-A nɩ kä ˈslɛlɛ -mä -aa lagɔwɛlɩɩ bia libhoo ˈmö: Ghlɛnɩ Blosu wa laa Lagɔ ˈa ˈtɩtɩ a -tɩtɩɩ! ˈmö -n -ɲɛ ˈligbëlowli ˈsɔ ˈkä -lɛ ˈɔ -gbëlea nuë ˈwʋ Biblë a ˈcɩɛcɩʋ tɛɛ

ˈSaa kää ˈŋlɩ ˈn yɩ kää dɛsɛ: -A -kä -a ˈkä nɩkpa kwänɩ wa ˈkä Zezwii a -nʋa zʋʋ, -a kä -a ˈkʋa Lagɔ ˈa wɛlɩɩ ˈcɩa. (Mat. 28:19, 20) Lagɔbɔgwɩɩ wa -ɲɩaɲɩɛ, -a -kii ˈmö ghlɛnɩ, -a bhɛnɩ -a ˈkä sasɛ Lagɔ ˈa gbëawɛlɩ ˈcɩa. Blosu wa laa Lagɔ ˈa ˈtɩtɩ a -tɩtɩɩ!, wʋ -kaɲɩ kwänɩ -a ˈkä sasɛ Lagɔ ˈa gbëawɛlɩɩ ˈcɩa a za wa -bhɩʋä. -A bhɛnɩ -a ˈku ˈmö ghlɛnɩ, nzɩ ˈligbëlowli -a -ɲɛ gbanɩɛ -aa tɛkäˈwʋ ˈsɔ ˈkä -lɛ ˈɔ gbëlea nuë ˈwʋ, Biblë a ˈcɩɛcɩʋ tɛɛ.

Sɛ -a ˈkää zʋ:

• Sɛɛ -a bhɛnɩɛ -a ˈkä gbä, -yɩ -wʋä -mä ziple ˈmö, ˈyi ˈylɩmö.—Ylɩˈɛ -mä ˈylʋba wa laa 2013 a Maasɩ a Lagɔ ˈa ˈKämanɔɔ a libho a kpʋ ˈklʋ.

• -Naɲɩgäsɛ a -nʋ -n ˈkää ˈmö ˈcɩanɩ, kä wʋ ˈkä -mä -naˈa lagɔwɛlɩbia -kotoku ˈmö -wʋ. -N käˈɛ -n ˈkä bloswɩ -mimii a -bɛ -n ˈkää nɩkpa ˈɲɛ -su.

• A nɩ -bhɛ zɛmösɛkïbhë -bhlʋ, ɛ -käˈɛ ˈsɔ a ˈyize. A nɩ tɩ minitie kʋgbä yɛˈmö bhlɩ.

ˈDɩmözʋwɛlɩɩ -a ˈkää ˈcʋ nɩ ˈmö -gänɩ:

• Bhibhee Lagɔ nzɩ Biblë a ˈcɩacɩatʋ -kamöa dlɩ zɛmö -wʋ. Bhibhe Zoova nzɩ -n -ɲɛ nɩkpa ˈsɔ ˈkä Biblë a ˈcɩɛcɩʋ tɛɛ, nzɩ -n ˈkäˈɛ nɩkpɛ -a mɔ -yiɛ sasɛ Biblë a ˈcɩasɛ glɩnɩ.—Fil. 2:13.

• -Mä ˈa ˈligbë ˈmö a lagɔwɛlɩɩ a ˈcɩɛcɩʋ ˈmö, -n -käˈɛ -na ˈyize Biblë ˈcɩɛ dɔˈwʋ -wʋ, ˈsaa ˈcɛlɩɛ -mä ziple ˈmö, zwi dlɩ zɛmö. -N -kä -sɩbhä zʋʋ, -n yi nɩkpɛ -lɛ -gbële nuë ˈwʋ lagɔwɛlɩɩ ˈɲɛnɩ kumosusɛ.

[Yɩ pɔ jijoˈwʋ, kpʋ 1]

A -kä -mä ˈligbï ˈmö lagɔwɛlɩ bianɩ dɔˈwʋ -wʋ:

“Sɛɛ zɩkpa ˈkää zɩkö -wʋ a wɛlɩ ˈmö nɩkpa a -bɛ ˈpanɩɛ dlɩ kɛ, nza -a yeaɲɩɛ ˈylɩmöä nzɩ -a ˈkä lɛ a ˈkibhï ˈla, ˈgämö yɔwʋ ylɩnɩ. -N pä bhä dlɩ nɩɩ, -lii yi ˈylɩ -bhlʋ ˈmö -mä mö -a? [ˈTatinɔ ˈyi ɔ ˈkä -gömö -sɛ.] Sɛɛ Biblë kää ˈtɩtɩ -yɩ ˈtɛmanɩɛ dlɩ ˈwʋ ˈmö, nɩkpa a -bɛ yɩ sɛɛ zuzu -gömö. Yɩɛ nimïyɩbhäkïbhï -mimii a zɛmösɛna -yɩ -wʋa -mä Biblë ˈmö miɛ dɛˈɛ.” ˈƝɛ ˈligbëlowli blosu -bhʋ ˈn ˈɲɔ ˈdɩ nɩɩ, ɔ nɩ ylɩ -mä wʋ -gömö, -mä a nimïyɩbhäkïbhï -yɩ -wʋa -mä, ɔ nɩ -sɛ -lɛ -bhlʋ -a kɔɔ teɲii dlɩ sɛ. Ɔ -kä -lɛ -bhlʋ -sɛ ˈwë, kälɩ blosu ˈklʋ nzɩ -n ˈkɔ sɛɛ wa ˈcɩaa Biblë sʋlʋnɩ. ˈƝɔ ˈdɩ nɩɩ, -n yi ˈwʋ ˈsɔ yinɩ nzɩ a ˈkä zɛmösɛkïbhë -mäma ˈcɩɛ.