ˈCƖƐCƖƐKÏBHË 53
˗A nɩ ˗sɛ ˗lɛ ˈbhlibhïle a ˗mɛ nɛnɩɛ Zoova dlɩ yɔwʋ
‘Lagɔ a ˗mɔ ˗wʋä ˈmäna ˈmö,’ ˈmö Zoova glɩnɩɛ. (1 Timotee 1:11) Ɔ yɩbhä nɩɩ ˗a nɩ ˗wʋ ˈmäna ˈmö ˗mä ˗aˈa zɩkpaa ˈmö. ˗A ˗kä libho nʋ ˈwë ˈn ˗a ˗kä ˈtɛɲɩ ˈwʋ ˈlibhï ˗a ˗kä ɲɛpɛ ˈn ˗a ˗kä ˈbhlii, yɩ ˗bhoo teɲii ˈmäna ˈwʋ. ˗Mä ˈcɩɛcɩɛkïbhë ˈlɛ ˈmö, sɛɛ ˗a ˈkää ˗aˈa ɲɛpɛɲɛpɛtɛɲɩ ˈwʋ ˈlibhï nzɩ ˗a ˈkä ˈbhli, sɛɛ nɛnɩɛ Zoova dlɩ yɔwʋ, mö ˗a ˈkää ˈylɩmö.
1. ˗A ˗kä ˈbhlibhïle ˗lɛ ˗sɛɛ yii, ˈsaa ˗a ˈkä ɔ dlɩ kɛ ˈpänɩ ˈnɩ?
ˈSaa nɛnɩmö ɔ dlɩ yɔwʋ, ˗n nʋ ɔ ˗naˈa ɲɛpɛɲɛpɛtɛɲɩ ˈmö ˈnɩ? ˗Mumuë, ˗mä ˈligbë ˈmö ˗mä wa glɩɛ sɛ ˈwa zɛlɩɛ ˈbɔgʋ ˈmö, ˈwa ˗pʋnɩɛ ˈlwɩ ˈyukwli, ˈwa ylɛɛ tlevizɩɔ, ˈn wa möˈɛ ˗mä ɛtɛnɛtɩ ˈklʋ. ˗Mumuë wabhlɩ, wa ˗ɲɛ wa ˈbhɩa ˈsɔ ˈkä bie mö, wa ˈkä ˗dluä mö, ˈn wa ˈkä ˈbhlibhïle a kii ˗mimii ˗bhɛ, ˈmö wa yɩbhää. ˗A bhɛnɩ ˗a ˈkä ˈbhlibhïle a ˗mɛ ˗a yɩbhää ˗lɛ ˗sɛɛ, ˗maa ɛ nɩ glɩnɩ ˈbhlibhïle a ˗mɛ “nɛnɩɛ Lagɔ dlɩ yɔwʋ.” (Ɛfɛɛzɩ a ˗nʋa 5:10) ˗Yɩ kää ˈŋlɩ ˈn yɩ kää dɛsɛ, miɛ nɩɩ zɩˈɛ a ˈbhlibhïle a ˗bɛ ˈmö, ˗lii a ˗mi Zoova ˈnɩɛ ˗waa ˈlɩlɩlɩ, mii ˗wʋä ˗mä: ˗Glakäkʋ, ˗ɔɔzʋkäli ˈn ˗damina a sɛ a ˗lii. (Zɛlɩ Psaume 11:5 ˈmö.) ˈSaa ˗kaɲɩ ɔ kwänɩ ˗a ˈkä ˈbhlibhïle a ˗mɛ nɛnɩɛ ˗lɛ ˗sɛ ˈnɩ?
˗A ˗kä bhɛya a ˗muë ˗waa Zoova ˗lɛ ˗sɛɛ, yɩ yi ˗aa ˗li a ˗lii ˈmö ˗kä ˈn yɩ yiˈɛ ˈŋlɩ ˗kä, ˗a yi ˈbhlibhïle a ˗mɛ nɛnɩɛ ˗lɛ ˗sɛ. ˗Mä ˈcɩɛcɩɛkïbhë 48 ˈmö, ˈsaa ˗a ˈcɩɛ miɛ nɩɩ, “˗Ɔ ˗ɲɛ ˈnɛɛnɩɲɔ ˗kä ˈwʋ ˗bhlinɩɩ, ˈnɛɛnɩɲɔ ɔ ˈkää ˈzʋ.” ˗Maa nɩkpa ˗wa ˈnɩɛ Lagɔ ˈa ˈpäpägböö ˗waa, ˗a ˗ɲʋa ˗kä ˈkwädlɩ ˈwʋ ˗bhlinɩɩ, yɩ ˗yiɲɩ “˗lizoku ˈwʋ ˗lɛnɩ.”—Proverbes 13:20.
2. ˗A ˗kä ˗aˈa ˈbhlibhïle a ˈtɛɲɩ sasɛ bhëga, sɛ yɩ kä ɔ dɛsɛ ˈnɩ?
