A nɩ wäzɩ cuu
1. −Aˈa ˈwluyɩbhäyɩbhʋ ˈkɔdʋ a za, -zlɩmɛ -a ˈkä bhä nɩkpa a wäzɩwäzɛ tɛɛ ˈnɩ?
1 ˈN -n -kä -naɲɩ ˈwlugïganɩ -n ˈkä lile a lile pii -naˈa ˈligbë ˈmö a -nʋa, ɛ -käˈɛ -na bhɛya a za, sɛɛ -n yɔlɔɔ ˈn -n yiɛ mönɩ plɩɩ a za, -n -kʋä lilea ˈla ˈwʋ wäzɩnɩɛ yi, ˈmänasɛ ˈn kumösusɛ -n ˈkʋä wäzɩ. Sɛ -bhlʋ -kpɔ ˈla, -sɩbhä -aˈa ˈwluyɩbhäyɩbhʋ ˈkɔdʋ -wʋ -wʋä yi dɔˈwʋ a za, libho a -bɛ wa nʋä, -a ˈkäa ˈwugɔmʋsɛ sasɛ li a za. ˈDimasie ta tʋ -mä ˈwluyɩbhäyɩbhʋʋ ˈkä tɛɛ, ˈn Zoova -ɲɩaɲɩɛ ˈklʋkpa -a ˈkä -mumuë wäzɩ. ˈSaa -kaɲɩ bhä kwänɩ nzɩ -a ˈkä kumösusɛ nɩkpa wäzɩ ˈnɩ?
2. ˈSaa -kaɲɩ bhä -mä ˈsunɩ nzɩ -a ˈkä kumösusɛ nɩkpa wäzɩ ˈnɩ?
2 -A -kä -li a -lii Zoova -nʋɲɩɛ ˈwlu -aˈa ˈwluyɩbhäyɩbhʋʋ ˈwʋ, ˈwʋ dlɩ ˈpä, yɩ -yiɲɩ kwänɩ -a ˈkä kumösusɛ nɩkpa wäzɩ. (Isa. 65:13, 14) -A nɩ ligba nɩɩ, -mä -aˈa ˈylʋbö ˈwuë a nɩkpa wäzɩwäzɛ ˈmö, -a ghlɩnɩ -mä -li a -lii. (ˈYɩ ziple “-Li a -lii ˈwlʋnɩɛ ˈyli” ˈylɩmö.) Nɩkpa a wäzɩɛ, -mumuë yi yi, -mumuë ˈnaa ˈkä yi. Nɩkpa -wa ˈkää -lɛ -aˈa ˈwluyɩbhäyɩbhʋʋ ˈwʋ yi ˈnɩ zu aˈbhë -kë, sɛ -a ˈtɛmanɩɛ ˈyli yɔwʋ ˈn -a yuë wäzɩ, -sɩbhä ˈghlimanɩ Zoova ˈa ˈŋlɩ ˈn yɩ tulaˈɛ nɩɩ, dlɩzɛmö ɔ nɛnɩɛ.—Ps. 145:3, 7; Kl. 22:17.
3. Sɛɛ -a kä bhä a ˈkä nɩkpawäzɩkpɩ dlinɩ ˈnɩ?
3 ˈYukugänɩwa a -zɩkpö kä yɩ ˈkä bhʋlʋbhlʋ sɛɛ yɩ ˈkää nɩkpawäzɩkpɩ a -bɛ nɩkpa dlinɩ, sɛtɛlɩ. Wa ˈkä -sɩbhä zʋ a dɔˈwʋ, wa kä wa ˈkä -mä -waa -lɛ -wʋ a -gbïli zɛmö kpʋ -bhlʋ zʋ, wa bhɛnɩˈɛ wa ˈkɩ nɩkpabhë dlinɩ -mä ˈwa ˈpɩɔ ˈyli. Ylɩ gbʋplʋsɛ ˈn ˈdimasɩ ˈmö, -a -kä nɩkpa wäzɩkpɩ ˈɲɛ dɔˈwʋ -wʋ, -a bhɛnɩ -a ˈkʋäˈɛ ˈgämö peliodikïa ˈɲɛ ˈmö. Nɩkpa wäzɩwäzɛ a ˈtɛɲɩ -kä ˈplɩ ˈwë, -a -yi sɛ nɩɩ, ˈyli yɔwʋ -a ˈtɛmanɩɛ ˈn -a yiɛ nɩkpa a -bɛ wäzɩ nzɩ -a -ɲʋä ˈkä ˈgämö -aˈa ˈwluyɩbhäyɩbhʋʋ ˈkɔdʋ ˈwʋ mö, -mä Zoova -lianɩɲɩɛ ˈwugɔmʋsɛ, zaa yɩ -yiɲɩ teɲii ˈmäna ˈwʋ -bhö.
[Yɩ pɔ jijoʼwʋ, kpʋ 4]
Sɛɛ -n ˈkä bhä gbä ˈnɩ?
-N -kä bhälɩ ˈwë, -n bhɛnɩ -n ˈkä nɩɩ: “-Aˈa ˈwluyɩbhäyɩbhʋʋ -wʋ kää teɲii dɛsɛ a za, -a -wʋä nɩkpa wäzɩ dɔˈwʋ. Zaa -naˈa kpʋä dɛˈɛ. Ylɩ ˈwʋ ˈkää ˈmö tɛɛ, ˈgïle ˈn dɛɛ wa ˈkʋä -bhɛnɩ, yɩ ˈwuë yɩ cɛlɩ -lɛ kpʋ nɩ ˈklʋ.”
