Kwänɩ ˈkukwlekäwa wa ˈkä Zoova yɩbhlɩnɩ
1. Sɛɛ Zezwii tula ɔ nɩɩ, ɔ kä ˈkukwlekäwa a ŋäzɩdlɩ ˈnɩ?
1 Ylɩya tʋʋ -mä Zezwii ˈkä ˈku. Ɔ -wʋ a-a -mä Zeliko a -glɔ ˈmö wlʋ dɔˈwʋ, ˈn ˈkukwlekäwa ˈsɔ -wa -lɛ zlazlawa yiɛ ˈmö kpa, wa lɛ: “Atʋ Daviidɩ ˈa yowli aa, ˈpä -aa ŋäzɩdlɩ aa!” ˈKlɩ ˈkädɛ ɔ ˈkää bhäla ˈyɩ, ɔ wɛ a-a ˈwʋ dlɩ ˈpä dɔˈwʋ, maa ɔ ˈnʋä ˈwa wäzɩwɛlɩ, ˈnɩgbö ɔ ˈnɩgböä ˈn ɔ yuë a-a ˈdɩ ˈɲɛ nɩɩ, wa nɩ yinɔɔ, ˈn ɔ yuë a-a göpö. (Mat. 20:29-34) Sɛɛ Zezwii ˈpää ˈkukwlekäwa a ŋäzɩdlɩ, sɛɛ -a bhɛnɩɔ -a ˈkä ˈɔ gbäpöö -gänɩ ˈnɩ?
2. ˈKukwlekäɲɔ -a -ɲɛ gbanɩɛ nɩkpabhë a ˈyila ˈklʋ ˈwʋʋ, sɛɛ -a bhɛnɩ ɔ -a ˈkɔ lagɔwɛlɩ ˈɲɛ ˈnɩ?
2 Kwänɩ nɩkpa: ˈN -n -ɲɛ ˈkukwlekäɲɔ -kä ˈwʋ gbanɩ, ɛ yi -kamä nɩkpabhë a ˈyila ˈklʋ oo, -n bhɛnɩ -n ˈkɔ -naɲɩ sʋlʋnɩ, nzɩ -n ˈkɔ ˈdɩ ˈɲɛ nɩɩ, -n yɩbhä -n ˈkɔ kwänɩ. -Sɩbhä a nɩkpa ˈla wa dɔˈwʋ waˈaa dɛsɛ -kä zaa, -n kɔɔ yɔwʋ ghlɛ cuu, -gu ɔ ˈkää -gu, maa ɔ -kä sɛ -yi nɩɩ, -n yɩbhä -n ˈkɔ -tiamö kwänɩ, ɔ ˈna -kamöa -gu. Yɩbhlɩnɩˈɛ sɛ nɩɩ, ˈkukwlekäwa a ˈki ˈnɩɛ muënɩ zaa, sɛ -n ˈkuëë kwänɩ ˈnɩɛ sɛ -bhlʋ -kpɔ -wʋ. -N kɔ -sɩbhä kwänɩ ˈwë -n bhɛnɩ -n ˈkɔ ˈdɩ ˈɲɛ nɩɩ, Biblë a ˈcɩacɩalibho -n nʋä. ˈƝɔ ˈdɩ nɩɩ, -n yɩbhä -n ˈkä Psaume 146:8 -ɲɛ Isaïe 35:5, 6 ˈsɔ a sɛ a Biblë ˈa gbɛlɩ ˈmö zɛlɩ. ˈKukwlekäwa a ˈylɩlɩyʋʋ wa laa Blayɩ, ˈn ɔ -kii ˈmözɛlɩsɛ -yi, ˈɲɔ ˈdɩ nɩɩ, ɔ -kä ˈyɩbhä, -n bhɛnɩ -n ˈkɔ -sɩbhä a lagɔbɔgʋ -lɛmö, -wʋ ˈkɔɔ kwänɩ nzɩ ɔ ˈkä Biblë ˈcɩɛ. -N bhɛnɩˈɛ ˈgämö -n ˈkä -mä jw.org ˈklʋ ˈyukwli -pʋnɩlii -sɛ -n ˈkɔɲɩ ˈɲɛ. ˈƆ ɔdinatɛlɩ -kä bhɛnɩ ɛ ˈkä cɛlɩcɛlɩ -lii ˈmö zɛlɩ nzɩ wa ˈkä ˈnʋ, lagɔbɔgwɩ wa cɛlɩnɩɛ RTF ˈmö -n ˈkää -mä jw.org ˈklʋ -sɛ, yo -kamä dlɩ yɔwʋ nɛnɩ.—Ylɩɩ -mä ziple ˈmö dɛ wa ˈcɛlɩɛ “-N -kä ˈkukwlekäɲɔ kwänɩ dɔˈwʋ -wʋ...”