ˈBhlibhïle ˗a ˗sɛɛ ˗lɛ yi nɛnɩ aˈbhë ˗kë, ˗a nɩ ˈnɛmanɩ ˗aɲɩ ˈwʋ, ɛ tɩa ˗aˈa ˈtɛɲɩ ˈwuë ˈwʋ ˈlibhï. Ɛˈɛ ˗bhö ɲɩasɛ, ˗maa yɩ bhɛnɩ yɩ ˈkä ˈŋlɩ ˗kä, ˗a ˈnaa ˈkä ˈtɛɲɩ ghlɩ nzɩ ˗a ˈkä ˗lii ˗yɩ kää dɛsɛ nʋ. Biblë ˗lɛ nɩɩ: “ˈTɛɲɩɩ ˈwuë Lagɔ ɲaɲɩɛ a nɩ tɛ ˈyi ˈtatinɩ ɛ nɩ tɩ ˈfʋ ˈplɩ.”—Zɛlɩ Ɛfɛɛzɩ a ˗nʋa 5:15, 16 ˈmö.
ˈCƖƐ ˗LII ˗MIMII
Sɛɛ ˗a ˈkää ˈbhlibhïle a ˗mɛ nɛnɩɛ ˗lɛ ˗sɛ, ˈyi ˈylɩmö.
3. ˈBhlibhïle a ˗mɛ ˈnɩɛ nɛnɩɩ, ˗a nɩ panɛɛ ˗gömö
˗Yɩ kä ɔ ˈŋlɩ ˈn ˗a kä ɔ ˗a ˈkä ˈnɛɛnɩsɛ ˗aˈa ˈbhlibhïle ˗lɛ ˗sɛ ˈnɩ? ˈZʋ ˗lɛ VIDEO, ˈn a nɩ yɩlɩ nimïyɩbhäkïbhë ˈlɛ yɔwʋ.
Bhlaˈmö a ˈbhlibhïle wa bhɛ a˗a ˗mä Ghlɔɔmö, sɛ ɛ ˗ɲɛ zɩˈɛ a ˈbhlibhïle ˈwlʋnɩ ɔ ˈnɩ?
˗Mä video ˈlɛ ˈmö, ˈsaa Dani ˈnʋ ɔ ˈmö ˈbhlibhïle a dɔˈwʋ ˈnɩ?
Zɛlɩ Ghlɔɔmö a ˗nʋa 12:9 ˈmö, ˈn a nɩ yɩlɩ nimïyɩbhäkïbhë ˈlɛ yɔwʋ:
Sɛɛ Biblë a gbɛlʋ ˈlɛ bhɛnɩ ɔ wʋ ˗kamö kwänɩ ˗n ˈkä ˈbhlibhïle a ˗mɛ nɛnɩɛ ˗lɛ ˗sɛ ˈnɩ?
˗Lii a ˗mi Zoova ˈnɩ ɔ ˗waa ˈlɩlɩlɩ? Zɛlɩ Proverbes 6:16, 17 ˈn Galatii a ˗nʋa 5:19-21 ˈmö. A ˗kä ˈmö zɛlɩ ˈwë, a nɩ yɩlɩ nimïyɩbhäkïbhë ˈlɛ yɔwʋ:
˗Mä gbɛlɩ ˈlɛ ˈmö a ˗lii wa zɛlɩɛ, sɛ yɩ ˗ɲɛ zɩˈɛ a ˈbhlibhïle mönɩ ɔ yɔwʋ ˈnɩ?
Sɛɛ ˗n ˈkä ɔ ˈnɛɛnɩsɛ ˗naˈa ˈbhlibhïle ˗lɛ ˗sɛ ˈnɩ?
ˈYɩbhä ˗naɲɩ nimï:
Sɛ n ˈkä ɔ ˈzʋ ˈnɩ? ˗Lii a ˗mi ˈnɩɛ Zoova dlɩ yɔwʋ nɛnɩ ˗wʋ ɔ ˗mä ˈbhlibhïle ˈlɛ ˈmö ˗a?
ˈTɛɲɩ ˗mɛ mö ɔ ˈnɩ? ˈTɛɲɩ n ˈkää ˈwʋ ˈlibhï n ˈkä ˗lii ˗yɩ kää dɛsɛ nʋʋ, ˈmö n libhï ɔ ˈwʋ ˈn n bhli bhä ˗a?
˗Mɔ n ˗ɲɛ bhli ɔ ˈnɩ? ˈBhlibhïle ˈlɛ a za, n ˗ɲɛ nɩkpa ˗wa ˈnɩɛ Zoova ˗waa ˈsɔ ˈnaa ˈkä ɔ ˈkwädlɩ ˈwʋ ˗bhlinɩ ˈyize ˗a?
