbhʋ ˈkä sasɛ ˈwʋ ˈplɩ a dɔˈwʋ, ˈsaa kä ɔ ˈŋlɩ ˈn lagɔwɛlɩbiawa ˈkä waɲɩ ˈwlugïganɩ kä ɔ dɛsɛ ˈnɩ?
10 Sɛɛ lagɔwɛlɩbiawa ˈkää waɲɩ ˈwlugïganɩ: Lagɔwɛlɩbiawa käˈɛ ˈwa ˈsaa wa ˈkää nʋ nzɩ ˈwluyɩbhäyɩbhʋ ˈkä sasɛ ˈwʋ ˈplɩ. -Sɩbhä a za, wa kä wa ˈkä waɲɩ ˈwlugïganɩ lagɔwɛlɩ bia dɔˈwʋ, ɛ ˈkäˈɛ -mä ˈwa ˈligbë ˈmö a lagɔwɛlɩ a ˈcɩɛcɩʋ a da glɩnɩ. Mii ˈkää ˈŋlɩ -kä wa ˈkä -mumuë kwänɩ. Mɩˈɩɛ nɩɩ, wa ˈwuë wa kä wa ˈkä ˈwa peliodikïa -ɲɛ lagɔbɔgwɩ -mimii ˈsɔ kä ˈwë wa -kä ˈwluyɩbhäyɩbhʋ ˈwʋ yi, nzɩ wa ˈwuë wa ˈkä -pa -mä lagɔwɛlɩbia bɛyɩ mö, wa tɩa ˈfʋ ˈtɛɲɩ ˈlɩbhä.
11 Wa kä wa ˈkä waɲɩ ˈwlugïganɩ nzɩ wa ˈkä minitia nimï tɩ wa ˈkä -paa -mä ˈwluyɩbhäyɩbhʋ ˈwʋ ghlɛ. Mɩɛ abhlɩ, -mä ˈwluyɩbhäyɩbhɩ ˈwuë ˈwʋ, -a yɩbhä -a ˈkä -mä ghlɛ ˈwë yɩ ˈkä tɛɛ. Maa -a -kä lagɔwɛlɩbiabiʋ a ˈwluyɩbhäyɩbhʋ a ˈgïle ˈwʋ ˈmɩɛ, yɩɛ nɛnɩ ˈlɩlɩlɩ. ˈSaa kä ɔ ˈŋlɩ ˈnɩ? -Ɔ -suä lagɔwɛlɩbiabiʋ a ˈwluyɩbhäyɩbhʋ, -li a ˈki a -bɛ ɔ ˈpää ˈwʋ dlɩ ˈn ɔ gïganɩɛ -zɩkpa ˈwlu. ˈN lagɔwɛlɩbiawa ˈnɩ zuu, ɔ bhɛnɩ ɔ ˈkä nɩɩ, wa nɩ mö -mä ˈpɩɔ -wʋä ˈghlii ˈyli. ˈN ˈpɩɔ ˈwʋ -mä wa ˈkää lagɔwɛlɩ bia mö -kä dɛ ˈtlʋnɩ, -muë kää tobï ˈn -muë ˈnɩɛ tobï -kä, ɔ bhɛnɩ ɔ ˈkua yɔwʋ ˈzʋzʋnɩ. ˈPɩɔ ˈyli -mä wa ˈkää lagɔwɛlɩ bia mö, jɛzlʋwa -kä -mä zuu, ɔ bhɛnɩ ɔ ˈkä lagɔdaayu ɲɩbhɛlʋ -ɲɛ lagɔdaayu ŋlʋyu ˈsɔ yɔwʋ ˈzʋzʋnɩ. Ɔ bhɛnɩˈɛ ɔ ˈkä ɲɩbhɛlʋdaayuëa a -zɩkpö -ɲɛ ŋlʋdaayuëa a -zɩkpö ˈsɔ yɔwʋ ˈzʋzʋnɩ yi ˈkä ˈgamö lagɔwɛlɩ bianɩ. ˈN lagɔdaayuëa -waaˈa nɛmönɛmɛ bhɛnɩ, -mä ˈywi ˈwʋ ˈn -mä -bïdi ˈmö -maɲɩ plɛplʋ ˈnaa ˈkuë kɛ ˈmö tɛnɩ -mä ɔ nɩ zʋä. Lagɔwɛlɩbiawa -wa yɛɛ -mä lagɔwɛlɩɩ ˈmö -jɩbhɛnɩ -ɲɛ lilili ˈsɔ, ˈmö ɔ bhɛnɩˈɛ ɔ ˈkä yɔwʋ ˈzʋzʋnɩ. ˈN -mumuë -kä ˈtɛɲɩ ˈwʋ ˈmɩɛ, yɩ yi ˈŋlɩ -kä ɔ ˈkä -zɩkpa ˈwʋ ˈsɔ ˈwlugïganɩ. Zlɩ -mɛmɛ ˈmö, -lii -mimi yi ˈŋlɩ -kä -a ˈkä ˈgïle ˈwʋ ˈmɩɛ. Maa -a -kä ˈkwädlɩnɩ -sɩbhä ˈgïle ˈwʋ ˈmɩɛ ˈyize, -a nɩ ˈyɩbhä -aɲɩ nimï ˈn lagɔwɛlɩbiabiʋ a ˈwluyɩbhäyɩbhʋ mʋ nɩ -aa ˈyila ˈklʋ dɛsɛ kä ˈn -a ˈnɩɛ sasɛ -aɲɩ ˈwlugïganɩsɛ yi a za yɩ -kä -sɩbhä -wʋ.
