-A -pʋnɩ Lagɔ ˈyukwli: Sɛɛ -a ˈkʋ ɔ ˈmö ˈcɩanɩ?

-Muë ˈmözɛlɩzɛlɛ ˈtɛɛnɩɛ kɛˈmö, -a ˈkʋa Biblë ˈmö a tɛkäkïbhï wa cɩɛɛ tɛɛ sʋlʋnɩ nza wa -bhɛɛ blosu -A -pʋnɩ Lagɔ ˈyukwli. ˈCɩɛcɩɛkïbhë -bhlʋ, kpɩ ˈsɔ a libhïä ˈwʋ Yɩ ˈmö a fotii kä -lii yɔwʋ, -yɩ sʋlʋnɩɲɩɛ sɛɛ -a ˈkɩɛ -gänɩ nzɩ -a ˈkä ˈcɩa.

Fotii, -yɩ -wʋä -mä -A -pʋnɩ Lagɔ ˈyukwli ˈmöö, yɩ -bhlʋ -kpɔ mii -wʋä -mä -A -pʋnɩ Lagɔ ˈyukwli -a ˈkä ˈkwädlɩnɩ -bhölɩ ˈmö. Maa wʋbhlɩ, wʋ kä ˈcɛlɩcɛlɩlii a -bɛ ˈmö ˈn -wa -yiɛ ˈtikïyie ˈwʋ ˈmözɛlɩsɛ bhɛnɩ wa ˈkʋ ˈmö ˈcɩɛnɩ. -Ɔ cɩɛɛ Biblë -kä -A -pʋnɩ Lagɔ ˈyukwli -su, lagɔwɛlɩbiawaa -mumuë wabhlɩ, -A -pʋnɩ Lagɔ ˈyukwli -a ˈkä ˈkwädlɩnɩ -bhölɩ ˈmö wa libhïä ˈwʋ. Wʋ kpɩ -mimii kä -zipli ˈklʋ, -yɩ kää wɛlɩ -mimii ˈmö. -Ɔ cɩɛɛ Biblë -kä bhɛnɩ, a nɩ yɩlɩɩ yɔwʋ.

Blosu ˈla, ˈmö -a nɩ cʋ ˈla ˈmö ˈɲɛɛ yi -kë, -a bhɛnɩ -a ˈkʋ ˈtɛɲɩ ˈwuë ˈmö nɩkpa ˈɲɛ. -N -kä nɩkpɛ Biblë ˈcɩa dɔˈwʋ -wʋʋ, ghlɛnɩ foti ˈla ˈmö nzɩ sɛɛ Biblë gbää yɩ dɔˈwʋ -n ˈkɔɲɩ dlɩ -gömö -sɛsɛnɩ. ˈYɩbhänɔ ˈkïbhï ˈwʋ, n ˈkäa sɛ -yi nɩɩ, ɔ yɛ ˈsaa -n ˈcɩɔ ˈmö ˈnʋʋ, -n ˈkä ˈɔ dlɩ kɛ zɩ. Biblë a gbɛlɩ -yɩ -wʋä -lɛ kpʋ zɛmö, a nɩ zɛli ˈmö ˈn a nɩ yɩlii yɔwʋ. Blosu ˈla -kä zɛmö bhɩɛ ˈlɩlɩlɩ, ˈbɔgʋʋ wa laa ˈSaa Biblë bhɛnɩ bhä ɛ -kaɲɩ ˈcɩa ˈnɩ? a nɩ ˈcɩɛnu ˈmö, -n ˈkɔ kwänɩ -këë, ɔ ˈkä badizee.