˗Lu a ˗mu ˈnɩɛ nɛnɩ, ˗a ˗kʋʋ teɲii gwë ˈdionɩ, yɩ kä ˗aa ˗li a ˗lii ˈmö. Zaa, ˈbhlibhïle a ˗mɛ ˈnɩɛ nɛnɩ, ˗ɛ ˗kaɲɩɛ ˗lizoku ˈmö ˈpää, ˗a kä ˗a ˈkɛ gwë ˈdionɩ.
4. ˗A nɩ nʋnɩ ˈnɛɛnɩsɛ ˗aˈa ˈtɛɲɩ libho ˈmö
ˈZʋ ˗lɛ VIDEO, ˈn a nɩ yɩlɩ nimïyɩbhäkïbhï ˈlɛ yɔwʋ.
˗Mä video ˈlɛ ˈmö, lagɔdaauyuu ˈnɩɛ ˗lizoku ylɛ abhlɩ, ˗maa ˈsaa ˈnɩ ɔ nɛnɩ ˈnɩ?
Zɛlɩ Filiipö a ˗nʋa 1:10 ˈmö, ˈn a nɩ yɩlɩ nimïyɩbhäkïbhë ˈlɛ yɔwʋ:
˗A ˗kä ˈbhlii, ˈtɛɲɩ ˗zɩmö ˗a ˈkää ˗sɛ a dɔˈwʋ, sɛɛ Biblë a gbɛlʋ ˈlɛ bhɛnɩ ɔ wʋ ˗kaɲɩ kwänɩ ˈnɩ?
5. ˗A nɩ ˗sɛ ˗lɛ ˈbhlibhïle a ˗mɛ nɛnɩɛ
ˈBhlibhïle a ˗bɛ ˈnɩɛ Zoova dlɩ yɔwʋ nɛnɩ abhlɩ, ˗maa ˗mimii a ˗bɛ ˗wʋˈɛ ˗lɛ ˗yɩ nɛnɩɛ. Zɛlɩ Ecclésiaste 8:15 ˈn Filiipö a ˗nʋa 4:8 ˈmö, ˈn a nɩ yɩlɩ nimïyɩbhäkïbhë ˈlɛ yɔwʋ:
ˈBhlibhile a kii ˗yɩ nɛnɩɛ a glaˈmo, ˗mɛ ˗n yɩbha ɔ ˈnɩ?
ˈBhlibhïle a ˗bɛ ˗bhölɩ ˗yɩ ˗bhöä ˈmäna ˈwʋ.
NƖKPA ˗MUMUË LƐ NƖƖ: “ˈBhlibhïle yi ˗glakäkʋ ˈmö ˗kä oo, ɛ yi ˗ɔɔzʋkälii ˗ɲɛ ˗damina ˈsɔ ˈmö ˗kä oo, naɲɩgäsɛ ˗amöö ˈniɛ nʋ zaa, ɛˈɛ ˗bhö ˗lizoku.”
Sɛɛ ˗n ˈkä ɔ gbä ˈnɩ?
DƐSƐKÄKÏBHÏ
Zoova yɩbhä nɩɩ ˗a nɩ ˗sɛ ˗lɛ ˈbhlibhïle a ˗mɛ nɛnɩɛ, ˗ɛ ˗kaɲɩɛ ˈmäna dlɩ zɛmö ˈzʋ.
ˈWʋligbanɩkïbhï
ˈBhlibhïle a ˗mɛ Klɩtɩɛyi ˈnɩ ɔ ˗kä ɔ ˈkä ˗lɛ ˗sɛ ˈnɩ?
˗A ˗kä ˈbhlie yi a ˈtɛɲɩ ˗a ˈkää ˗sɛɛ, ˗yɩ kä ɔ ˈŋlɩ ˈn ˗a ˈkɛ ɔ sasɛ bhëga ˈnɩ?
˗Yɩ kä ɔ ˈŋlɩ ˈn ˗a yɩbhä ɔ ˗a ˈkä ˈbhlibhïle a ˗mɛ nɛnɩɛ Zoova dlɩ yɔwʋ ˗lɛ ˗sɛ ˈnɩ?
YILII YƆWƲ
˗Mɔ kä bhä ɔ ˈkä ˗aˈa ˈbhlibhïle ˗lɛ ˗sɛ ˈnɩ?
˗Lii ˗yɩ ˗kaɲɩɛ kwänɩ ˗a ˈkä sasɛ ˗aˈa ˈbhlibhïle ˗lɛ ˗sɛ, ˈyi ˈylɩmö.
« Comment se détendre sainement ? » (La Tour de Garde, 15 octobre 2011)
Nɩkpɛ ˗bhlʋ ˗ɔ zigbanɩɛ ˈɔ ˈbhlibhlisaa ˈmö a wɛlɩɩ, zeli ˈmö (biographie « J’ai même surmonté mes préjugés »).
« La Bible transforme des vies » (La Tour de Garde, 1er février 2010)
ˈŊlɔ ˗bhlʋ ˈyɩɛ ˈbhlibhïle ˗ɛ kää ˗damina ˈmö ˈylɩmö a sɛ ɔ ˈzʋä, ˈyi ˈylɩmö.