[Yɩ pɔ jijoʼwʋ, kpʋ 4]
-Li a -lii ˈwlʋnɩɛ ˈyli
• ˈYlʋbö -miˈla -yɩ ˈplɩɛ ˈmö, -aˈa lagɔdaayunlʋyu -bhlʋ, -ɔ -wʋä nɩkpawäzɩkpɩ dlinɩ dɔˈwʋ, mɔɔ ˈyɩbhää ɔɲɩ nimï, ˈsaa ˈwuë n -wʋä nʋ dɔˈwʋ kä bhä dɛsɛ -a? Ɔɲɩ ɔ ˈyɩbhä a-a nɩmï nɩɩ, ‘nɩkpa -a wäzɩɛ yɩ bhä -tiamö -lɛ ˈwluyɩbhäda yi -a?’ ˈYlɩ gbʋplʋ a ˈzɔkpɔsɛ, -mä ˈwluyɩbhäyɩbhʋʋ ˈwʋ, ɛdiɛ a -glïgbë -bhlʋ wa laa Sikö, -mä a nɩkpɛ -bhlʋ, mɔ glɩ a-a -lɛ ɔ yɔwʋ. Zaa -aˈa lagɔdaayunlʋyu yoo ɔɲɩ sʋlʋnɩ. -Miˈla ˈnɩa ˈwʋ ziza, nɩkpawäzɩkpʋ wa ˈɲɛɛ nɩkpɛ ˈla nza ɔ yiɛ -lɛ ˈwluyɩbhäda. Ɔ ˈyɩbhänɩ -aˈa lagɔdaayu ˈla ˈkïbhï a -bɛ ˈwʋ ˈn ɔ yɔɔ yɩ zɛmö ˈɲɛ. Sɛɛ ˈwluyɩbhäyɩbhʋʋ nɛmanɔɔ teɲii dlɩ yɔwʋ, ˈn sɛɛ lagɔdaayuë -wa ˈbhöönɩɛ -gwlɩ -mimii -gömö ˈn wa yiɛ -lɛ ˈwluyɩbhäda yi a -wʋwʋsa -ɲɛ ˈwa nʋnʋlii ˈsɔ nɔɔ -li a -lii ˈwlu a wɛlɩ, ˈmö ɔ sɛnɩɛ ˈmö. Bhäla nɩkpɛ -bhlʋ -ɲɛ ˈɔ ˈlɛŋlɛ ˈsɔ -wa glɩ a-a -lɛ ɔ yɔwʋ, ɔ -ɲʋa yiɛ ˈdɩ sɛ. Wäzɩ wa wäzuë yɛ wabhlɩ ˈn wa yiɛ -lɛ ˈwluyɩbhäda bisɩ ˈmö yinɩ. ˈWluyɩbhäyɩbhʋʋ nɛmanuëˈɛɛ dlɩ yɔwʋ zaa, wa yiɛ nɩɩ, ˈdimasɩ ˈmö wa yi -lɛ -wʋ. -Lɛ -aˈa lagɔdaayu ŋlʋyu yɩbhlɩnɩɛ sɛ nɩɩ, -aˈa ˈylʋba ˈmö a nɩkpa wäzɩwäzɛ, kä -tiamö dɛsɛ.
• ˈLilili nɩ ˈwʋ, -mä ˈwluyɩbhäyɩbhʋʋ ˈkɔdʋ ˈwʋ, ˈyiosɛɲɔ -bhlʋ -ɲɛ ˈɔ ˈlɛŋlɛ ˈsɔ, wa yiɛ waɲɩ nɩkpɛ -bhlʋ -ɲɛ ˈɔ ˈlɛŋlɛ ˈsɔ -wa ˈklʋä ˈyli yɔwʋ waɲɩ sʋlʋnɩ. ˈN nɩkpɛ ˈla -ɲɛ ˈɔ ˈlɛŋlɛ ˈsɔ yiɛ nɩɩ, wa tɛkä wa yiɛ ˈwluyɩbhäyɩbhʋʋ ˈla ˈwʋ. ˈN ˈyiosɛwa yuë nimï yɩbhä, “-Mɔ wäzaɲɩ ɔ ˈnɩ?” ˈN wa yiɛ nɩɩ, “ˈylɩ -bhlʋ ˈmö -aaˈa -lɛ -wʋ la, maa -a ˈkää -mä -aˈa ˈligbëa ˈmö ˈwlu sɩbhää, ˈn -a yiɛ nɩkpawäzɩkpʋ -lɛ -aˈa -gbëlea zɛmö ghlɩnɩ.” Saa wa nʋä. Wa yiɛ kpʋ ˈla ˈmö zɛlɩ, ˈn wa yiɛ ˈsaa cɛlɩɛ -mä wʋ -gömö aˈbhë, yie. Lagɔdaayuë -wa ˈbhöönɩɛ -gwlɩ -mimii -gömö ˈn wa yiɛ -lɛ ˈwluyɩbhäda, ˈn wa -ɲʋä ˈsɔ wa yiɛ ˈgämö lini. ˈSaa wa yiɛ ˈylɩmö, nʋa teɲii libho ˈwlu zaa, wa yiɛ nɩɩ wa yi zlɩ -mɛˈla ˈmö ˈwʋ ˈsɔ yinɩ. Sɛɛ wa ˈkʋä ˈyli zʋnɩ nzɩ wa ˈkʋä -mä ˈwa ˈligbëa ˈmö ˈylɩmöä ˈmö, wa ˈkʋä kwänɩ lagɔwɛlɩ a dɔˈwʋ, -sɩbhä a -lii ˈla ˈwuë, wa yiɛ yɔwʋ zʋnɩ.