˗A ˗ɲɛ nɩkpɛ ˗kä ˈdɩ ˗sɛɛ yi a sɛ ˗a ˈkää gbä, sɛɛ ˗a ˈkiɛ ˈmö ghlɛnɩ

˗A ˗ɲɛ nɩkpɛ ˗kä ˈdɩ ˗sɛɛ yi a sɛ ˗a ˈkää gbä a kïbhïï, lagɔdaayuëa ˈkɩ ˗bhɛ a dɔˈwʋ, libho a ˗bɛ wa nʋä. ˈN lagɔwɛlɩbiawa a ˗bɛ ˈyɩ ˈylɩmö nɩɩ, yɩ kwänuë. Maa kii nɩkpaa ˗wʋä ˈmö ˗mä bhlɩɩ ˈwuë ˗gömö, yɩˈɩɛ ˈmö mlɩnɩ. Zaa lagɔdaayuëa ˗kä lagɔwɛlɩɩ bia dɔˈwʋ ˗wʋ, bhɛnɩ wa ˈkä sɛ ˗mämaa ˈzʋ. Wa bhɛnɩˈɛ wa ˈkä kïbhïï ˗mimii ˈmö ghlɛnɩ, ˗yɩ ˗ŋwa ˈwa pɩɔ ˈyli a ˗nʋa ˈwʋ. Maa lagɔwɛlɩbiabiu ˗wʋ ˗wʋä ˈwʋ dɛ a ˈtɛɲɩ ˈmö a ˈdɩmözʋwɛlɩɩ, lagɔdaayuëa ˈwuë kä wa ˈkɩ ˗gänɩ. Ɛˈɛ ˗bhö ɲɩasɛ, maa sɛɛ Zezwii nʋä nɩɩ, Lagɔ ˈa ˈKämanɔɔ a ˈtɩtɩ a ˗tɩtɩɩ, yɩ kä yɩ ˈkä saa ˈwuë ghlɛ, mö ˗a yɩbhää ˗a ˈkä ˈklʋkpamö ˈzʋ.—Mt 24:14.

Lagɔdaayuëa ˗kä ˗mä ˈwluyɩbhäyɩbhʋ ˈwʋ ˗sukuyu a libho ˗bhɛ dɔˈwʋ ˗wʋʋ, ˗a ˗ɲɛ nɩkpɛ ˗kä ˈdɩ ˗sɛɛ yi a sɛ ˗a ˈkää gbä a kïbhïï ˗yɩ ˗wʋä ˗mä ˈwluyɩbhäyɩbhʋʋ a ˈbɔgʋ ˈmö, wa kä wa ˈkɩ ˗gänɩ. Nimïyɩbhäkïbhëa, Biblë a gbɛlʋ, ˈn kïbhëa wa ˈkää ˈligbëlowlii yɔwʋ tɩɩ, wa bhɛnɩ wa ˈkɩ ˈmö zigbanɩ. Maa wa ˗kä ˗mä ˈwluyɩbhäyɩbhʋʋ a ˈbɔgʋ ˈmö nɩɩ wa nɩ ˗gäni klɩpaa nʋʋ, wa kä wa ˈki ˗gänɩ. ˈDɩmözʋwɛlɩɩ ˗yɩ ˗wʋä ˗mä 2020 a Zwɩɛ a ˈwluyɩbhäyɩbhʋʋ a ˈbɔgʋ ˈmö, ˗lɛ kpʋ 8 ˈklʋ yɩ yɛ ˈmö zigbonɩ. ˗Minɩ ˈlɛ mii ˈplɩaˈa ˗lɛ yɩ ˈbhle ˈmö.