12. -N -ɲɛ lagɔwɛlɩbiaɲɔ -mɔmɔ ˈsɔ -kä ˈkwädlɩ ˈmö ˈnʋnʋnɩ nzɩ a ˈkä ˈwʋ-bhlinɩɩ, ˈsaa -n kä ɔ -n ˈkä dlɩ ˈwʋ ˈpä ˈnɩ?
12 Lagɔwɛlɩbiawaa -wa yiɛ lagɔwɛlɩbiabiʋ a ˈwluyɩbhäyɩbhʋ ˈwʋ bhɛnɩ wa ˈkä ˈmö ˈnʋnʋnɩ wa ˈkä ˈwʋ-bhlinɩ a dɔˈwʋ ˈwë ˈn wa ˈkäa bhäla -lɛ ˈwluyɩbhädaa yi. -Lɛ ˈwluyɩbhädaa wa bhɛnɩˈɛ wa ˈkʋä -lɛ ˈwʋ-bhlinɩɲɔ ˈɲɛnɩ. ˈN -n -ɲɛ -mɔmɔ ˈsɔ -kä ˈkwädlɩ ˈmö ˈnʋnʋnɩ a ˈkä ˈwʋ-bhlinɩɩ, -nˈn-ä ɔ bhɛnɩ -n -ɲɛ käbö -nʋa -mumuë ˈsɔ ˈkä ˈwʋ-bhlinɩ -n ˈkʋä ˈylimötulanɩ nɩɩ, -n “-wamuë” -a? (2 Kɔ. 6:11-13) -Ɔ tɛɛ lilili ˈwʋ lagɔwɛlɩbiabiʋʋ, -nˈn-ä ɔ bhɛnɩ -n -ɲɔɔ ˈsɔ -a ˈkä ˈgamö lagɔwɛlɩ bianɩ nzɩ -n ˈkɔ kwänɩ ɔ ˈkä ˈyukusɛ mö -mä ˈɔ lagɔwɛlɩbia libho ˈmö -a? (1 Kɔ. 10:24; 1 Tim. 4:13, 15) -Pʋnɩ sasɛ ˈdɩmözʋwɛlɩ ˈwuë wa ˈɲɩamöä ˈyukwli ˈn ˈpɩɔ ˈyli -mä -n ˈkää lagɔwɛlɩ biaa mö a wɛlɩ kökä. -Ɔ -suä lagɔwɛlɩbiabiʋ a ˈwluyɩbhäyɩbhʋ -kä nɩkpa yɔwʋ ˈzʋzʋnɩ ˈwë, a nɩ tɩ a -ɲɛɛ ˈkää ˈwʋ-bhlinɩ ˈmö zigbanɩ ˈn a tɩˈɛ ˈtɛɲɩ ˈlɩbhä maa a nɩ mö cuu.
13. -Mä -aˈa lagɔwɛlɩbiabiʋ a ˈwluyɩbhäyɩbhʋ ˈwʋ, nɩkpa ˈwuë -kä sasɛ ˈwa libhi wa kää ˈyli ˈzʋnɩɩ, sɛ yɩ -kaɲɩɔ -li a -lii ˈwlu nʋ ˈnɩ?
