Imitez leur foi
1. Ɔkötɔblɩ a ˈdimasɩ -ɛ tɛɛnɩɛ ˈylɩ 19 ˈwʋ, -mä -zɩkpa ˈmö a Biblë a ˈcɩɛcɩʋ ˈmö, ˈbɔgʋ -mu -a ˈkä ɔ ˈmö ˈcɩɛnɩ ˈnɩ?
1 2015 a ˈylʋba nɩ ˈmö, ɔkötɔblɩ a ˈdimasɩ -ɛ tɛnɩɛ ˈylɩ 19 ˈwʋ, bɔgʋʋ wa laa Imitez leur foi, -mä -zɩkpa ˈmö a Biblë a ˈcɩɛcɩʋ ˈmö, ˈmö -a ˈkää ˈmö ˈcɩɛnɩ. Lagɔnɩkpa 14, ˈŋwlɩ -ɲɛ ɲɩbhɛlɩ ˈsɔ -wa ˈtɛɛnɩ a-a Lagɔ dlɩ, wa wɛlɩ -yɩ -wʋä -mä Biblë ˈmö, ˈmö bɔgʋʋ ˈla sɛnɩɛ ˈmö. -A -kʋʋ ˈmö zɛlɩ a sɛ -a ˈkää lagɔnɩkpa ˈla -mä -aˈa dila zɛmö ˈwʋ ˈylɩnɩ, -sɩbhä wʋ cɛlɩɛ. Bɔgʋʋ ˈla kwänɩ ˈn -a nʋä ˈmö naa, lagɔnɩkpa ˈla -bhölɩ a-a -tiasɛ, wa -lɛ a-a nɩkpa a -muë ˈyɩ a-a ˈklɩ Zoova a -gänɩgänɩ za. Biblë ˈmö a nɩkpa a -gömöwɛlɩ ˈmö bɔgʋʋ nɩ ghlɛnɩɛ ˈmö ˈn wʋ -ɲɩaɲɩɛ ˈdɩmözʋwɛlɩ -a ˈkää zɩˈɛ -gänɩ bhʋlʋbhlʋ -mä -aˈa zɩkpa ˈmö.—Eb. 6:12.
2. Sɛ bɔgʋʋ wa laa Imitez leur foi -wʋwʋnɩɛ ˈmö, bhïla yɩ gbʋ.
2 Sɛ bɔgʋʋ ˈla -wʋwʋnɩɛ ˈmö: -Mä bɔgʋʋ nɩ ˈmö, a dɛ -bhlʋ, wa tli -mä -pʋ -wʋɲɩ ˈklʋ wa ˈcɛlɩɛ ˈtɛɲɩ -mɛ ˈmö -lii ˈplɩɛ ˈwʋ bhlʋbhlʋ. ˈN wa zʋɛ ˈgämö -mä ˈbhlɩ a desia -yɩ -kaɲɩɛ kwänɩ -a ˈkä dɛɛ nɩkpa ˈla -bhölɩnɩ a-a ˈn ˈtɛɲɩ -mɛ ˈmö wa -bhölɩnɩ a-a yɩbhlɩnɩ. -Mä ˈcɩɛcɩɛkïbhï ˈwuë ˈmöö, dɛ mäma -wʋ -lɛ dɛ wa ˈcɛlɩɛ “Qu’en penses-tu?”, -yɩ -kaɲɩɛ kwänɩ -a ˈkä nɩkpa ˈla a -gömöwɛlɩ dlɩ kɛ ˈpanɩ ˈn -a ˈkä ˈsaa yɩ ˈcɩaɲɩɛ ˈmö nɛmönɩ. Bɔgʋʋ ˈlɛ käˈɛ desia ˈmö -yɩ kää kulelie ˈn -yɩ tula -lii ˈtikïyiea ˈwuë, wa gbäzɩɛ ˈnɛɛnɩsɛ ˈmö, nzɩ -a -kɩɩ ˈmözɛlɩ dɔˈwʋ -wʋʋ, ɛ ˈkäa -bhɩɛ nɩɩ, -lɛ -a -wʋ a-a la.