3. Sɛɛ -a ˈkä bhä ˈkukwlekäwa sɛtɛlɩ -mä -aˈa ˈpɩɔ ˈyli ˈnɩ?
3 Tɛlɩ ˈkukwlekäwa sɛ: -Mä ˈligbï ˈmö a lagɔwɛlɩbiabiʋ ˈmö, ˈkukwlekäwa ˈnɩˈɛ ˈwʋ ghuloghulonɩ. Ɛˈɛ -bhö ɲɩasɛ, maa wa glaˈmö a -nʋa a -bɛ käbönɩkpa waˈaa -yi, -wa möä -mä ˈwa -bïdi nuë ˈwʋ wa -ɲʋa ˈkä ˈdɩ -sɛ a dɔˈwʋ, zʋ ˈwʋ yi -bhuëë. -Sɩbhä a za, “-a ˈkuë ghlɩ,” -a ˈkuë lagɔwɛlɩ ˈɲɛ a dɔˈwʋ, ˈmö yɩ ˈtɛɛ. (Mat. 10:11) -N kä bhä -mä -naˈa libho ˈmö, ɛ -käˈɛ -mä -naˈa -sukugbë ˈmö, ˈkukwlekäɲɔ -a? Tɛlɩ sɛ -n -ɲɔ ˈkä ˈdɩ -sɛ. ˈN -kukwlekäwa ˈa -sukugbë -kä -mä ˈa ˈpɩɔ ˈyli -wʋ, -mä a dɛɛ wa zʋä ˈbɔgwɩ nɩkpabhë ˈkɩ ˈmö zɛlɩɩ, kwä -mä -aˈa lagɔbɔgwɩ -yɩ cɛlɩnɩɛ Blayɩ ˈmö. -Mä -naˈa ˈpɩɔ ˈyli, ˈwlugïganɩzɩkpa -a zʋnɩɛ ˈkukwlekäwa ˈyli, ɛ -käˈɛ -bïdi ˈkukwlekäwa glɩɛ ˈmö, -wʋ bhä -mä -a? ˈLigbë ˈlä ˈmö a -nʋa, ɛ -käˈɛ -ɔ pälaa nɩkpa, ɛ -käˈɛ -ɔ -suä -sukugbëa, ˈɲɔ ˈdɩ nɩɩ, Zoova ˈa Bhlɩnɩwa, ˈkukwlekäwa a kwänɩkwänɛ dɛsɛ yɩ kää wa dɔˈwʋ. ˈN ˈɲɔˈɛ ˈdɩ nɩɩ, -n yɩbhä -n ˈkuë lagɔbɔgwɩ -yɩ cɛlɩnɩɛ blayɩ ˈmö -lɛmö. Biblë ˈmö ˈa wɛlɩ -yɩ nʋä nɩɩ, Lagɔ yia -pa ˈkukwle ˈyli bhɩa, tulanɔɲɩ ˈylimö. Video wa laa « Sans elle, je serais perdu », -wʋ sɛnɩɛ ˈkukwlekäɲɔ -bhlʋ, Biblë -ɛ cɛlɩnɩɛ blayɩ ˈmö nʋä -li a -lii ˈwlu a wɛlɩ ˈmö, ˈɲɔ ˈdɩ nɩɩ, -n yɩbhä -n ˈkɔɲɩ ˈylimö tulanɩ. ˈSaa kää ˈŋlɩ ˈn -n yuëa ˈylɩmöä mö, -n -kʋaɲɩ dlɩ -gömö -sɛsɛnɩ, yɩ yi ˈɲlɩ -kä -n -ɲɛ ˈkukwlekäwa ˈsɔ yi -yiyinɩ.
4. ˈSaa Zanɛtɩ a -bhɛbhɛlii ˈcɩaɲɩ ɔ ˈnɩ?
4 Lagɔdaayuŋluyu -bhlʋ -ɔɔɔ sɛ ylɩ wa laa Zanɛtɩ mɔɔ möä ˈkukwlekäwa ˈylɩmö yɩɛ -mä -budu -bhlʋ ˈmö. N ɔ -ɲɛ ŋlʋdɩgba -bhlʋ ˈsɔ yiɛ ˈdɩsɛsʋ tɛɛ. Sɛˈɛ Zanɛtɩ ˈɲɔ a-a ˈdɩ nɩɩ, “Zezwii yɛmanɩ a-a ˈkukwlekäwa, ˈsaa ɔ ˈkää zɩkö nʋ ˈkukwlekäwa ˈwuë a dɛ ˈmö ɔ tulanɩ a-a ˈylimö.” ˈN wa yiɛ ˈKlʋkälɩwɛlɩ a 21:3, 4 yɔwʋ ylɩ, ˈn ɔ yiɛ sɛɛ Lagɔ ˈa ˈKämanɔɔ ˈkää lɛ a wɛlɩ ˈla ˈyli ˈwälanɩ -gömö -sɛsɛnɩ. ˈN ɔ yiɛ ˈwʋ dʋ ˈtɩɩ, ˈn ɔ yiɛ gbä nɩɩ: “Nˈn-ä -bhlɛ tɛkäsɛ saˈa a wɛlɩ ˈnʋ. Nɩkpa a -bɛ a dɔˈwʋ ˈkukwlekäwa, -lu wa nʋä, ɛ -käˈɛ ˈwa dɩbawa a dɩbawa -wa ˈkuä ˈa -lizoku wa nʋä a za, ˈkukwle lɩbhʋää.” Ɛtɛnɛtɩ ˈmö, Zanɛtɩ ghlɛnɩɛ ˈmö ˈn ɔ yiɛ ŋlɔ ˈla lagɔbɔgʋ wa laa Qu’enseigne la Bible ? ˈyio ˈwʋ ˈpä. Zɩˈɛ, ɔ -ɲɔ ˈsɔ ˈdimasɩ -bhlʋ ˈmö, ˈwʋ ˈsɔ wa ˈcɩɛnɩɛ Biblë.
