ˈCƖƐCƖƐKÏBHË 40
Sɛɛ ˗a ˈkä ɔ ˈwlɩlɩ ˗wʋ Lagɔ a ˈyila ˈklʋ ˈnɩ?
ˈŊlɔ a ˗mɔ ˗wʋä ˈɔ yuu ˈwlu gïganɩ dɔˈwʋ nzɩ ɔ ˈkɔ ˗mä ˗suku ˈmö ˈyio ˈwʋ kwä, ˗a nɩ pänɩɛ ˗ka ɔ wɛlɩɩ dlɩ kɛ. Yuu ˈmö ɔ köbhaa sasɛ ˈyli, ˈɔ ˗banɩ ˗kä ˈwlɩlɩ ˗wʋ ˈn ɔ ˗käˈɛ bido a za. Ɔ ˗yi sɛ nɩɩ yuu ˗kä ˈwlɩlɩ ˗wʋ, yɩ yi ˈŋlɩ ˗kä ɔ ˈkä sasɛ ˈmö nɛnɩ ˈn yɩ yiˈɛ tula nɩɩ ɔ ˗lowluwaa ˈzʋnɔ sasɛ ˈyli. Saa ˗bhlʋ ˗kpɔ ˈla ˗sɩbhä ˗aa dɩba Zoova yɩbhää nɩɩ, ˗aˈa kpökpa nɩ ˗wʋ ˈwlɩlɩ ˈn ˗aˈa dlɩpäsaa nɩ ˗wʋˈɛ ˈwlɩlɩ. ˗A ˗kä ˈwlɩlɩ ˗wʋ, yɩ kä ˗aa ˗li a ˗lii ˈmö ˈn yɩ ˈghlimanɩˈɛ Zoova ˈa ŋlɩɩ.
1. Sɛɛ ˗a ˈkä ɔ ˈzʋ ˗aˈa kpökpaa ˈkä ˈkwädlɩ ˈwlɩlɩ ˗wʋ ˈnɩ?
Zoova lɛ nɩɩ: ‘A nɩ ˗wʋ ˈwlɩlɩ.’ (1 Piɛlɩ 1:16) Wa ˗kä nɩɩ ˗a nɩ ˗wʋ ˈwlɩlɩ nʋʋ, ˗aˈa kpökpa ˗ɲɛ ˗aˈa dlɩpäsaa ˈsɔ ˈmö wa gaa. ˗A ˈkä ˈwlɩlɩ ˗wʋ a dɔˈwʋ, ˗a kä ˗a ˈkä bido, ˗a käˈɛ ˗a ˈkä ˗aˈa ˗banɩ wɔlʋ. ˗Aˈa ˈligbï ˗ɲɛ ˗aˈa tobï ˈsɔ, yɩ käˈɛ yɩ ˈkä ˈwlɩlɩ ˗wʋ. ˗A bhɛnɩˈɛ ˗a ˈkä ˗mä Lagɔ a ’Kämanɔɔ a ˗budu ˈmö ˈwlɩlɩ päla. ˗A ˗kä ˈwlɩlɩ ˗wʋ, Zoova ˈa ŋlɩɩ mö ˗a ˈghlimanɩɛ.—2 Kolɛɛtɩ a ˗nʋa 6:3, 4.
2. ˗A ˈkä ˈwlɩlɩ ˗wʋ a dɔˈwʋ, ˗lii a ˗mi ˗a ˈkä ɔ gwë ˈdionɩ ˈnɩ?
Biblë ɲɩaɲɩ gbëaa ˈdɩ nɩɩ, “˗aˈa nʋnʋlii ˈwuë ˗ɲɛ ˗aˈa dlɩpäsaa ˈwuë ˈsɔ ˗yɩ pälaɲɩɛ fɩ Lagɔ a ˈyila ˈklʋ a dɔˈwʋʋ, a˗a nɩ ˗sɩɩ kɛˈmö.” (2 Kolɛɛtɩ a ˗nʋa 7:1) ˗Lii a ˗mi bhɛnɩɛ yɩ ˈkä ˗aˈa kpökpa ˗ɲɛ ˗aˈa dlɩpäsaa ˈsɔ ɲima, ˗a nɩ ˈdionii gwë. ˗A ˈkä Zoova dlɩ yɔwʋ nɛnɩ a dɔˈwʋʋ, ˗lii ˗yɩ ˗kaɲɩɛ ˗mä ˈsunɩ ˗a ˈkä ˈzokwësɛ dlɩ ˈpä, ˗a kä ˗a ˈkɩ ˗gömö panɩ. (Psaume 104:34) ˗A nɩ köbhaˈɛ ˗aˈa bhïlabhïlasaa ˈyli.—Zɛlɩ Kolɔɔsɩ a ˗nʋa 3:8 ˈmö.
