-A nɩ ˈcɩɛ lagɔwɛlɩbiawa -wa yɛɛ -mä lagɔwɛlɩbia libho ˈmö -jɩbhɛnɩ a dɛ

Lagɔdaayuëa -wa yɛɛ -mä lagɔwɛlɩbiabiʋ ˈmö -jɩbhɛnɩ, teɲii wa -bhöɲɩɛ ˈmäna ˈwʋ -mä lagɔzɩkpa ˈmö. -Mumuë yɛ -mä Zoova ˈa libho ˈmö ˈylʋbö a -bɛ -sɛ. -Mumuë ˈlili ˈwʋ wa ˈcɩɛ -kamä sasɛ lagɔwɛlɩbia libhoo. Maa lagɔwɛlɩbiawa ˈla ˈwuë yɩ ˈylɩmö nɩɩ, Zezwii mɔɔ -suä klɩtɩɛwa a -zɩkpa ˈn mɔɔ kwää lagɔwɛlɩbia libho -ɲɛ nɩkpa a lagɔwɛlɩ a ˈcɩacɩʋ ˈsɔ ˈyukusɛ. (Mat. 28:19, 20) Lagɔwɛlɩ wa bia zaa, wa -kä ˈklɩyɩyɛ ˈmö -wʋʋ, ˈmötɛɛnɔɔ wa ghlɩɛ “Lagɔ aˈbhë ˈmö wʋ ˈbhöönɩɛ ˈmö.” (2 Kɔ. 4:7) -Sɩbhä a lagɔwɛlɩbiawa ˈla, -a bhɛnɩ -a ˈkä wa dɛ -lii a -bɛ ˈcɩɛ. ˈSaa wa -yiɛ ˈla, ˈmänasɛ wa ˈcɩɩɛ -mumuë. (Ps. 71:18) -Sɩbhä a za, -a kä -a ˈkä sɛtɛlɩ nzɩ -a ˈkä wa dɛ ˈcɩɛ. Maa sɛ -a ˈkä ɔ ˈmö ˈzʋzʋnɩ ˈnɩ?

-Mä lagɔwɛlɩbia libho ˈmö.Lagɔwɛlɩbiawalili ɛ -käˈɛ -waˈa -bhlɛ -mä lagɔwɛlɩbia libho ˈmö -jɩbhɛnɩ, -kä wa ˈkä sasɛ lagɔwɛlɩ bia sɛ -yi nʋʋ, wa kä wa ˈkuë ˈcɩa. Klɩtɩɛwa -wa yɛɛ -mä lagɔwɛlɩbia libho ˈmö -jɩbhɛnɩ, ˈwa sɛ wa bia lagɔwɛlɩɩ, wa -kä -sɩbhä ˈwʋ ylɩɩ, wa yi -lii a -bɛ ˈcɩɛ. (Ylɩ -mä ˈylʋba wa laa 2015 a Fevlie a ˈylɩ 15 ˈmö a La Tour de Garde ˈmö. ˈCɩɛcɩɛkïbhëa -a nʋä « Garde ton zèle pour le ministère » a zɛmösɛkïbhëa a tanana -a nʋä « Aide les nouveaux proclamateurs » ˈyɩa ˈylɩmö.) -Sɩbhä a lagɔwɛlɩbiawa a ˈwʋ-bhlinɩbhlinɛ ˈla, -li a -lii a -mii -n ghlɩnɛ ɔ ˈmö ˈnɩ?

-N bhɛnɩ bhä -n ˈkä lagɔwɛlɩbiaɲɔ -ɔ yɛɛ -mä lagɔwɛlɩbia libho ˈmö -jɩbhɛnɩ ˈdɩ ˈɲɛ nzɩ -n -ɲɔɔ ˈsɔ, a ˈkä lagɔwɛlɩ bia mö -a? -Lɛ a lagɔwɛlɩbiaɲɔ ˈla -kä kpälɛkpälɛɲɔ glɩnɩɩ, ɔˈɔ bhɛnɩ ɔ ˈkä nɛmö zaa, -n bhɛnɩ -n ˈkä -mä ˈɔ bɛyɩ nɩkpa -n ˈcɩaa lagɔwɛlɩ a glaˈmö a -nɔ -bhlʋ kwä nzɩ a ˈkä -mä ɔ yɔwʋ Biblë ˈcɩɛnɩ. A -kä Biblë ˈcɩɛ ˈwë, ˈyɩbhä lagɔdaayu ˈla nimï, -mä -naˈa ˈcɩacɩasa ˈmö, ɔ -kä -lu ˈyli köbhaa, ɔ nɩ ɲɩamö ˈdɩ nzɩ ɔ -kamöˈɛ ˈdɩmö ˈzʋ.

Mʋa ˈbhlie: -Sɩbhä a lagɔwɛlɩbiawaa, mʋa ˈbhlie -n ˈkʋa sasɛ -yi. -Sɩbhä a lagɔwɛlɩbiawa ˈla a glaˈmö a -nɔ -bhlʋ wäzɩnɔɔ -mä -naˈa ˈligbë ˈmö a Biblë a ˈcɩɛcɩʋ ˈwʋ ˈn yɩbhänɔ ˈkïbhï ˈwʋ. ˈN lagɔdaayu ˈla -kä kpälɛkpälɛɲɔ glɩnɩɩ, aa bhä bhɛnɩ a ˈkä -mä ˈɔ mäa mö nzɩ a ˈkä -mä ˈa ˈligbë ˈmö a Biblë a ˈcɩɛcɩʋ -bhɛnɩ -a? A nɩ ˈyɩbhɔ nimï sɛ ɔ zʋä ˈn ɔ yiɛ Lagɔ a gbëawɛlɩ yɩbhlɩnɩ. ˈƝupälɩ a -mii ɔ ghlɩ bhä ˈnɩ? A nɩ ˈyɩbhɔ nimï, sɛɛ lagɔwɛlɩ mö ɔ ˈyukusɛ -mä ˈpɩɔ ˈla ˈyli ˈnɩ? ˈMäna a -ma ɔ ghlɩ bhä -mä Zoova ˈa libho ˈmö ˈnɩ?

ˈNɔ ˈmö ˈn yɩbhlɩnɩsɛ nɩɩ, -lii ˈwuë ˈmö ɔˈɔ sasɛ -yi. -Aa ˈwuë -a sa, lagɔwɛlɩbiawa -wa yɛɛ -mä lagɔwɛlɩbia libho ˈmö gwälɛ, ˈwa ˈslɛlɛ -bhʋlʋbhlʋ ɛ -wʋä. (Gh. 12:6-8) -Mumuë yɛ -gɔ zaa, waˈaa bhɛnɩ wa -ɲɛ -abhʋa ˈsɔ ˈkä ˈtɛɲɩ a bɛ -sɛ. Yɩ -wʋ -sɩbhä ˈmö ˈwë, maa sɛ wa yɛɛ -mä lagɔwɛlɩbia libho ˈmö gwälɛ a za, -a bhɛnɩ -a ˈkä wa dɛ -lii a -bɛ ˈcɩɛ.