Sɛ -a ˈkää ˈzʋ lagɔwɛlɩbiabiu a ˈwluyɩbhäyɩbhʋ ˈkä ˈmäna ˈwʋ -bhö

Lagɔwɛlɩbiabiu a ˈwluyɩbhäyɩbhʋ, lagɔzɩkpa ˈmö a ˈwluyɩbhäyɩbhɩ -miˈla a saa -sɩbhä wʋ -wʋmöä. Zoova aˈbhë mɔɔ ˈgïlaa ˈwluyɩbhäyɩbhʋ ˈla sɛ, wʋ -kaɲɩ kwänɩ -a ˈkä ˈdɩ ˈmö ˈzʋzʋnɩ, -a ˈkäa -wawanɩ ˈn -a ˈkä -li a -lii nʋ ˈyize. (Eb. 10:24, 25) Wʋ kä wʋ ˈkä minitie ngbï ɛ -käˈɛ minitie ngbiˈsɔ a sɛ -sɛ. ˈTɛɲɩ ˈla ˈmö, wa kä wa ˈkä -zɩkpöö ˈwlu gïganɩ, wa ˈkä lagɔwɛlɩbiawaa dɛɛ wa ˈkää mö sʋlʋnɩ, ˈn wa ˈkä bhibhe. A -kä -zɩkpa ˈmö a ˈwluyɩbhäyɩbhʋ -bhɛ ˈwë, a -kʋʋ -bhɛ yii, wʋ nɩ tɩ ˈmö ˈbhʋɔ. -Ɔ ˈkää ˈwluyɩbhäyɩbhʋ ˈla -su, -lu a -mu ˈkää -lɛ a zlɩ ˈla ˈmö lagɔwɛlɩbiawaa kwänɩ, wʋ wɛlɩɩ ˈmö ɔ nɩ bhïla. Ɛ -kä ˈylɩ gbʋplʋsɛ, lagɔwɛlɩbiawaa a glaˈmö a -nʋa a -bɛ ˈnɩ ˈdimasɩ -ɛ ˈplɩɛ ˈmö lagɔwɛlɩɩ biamö, -ɔ -suä ˈwluyɩbhäyɩbhʋ nɩ bhïla sɛ -a -ɲɛ ˈligbëlowli ˈsɔ ˈkää ˈdɩ -sɛ a wɛlɩɩ. -Lii -miɲɩ wɛlɩɩ -a bhɛnɩ ɔ -a ˈkäˈɛ bhïla ˈnɩ?

• -A -ɲɛ nɩkpɛ -kä ˈdɩ -sɛɛ yi a sɛ -a ˈkää gbä, -yɩ -wʋä -mä ˈWluyɩbhäyɩbhʋʋ a ˈbɔgʋ ˈmö.

• -Lii -yɩ ˈplɩɛ ˈlili ˈwʋ a wɛlɩɩ, sɛɛ -a ˈkɩɛ ˈmö ghlɛnɩ, nzɩ -a -ɲɛ nɩkpɛ ˈsɔ ˈkä ˈdɩ -sɛ.

• Wa ˈnɩ ˈyɩbhä wa -kaɲɩ ˈyukwli -pʋnɩ a sɛ a ˈkää ˈzʋ.

• Nɩkpa -waaa Lagɔ dlɩ ˈwʋ -kä; -wa pää dlɩ nɩɩ, ˈfʋ ˈpɩwʋ a -lii ˈwlʋä; -wa gbää käbögbɩ; ˈn -wa -wʋä lagɔgligbï ˈmö nɩkpa a -bɛ ˈnɩɛ -yii, sɛɛ -a -ɲʋa ˈkää ˈdɩ -sɛ.

• Sɛɛ -a ˈkää jw.org ˈmö ghlɛnɩ, JW Library^®, ɛ -käˈɛ Biblë.

• -Aˈa lagɔbɔgwɩɩ -a ˈcɩanɩɛ ˈmö, sɛɛ -a ˈkää yɩ glaˈmö a -nɩ ˈmö ghlɛnɩ.

• Sɛɛ -a ˈkää -ŋöŋöyukwli ˈmö ghlɛnɩ, sɛɛ -a ˈkää nɩkpa ˈbɔgwɩ ˈwʋ ˈcɛlɩ, sɛɛ -a ˈkää nɩkpabhë a ˈyila ˈklʋ a lagɔwɛlɩbiabiu -bhɛ, sɛɛ -a ˈkää nɩkpa ˈylɩmöä mö, ˈn sɛɛ -a ˈkʋa Biblë ˈcɩa.

• Sɛɛ -a ˈkää -aɲɩ ˈwʋ ˈnɛɛnɩ, sɛɛ -a ˈkää ˈligbëlowli ˈmö ˈnʋ, sɛɛ -a ˈkää nɩkpa a ˈklʋkpa -kä, ˈn -sɩbhä a -lii -mimii.

• Blosu ˈCɩawa a -nʋa a -nʋa, wʋ ˈmö a ˈcɩɛcɩɛkïbhë, ɛ -käˈɛ video.

• -A -ɲɛɛ ˈsɔ biaa lagɔwɛlɩɩ, sɛɛ -a ˈkʋa swɩ ɲɛmʋ ˈmö ˈpä ˈn sɛɛ -a ˈkʋa kwänɩ.

• Biblë a gbɛlʋ -wʋ -glɛɛ lagɔwɛlɩbiabiu ˈwʋ, ɛ -käˈɛ ˈtɩtɩ a -mi pää swɩ ɲɛmʋ ˈmö.