5. Zezwii a sa -aa bhɛnɩ -a ˈkä ˈkukwlekäwa yɛmanɩ abhlɩ maa, ˈn wa gbʋ -kaɲɩ plɛnɩ, ˈɲupälɩ a -mii ˈkä bhä ˈyli ˈwlʋnɩ ˈnɩ?
5 Mɩɛ abhlɩ -aa bhɛnɩ -a ˈkä Zezwii a sa ˈkukwlekäwa yɛmanɩ maa, nɩkpa -waɲɩ dila zuzukuzoku a ˈkifii -ɔ ˈkämanɩɛ nɩkpa -waaa ˈyɩbhä wa ˈkä Lagɔ ˈklʋkpamö ˈzʋ gbaa ˈklʋʋ, -ɲɛ nɩkpa -waaa -tiamö sɛ ylɩ ˈsɔ, -a bhɛnɩ -a ˈkuë kwänɩ wa ˈkä Lagɔ ˈa gbëawɛlɩ ˈmö ˈnʋ. (2 Kɔ. 4:4) -Mä Zeliko a -glɔ yɔwʋ a nɩkpa ˈsɔ -kpɔ, “wa ŋäzɩ ˈlɩbhää” Zezwii nza ɔ yɛmanuëë (Mat. 20:34) ˈN Zezwii a sa ˈkukwlekäwa ˈa gbʋ -kaɲɩ -plɛnɩ, -a yi nɩkpa kwänɩ wa ˈkä Zoova yɩbhlɩnɩ. Zoova, ɔ -bhlʋ -kpɔ mɔɔ bhɛnɩɛ ɔ ˈkä ˈkukwle ˈyli sɛ, ˈkwädlɩkwädlɩnɩ.
[Yɩ pɔ jijoʼwʋ, kpʋ 3]
-N -kä ˈkukwlekäɲɔ kwänɩ dɔˈwʋ -wʋ...
• -N -kä bhïla dɔˈwʋ -wʋ tɩ wɛlɩ ghäyɩ ˈpä. ˈKukwlekäwa ˈnɩɛ abhlɩ sɛ ylɩ maa, wa -ŋö sasɛ.
• -N -ɲɔ ˈsɔ, a -kä nɛmö dɔˈwʋ -wʋ, panɩ -naˈa sɔɔ ˈwʋ ɔ ˈku sɛ köbhä, a ˈkä nɛmö. ˈBhʋkwa -kä -lɛ -wʋ, ɛ ˈkäˈɛ sukïbhë, käbö -lu -mumuˈɛ, ˈɲɔ ˈdɩ.
• -N -kä -sɩbhä a -lu ˈylɩmöö, -n bhɛnɩ -n ˈkä nɩɩ, “yɩɛ.” ˈKukwlekäwa aˈbhï wa gbämö -sɩbhä. -Lii wa sʋlʋnʋa wa ylɩnii dlɩ zɛmö ˈwʋ.
• Dɛɛ gëbë ˈnɩɛ -wʋʋ, -lɛ -n -ɲɔ nɩ sɛnɩ ˈdɩ.
• Waˈaa ˈsaa ˈplɩɛ ˈwʋ -yi zaa, waˈaa dɛ gëbë -wʋä ˈyɩbhä. N -kä -gba ˈwʋ bhöä yi, ɲɔ ˈdɩ. -sɩbhä a dɔˈwʋ ɔ ˈnaa ˈkä ɔɲɩ -bhlʋ bhïla.
• ˈN ˈkukwlekäɲɔ -kä ˈyɩbhä ɔ ˈkä Biblë ˈcɩɛ, ˈn ɔ ˈnɩ -mä -naˈa ˈpɩɔ ˈyli glɩnɩ, yie kpʋ wa laa Veuillez suivre lˈintérêt (S-43), nzɩ -n ˈkʋ -mä -naˈa -zɩkpa ˈmö a -li a cɛlɩcɛlɩɲɔ yowʋ ˈɲɛ.