˗Lii ˗mimii bhɛnɩˈɛ yɩ ˗kaɲɩ fɩ päla. Yɩ ˗mi ɔ ˈnɩ? Mii ˗lɛ, siklɛtɩ, ˗jɛlɩ ˈn gëji. ˗Sɩbhä a ˗li ˈla, ˗a nɩ ˈdionii gwë. ˗A ˗kä ˗sɩbhä ˈzʋ, ˗a yi ˈmö nɛnɩ ˈtɩɩ, ˈn ˗a yiˈɛ tula nɩɩ ˗bhölɩbhölɛ Lagɔ ɲɩaɲɩɛ ˗a kä ɛ ˈklʋkpa. ˗Aˈa dlɩpäsaa ˗ɲɛ ˗aˈa nʋnʋlii ˈwuë ˈsɔ ˈkä ˈwlɩlɩ ˗wʋ a dɔˈwʋ, ˗ɔɔzʋkälii a ylɛylʋ ˈn ˗ɔɔzʋkälii a kii mimii nɩkpa nʋä ˈn wa sɛɛ ˗waɲɩ ˈwii, ˗a nɩ ˈtɛmanɩˈɛ ˈyli yɔwʋ ˗a ˈkɩ ˗gömö panɩ. (Psaume 119:37; Ɛfɛɛzɩ a ˗nʋa 5:5) ˗Sɩbhä a nʋnʋlizoku ˈla, ˗a ˈkɩ kɛˈmö ˗sɛ a dɔˈwʋʋ, yɩ bhɛnɩ yɩ ˗kaɲɩ kɛˈmö ˈtɛɛnɩ. Maa, ˗a nɩ kɩ dlɩ ˈwʋ nɩɩ Zoova bhɛnɩ ɔ ˗kaɲɩ kwänɩ.—Zɛlɩ Isaïe 41:13 ˈmö.
ˈCƖƐ ˗LII ˗MIMII
˗A ˗kä ˈwlɩlɩ ˗wʋ a sɛ yɩ ˈghlimanɩɛ Zoova ˈa ŋlɩɩ, ˈn sɛɛ ˗a ˈkää ˈzʋ ˗a ˈkä nʋnʋlizoku ˗yɩ päla fɩ ˈwlu ˈplɩ, ˗a nɩ ˈyi ˈylɩmö.
3. ˗A ˗kä ˈwlɩlɩ ˗wʋ Zoova ˈa ŋlɩɩ ˈmö yɩ ˈghlimanɩɛ
Zoova ˈa gböö ɔ ˈɲɛ a˗a Yizlaɛlɩ a ˗nʋa, ˗a ˗kɩɩ ˈmö zɛlɩ, yɩ ˈcɩaɲɩ nɩɩ ɔ ˗nʋa ˈkä ˈwlɩlɩ ˗wʋ, dɛsɛ yɩ kää teɲii ɔ dɔˈwʋ. Zɛlɩ Exode 19:10 ˈn 30:17-19 ’mö, ˈn a nɩ yɩlɩ nimïyɩbhäkïbhï ˈlɛ yɔwʋ:
Sɛɛ Zoova pää dlɩ ˈwlɩlɩwʋwɛ a dɔˈwʋʋ, sɛɛ Biblë a gbɛlɩ ˈlɛ tula ɔ ˗sɩbhä ˈnɩ?
˗Lii a ˗mi ˗a ˈkä ɔ nʋ nzɩ ˗n ˈkä ˈkwädlɩ ˈwlɩlɩ ˗wʋ ˈnɩ?
˗A ˈkä ˈkwädlɩ ˈwlɩlɩ ˗wʋ a dɔˈwʋ, ˗a kä ˗a ˈkä ˈtɛɲɩ ˈwʋ ˈlibhï ˈn ˗a käˈɛ ˗a ˈkä ˈyli yɔwʋ ˈtɛmanɩ. ˗A yi lɩkäwa glɩnɩ oo, ˗a yi ˈpʋawa glɩnɩ oo, dɛɛ ˗a yi ˗bhölɩnɩ aˈbhë ˗kë, ˗a bhɛnɩ ˗a ˈkä ˈwlɩlɩ ˗wʋ ˈyize. ˈZʋ ˗lɛ VIDEO, ˈn a nɩ yɩlɩ nimïyɩbhäkïbhë ˈlɛ yɔwʋ.
