ˈCƖƐCƖƐKÏBHË 26
˗Yɩ kä ɔ ˈŋlɩ ˈn yɔlɔylʋ ˗ɲɛ ˗lizokuu ˈwuë ˈsɔ ˗bhölɩ ɔ ˈnɩ?
“ˈSaa kä ɔ ˈŋlɩ ˈnɩ?” saˈa ˗sɩbhä nɩkpa a ˗bɛ nʋä, ˗lizoku ˗kʋa ghlɩ! Maa Biblë sɛ sasɛ kïbhë ˈlɛ zɛmö!
1. ˈSaa Sataa nʋ ɔ ˈn ˗lizokuu ˗bhölɩ ɔ zɩˈɛ ˈnɩ?
Zuzukuzoku a ˈkifii Sataa, Lagɔ ˈmö ɔ ˗sɛɛ ˈklʋkpamö. Sataa yɩbhä a˗a ɔ ˈkä nɩkpa ˗gömö ˈkämanɩ, yɩ za, ɔ yiɛ tɛkänɩkpaa Adaa ˗ɲɛ Ɛɛvö ˈsɔ ˗mä ˈsunɩ, ˈn wa yiˈɛɛ wabhlɩ Sataa a saa Lagɔ ’klʋkpamö ˗sɛ. Sataa ˈkä ˗sɩbhä ˈzʋ a dɔˈwʋ, Ɛɛvö ˈmö ɔ nʋä ylʋ. (Genèse 3:1-5) Sɛ ɔ ˈkää bhïla nzɩ Ɛɛvö ˈkä dlɩ ˈpä nɩɩ, Lagɔ ˈnɩɛ yɩbhä ɔ ˈkʋa ˗lu ˗bhlʋ ˗wʋ nɛnɩɛ ˈɲɛ, ˗sɩbhä ɔ bhïla. ˗Mä ˈɔ bhïlabhïlasaa ˈmö, sɛˈɛ ɔ yɩbhä a˗a ɔ ˈkä gbä nɩɩ nɩkpa ˈnɩ Lagɔ ˈklʋkpamö ˈzʋ, wa yi ˈmäna ˈmö ˗wʋ. ˗Zlɩɩ Sataa ˈɲɛɛ Ɛɛvö ˈdɩ nɩɩ wa ˈnaa ˈkä ˈkuu, ˗lɛ ɔ tɛɛ nɩkpa a ylʋ ˗nʋnwɛ. Nza Biblë nʋä nɩɩ Sataa, “ɔ ˈwuë yioɲɔ a ˈyize ɔ glɩnɩɛ. ˈMö yio ˈwuë ˈbhöönɩɛ ˈmö.”—Zaa 8:44.
2. ˈSaa Adaa ˗ɲɛ Ɛɛvö ˈsɔ ˗sɛ ɔ ˗lɛ ˈnɩ?
Zoova nɛnɩ a˗a teɲii dlɩ zɛmö Adaa ˗ɲɛ Ɛɛvö ˈsɔ a ˗gömö. Ɔ lɛ nɩɩ wa bhɛnɩ wa ˈkä Edɛɛnɩ a ˈlagblɛɛ ˈmö a swi ˈwuë a bhïï li. Maa suu ˗bhlʋ kpöö, wʋ bhïï ˈmö ɔ gbää wa nɩ tɩ li. (Genèse 2:15-17) ˗Maa sɛɛ Zoova ˈɲʋä ˈdɩ, wa ˈniɛ ˈklʋkpamö ˈzʋ. Ɛɛvö, “su ˈla a bhëa ˈmö ɔ ˈlibhïä ˈwʋ ˈn ɔ yea li.” Bhäla, Adaa “yiˈɛɛ ɔbhlɩ subhëa ˈla ˈwʋ ˈlibhï ˈn ɔ yea li.” (Genèse 3:6) Wa ˈsɔ ˗kpɔ, saˈa ˗sɩbhä wa ˗sɛɛ Lagɔ ˈklʋkpamö. Adaa ˗ɲɛ Ɛɛvö ˈsɔ, waˈaa ˈɲiɲlolii ˈmö ˗kä zaa, wa bhɛnɩ a˗a wa ˈkä ˈsaa nɛnɩɛ nʋ. ˗Maa, ˗blipäsɛ wa ˗sɛɛ Lagɔ ˈklʋkpamö, wa yiɛ ˈɲiɲlolinʋwa ˈzʋ ˈn wa yiɛ Lagɔ ˈa ˈKämanɔɔ kplɩsɛ tlinɩ. Zaa, sɛ wa ˈzʋä a za, wa yɔlɔ teɲii ˗mä ˈwa zɩkpaa ˈmö. (Genèse 3:16-19).
