Batɛɛmö ˗lɛ ˗lu a ˗mu kää dɛsɛ!

Zezwii nʋ a˗a nɩɩ, Klɩtɩɛwaa kä wa ˈkä badizee. (Zɛlɩ Matie 28:19, 20 ˈmö.) ˗Maa, ˈsaa wa la ɔ batɛɛmö ˈnɩ? Nɩkpɛ a ˗mɔ yɩbhää ɔ ˈkä badizee, ˈsaa ɔ kä bhä ɔ ˈkä nʋ ˈnɩ?

1. ˈSaa wa la ɔ batɛɛmö ˈnɩ?

Glɛkögbʋ ˈmö wa ˗kä “batɛɛmö” nʋʋ, mii sɛɛ zɛmö nɩɩ wa ˈkä ˗mä nɩkpɛ ˈɲu ˈmö ˈzʋ, nzɩ ɔ ˈkä “ˈwʋ ˈmla.” Wa badizee Zezwii ˗mä zludɛɛ a ˈɲudɔlʋ ˈmö, ˗mä ˈɲu ˈmö ˗mä ɔ ˈmla ˈwʋ, ˈn ɔ yiɛ ‘ˈwʋ ˈwlʋ.’ (Maakö 1:9, 10) Zezwii a saa ˗sɩbhä wa badizee zɩˈɛ ˗tiamö a Klɩtɩɛwaa. ˗Mä ˈɲu ˈmö ˗mä wa zuë ˈn wa mlaa ˈwʋ.

2. ˈSaa batɛɛmö tula ɔ ˈnɩ?

Nɩkpɛ a ˗mɔ ŋluä ˈwʋ ɔ ˈkä badizee, yɩ tula nɩɩ ɔ yɛ ɔɲɩ Lagɔ yowʋ ˈɲɛ ˈwë. ˗Maa, sɛɛ nɩkpɛ ɲɛ bhä ɔɲɩ Lagɔ yowʋ ˈnɩ? Nɩkpɛ ˈkä ɔɲɩ Lagɔ yowʋ ˈɲɛ a dɔˈwʋ, Lagɔ ˈmö ɔ bhibhee ˈn ɔ ɲɔɔ ˈdɩ nɩɩ ɔ yɩbhä ɔ ˈkɔ ˈkwädlɩ bʋbɔ. Ɔ ɲɔˈɛ ˈdɩ nɩɩ, ɔ ˈyize ˈmö ɔ ˈkää bʋbɔ, ˈn ˈsaa nɛnɔɔ dlɩ yɔwʋ a ˈyize mii ˈkää dɛsɛ ˗kä ˗mä ˈɔ zɩkpaa ˈmö. Ɔ kä ɔ ˈkä ‘ɔɲɩ dlɩ ˗sɛ, ɔ ˈkɔ ˗gänɩ ˈyize.’ ˈN ɔ käˈɛ ɔ ˈkä Zezwii ˈa ˈcɩawɛlɩɩ ˗ɲɛ ˈɔ gbäpöö ˈsɔ ˗gänɩ. (Matie 16:24) Nɩkpɛ ˗kä ɔɲɩ Zoova yowʋ ˈɲɛ ˈn ɔ ˗kä badizee, yɩ kä ˈŋlɩ ˈn ɔ ˗ɲɛ Zoova ˈsɔ ˗wʋnɩɛ ˈwʋ, ˈn ɔ ˗ɲɛ ˗wa bʋbɔ Zoova ˈsɔ ˗wʋnɩˈɛ ˈwʋ.

3. Nɩkpɛ a ˗mɔ yɩbhää ɔ ˈkä badizee, ˈsaa ɔ kä bhä ɔ ˈkä nʋ ˈnɩ?

Nɩkpɛ a ˗mɔ yɩbhää ɔ ˈkä badizee, ɔ kä ɔ ˈkä Zoova yɩbhlɩnɩ ˈn ɔ käˈɛ ɔ ˈkɔ teɲii dlɩ ˈtɛɛnɩ. (Zɛlɩ Ebleewaa 11:6 ˈmö.) ˗N ˗kä Zoova a dɛ ˈcɩɛ ˈyize, ˗naˈa dlɩˈwʋkänɔɔ yi ˈmö ˈtumanɩ, ˈn ɔ ˗wawʋ ˗yimöˈɛ teɲii dlɩ zɛmö zumanɩ. Yɩ bhɛnɩ yɩ ˗kamö ˗mä ˈsunɩ ˗n ˈkä ˈɔ wɛlɩɩ bia ˈn ˗n ˈkä ˈɔ ˈpäpägböö ˈklʋkpamö ˈzʋ ˗mä ˗naˈa zɩkpa mö. (2 Timotee 4:2; 1 Zaa 5:3) Nɩkpɛ ˗kä ‘ˈsaa nɛnɩɛ Lagɔ dlɩ yɔwʋ nʋ ɔ ˈkɔa teɲii dlɩ yɔwʋ nɛnɩ a za,’ ɔ ˈkä ɔɲɩ Lagɔ yowʋ ˈɲɛ ˈn ɔ ˈkä badize a ˈtʋ yo dlɩ zɛmö yi.—Kolɔɔsɩ a ˗nʋa 1:9, 10.a

ˈCƖƐ ˗LII ˗MIMII

4. ˈSaa Zezwii ˈa batɛɛmö ˈcɩaɲɩ ɔ ˈnɩ?

Zɛlɩ Matie 3:13-17 ˈmö, nzɩ sɛɛ Zezwii ˈa batɛɛmö ˈplɩplɩnɩɛ ˈmö, ˗n ˈki ˈylɩmö. ˈN a yɩlɩ nimïyɩbhäkïbhï ˈlɛ yɔwʋ.

• Dɛɛ wa badizee Zezwii, ˈyu ˈpʋpɔ ɔ glɩnɩ a˗a bhä ˗a?

• Sɛ wa badizee ɔ Zezwii ˈnɩ? ˈƝu wa pälɔ bhä ˈwlu ˗a?

Wa badizee Zezwii ˈwë cuu, ˈn ɔ yiɛ libho Lagɔ ˈɲɔ a˗a tɛɛ. Zɛlɩ Lwiikö 3:21-23 ˈn Zaa 6:38 ˈmö, ˈn a nɩ yɩlɩ nimïyɩbhäkïbhë ˈlɛ yɔwʋ:

• Zezwii badizee ˈwë, libho a ˗mu kä ɔ teɲii dɛsɛ, ɔ ˈpïlanɩ ɔ ˈyuku ˗mä ˈɔ zɩkpa ˈmö ˈnɩ?

5. ˗N bhɛnɩ ˗n ˈkä badizee

Nɩkpɛ ˈkä ɔɲɩ Lagɔ yowʋ ˈɲɛ ˈn ɔ ˈkä badizee, ˗mumuë ˗kä ˗sɩbhä a ˗lii ˈwʋ dlɩ ˈpää, yɩ ˗bhʋa ŋanɔ ˈwʋ. Maa, ˗n ˗kä ˈyukusɛ mö ˗mä lagɔwɛlɩɩ ˈmö, ˗n yi ˈylɩmö nɩɩ ˗n bhɛnɩ ˗n ˈkä ˗li ˈla ˈsɔ ˗kpɔ ˗yɩ kää dɛsɛ nʋ. ˗Mumuë ˗wa ˈzʋä ˗sɩbhä, ˈyɩ wa wɛlɩɩ ˈylɩmö. ˈZʋ ˗lɛ VIDEO.

VIDEO: Sɛɛ ˗n ˗ɲɛ Zoova ˈkää ˈwʋ ˗wʋnɩ (1:11)

Zɛlɩ Zaa 17:3 ˈn Zaakö 1:5 ˈmö, ˈn a nɩ yɩlɩ nimïyɩbhäkïbhë ˈlɛ yɔwʋ:

• ˈSaa ˈkä ɔ nɩkpɛ kwänɩ nzɩ ɔ ˈkä ˈmö ˗bhɩɔ ɔ ˈkä badizee ˈnɩ?

1. 1. -A ˈkä ˗aɲɩ Zoova yowʋ ˈɲɛ a dɔˈwʋ, Zoova mö ˗a ɲɛɛ ˈdɩ nɩɩ ˗a yɩbhä ˗a ˈkɔ ˈkwädlɩ bʋbɔ.

2. 2. ˗A ˗kä badizee, nɩkpaa ˈmö ˗a tulanɩɛ ˈylimö nɩɩ ˗a yɛ ˗aɲɩ Lagɔ yowʋ ˈɲɛ ˈwë.

6. ˗A ˗kä badizee, Zoova ˈa ŋëyi ˈmö a ˗nɔ ˗a zʋä

˗A ˗kä badizee, ˈbhlɩ ˗gömö a lagɔdaayuë ˗wa ˗wʋnɩɛ ˈwʋ, wa glaˈmö a ˗nʋa a zʋä. ˗Aaa ˈpɩɔ ˗bhlʋ ˈyli ˈbhöönɩ, ˗aaa ˈzʋzʋsaa ˈwʋ ˗gbɔ, maa ˗lii ˗bhlʋ ˗kpɔ mö ˗a kää dlɩ ˈwʋ ˈn ˈpäpägbö ˗bhlʋ ˗kpɔ mö ˗a ˗gänɩɛ. Zɛlɩ Psaume 25:14; ˈn 1 Piɛlɩ 2:17 ˈmö, ˈn a nɩ yɩlɩ nimïyɩbhäkïbhë ˈlɛ yɔwʋ:

• Nɩkpɛ ˗kä badizee, ɔ ˗ɲɛ Zoova ˈsɔ a jijoˈwʋ a ˗lii ˗ɲɛ ˗mumuë ˗wa bʋbɔɔ ˈsɔ, sɛ yɩ ˗wʋ ɔ ˈnɩ?

DƐSƐKÄKÏBHÏ

Zezwii lɛ nɩɩ Klɩtɩɛwaa kä wa ˈkä badizee. Nɩkpɛ ˈkä badizee a dɔˈwʋ, ɔ kä ɔ ˈkä teɲii Zoova dlɩ ˈtɛɛnɩ, ɔ kä ɔ ˈkä ˈɔ ˈpäpägbö ˈmö ˗bhölɩnɩ ˈn ɔ käˈɛ ɔ ˈkä ɔɲɩ Zoova yowʋ ˈɲɛ.

ˈWʋligbanɩkïbhï

• ˈSaa ˗lɛ ɔ batɛɛmö ˈnɩ? ˈN ˗yɩ kä ɔ ˈŋlɩ ˈn ɛ kä ɔ dɛsɛ ˈnɩ?

• Nɩkpɛ ˗kä badizee, ˈsaa yɩ tula ɔ ˈnɩ?

• Nɩkpɛ ˈkä ɔɲɩ Zoova yowʋ ˈɲɛ ˈn ɔ ˈkä badizee a dɔˈwʋ, ˗lii ˗mi ɔ kä bhä ɔ ˈkä nʋ ˈwë ˈnɩ?

YILII YƆWƲ

Sɛɛ Biblë gbää batɛɛmö a dɔˈwʋ, ˈcɩɛ yɩ dɛ.

« Qu’est˗ce que le baptême ? » (Ɛtɛnɛtɩ ˈklʋ a ˈcɩɛcɩɛkïbhë)

ˈDɩmözʋwɛlɩɩ ˗yɩ ˗kamöä kwänɩ ˗n ˈkä pɛɛpɛ pɛɛpɛ ˈyukusɛ mö ˗këë, nzɩ ˗n ˈkä badizee, ˈyi ˈylɩmö.

« L’amour et la reconnaissance pour Jéhovah mènent au baptême » (La Tour de Garde, mars 2020)

Sɛɛ nɩkpɛ ˗bhlʋ ˈyi a˗a ˈylɩmö nɩɩ ɔ kä ɔ ˈkä sasɛ dlɩ ˈpä ˈwë nzɩ ɔ ˈkä badizee, ˈyi ˈylɩmö.

« Ils voulaient que je découvre la vérité par moi˗même » (La Tour de Garde, 1er février 2013)

Sɛɛ ˗lɛ ˗lu a ˗mu kää teɲii dɛsɛ ˈn sɛɛ ˗a ˈkää ˗aɲɩ ˈwlu gïganɩ ɛ dɔˈwʋ, ˈyi ˈylɩmö.

« Devrais˗je me faire baptiser ? » (Les jeunes s’interrogent. Réponses pratiques [volume 2], chapitre 37)