3. Sɛ -a ˈkä bhä zʋ nzɩ -a -kä ˈbɔgʋ -lɛ a ˈmö a -lii ˈcɩɛ, -a ˈku -li a -lii ˈmö ghlɩnɩ ˈnɩ?
3 Sɛ wʋ kää -aa -li a -lii ˈmö: ˈSasɛ libhonʋɲɔ a ˈbɔgʋ ɔ ˈpäɲɩɛ ˈwʋ, -wʋ -wʋä -mä ˈbɔgʋ ˈla ˈmö, sɛˈɛ wʋ -paɲɩɛ swɩɩ ɲɛmʋ ˈmö nɩɩ: “A nɩ ylɩnɩ -lii -mä a dila zɛmö ˈwʋ, a nɩ ˈtɛmanɩ ˈyli yɔwʋ a ˈkä -lii ˈmö ˈnʋ. A nɩ yɛla -lii ˈmö, sɛ yɩ -wʋä -mä nɩkpa ˈla a dila zɛmö yɩ ˈkä -sɩbhä -mä ˈa dila zɛmö -wʋmö. ˈSaa wa ˈyɩ a-a ˈylɩmö a nɩ ˈyɩni -mä ˈa dila zɛmö ˈylɩmö. Ɛ -käa abhʋa, sɛ a ˈkäa zʋ -ɲɛ ˈwa sɛ wa zʋ a-a ˈsɔ a nɩ kwänii yɔwʋ.” Wa -kä nɩɩ, -a nɩ ylɩnɩ -lii dlɩ zɛmö ˈwʋ nʋʋ, ɛˈɛ -bhö nɩɩ, a ˈkä ˈfʋ dila biaa, maa wɛlɩ wa sɛnɩɛ ˈmö, ˈsaa yɩ sɛnɩɛ ˈmö, -a ˈkɩ dlɩ zɛmö ˈwʋ yɩlɩnɩ ˈn -a ˈkä -aɲɩ nɩkpa -waɲɩ gbʋ wa bhïlaa a ˈbhle ˈmö zʋ, ˈmö wa gaa. -A ˈkä -sɩbhä zʋ a dɔˈwʋ, -a kä -a ˈkä ˈtɛɲɩ ˈwʋ ˈlibhï ˈn -a ˈkɩ dlɩ kɛ ˈpänɩ. (Neh. 8:8) ˈN ˈsaa -a ˈkää ˈcɩɛ -kä -mä ˈcɩɛcɩɛkïbhë a jijoˈwʋ -wʋ, -ɔ ˈkää ˈcɩɛcɩʋ ˈla -su nɩ ˈlibhï segɔdia 30 ɛ -käˈɛ 60 a sɛ ˈwʋ ɔ ˈkä -wa -pʋnɩɛ ˈyukwli ˈsaa -a ˈcɩɛ a-a zlɩ ˈla ɛ ˈplɩɛ ˈmö ˈwʋ ligbanɩ. -Lɛ a zlɩ ˈla ˈmö a ˈsaa -a ˈkää ˈcɩɛ ˈmö, dɛ wa zʋä “Qu’en penses-tu?” nɩ -mä -wʋ, nimïyɩbhäkïbhë -bhlʋ ɛ -käˈɛ ˈsɔ ˈmö -ɔ nɩ ˈyɩbhänuë ˈwʋ ɔ ˈkuë ˈsaa wa ˈcɩɛ a-a ˈwʋ ligbanɩ.
4. ˈSaa kä ɔ ˈŋlɩ ˈn -a kä ɔ -a ˈkä bɔgʋʋ wa laa Imitez leur foi ˈcɩɛ ˈnɩ?
4 Sɛɛ gbisɔgbisɔɲu bhluˈɛ pɛɛpɛ pɛɛpɛ dʋdʋʋ, -sɩbhä ˈpɩwʋ nɩ -a -wʋä dɛɛ ˈmö ghlɛnɩɛ ˈki -mimii ˈmö ˈn wʋ sɛnɩɛ pɛɛpɛ pɛɛpɛ -aˈa dlɩˈwʋkänɔ ˈwʋ. ˈBɔgʋ nɩ, -mä La Tour de Garde ˈmö a dɛ wa zʋä nɩkpa a -gömöwɛlɩ ˈyize, ˈmö wa ylɩɛ ˈwʋ ˈn wa yuä -bhɛ. -Lɛ a ˈpɩɔ ˈla a sa, Zoova mɔ -ɲɩaɲuä ɔ -kaɲɩ kwänɩ -aˈa dlɩˈwʋkänɔ ˈkä zumanɩ. (Za. 1:17) A-a nɩ yi ˈkwädlɩ -aˈa -zɩkpa ˈmö a Biblë a ˈcɩɛcɩʋ ˈwʋ, -a -kä ˈcɩɛ dɔˈwʋ -wʋ, -a -kä bhɛnɩ, -a nɩ bhïlamö, -sɩbhä a dɔˈwʋ, -a yi sasɛ wʋ ˈmö a -li a -lii ghlɩ!