ˈCƖƐCƖƐKÏBHË 42
˗Waaa ˈŋwlɩ ˗kää, ˗waaa ghïla ˗wʋʋ, ˈn kwäkwänɩkwäkwänɛ a dɔˈwʋ sɛɛ Biblë gbää
Nɩkpa ˗mumuë a ˗bɛ pä dlɩ nɩɩ nɩkpɛ ˈnɩ ˈŋlɔ ˗kää, ˈŋlɔ ˈnɩˈɛ ghlɩ ˗wʋʋ, ɔˈɔɔ bhɛnɩ ɔ ˈkä ˈmäna ˈmö ˗wʋ. ˗Maa, ˈlɩlɩlɩ a dɔˈwʋ ˗wa yɛɛ kwäkwänɩ ˈwë, wa ˈwuë mʋa ˈnɩɛ ˈmäna ˈmö ˗wʋ. Nɩkpa ˗waaa ˈŋwlɩ ˗kää, ˈn ŋwlɩɩ ˗waaa gïla ˗wʋʋ, wa ˈwuë mʋa ˈnɩɛ yɔlɔylʋ ˈmö ˗wʋ. Biblë ɲɩaɲɩ ˈdɩ nɩɩ ˗wa gbää wa ˈnaa ˈkä ˈŋwlɩ kwää, ˗wa gbäˈɛ wa ˈnaa ˈkä ghïla mö, ˈsaa wa ˗sɛ ˗lɛ ˈn kwäkwänɩkwäkwänɛ kökä, ˗li ˈla a kii ˈsɔ ˗kpɔ, Lagɔ a ˈɲɛɲlii yɩ glɩnɩɛ.
1. ˗Waaa ˈŋwlɩ ˗kä ˈn ˗waa ghïla ˗wʋʋ, sɛ yɩ kä ɔ wa ˗li a ˗lii ˈmö ˈnɩ?
Biblë lɛ nɩɩ: “˗Ɔ ˗kä ˈɔ bhibheŋlɔɔ kwää, yɩ nɛnɩ. ˗Maa ˗ɔ ˗kä nɩɩ ɔ ˈnaa kwäaˈa ɔ ˗nɔɔ nʋʋ, yɩ nɛnɩ teɲii.” (Zɛlɩ 1 Kolɛɛtɩ a ˗nʋa 7:32, 33, 38 ˈmö.) ˗Ɔ ˗kä gbä nɩɩ ɔ ˈnaa kwäaˈa ˈŋlɔ nʋʋ, ˗ɔ ˗käˈɛ gbä nɩɩ ɔ ˈnaa mö ghlɩ nʋʋ, ˗yɩ kä ɔ ˈŋlɩ ˈn ‘yɩ nɛnɩ ɔ teɲii’ ˈnɩ? Klɩtɩɛwaa ˗waaa ˗lɛglɩɲɔ ˗kää, waˈa ˗lɛglɩɲɔ a ˈylizʋnɩlibho ˗kä, zaa wa kä ˈtɛɲɩ wa ˈkä ˈwa lagɔwɛlɩbialibhoo ˈwʋ gbanɩ. Wa ˈkä bhlɩɩ ˗mɛmɛɛ ˈmö Lagɔ ˈa ˈtɩtɩ a ˗tɩtɩɩ bia mö, yɩ ˈnaa ˈkʋa kɛˈmö ˈtɛɛnɩ.
2. ˗Yɩ kä ɔ ˈŋlɩ ˗a ˈkä ˗lɛ ˈkämanɩwaa ˈyila ˈklʋ kwäkwänɩ nɛnɩ ɔ ˈnɩ?