3. ˈSaa Adaa ˗ɲɛ Ɛɛvö ˈsɔ ˗sɛ ˗lɛ, ˈsaa yɩ nʋʋɲɩ ɔ ˈwlu ˈnɩ?
Adaa ˗ɲɛ Ɛɛvö ˈsɔ, ˈsaa wa nʋä a za, ˈɲiɲlolinʋwaa wa ˈzʋä ˈn wa yiɛ ˈɲiɲlolii ˈwa yuëa ˈpïlanɩ. Sɛˈɛ Biblë gbää Adaa a dɛ nɩɩ: “Nɩkpɛ ˗bhlʋ ˗kpöö, Adaa, mɔɔ ˗lɛmöä mäˈä ˈpɩwʋ ˈɲiɲlolinʋnwɛ. ˈƝiɲlolinʋnwɛ ˈla, mɛɛ ˗lɛmöˈɛɛ ɛbhlɩ ˈkwie. Ɛ za nɩkpaa ˈwuë kuä.”—Ghlɔɔmö a ˗nʋa 5:12.
˗Lii a ˗bɛ kä ˈŋlɩ ˈn ˗a yɔlɔɔ. Dɛ ˗mämaa a dɔˈwʋ, ˈsaa ˗a ˗sɛɛ ˗lɛ ˈnɩɛ nɛnɩ nza ˗a yɔlɔɔ. ˗Mɔmɔɔ ˈa ˈsaa ɔ ˗sɛɛ ˗lɛ bhɛnɩˈɛ yɩ ˈkä gbä nzɩ ˗a ˈkä yɔlɔylʋ ˈmö ˗wʋ. Dɛ ˗mämaa a dɔˈwʋ, dɛɛ ˗a ˗wʋä ˈn ˈtɛɲɩ ˗a ˗wʋä ˈmö, yɩ käˈɛ ˈŋlɩ ˈn ˗a yɩɛ ˈklɩ.—Zɛlɩ Ecclésiaste 9:11 ˈmö.
ˈCƖƐ ˗LII ˗MIMII
˗Yɩ kää ˈŋlɩ ˈn ˗a ˗yiɛ sɛ nɩɩ Lagɔ ˈmö ˗aˈa yɔlɔylʋ ˈnɩɛ ˈmö ˈbhöönɩ, ˈn ˗a ˗käˈɛ yɔlɔylʋ ˈmö ˗wʋ, ˈsaa yɩ nʋä Lagɔ ˈwlu, ˈyi ˈylɩmö.
4. ˗Mɔ ˗aˈa yɔlɔylʋ ˈbhöönɩ ɔ ˈmö ˈnɩ?
Nɩkpa a ˗bɛ pä dlɩ nɩɩ Lagɔ mɔɔ ˈkämanɩɛ mäˈä ˈpɩwʋ a nɩkpa ˈwuë ˗gömö. ˗Tiawɛlɩɩ bhä ˗a? ˈZʋ ˗lɛ VIDEO.
Zɛlɩ Zaakö 1:13 ˈn 1 Zaa 5:19 ˈmö, ˈn a nɩ yɩlɩ nimïyɩbhäkïbhë ˈlɛ yɔwʋ:
Lagɔ ˈmö ˗aˈa yɔlɔylʋ ˗ɲɛ ˗lizoku ˈwuë ˗yɩ ghlɩɲɩɛ ˈsɔ ˈbhöönɩ ɔ ˈmö ˗a?
5. ˈSaa Sataa ˈa ˈkämanɔɔ ˈwälanɩ ɔ ˈyli ˈnɩ?
Zɛlɩ Genèse 3:1-6 ˈmö, ˈn a nɩ yɩlɩ nimïyɩbhäkïbhï ˈlɛ yɔwʋ:
Yiodɩ a ˗mi Sataa ˗sɛ ɔ ˈnɩ?—Yɩlɩ ˗mä gbɛlʋ 4 ˈn 5 ˈmö.
Sɛɛ Sataa tula ɔ ˗mä ˈɔ bhïlabhïlasaa ˈmö nɩɩ, Zoova ˈnɩɛ ˈyɩbhä ɔ ˈkä nɩkpaa ˗lu a ˗mu nɛnɩɛ ˈɲɛ ˈnɩ?
Sɛɛ Sataa tula ɔ nɩɩ Zoova ˈnɩ nɩkpa ˗gömö ˈkämanɩ aˈbhë ˗kë, wa bhɛnɩ wa ˈkä ˈmäna ˈmö ˈnɩ?
Zɛlɩ Ecclésiaste 8:9 ˈmö, ˈn a nɩ yɩlɩ nimïyɩbhäkïbhë ˈlɛ yɔwʋ:
Sɛɛ nɩkpa ˈmaa ˈkäa Lagɔ ˈa ˈKämanɔɔ ˈklʋkpamö ˗sɛ, tɛɛnɩ ˗lɛ ˗këë zɩˈɛ, ˈsaa plɩ ɔ ˈwʋ ˈnɩ?
1. Adaa ˗ɲɛ Ɛɛvö ˈsɔ ˈnɩɛ a˗a ˈɲiɲlolii ˈmö ˗kä ˈn ˗mä ˈbhlɩ a ˗bhlɩɩ ˈmö ˗mä wa ˗bhölɩnɩ a˗a. ˗Maa, Sataa ˈmö wa ˗pʋnɩɛ ˈyukwli ˈn wa yiɛ Zoova ˈklʋkpamö ˗sɛ.
2. Wa ˗sɛɛ Zoova ˈklʋkpamö ˈwë, ˈɲiɲlolii mi, yɔlɔylʋ mu ˈn ˈkwie, yiɛ saa ˈwuë mlɩmanɩ.
3. Zoova yiaˈa ˗pa ˈɲiɲlolii, yɔlɔylʋ ˗ɲɛ ˈkwie ˈsɔ sɛ ˗sɛ. Nɩkpa ˈnaa ˈkäa ˈɲiɲlolii ˈmö ˗kä ˈn ˗mä ˈbhlɩ a ˗bhlɩɩ ˈmö ˗mä wa ˈkää ˗bhölɩnɩ.
6. ˗A ˗kä yɔlɔylʋ ˈmö ˗wʋ yɩ kälɩ teɲii Zoova yɔwʋ
˗A ˗kä yɔlɔylʋ ˈmö ˗wʋ, ˈsaa yɩ nʋ ɔ Lagɔ ˈwlu ˈnɩ? ˈBhlɩlowli Daviidɩ ˗ɲɛ Zezwii a tietieɲɔ Piɛlɩ ˈsɔ a sɛ wa gbää, ˗a nɩ ˈyiɛ ˗ka ˈylɩmö. Zɛlɩ Psaume 31:7; ˈn 1 Piɛlɩ 5:7 ˈmö, ˈn a nɩ yɩlɩ nimïyɩbhäkïbhë ˈlɛ yɔwʋ:
˗N yɩbhlɩnɩɛ sɛ nɩɩ ˗a ˗kä yɔlɔylʋ ˈmö ˗wʋ, Zoova yɩlii ˈwʋ ˈn yɩ kälɔ teɲii yɔwʋʋ, ˈsaa yɩ nʋmö bhä ˈwlu ˈnɩ?
