ˈCƖƐCƖƐKÏBHË 13
Sɛɛ ˈfʋ a lagɔgligbï päla ɔ Lagɔ ˈa ŋlɩɩ fɩ ˈnɩ?
ˈN Lagɔ ˗kä ˗wawʋ glɩnɩɩ, lagɔgligbï ˗yɩ gbää Lagɔ ˈmö yɩ bʋbɔɔ, sɛ yɩ ˗wʋ ɔ ˈmö ˈn yɩ nʋ ɔ ˗lizoku a ki ˈwuë ˈnɩ? Lagɔgligbï ˈla ˗kä ˗sɩbhä a ˗lii nʋ, ɛˈɛ ˗bhö fʋ, ˗maa ˈfʋ a lagɔgligbï yɩ glɩnɩɛ nza yɩ zʋä ˗sɩbhä. Lagɔ ˈa ŋlɩɩ ˈmö yɩ pälaa fɩ. Sɛ yɩ päla ɔ Lagɔ ˈa ŋlɩɩ fɩ ˈnɩ? Sɛɛ Lagɔ pä ɔ yɩ dɔˈwʋ dlɩ ˈnɩ? ˈN ˈsaa ɔ ˈkä ɔ lagɔgligbï ˈla ˈwlu nʋ ˈnɩ?
1. ˈSɛɛ ˈfʋ a lagɔgligbï a ˈcɩawɛlɩɩ päla ɔ Lagɔ ˈa ŋlɩɩ fɩ ˈnɩ?
ˈFʋ a lagɔgligbï ˈmö a ˗nʋa, “Lagɔ ˈa ˗tiamö a wɛlɩɩ ˈmö wa zigbanɩɛ yiodɩ ˈmö.” (Ghlɔɔmö a ˗nʋa 1:25) A yɩɛ, ˈfʋ a lagɔgligbï ˈla ˈnɩɛ yɩ ˈmö a ˗nʋa Lagɔ ˈa ŋlɩɩ sʋlʋnɩ. Maa ˗tɩamö a dɔˈwʋ, Biblë ɲɩaɲɩ ˈdɩ nɩɩ ˗a ˗kä Lagɔ ˈɔ ŋlɩɩ ˈmö lanɩ, dɛsɛ yɩ kää teɲii. (Ghlɔɔmö a ˗nʋa 10:13, 14) Lagɔgligbï ˗mimii a ˈkifiea lɛ nɩɩ ˗lizoku ˗kä nɩkpɛ ghlɩɩ, Lagɔ mɔɔ kää yɩ gbʋ, maa yiodɩɛ. ˗Lizoku ˈnɩɛ ˗zɩ Lagɔ ˈmö ˈbhöönɩ. (Zɛlɩ Zaakö 1:13 ˈmö.) Lagɔgligbï a yiowɛlɩɩ a za nɩkpa a ˗bɛ ˈdionɩɛ Lagɔ gwë.
2. Sɛɛ ˈfʋ a lagɔgligbï a nʋnʋlii päla ɔ Lagɔ ˈa ŋlɩɩ fɩ ˈnɩ?
Sɛɛ Zoova ˗suä nɩkpa, ˈfʋ a lagɔgligbï ˈnɩ ˈzʋ ˗sɩbhä. Biblë lɛ nɩɩ ˈfʋ a lagɔgligbï, “ˈwa ˈɲiɲlolii, yɩ yɛ teɲii ˈɲli ˈmlu, Lagɔ kɩ ˈylɩmö.” (’Ylimötulanɩlii 18:5) ˈYlʋbö a ˗bɛ zɩˈɛ dɛˈɛ sɛɛ lagɔgligbï plɛɛ politikö ˈmö. ˗Mä bhlɩɩ ˈwuë ˗gömö a tʋ nɩkpa gwɩɛ zɩˈɛ, wa ˗wʋ ˗mä wʋ zɛmö, wa kä ˈŋlɩ ˈn nɩkpa a miniɲwɩ kuä ˈn wa ˗wani ˈmö. Lagɔgligbï a ˈkifiea, wʋlʋnɩlii mii nɛnʋa dlɩ yɔwʋ, zaa ˈwa lagɔgligbï ˈmö a ˗nʋa ˈmö wa zɛlaa moni, wa ˈkäa wʋlʋnɩli ˈla ghlɩ. ˈWa nʋnʋli ˈla ˈwuë tula nɩɩ waˈaa ˗tiamö Lagɔ ˗yi, ˈn waˈaa ɔ ˈklʋkpa ˗kä.—Zɛlɩ 1 Zaa 4:8 ˈmö.