˗Waaa ˈŋwlɩɩ ˗kä, ˈn ˗waaa ghïla wʋʋ, sɛ wa bhɛnɩɛ wa ˈkä ˈsaa wa ˗sɛ ˗lɛ ˗li a ˗lii ˈmö ghlɩnɩɩ, ˗sɩbhä ˗wa kwäkwänɩɛ bhɛnɩˈɛ wabhlɩ wa ˈkä ˈwa kwäkwänɩkwäkwänɛ ˗li a ˗lii ˈmö ghlɩnɩɩ. Biblë lɛ nɩɩ, “A ˗kä ˈsɔ ˗bhlii, yɩ nɛnɩ yɩ ˈkä ˗n ˗kä ˗bhlʋ ˗bhli ˈwʋ zi. (Ecclésiaste 4:9) Klɩtɩɛwaa ˗wa yɛɛ kwäkwänɩ ˈwë, ˗wa zʋä Biblë a ˈpäpägböö ˈklʋkpamö, ˗sɩbhä yɩ ˈwlʋnɩɛ ˈyli ˗mä ˈwa zɩkpa ˈmö. ˗Wa kwäkwänɩɛ ˗lɛ ˈkämanɩwaa ˈyila ˈklʋʋ, sɛ wa ˈɲɛɲɛnɩɛ ˈdɩ ma˗a nɩɩ, wa yi ˈkwädlɩ ˗wawanɩ, ˈn wa yi ˈklʋkpamö ˈzʋzʋnɩ. ˈSaa yɩ ˈwälanɩɛ ˈyli miɛ nɩɩ, wa ˈtɛɛnɩtɛɛnɩ dlɩ wa ˈkä ˗wa glɩglɩnɩɛ ˈfʋ yɔwʋ ˈwʋ zi. Yɩ bhɛnɩˈɛ yɩ ˈkä ˈŋlɩ ˗kä ˈwa ˈligbë ˈmö a ˗nʋa ˈwuë ˈkä ˈtɩɩglɩglɛ ˈmö ˗wʋ.
3. Sɛɛ Zoova yɩlɩ ɔ kwäkwänɩkwäkwänɛ ˈwʋ ˈnɩ?
Dɛɛ Zoova ˈgïlaa kwäkwänɩkwäkwänɛ a tɛkänɛ sɛɛ, ɔ ˗lɛ nɩɩ: “Nɩkpɛ kä ɔ ˈkä ɔ dɩba ˗ɲɛ ɔ ˗da ˈsɔ yɔwʋ ˈbhöö, nzɩ ɔ ˗ɲɛ ɔ ˈlɛŋlɛ ˈsɔ wa ˈkä yɔwʋ ˈdiodionɩ.” (Genèse 2:24) Zoova yɩbhä nɩɩ ˈluwli ˗ɲɛ ˈɔ ŋlɔɔ ˈsɔ, wa nɩ ˗wawanɩ ˈn wa nɩ ˗wʋnɩ ˈkwädlɩ ˈwʋ ˗mä ˈwa zɩkpa ˈwuë ˈmö. ˈLuwli ˗kä käböŋlɔ a ˈbɛyɩ mö, ŋlɔɔ ˗käˈɛ ɔbhlɩ gbɩ sɛ tɛlɩ, ˗lɛ wa bhɛnɩɛ wa ˈkä ˈylimö ˗sɛnɩ. ˗Sɩbhä a ˗lii ˗kä ˈwʋ ˈplɩɩ, ˗mɔ wa nʋä ˗lizoku ˈwlu ˗kä ˈyɩbhää, ɔ bhɛnɩ ɔ ˈkä ˈɔ ˗lɛglɩɲɔ yɔwʋ ˈbhöö. Ɔ ˗käˈɛ ˗waa, ɔ bhɛnɩ ɔ ˈkɩ ˈyi ˈtatinɩ.a (Matie 19:9) Zoova ˈnɩɛ ˈyɩbhä Klɩtɩɛwaa ˈkä ˈŋwlɩ a ˗bɛ kwä.—1 Timotee 3:2.
ˈCƖƐ ˗LII ˗MIMII
˗N ˈnɩ ˈŋlɔ ˗kää, ˗n ˈnɩ ghlɩ ˗wʋ aˈbhë ˗kë, sɛɛ ˗n bhɛnɩɛ ˗n ˈkä Zoova ˈmäna dlɩ zɛmö ˈzʋʋ, ˈyi ˈylɩmö.