7. Zoova yi mäˈä ˈpɩwʋ a yɔlɔylʋ ˈwuë ˈyli bhɩa
Zɛlɩ Isaïe 65:17 ˈn ’Ylimötulanɩlii 21:3, 4 ˈmö, ˈn a nɩ yɩlɩ nimïyɩbhäkïbhë ˈlɛ yɔwʋ:
Sɛɛ ˗a ˗yiɛ sɛ nɩɩ Zoova yiaˈa ˗pa ˗lizokuu ˈwuë ˗yɩ yɔlɔaɲɩɛ ˈyli bhɩa, ˗yɩ kä ɔ ˈŋlɩ ˈn yɩ ˈtɛmanɩ ɔ dlɩ ˈwʋ ˈnɩ?
˗N ˗yi a˗a bhä sɛ ˗a?
Dɛɛ Sataa ˗sɛ a˗a ˈɔ yiodɩ a tɛkänɩɩ, Zoova ˈmö ɔ ˈlibhïnɩ a˗a yiodɩ ˈwʋ. Mii sɛɛ zɛmö nɩɩ Zoova ˈa ŋlɩɩ ˈmö ɔ päla fɩ, ˈn ˈkämanɩɲɔ a ˗mɔ ˗suä ɔ ˗nʋa ˗ɔɔˈmözlɔnɩsɛ, ˗ɔɔɔ ˗wawʋ dlɩ zɛmö ˗kä, ˗sɩbhä ɔ ˈlibhoo ˈwʋ. Zoova ˗kä zɩkö yɔlɔylʋ a kii ˈwuë ˈyli bhɩa, ɔ yi ˈɔ ŋlɩɩ ˈwlɩlɩ päla. Ɔ yi ˈbhlɩbhë ˈylimö tulanɩ nɩɩ, ˈɔ ˈKämanɔɔ muu glɩnɩɛ ˈKämanɔɔ a ˗mu nɛnɩɛ teɲii. Zoova ˈkä ɔ ˈŋlɩ ˈwlɩlɩ päla, yɩ ˗lɛ ˗lu a ˗mu kää teɲii dɛsɛ.—Matie 6:9, 10.
NƖKPA ˗MUMUË LƐ NƖƖ: “Lagɔ ˈkɩ ˈylɩmö ˗a ˗kɔa dlɩ ˈtɛɛnɩ a za, nza ɔ gbää ˈn ˗a yɔlɔɔ.”
Sɛɛ ˗n ˈkä ɔ gbä ˈnɩ?
DƐSƐKÄKÏBHÏ
Zuzukuzokuu a ˈkifii Sataa ˗ɲɛ tɛkänɩkpa ˈsɔ, mʋa kää ˈŋlɩ aˈbhë ˈn ˗lizokuu ˗zuä zɩˈɛ mäˈä ˈpɩwʋ. ˗Aa gbʋ plɛnɩ teɲii Zoova ˈn ɔ yiaˈa ˗pa yɔlɔylʋ a kii ˈwuë ˈyli bhɩa.
ˈWʋligbanɩkïbhï
Zuzukuzokuu a ˈkifii Sataa, sɛ ɔ nʋ ɔ Ɛɛvö ylʋ ˈnɩ?
Adaa ˗ɲɛ Ɛɛvö ˈsɔ, wa ˗sɛɛ Lagɔ ˈklʋkpamö, ˈsaa yɩ ˈwälanɩ ɔ ˈyli ˈnɩ?
Sɛ ˗a ˗yi ɔ sɛ nɩɩ ˗a ˗kä yɔlɔylʋ ˈmö ˗wʋ, yɩ kälɩ teɲii Zoova yɔwʋ ˈnɩ?
YILII YƆWƲ
ˈSaa Biblë la ɔ ˈɲiɲlolii ˈnɩ?
Sɛɛ Sataa gbää ˗mä Edɛɛnɩ a ˈlagblɛɛ ˈmö, zeli ˈmö.
« Pourquoi Dieu permet˗il les souffrances ? » (La Tour de Garde, 1er janvier 2014)
Nimïyɩbhäkïbhë ˗bhlʋ ˗a kla a˗a teɲii dlɩ ˈyli, ˈyɩ a zɛmösɛna ˈylɩmö.
˗Yɩ kää ˈŋlɩ ˈn yɔlɔylʋ ˗zuä zɩˈɛ mäˈä pɩwʋ, nɩkpɛ ˗bhlʋ ki ˈmö ˈnʋ.