˗A ˗kä ˈwlɩlɩ ˗wʋ ˈn ˗aˈa ˗lii ˈwuë ˗käˈɛ ˈwlɩlɩ ˗wʋ, ˗muë ˗a ɲɛɛ lagɔwɛlɩɩ sɛ wa ˈkä ɔ gbä ˈnɩ?
4. Sɛɛ ˗a ˈkä ɔ ˗lizoku ˗yɩ päla fɩ kɛˈmö ˗sɛ ˈnɩ?
Zoova bhɛnɩ ɔ ˗kaɲɩ kwänɩ ˗a ˈkä nʋnʋlizoku a kii ˈwuë ˈwlu ˈplɩ.
˗N ˗kä ˗kamä nɩkpɛ a ˗mɔ ˈbhua siklɛtɩ glɩnɩ, ˗n ˗käˈɛ gëji ˈbhua, ˗n ˈkɩ kɛˈmö ˗sɛ ˈtɛɛnɩmö ˗kamä teɲii kɛˈmö. Maa, ˈsaa ˗kamö ɔ kwänɩ ˈnɩ? Siklɛtɩ ˗ɲɛ gëji ˈsɔ a ˈsaa yɩ nʋmöä ˈwlu, ˈpäniɛ ˗ka dlɩ kɛ. Zɛlɩ Matie 22:37-39 ˈmö, ˈn a nɩ yɩlɩ kïbhëa ˈlɛ yɔwʋ. Nɩkpɛ ˗kä teɲii siklɛtɩ ˗ɲɛ gëyi ˈsɔ ˈbhua, ˈsaa yɩ ˈkää ˈyli ˈwälanɩ...
ɔ ˗ɲɛ Zoova ˈsɔ a ˈwʋwʋnɛ a dɔˈwʋ.
ɔ ˗ɲɛ ˈɔ ˈligbë ˈmö a ˗nʋa ˈsɔ a jijoˈwʋ ˈn ˗wa ˗binɔɔ.
Sɛ ˗n ˈkää ˈzʋ nzɩ ˗n ˈkä ˗lizoku ˈla kɛˈmö ˗sɛ, ˈzʋ ˗sɩbhä.a ˈZʋ ˗lɛ VIDEO.
Zɛlɩ Filiipö a ˗nʋa 4:13 ˈmö, ˈn a nɩ yɩlɩ nimïyɩbhäkïbhë ˈlɛ yɔwʋ:
Bhibhebhiuu, Biblë a ˈcɩɛcɩʋ, ˈn ˈwluyɩbhäyɩbhʋ ˈwʋ a mömɛ, sɛ yɩ bhɛnɩ ɔ yɩ ˈkä nɩkpɛ a ˗mɔ yɩbhää ɔ ˈkä ˈɔ nʋnʋlizoku kɛˈmö ˗sɛ kwänɩ ˈnɩ?
5. Sɛɛ ˗a ˈkä ɔ dlɩpäsaa a ˗ma ˈnɩɛ ˈwlɩlɩ ˗wʋ ˈn nʋnʋlizoku ˈwlu ˈplɩ ˈnɩ?
Zɛlɩ Kolɔɔsɩ a ˗nʋa 3:5 ˈmö, ˈn a nɩ yɩlɩ nimïyɩbhäkïbhï ˈlɛ yɔwʋ:
Nɩkpɛ ˗kä ˗ɔɔzʋkälii ylɛ, ɔ ˗kä foti ˗yɩ kää ˗ɔɔzʋkäli ˈmö nɩkpɛ yio ˈwʋ ˈpä, ɔ ˗käˈɛ ˗lii ˗mimii nʋ ɔ ˈkä ɔɲɩ ˈwi ˗sɛɛ, sɛɛ ˗a ˗yi ɔ sɛ nɩɩ ˗lii a ˗mi ˈnɩɛ ˈwlɩlɩ ˗wʋ Zoova a ˈyila ˈklʋ ˈmö yɩ glɩnɩɛ ˈnɩ?
˗Na dɔˈwʋ, Zoova ˗kä nɩɩ ˗a nɩ ˗wʋ ˈwlɩlɩ ˗mä ˗aˈa dlɩpäsaa ˈmö nʋʋ, mii sɛ ɔ zɛmö nɩɩ, yɔwʋ ɔ kälɩɛ teɲii ˗a? ˗Yɩ kä ɔ ˈŋlɩ ˈnɩ?
Sɛɛ nɩkpɛ bhɛnɩɛ ɔ ˈkä ˈɔ dlɩpäsazokwëa ˈwlu ˈplɩ, ˈyi ˈylɩmö. ˈZʋ ˗lɛ VIDEO.
Sɛɛ ˗a ˈkää ˈkwädlɩ ˈwlɩlɩ ˗wʋ ˗mä ˗aˈa dlɩpäsaa ˈmöö, Zezwii ˈkää yɩ wɛlɩɩ bhïla yii, wɛlɩɩ ɔ pälɩɛ ˈwʋ. Zɛlɩ Matie 5:29, 30 ˈmö, ˈn a nɩ yɩlɩ nimïyɩbhäkïbhë ˈlɛ yɔwʋ:
Sɛɛ Zezwii gbää ˗mä gbɛlɩ ˈlɛ ˈmö mii ˈnɩɛ zɛmö ˗sɛ nɩɩ, ˗a kä ˗a ˈkä ˗aɲɩ zɛ ˈwʋ bhïlanɩ. Maa, sɛ yɩ sɛɛ zɛmö mɩɛ nɩeɩ ˗a ˗kä ˗lu nʋä yii, ˗a nɩ ˈtɛmanɩ teɲii ˈyli yɔwʋ nzɩ ˗a ˈkʋ nʋ. Zaa, sɛɛ ˗a ˈkä ɔ ˈyli yɔwʋ ˈtɛmanɩ ˗a ˈkä dlɩpäsaa a ˗ma ˈnɩɛ ˈwlɩlɩ ˗wʋ kɛˈmö ˗sɛ ˈnɩ?b
˗N ˗kä ˈyli yɔwʋ ˈtɛmanɩ dɔˈwʋ ˗wʋ nzɩ ˗n ˈkä dlɩpäsazokwëa ˈwlu ˈplɩɩ, kɩ dlɩ ˈwʋ nɩɩ Zoova yɩlɩ yɩ ˈwuë ˈwʋ. Zɛlɩ Psaume 103:13, 14 ˈmö, ˈn a nɩ yɩlɩ nimïyɩbhäkïbhë ˈlɛ yɔwʋ:
Dlɩpäsaa a ˗ma ˈnɩɛ ˈwlɩlɩ ˗wʋ ˗kamö yɔlɔa dɔˈwʋ ˗wʋ, sɛɛ Biblë a gbɛlɩ ˈlɛ bhɛnɩ ɔ yɩ ˗kamö kwänɩ ˗n ˈkä ˈyli yɔwʋ ˈtɛmanɩ ˈyize ˈnɩ?
˗N yi ˈwʋ ˈsɔ ˗lizoku ˈmö bhlinɩ aˈbhë ˗kë, swɩ nɩ ˗tɩmö yɔwʋ ˈkunɩ!
˗Sɩbhä a ˗lii ˗kä nɩkpɛ ghlɩɩ, ɔ bhɛnɩ ɔ ˈkä gbä nɩɩ, ‘Nˈn˗ä bhɛnɩ n ˈkɩ ˈwlu ˈplɩ. Zaa, n ˈnaa ˈkäa ˈfʋ naɲɩ yɔlɔa.’ ˗A nɩ ˈpänɩɛ ˗ka ˈwʋpälɩwɛlɩ ˈlɛ dlɩ kɛ: Guëguëɲɔ ˗kä guë dɔˈwʋ ˗wʋ, ɔ ˗kä gozo ˈn ɔ ˗kä zɛmö bhlii, mii ˈnɩɛ zɛmö ˗sɛ nɩɩ wa kɔ ˈwlu ˈplɩ ˈwë. Mii ˈnɩɛ ˈyɛ zɛmö ˗sɛ nɩɩ ɔ ˈkää guë yii, mää ɔ tɛɛnɩ a˗a, ˗mä ɔ ˈkää ˈwlu sɩbhä nzɩ ɔ ˈkä ˈwʋ ˈsɔ tɛɛnɩ. Zaa, nɩkpɛ ˗kä ˈwʋ ˈsɔ ˗lizoku a nʋnwɛ ˈmö bhlinɩɩ, mii ˈnɩɛ zɛmö ˗sɛ nɩɩ ɔˈɔɔ bhɛnɩ ɔ ˈkɩ ˈwlu ˈplɩ ˈlɩlɩlɩ. Mii ˈnɩɛ ˈyɛ zɛmö ˗sɛ nɩɩ libhoo ˈwuë ɔ nʋä ˈn ɔ yi a˗a ˈyukusɛ mö, ˈfʋ a libhoo. Yɩbhlɩnɩ sɛ nɩɩ, ˗sɩbhä a ˗lii bhɛnɩ yɩ ˈkä nɩkpa ˈwuë ghlɩ. Dɛɛ ˗mämaa a dɔˈwʋ, mii kää ˈŋlɩ aˈbhë ˈn ˗a ˈtɛmanɩɛ ˈmö ˈn ˗a möä mö ˈyukusɛ ˈyize. Zaa, swɩ nɩ ˗tɩmö yɔwʋ ˈkunɩ, Zoova ˗yimö kwänɩ ˗n ˈkä nʋnʋlizoku ˈwlu ˈplɩ.
NƖKPA ˗MUMUË LƐ NƖƖ: “Teɲii ˗li ˈlɛ ˗sunɩɩɛ ˈwlumö. Nˈn˗ä bhɛnɩ n ˈkɩ kɛˈmö ˗sɛ.”
Biblë a gbɛlʋ ˗mu ˗n ˈkä ɔ ˈmö zɛlɩ nzɩ ˗n ˈkɔ ˈylimö tulanɩ nɩɩ Zoova bhɛnɩ ɔ ˈkɔ kwänɩ ɔ ˈkä ˗lizoku a nʋnwɛ kɛˈmö ˗sɛ?
DƐSƐKÄKÏBHÏ
˗Aˈa kpökpa ˗kä ˈwlɩlɩ ˗wʋ, ˈn ˗aˈa dlɩpäsaa ˗ɲɛ ˗aˈa nʋnʋlii ˈwuë ˈsɔ ˗käˈɛ ˈwlɩlɩ ˗wʋ, ˗a yi Zoova dlɩ yɔwʋ nɛnɩ.
ˈWʋligbanɩkïbhï
˗A ˗kä ˈwlɩlɩ ˗wʋ, ˗yɩ kä ɔ ˈŋlɩ ˈn yɩ kä ɔ teɲii dɛsɛ ˈnɩ?
Sɛɛ ˗a ˈkä ɔ ˈzʋ ˗aˈa kpökpa ˈkä ˈkwädlɩ ˈwlɩlɩ ˗wʋ ˈnɩ?
Sɛɛ ˗a ˈkä ɔ ˈzʋ nzɩ ˗aˈa dlɩpäsaa ˗ɲɛ ˗aˈa nʋnʋlii ˈsɔ ˈkä ˈwlɩlɩ ˗wʋ ˈnɩ?
YILII YƆWƲ
˗A ˈnɩ ˗lu ˗kä aˈbhë ˗kë, sɛɛ ˗a ˈkä ɔ ˈzʋ nzɩ ˗a ˈkä ˈwlɩlɩ ˗wʋ ˈyize ˈnɩ?
ˈDɩmözʋwɛlɩɩ ˗yɩ ˈkää nɩkpɛ kwänɩ ɔ ˈkä siklɛtɩ ˈyi ˈtatinɩ.
˗Ɔɔzʋkälii a ylɛylʋ, ˗lizoku a ˗mi yɩ bhɛnɩɛ yɩ ˈkä nɩkpɛ ˈwlu nʋʋ, ˈyi ˈylɩmö.
« La pornographie : inoffensive ou dangereuse ? » (La Tour de Garde, 1er août 2013)
Sɛɛ nɩkpɛ ˗bhlʋ ˈzʋä ˈn ɔ yiɛ ˗ɔɔzʋkälii a ylɛylʋ ˈbhlena, ˈyi ˈylɩmö.
« J’ai échoué bien des fois avant de réussir » (La Tour de Garde no 4 2016)
a ˈCɩɛcɩɛkïbhëa ˈlɛ ˈmö a dɛɛ wa ˈzʋä, Yɩlii yɔwʋ, ˗lɛ a kïbhëa ˗a nʋä « Comment arrêter de fumer » ˈdɩmözʋwɛlɩɩ a ˗bɛ ˗yɩ ˈkää nɩkpɛ kwänɩ ɔ ˈkä ˗sɩbhä a nʋnʋlii kɛˈmö ˗sɛ, yɩ ˗wʋ ˗mä.
b Nɩkpɛ ˈkä ɔɲɩ ˈwi ˗sɛ a wɛlɩɩ, ˗n ˈkɩ sasɛ ˈmö ˈnʋ a dɔˈwʋ, yɩlɩ ˗mä kïbhëa ˈlɛ ˈmö, ˗a nʋä « Comment arrêter de me masturber ? » ˈbɔgʋʋ wa laa, Les jeunes s’interrogent. Réponses pratiques (volume 1), wʋ ˈcɩɛcɩɛkïbhë 25 ˈmö.