4. ˗Waaa ˈŋwlɩ ˗kä ˈn ˗waaa ghïla ˗wʋ nɩ nʋnɩ sasɛ ˈwa ˈtɛɲɩ libhoo ˈmö
Nɩkpaa ˗waaa ˈyɩbhä wa ˈkä ˈŋwlɩ kwää, ɛ ˗käˈɛ ŋwlɩɩ ˗waaa ˈyɩbhä wa ˈkä ghïla möö, Zezwii lɛ nɩɩ ˈsaa wa ˗sɛ ˗lɛ, Lagɔ a ˗ɲɛɲɛluä. (Matie 19:11, 12) Zɛlɩ Matie 4:23 ˈmö, ˈn a nɩ yɩlɩ nimïyɩbhäkïbhë ˈlɛ yɔwʋ:
Zezwii ˈnɩ a˗a ˈŋlɔ ˗kä, zaa sɛ ɔ ghlɛnɩ ɔ ˈtɛɲɩ ˈmö ˈn ɔ yi bhä ɔ Dɩba ˈa libhoo nʋ ˈn ɔ yɩ ɔ nɩkpaa ˗mumuë kwänɩ ˈnɩ?
Klɩtɩɛwaa ˗waaa ˈŋwlɩ ˗kää, ˈn Klɩtɩɛŋwlɩɩ ˗waaa ghïla ˗wʋʋ, sɛ wa bhɛnɩ ɔ wa ˈkä Zezwii a saa ˈmäna ˈmö ˗wʋ ˈnɩ? ˈZʋ ˗lɛ VIDEO, ˈn a nɩ yɩlɩ nimïyɩbhäkïbhë ˈlɛ yɔwʋ.
Klɩtɩɛwaa ˗waaa ˈŋwlɩ ˗kää, ˈn Klɩtɩɛŋwlɩɩ ˗waaa ghïla ˗wʋʋ, sɛ wa bhɛnɩ ɔ wa ˈkä sasɛ ˈwa ˈtɛɲɩ ˈmö ghlɛnɩ ˈnɩ?
˗N ˗yi a˗a bhä sɛ ˗a?
ˈYlʋbö ˗zɩmö nɩkpɛ ˈkää ˗kä nzɩ ɔ ˈkä ˈŋlɔ kwä, ɛ ˗käˈɛ ɔ ˈkä ghlɩ ˈmöö, Biblë ˈnɩɛ yɩ wɛlɩ bhïla. ˗Maa ɛ zʋʋɲɩ ˈdɩ ˈmö nɩɩ, nɩkpɛ ˗kä ɔ ˈkä ˈŋlɔ kwää, ˈtɛɲɩ ˗ɛɲɩ ˈmö ˈŋlɔ a ˈtʋ ˗zuä teɲii ˗mä ɔ dlɩ zɩmö, ˈtɛɲɩ ˈla nɩ ˈplɩɛ ˈwë. Ɛˈɛ ˗bhö ɲɩasɛ, ˗maa ɔ ˈnaa ˈkä ˈnɛɛnɩsɛ ˗mɔ ɔ ˈkää kwä ˗lɛ ˗sɛ. —1 Kolɛɛtɩ a ˗nʋa 7:36.
5. ˗A nɩ ˗sɛ ˗lɛ ˈnɛɛnɩsɛ ˗mɔ ˗a ˈkää kwä
˗A ˈkä ˗mɔ ˗a ˈkää kwä ˗lɛ ˗sɛ glɩnɩ ˗li a ˗mi kää teɲii dɛsɛ ˗mä ˗aˈa zɩkpaa ˈmö. Zɛlɩ Matie 19:4-6, 9 ˈmö, ˈn a nɩ yɩlɩ nimïyɩbhäkïbhë ˈlɛ yɔwʋ:
Klɩtɩɛwaa ˗kä kwäkwänɩɛ yii, ˗yɩ kä ɔ ˈŋlɩ ˈn wa kä ɔ wa ˈkä sasɛ dlɩ ˈpä ˈwë nzɩ wa ˈkä kwäkwänɩ ˈnɩ?