3. Sɛɛ Lagɔ pä ɔ ˈfʋ a lagɔgligbï a nʋnʋlii a dɔˈwʋ dlɩ ˈnɩ?
ˈPää ˗ka dlɩ, ˈn ˈfʋ a lagɔgligbï a ˗lizokuu yɩ nʋä ˗kamö teɲii ˈklɛ ˈwʋ ˗bhöö, Zoova ɔbhlɩ ˈnaa, ˈsaa yɩ nɔ bhä ˈwlu ˈnɩ? Zoova nɩkpa ɔ ˗waa, ˗maa ˈfʋ a lagɔgligbï a ˈkifiea ˗wa päla ˈɔ ŋlɩɩ fɩɩ, ˗wa nʋä ˈwa nɩkpa ŋäzɩsɛ, ˈmö ɔ ˈpänɩɛ teɲii ˈklɛ yɔwʋ. Ɔ lɛ nɩɩ ˈfʋ a lagɔgligbï ˈwuë ɔ yi ˈyli bhɩa, ‘˗bɛ ˈnaa ˈkɩaˈa ˈkwädlɩ ˈylɩmö.’ (’Ylimötulanɩlii 18:21) Lagɔ yiaˈa ˗pa ˈfʋ a lagɔgligbï ˈyli bhɩa ˈlɩlɩlɩ.—’Ylimötulanɩlii 18:8.
ˈCƖƐ ˗LII ˗MIMII
Sɛɛ Lagɔ pää ˈfʋ a lagɔgligbï a nʋnʋlii a dɔˈwʋ dlɩɩ, ˗a yi yɩ kïbhï ˗mimii yɔwʋ yɩlɩ. ˈN ˗yɩ kää ˈŋlɩ ˈn ˗aaa ˗kä ˗a ˈkä lagɔgligbï ˈla a nʋnʋlii ˈyi ˈtatinɩ nzɩ yɩ ˗kaɲɩ swɩ yɔwʋ ˈkuanɩ ˗a tɩa Zoova yɩbhlɩnɩ a za, ˗a yiˈɛ ˈylɩmö.
4. Lagɔgligbï ˈwuë mii ˈnɩɛ Lagɔ dlɩ yɔwʋ nɛnɩ
Nɩkpa a ˗bɛ pä dlɩ nɩɩ lagɔgligbï ˈwuë, ˈywii a ˗bɛ ˗yɩ möä ˗mä Lagɔ yɔwʋ a saa ˗sɩbhä yɩ ˗wʋä. Maa, ˗tiawɛlɩɩ bhä ˗a? Zɛlɩ Matie 7:13, 14 ˈmö, ˈn a nɩ yɩlɩ nimïyɩbhäkïbhë ˈlɛ yɔwʋ:
Sɛɛ Biblë gbä ɔ Lagɔ ˈa ˈpɩwʋlelea a ˈyioo a dɔˈwʋ ˈnɩ?
ˈZʋ ˗lɛ VIDEO, ˈn a nɩ yɩlɩ nimïyɩbhäkïbhë ˈlɛ yɔwʋ.
Sɛˈɛ Biblë nʋ ɔ nɩɩ, lagɔgligbï a ˗bɛ mii nɛnɩɛ Lagɔ dlɩ yɔwʋ ˗a?
5. ˈFʋ a lagɔgligbï ˈnɩɛ Lagɔ ˈa ˗wawʋ a gbäpöö ˗gänɩ
ˈFʋ a lagɔgligbï pälaa Lagɔ ˈa ŋlɩɩ fɩ ˈki a ˗bɛ ˈmö. Sɛ yɩ pälaa teɲii Lagɔ ˈa ŋlɩɩ fɩ aˈbhë miɛ nɩɩ, yɩ gwɩmö tʋ. ˗N ˈkɩ sasɛ ˈylɩmö a dɔˈwʋ, ˈzʋ ˗lɛ VIDEO, ˈn a nɩ yɩlɩ nimïyɩbhäkïbhï ˈlɛ yɔwʋ.
ˈSɔnatʋ ˈkɔdʋʋ a ˈtɛɲɩ ˈmö ˈsaa lagɔgligbï a ˗bɛ nʋ ɔ ˈnɩ?
ˈSaa lagɔgligbï nʋä, sