Ghlɛnɩ videwii ˈmö -n ˈkä ˈcɩa

Videwii, fotii, ˈn -sɩbhä a -lii -mimii, yɩ ˈsunɩ -mä nɩkpaa ˈn wa -pʋnɩɲɩɛ sasɛ ˈyukwli, yɩ kwänʋa ˈn ˈsaa -a ˈcɩa, ˈwa nwiɛ ˈmö ˈn wa zwiɛ ˈwlumö. Zoova, -aˈa ˈcɩaɲɔɔ ˈkɔdɔɔ, -sɩbhä a -lii ˈmö ɔ ghlɛnɩ a-a ˈmö ˈn ɔ ˈcɩa dɛsɛkälii. (Gn 15:5; Jr 18:1-6) Zezwii, ˈcɩaɲɔɔ ˈkɔdɔɔ ghlɛnɩmö a-a -sɩbhä a -lii ˈmö ˈn ɔ ˈcɩa nɩkpaa. (Mt 18:2-6; 22:19-21) ˈYlʋböyiea -yɩ ˈplɩɛ ˈmö, videwii ˈwälanɩ -li a -lii ˈyli, -yɩ kwänɩɲɩɛ teɲii. -N -kä nɩkpɛ Biblë ˈcɩa dɔˈwʋ -wʋ, -n ghlɛni ɔ sasɛ ˈmö -a?

Videwii kʋgbä ˈmö wa -bhɛ, yɩ -kaɲɩ kwänɩ -a ˈkä blosu wa laa Lagɔ a ˈtɩtɩ a -tɩtɩɩ! ˈmö ghlɛnɩ nzɩ -a ˈkä Biblë nɩkpa ˈcɩa. -Mä blosu ˈla ˈmö a nimïyɩbhäkïbhï -yɩ yuluä, yɩ kä bhʋlʋbhlʋ yɩ video. Ɛtɛnɩ ˈklʋ a dɔˈwʋ, -mä videwii ˈla ˈmö, -n -kä nɩkpɛ ˈcɩa dɔˈwʋ -wʋ, ˈtɛɲɩ -mɛ ˈmö -n ˈkɔɔ video ˈylimö tulanɩ ˈn dɛɛ -n ˈkää ˈwʋ pɩɛnɩ, -sɩbhä a -lii -wʋ -mä. -Aˈa lagɔbɔgwɩ -mimii -a ˈcɩanɩɛ ˈmö a videwii -bhölɩˈɛ.

-Mɔ -n ˈcɩa Biblë, -n -ɲɔɔ ˈsɔ a yɛ ɔ Biblë ˈmö a ˈkïbhë yɔwʋ yɩlɩ, -a ˈtɛɛnɔɔ kɛˈmö ɔ ˈka ˈmö ˈnʋ a dɔˈwʋ -a? Yɔlɔylʋ ˈmö ɔ -wʋ ɔ -kamö a za ɔ -a? Yɩlɩ -mä jw.org® -ɲɛ JW Télédiffusion® ˈsɔ ˈklʋ nzɩ video -wʋ ˈkɔɔ kwänɩ, -n ˈkʋ -mä -sɛ. -N ˈcɩa Biblë, -n -ɲɔɔ ˈsɔ a bhɛnɩ a ˈkʋ ˈgämö ylɛnɩ ˈn a ˈkä wʋ dɛsɛkäkïbhï yɔwʋ yɩlɩ.

Cwɩɩ ˈwuë ˈmö, wa bhɛ videwii ˈlilili. -N -kɩɩ ylɛ dɔˈwʋ, sɛɛ -n ˈkiɛ ˈmö ghlɛnɩ nzɩ -n ˈkä -mumuë kwänɩ -n -kʋa ˈcɩa dɔˈwʋ, mö -n nɩ ˈpä ˈwʋ dlɩ.