Biblë bhɛnɩ ɛ ˗kaɲɩ kwänɩ ˗a ˈkä ˈŋlɔ a ˗nɔ a ˗nɔ, ɛ ˗käˈɛ ˈluwli a ˗nɔ a ˗nɔ ˗lɛ ˗sɛ nzɩ ˗a ˈkä kwäkwänɩ. Ɔ kä ɔ ˈkä nɩkpɛ a ˗mɔ ˗wa Zoova glɩnɩ.b Zɛlɩ 1 Kolɛɛtɩ a ˗nʋa 7:39 ˈn 2 Kolɛɛtɩ a ˗nʋa 6:14 ˈmö, ˈn a nɩ yɩlɩ nimïyɩbhäkïbhï ˈlɛ yɔwʋ:
˗Yɩ kä ɔ ˈŋlɩ ˈn ˗a kä ɔ ˗a ˈkä klɩpaa Klɩtɩɛyi kwä ˈnɩ?
˗A ˗kä nɩkpɛ a ˗mɔ ˈnɩɛ Zoova a bʋbɔbʋbɔɲɔ glɩnɩ kwää, sɛɛ Zoova yɩlii ɔ ˈnɩ?
Nɩma ˈsɔ ˗yiɲɩ ˈmötɛɛnɔ ˈnɩɛ ˈmö mlɩnɩɩ, wa ˗kii yɔwʋ gwanɩ nzɩ yɩ ˈkä libho ˈgämö nʋnɩɩ, ˈklɩ yɩ ˈkää teɲii ˈyɩ. Sɛ ˗bhlʋ ˗kpɔ ˈla, Klɩtɩɛyi ˗kä nɩkpɛ a ˗mɔ ˈnɩɛ Zoova a ˗nɔ glɩnɩ kwää, ˗sɩbhä wa ˈkää teɲii ˈklɩ ˈyɩ.
6. Sɛɛ Zoova yɩlɩɛ kwäkwänɩkwäkwänɛ ˈwʋ yɩlɩmɛɛ ˗sɩbhä ˈwʋ
Bhlaˈmö a dɔˈwʋ ˗mä Yizlaɛlɩ, ɲɩbhɛlɩɩ ˈfʋ wa sɛ a˗a ˈwa ŋwlɩɩ ˈsuë ˈmö ˗lii ˗yɩɩɛ dɛsɛ ˗kä a za. Zɛlɩ Malachie 2:13, 14, 16 ˈmö, ˈn a nɩ yɩlɩ nimïyɩbhäkïbhë ˈlɛ yɔwʋ:
˗Wa sɛɛ ˈfʋ ˈwa ŋwlɩɩ ˈsuë ˈmöö, ˗yɩ kä ɔ ˈŋlɩ ˈn yɩ ˈnɩ ɔ Zoova dlɩ yɔwʋ nɛnɩ ˈnɩ?
ˈLuwli ˗ɲɛ ŋlɔ ˈsɔ ˗kä yɔwʋ ˈbhööbhönɩɩ, wa ˗ɲɛ ˈwa ˈligbë ˈmö a ˗nʋa ˈsɔ ˈklɩ wa ˈyɩɛ teɲii.
ˈZʋ ˗lɛ VIDEO, ˈn a nɩ yɩlɩ nimïyɩbhäkïbhë ˈlɛ yɔwʋ.
˗Mɔ ˗n kwää ˈnɩ Zoova a ˗nɔ glɩnɩ, sɛɛ ˗n ˈkä ɔ ˈzʋ nzɩ a ˈkä ˈmäna ˈmö ˗wʋ ˗mä ˈa ˈligbëa ˈmö ˈnɩ?
7. Sɛɛ Zoova ˈa ˈpäpägböö gbää kwäkwänɩkwäkwänɛ a dɔˈwʋ a nɩ ˈzwi ˈklʋkpamö
Nɩkpɛ ˈkä Zoova ˈa ˈpäpägböö ˗yɩ bhïla kwäkwänɩkwäkwänɛ a wɛlɩɩ ˈklʋkpamö zʋ a dɔˈwʋʋ, ɔ kä ɔ ˈkä teɲii ˈyli yɔwʋ ˈtɛmanɩ.c ˗Maa ˗wa zʋä ˗sɩbhä Zoova ˈɲu ɔ pʋa. ˈZʋ ˗lɛ VIDEO.
Zɛlɩ Ebleewaa 13:4 ˈmö, ˈn a nɩ yɩlɩ nimïyɩbhäkïbhï ˈlɛ yɔwʋ:
˗Na dɔˈwʋ, Zoova ˈa ˈpäpägböö ˗yɩ bhïla kwäkwänɩkwäkwänɛ a wɛlɩɩ, yɩ nɛnɩ bhä ˗a? ˗Yɩ kä ɔ ˈŋlɩ ˈnɩ?
˗Mä bhlɩɩ ˗mimii ˈmöö, ˗mä a ˈkämanɩwaa yɩbhä nɩɩ, ˗wa yɩbhää wa ˈkä kwäkwänɩ nɩ mö ˗lɛ wa ˈyila ˈklʋ. Wa ˗käˈɛ ˈylimö ˗sɛnɩɛ yii, wa nɩ möˈɛ ˗lɛ wa ˈyila ˈklʋ. Zoova yɩbhä nɩɩ Klɩtɩɛwaa nɩ ˈzʋ ˈkämanɩwaa a ˗lɔ ˈla wa ˈgïla sɛ ˈklʋkpamö. Zɛlɩ Tiitɩ 3:1 ˈmö, ˈn a nɩ yɩlɩ nimïyɩbhäkïbhë ˈlɛ yɔwʋ:
˗N ˗kä ˈŋlɔ ˗kää, ˗n ˗kä ghlɩ ˗wʋʋ, ˗n ˗ɲɛ ˗naˈa ˗lɛglɩɲɔɔ ˈsɔ a yɛ ɔ ˗mä ˈkämanɩwaa ˈyila ˈklʋ kwäkwänɩ ˈwë ˗a?
˗MƆMƆƆ ˗KAMÖ NIMÏ ˈYƖBHÄ NƖƖ: “˗Yɩ kä ɔ ˈŋlɩ ˈn wa kä ɔ wa ˈkä klɩpaa ˗lɛ ˈkämanɩwaa ˈyila ˈklʋ kwäkwänɩ ˈnɩ? Waˈa ɔ bhɛnɩ wa ˈkä ˈfʋ yɔwʋ glɩglɩnɩ ˗a?”
Sɛɛ ˗n ˈkä ɔ gbä ˈnɩ?
DƐSƐKÄKÏBHÏ
˗Ɔɔɔ ˈyɩbhä ɔ ˈkä ˈŋlɔ kwää, ˈn ˗ɔɔɔ ˈyɩbhä ɔ ˈkä ghlɩ mö ˈn ˗wa kwäkwänɩɛ, ˈsaa wa ˗sɛ ˗lɛ, Zoova a ˈɲɛɲɛlii yɩ glɩnɩɛ. Wa ˈwuë, wa ˗kä ˈsaa Zoova yɩbhää nʋʋ, wa yi ˈmäna ˈmö ˗wʋ.
ˈWʋligbanɩkïbhï
˗Ɔɔɔ ˈŋlɔ ˗kää, ˈn ˗ɔɔɔ ghlɩ ˗wʋʋ, sɛ ɔ ˈkä ɔ ˈɔ ˈtɛɲɩ sasɛ libho ˈmö nʋnɩ ˈnɩ?
˗Yɩ kä ɔ ˈŋlɩ ˈn Biblë gbä ɔ nɩɩ ˗mɔ ˗a ˈkää kwä nɩ glɩnɩ klɩpaa Zoova a bʋbɔbʋbɔɲɔ ˈnɩ?
Sɛɛ Biblë gbää a dɔˈwʋ, ˗lu ˗bhlʋ a ˈyize muu ˈkää gbä ˗wa yɛɛ kwäkwänɩ ˈwë ˈkä ˈylimö ˗sɛnɩ. Wʋ ˗mu ɔ ˈnɩ?
YILII YƆWƲ
Wa ˗kä nɩɩ ˗mɔ ˗a ˈkää kwää ‘nɩ glɩnɩ Zezwii a ˗nɔ klɩpaa,’ sɛ yɩ sɛ ɔ zɛmö ˈnɩ?
« Questions des lecteurs » (La Tour de Garde, 1er juillet 2004)
Ylɛ videwi ˈlɛ ˈsɔ ˗kpɔ yɩ ˗kamö kwänɩ ˗n ˈkä ˈnɛɛnɩsɛ ˗mɔ ˗n ˈkää kwä ˗lɛ ˗sɛ.
˗Wa yɩbhää wa ˈkä kwäkwänɩ a sɛ wa ˈkää ˗bhlɛ waɲɩ ˈwlu gïganɩ (11:53)
˗Yɩ kää ˈŋlɩ ˈn lagɔdaayu ˗bhlʋ yiɛ nɩɩ ˈsaa Zoova ˈɲɔɔ kä teɲii dɛsɛ yɩ ˈkä ˗mi ɔ ˗sɛ kɛˈmö ˈwʋ zii, ˈyi ˈylɩmö.
˗Ɔ yɩbhää ɔ ˗ɲɛ ˈɔ ˗lɛglɩɲɔ ˈsɔ ˈkä yɔwʋ ˈbhööbhönɩɩ, ˈsaa ɔ ˈkä ɔ dlɩ kɛ ˈpä nɩ?
« Honore “ce que Dieu a uni” » (La Tour de Garde, décembre 2018)
a Yɩlɩ ˗mä Dlɩgömösɛsɛnɩkïbhë 4 ˈmö, ˗lii ˗yɩ ˈkää gbää nzɩ ˈluwli ˗ɲɛ ˈŋlɔ ˈsɔ ˈkä yɔwʋ ˈbhööbhönɩ, ˗n ˈkɩ ˈylɩmö.
b Nɩkpaa ˗mumuë a ˈbɛyɩ a dɔˈwʋ, ˗mɔ ˈwa yuu ˈkää kwää, waˈbhï mʋa sɔɔ ˗lɛ. Yɩ ˗kä ˗sɩbhä ˈmö ˗wʋ, ˗mɔ wa ˈkää ˗lɛ ˗sɛɛ, ɔ yi lɩkäɲɔ glɩnɩ oo, ɔ yiˈɛ ˈpʋaɲɔ glɩnɩ oo, mii ˈnɩɛ dɛsɛ ˗kä ˈwa dɔˈwʋ. ˗Maa, ˈsaa wa yɩbhää miɛ nɩɩ, ɔ nɩ glɩnɩ nɩkpɛ a ˗mɔ ˗waa Zoova.
c ˗N ˗ɲɛ ˗naˈa ˗lɛglɩɲɔɔ ˈsɔ a ˈnɩ ˗bhlɛ ˈkämanɩwaa ˈyila ˈklʋ kwäkwänɩ, ˗n ˗kä nɩɩ ˗n yɩbhä ˗n ˈkɔ yɔwʋ ˈbhöö, ˗n ˗käˈɛ nɩɩ ˗n ˗ɲɔɔ ˈsɔ a ˈkä ˈmö ˈnʋnʋnɩ nzɩ a ˈkä ˗lɛ ˈkämanɩwaa ˈyila ˈklʋ kwäkwänɩɩ, ˗n ˗mö yɩ ˗wʋä käˈmö.