-A nɩ kä ˈslɛlɛ -mä -aa lagɔwɛlɩɩ bia libhoo ˈmö: -A nɩ ˈcɩa -wa tɛɛ ˈlili ˈwʋ

ˈSaa kää ˈŋlɩ ˈn yɩ kää dɛsɛ: Zezwii a ˈwʋ-bhlinɩwalili kä wa ˈkä “wɛlɩ ˈwuë” ɔ ˈɲʋaa ˈklʋkpamö zʋ. -Mä yɩ ˈmö, wa kä wa ˈkä -mumuë gbëawɛlɩ ˈcɩa. (Mat. 28:19, 20) -Wa yiɛ ˈlili ˈwʋ -aˈa ˈwluyɩbhäyɩbhʋʋ ˈwʋ, wa glaˈmö a -nʋa -mumuë -wa nɛmöä lagɔsɛ plɛmö Lagɔlibho a -suku ˈn wa ɲɛ -kamä ˈwa ˈligbë ˈmö a -nʋa -ɲɛ ˈwa bhɛya ˈsɔ lagɔwɛlɩɩ. Maa, sɛ wa ˈcɩɛɛ lagɔwɛlɩ ˈyize, -sɩbhä yɩ nɛmanuë dlɩ yɔwʋ ˈn wa kä sɛyɩbhlɩnɩ nɩɩ Zoova yɩbhä nɩɩ, nɩkpa ˈwuë nɩ yɩbhlɩnɩ ˈɔ ˈtɩtɩ a -tɩtɩɩ, yɩ yua -mä ˈsunɩ nzɩ wa ˈkä nɩɩ wa yɩbhä wa ˈkä lagɔwɛlɩɩ bia -bɛyɩ ˈmämö. (Gh. 10:13, 14) Wa -kä ˈwʋ ŋlu ˈwë nzɩ wa ˈkä lagɔwɛlɩbiawa -waa badize zʋʋ, wa -kʋa sasɛ ˈcɩaa, yɩ yʋa kwänɩ, wa yi ˈyli yɔwʋ ˈtɛmanɩ. Ɛˈɛ -bhö ɲɩasɛ, maa lagɔwɛlɩɩ bia libhoo glɩnɩ -lu a -mu kää dɛsɛ -wʋ ˈkʋa ˈyukusɛ kwä ˈyize -mä ˈwa lagɔwɛlɩɩ ˈmö a dɔˈwʋ.​—Lwiikö 6:40.

Sɛ -a ˈkää zʋ:

• Kwänɩ -ɔ tɛɛ ˈlili ˈwʋ lagɔwɛlɩbiabiʋ nzɩ ɔ ˈkä lagɔbɔgwɩ ɔ ˈkää ˈmö ghlɛnɩ ɔ ˈkä lagɔwɛlɩɩ bia ˈn -mi ɔ ˈkää ˈmö ˈcɩanɩ ghlɩ. Sɛ -n gïganɩɛ -naˈa lagɔwɛlɩ bia -kotoku ˈwlu, tulanɔɔ -sɩbhä ˈylimö ˈn sʋlʋnɔɔ libho -mu lagɔbɔgwɩ -n -suä kää bhʋlʋbhlʋ.

• Wa -kä nɩkpɛ peliodikö ˈɲɛɛ yi a sɛ wa bhɛnɩɛ wa ˈkä gbä a ˈdɩmözʋwɛlɩɩ -yɩ ˈcɛlɩɛ -mä Lagɔ ˈa ˈKämanɔɔ a libho a kpʋ ˈklʋ, a nɩ -sɛ -lɛ -bhlʋ nzɩ a ˈkɩ ˈgämö -bhɛnɩ. ˈPɔ swɩ ɲɛmʋ ˈmö nzɩ sɛ ɔ bhɛnɩɛ, ɔ ˈkɩ -sɩhä ˈmösɛnɩ. ˈBɔgʋ wa laa École du ministère a kpʋ 82 ˈklʋ a -lii a ghlɩnɩɛ -mä a ˈpɩɔ ˈyli ˈwʋ -bɛ ˈwʋ, a nɩ ˈyɩ ˈylɩmö. ˈƆ ˈmö pälasa ˈn sɛ ɔ -suä ˈɔ kpökpa, sɛ yɩ kää dɛsɛɛ, pɩɛnɩ yɩ wɛlɩ ˈwʋ.​—2 Kɔ. 6:3, 4.

• ˈCɩɔ pɛɛpɛ pɛɛpɛ ˈyize. Tulanɔɔ ˈa pɩɔ -wʋɲɩ ˈyli a bianɩɛ lagɔwɛlɩ a desɛɛ ˈylimö ˈn nɩkpa ɔ ˈɲɛɛ lagɔwɛlɩ a sɛɛ ɔ ˈkʋa ghlɩɩ a -lii ɔ ˈcɛlɩɛ, sɛ ɔ ˈkɩɛ libho ˈmö nʋnɩ sʋlʋnɔɔ -sɩbhä. Nɩkpa -wa yɩbhä wa ˈkä lagɔwɛlɩ ˈcɩɛ, sɛɛ ɔ ˈkʋa ghlɩɩ a -lii sʋlʋnɔɔ sɛɛ ɔ ˈkɩɛ ˈcɛlɩ. Sɛ ɔ ˈkää jw.org -ɲɛ ˈbɔgʋʋ -ke wa laa Une bonne nouvelle pour des gens de toutes nations ˈsɔ ˈmö ghlɛnɩ -mä ˈɔ lagɔwɛlɩɩ bia libhoo ˈmö, sʋlʋnɔɔ -sɩbhä. Kwänɔɔ ɔ ˈkä nɩkpa -wa yɩbhää wa ˈkä lagɔwɛlɩ ˈcɩɛ, ɔ ghlɩɛ ˈyli zʋnɩ.​—1 Kɔ. 3:6.

• -Kpaanɩ dlɩ ˈmö ˈn bhɩzɔɔ. (Prov. 25:11) -Naˈbhë -bhɛ -li a -lii nzɩ ɔ ˈkä -naˈa gbäpöö -gänɩ. Sɛ -n -suä kumö ˈn sɛ -n tula nɩɩ, -na ˈbhɩa a gbʋ plɛnɩmö, -li a -lii yɩ nʋä yi bhäla ˈyli ˈwlʋnɩ.

ˈDɩmözʋwɛlɩɩ -a ˈkää ˈcʋ nɩ ˈmö -gänɩ:

• Nɩkpɛ -n ˈcɩaa lagɔwɛlɩ, -n -ɲɔ ˈsɔ a nɩ mönɩ ˈgämö lagɔwɛlɩ biaa -mä ˈligbï ˈmö, -n -kä ˈwʋ ˈsɔ nɩkpa ˈylɩmö ˈyɩɛ mö dɔˈwʋ -wʋ, ˈn -n -käˈɛ nɩkpɛ Biblë ˈcɩa mö dɔˈwʋ -wʋ, a nɩ mönɩ ˈgämö. -N nɩˈɛ -sɩbhä a -nɔ -kä, wäzɩ lagɔwɛlɩbiaɲɔ -ɔɔ -bhlɛ -mä lagɔwɛlɩɩ bia libhoo ˈmö gwälɛ nzɩ -n -ɲɔɔ ˈsɔ a ˈkä ˈgämö libho nʋnɩ.