13 Nɩkpa a 70 -kpɔ Zezwii gïganɩ a-a ˈwlu , wa ˈbhöä lagɔwɛlɩbia bɛyɩ “ wa ˈwuë ˈmäna ˈn ˈwa yiɛ yi.” (Lwiikö 10:17) -Tiasɛ a dɔˈwʋ, sɛɛ Zezwii -ɲɛ ˈɔ ˈwʋ-bhlinɩwa ˈsɔ ˈyɩbhää ˈwlu ˈwë ˈn wa yiɛ lagɔwɛlɩbiaa mö, mii kwänuëë ˈn wa yiɛ ˈyukusɛ mö -mä ˈwa lagɔwɛlɩbia libho ˈmö. Sɛ -bhlʋ -kpɔ ˈla -sɩbhä -aˈa zɩˈɛ a ˈlagɔwɛlɩbiabiʋ a ˈwluyɩbhäyɩbhʋ käˈɛ -aa -li a -lii ˈmö. -Mä -aˈa lagɔwɛlɩbiabiʋ a ˈwluyɩbhäyɩbhʋ ˈwʋ nɩkpa ˈwuë -kä sasɛ ˈwa libhi wa kää ˈyli ˈzʋnɩɩ, yɩ -yiɲɩ swɩ ɲɛmʋ ˈmö ˈpä, yi -yiɲɩ -li a -bɛ sʋlʋnɩ ˈn -a yiˈɛ sasɛ ˈwlugïganɩ. -Sɩbhä a dɔˈwʋ, “-mä ˈbhlɩɩ a këtiea ˈwuë ˈwʋ, Lagɔ a ˈtɩtɩ a -tɩtɩɩ, yɩ yi -mä ghlɛ.”—Mat. 24:14.
[Entrefilet, kpʋ 4]
Sɛɛ lagɔzɩkpa ˈmö a ˈwluyɩbhäyɩbhɩ -miˈla kää dɛsɛ -sɩbhä lagɔwɛlɩbiabiʋ a ˈwluyɩbhäyɩbhʋ kämöˈɛ dɛsɛ
[Entrefilet, kpʋ 5]
-Ɔ ˈkää lagɔwɛlɩbiabiʋ a ˈwluyɩbhäyɩbhʋ -su -kä ɔɲɩ ˈwlugïganɩ dɔˈwʋ -wʋʋ, -wa ˈkää -lɛ a zlɩ ˈla ˈmö lagɔwɛlɩ biaa möö, sɛ ɔ ˈkʋaa swɩ ɲɛmʋ ˈmö ˈpää ˈn sɛ ɔ ˈkʋaa sɛ wa bhɛnɩɛ wa ˈkä gbä sʋlʋnɩ, ˈmö ɔ kää ɔ ˈkä dlɩ ˈwʋ ˈpä
[Yɩ pɔ jijoˈwʋ, kpʋ 6]
ˈN lagɔdaayu ŋlʋyu -kä lagɔwɛlɩbiabiʋ a ˈwluyɩbhäyɩbhʋ -suä yi
Lagɔdaayu ŋlʋyu kä ɔ ˈkä ˈwlu gwanɩ nzɩ ɔ ˈkä sɛ glɩ nzɩ ɔ ˈkä lagɔwɛlɩbiabiʋ a ˈwluyɩbhäyɩbhʋʋ -su. Lagɔdaayu ɲɩbhɛlʋ ˈkäa -mä ˈwluyɩbhäyɩbhʋ ˈwʋ ˈmö -sɛnɩ, ˈmö ŋlʋdaayuu ˈla -ɲʋä ˈsɔ nɩ -sɛnɩ ˈmö. Nimïyɩbhäkïbhï -ɲɛ yɩ zɛmösɛna ˈsɔ ˈmö ɔ ˈkää ˈmö ghlɛnɩ nzɩ ɔ ˈkä ˈwluyɩbhäyɩbhʋʋ ˈla -su. Ɔˈɔɔ -kä ɔ ˈkä tula nɩɩ, ˈcɩa dɔˈwʋ ɔ -wuë. ˈN ɔ -kä lagɔdaa ŋlʋyu -mɔmɔ -ɔ badizee ˈdɩ ˈɲɛ nɩɩ, ɔ nɩ bhibhee, daayu ŋlʋyu ˈla käˈɛ ɔbhlɩ ɔ ˈkä ˈwlu gwanɩ. ˈLɩlɩlɩ a dɔˈwʋ ˈn ɲɩbhɛlʋdaayu -kä -lɛ ˈwʋ ghlɛnɩ, ŋlʋdaayuu ˈla kä ɔ ˈkɔ ˈwluyɩbhäyɩbhʋ yowʋ ˈɲɛ. -Ɔ -suä lagɔwɛlɩbia libbho -mä -zɩkpa ˈmö, ˈn -lii ˈkɔɔ ˈmö bhulo a sɛ ɔ ˈkää ˈzʋʋ, ɔ kä ɔ ˈkä -sɩbhä yɛka nzɩ yɩ tia bhäla -li a -bɛ ɲima. ˈN -lɛ ˈwluyɩbhäyɩbhʋʋ ˈwʋ, ɲɩbhɛlʋdaayu -ce, -ɔ kää -kamä ˈylʋbö ngbï -mʋäna, ɛ käˈɛ ˈylʋbö kʋgbäta a sɛ -ɔ badizee, ˈn ɔ -kä -lɛ -wʋmö, wa bhɛnɩ wa ˈkä ŋlʋdaayu -lɛ -sɛ nzɩ ɔ ˈkä ˈwluyɩbhäyɩbhʋ -su. Ɛˈɛ -bhö ɲɩasɛ, maa ˈyukugänɩwaa a dɔˈwʋ ɔˈɔɔ -bhlɛ sasɛ ˈyli yɔwʋ ˈtɛmanɩ. Zaa yɩ -kä -sɩbhä ˈmö -wʋ, -ɔ -suä lagɔwɛlɩbia libho kä ɔ ˈkʋa ˈdɩ ˈɲɛ nɩɩ, ŋlʋdaayu ˈla mɔɔ ˈkää ˈwluyɩbhäyɩbhʋ -su maa, ɲɩbhɛlʋdaayuu -ce ˈla mɔɔ ˈkää ɔbhlɩ bhibhee ˈn ˈyukugänɩwa ˈkii ˈwʋ ŋulu. ˈN -daayuɲɩbhɛlʋ -ɔ ˈklʋä ˈyli yɔwʋ ˈn -ɔ badizee -kä -lɛ -wʋ, maa ˈki ˈyukugänɩwa a ˈyize -yiɛ a za, ɔ ˈnɩ lɔɔ -kä ɔ ˈkä ˈwluyɩbhäyɩbhʋ -su, ɔ ˈkäˈɛ -zɩkpa a ˈwlumö bhibhee, ˈyukugänɩwa ˈnɩɛ -kä wa ˈkä ˈsaa kää ˈŋlɩ ˈn ɔˈɔɔ -sɩbhä a lɔɔ -kä -mä lagɔzɩkpa ˈmö a dɔˈwʋ ˈmö -sɛnɩ , maa wa bhɛnɩ wa ˈkä ŋlʋdaayuëa ˈdɩ ˈɲɛ wa ˈkä ˈwluyɩbhäyɩbhʋ -su cuu ˈn wa ˈkä bhibhee. Zila -yɩɲɩ ˈmö ŋlʋdaayuëa ˈkää ˈwluyɩbhäyɩbhʋ -suä yii, ˈyukugänɩwa kä wa ˈkä ɲɩbhɛlʋdaayu ˈla -sɩbhä ˈdɩ ˈɲɛ.
[Yɩ pɔ jijoˈwʋ, kpʋ 6]
-Mä -aˈa lagɔwɛlɩbiabiʋ a ˈwluyɩbhäyɩbhʋ ˈwʋ a -li -yɩɲɩ gbʋ -n bhɛnɩɛ -n ˈkä bhïlaa:
• Sɛ wa ˈkää peliodikïa bia a wɛlɩ -yɩ ˈcɛlɩɛ -lɛ Lagɔ ˈa ˈKämanɔɔ a libho a kpʋ -gömö.
• Lagɔwɛlɩbiabiʋ a video -wʋ ˈbhöönɩɛ -mä jw.org ˈklʋ.
• -Aˈa lagɔwɛlɩbiabiʋ a ˈki -mimi, sɛ -a ˈkää bhïlabhuluu tɛɛ ˈn -a -kä möä yi a sɛ -a -kää gbä nzɩ -a -kä ˈwʋ ˈsɔ yinɩ ˈligbëlowlii -kaɲɩ ˈyukwli -pʋnɩ, ˈn nɩkpɛ -kä peliodɩkö ˈwʋ ˈlibhï, sɛ -a ˈkɔɔ ˈdɩ ˈɲɛ nɩɩ, ɔ bhɛnɩ ɔ ˈkä saa ɔ kää ˈɲɛ nzɩ wa ˈkä ˈbɔgwɩ -mimi -bhɛ.
• Biblë ˈmö a wɛlɩkïbhëa -a ˈpää swɩ ɲɛmʋ ˈmö ˈn -a bhïlaa lagɔwɛlɩbiabiʋ a wɛlɩ.
• Lagɔwɛlɩbia bɛyɩ a ˈtɩtɩɩ -yɩ ˈplɩɛ -mä -aˈa bɛyɩ ˈwʋ ɛ ˈkäˈɛ -yɩ ˈbhöönɩɛ -mä -aˈa lagɔbɔgwɩ ˈmö, mi.
• ˈTɩtɩɩ -yɩ ˈbhöönɩɛ -mä Lagɔ ˈa ˈKämanɔɔ a libho a ˈkpʋ ˈmö.
• ˈTɩtɩɩ -yɩ ˈbhöönɩɛ -mä -aˈa lilili nɩ ˈwʋ a lagɔlibho a ˈwluyɩbhäyɩbhʋ ˈmö.
• Lagɔwɛlɩbiabiʋ a ˈtɩtɩɩ -yɩ ˈbhöönɩɛ -mä La Tour de Garde ˈmö
• Lagɔwɛlɩbiabiʋ a wɛlɩ -yɩ ˈbhöönɩɛ -mä ˈbɔgwɩ wa laa École du ministére -ɲɛ « Viens, suis-moi » a sɛ a ˈbɔgwɩ ˈmö.
• -Mä jw.org ˈklʋ a -lii -yɩ ˈwlʋä zɛmö, -a bhɛnɩɛ -a ˈkä ˈmö ghlɛnɩ nzɩ -a ˈkä lagɔwɛlɩ bia.
• La Traduction du monde nouveau -a ˈwlʋä lilili ˈwʋ, -a bhɛnɩˈɛ -a ˈka ˈmö ghɛnɩ -a ˈkä lagɔwɛlɩ bia.
• Nɩkpɛ a -mɔ gbää Lagɔ ˈnɩɛ -bhölɩɩ, -ɔ nʋˈɛ nɩɩ, Lagɔ mɔ ˈnɩɛ ˈpɩwʋ a -li ˈwʋë ˈwäla, Ɛduyɩsɩ ˈn Budisɩ, -n ˈkɔɔ lagɔwɛlɩ ˈɲɛ yi a sɛ -n bhɛnɩɛ -n ˈkä tɛkädɔˈwʋ gbä.
• Nɩkpɛ -a -mɔ ˈnɩɛ ˈyɩbhä ɔ -kamö ˈyukwli -pʋnɩ, ˈn ɔ -sɛnɩɛ käbösɛ ˈmö a sɛɛ -n ˈkiɛ -gömö -sɛ.
• -N -ɲɛ -bhlinɩɛ ˈwʋʋ, sɛ -n ˈkɔɔ kwänɩ nzɩ ɔ ˈkä ˈyli yɔwʋ ˈtɛɛ, a -kä -mä ˈligbï ˈmö lagɔwɛlɩ bianɩɛ möö.
• Nɩkpɛ -ɔ gbää gbʋ -mumu, sɛ -n ˈkɔɔ lagɔwɛlɩ ˈɲɛ.
• Lagɔwɛlɩbiabiʋ a ˈki -mimi -yɩ -lɛ: -A -kä lagɔwɛlɩ bia mö a kïbhï -a ˈkää yɔwʋ ylɩ a sɛtɛlɩtɛlɛ, ŋöŋöyukwli ˈmö a lagɔwɛlɩbiabiʋ, nɩkpabhë a ˈyila ˈklʋ a lagɔwɛlɩbiabiʋ, -n ˈkä nɩkpɛ ˈwʋ ˈsɔnadɔˈwʋ ˈylɩmöä mö, ˈn sɛ -a ˈkää nɩkpa Biblë ˈcɩa, -sɩbhä a -lii.
• -A ˈkä -aaɲɩ ˈwʋ ˈnɛmanɩ, -a ˈkä dlɩwätɛ -kä, -a ˈkä ˈyli köbha, -a ˈkä sasɛ dlɩpäsɛ -yi ˈn -sɩbhä a -li -mimii a ˈwʋligbanɩligbanɛ.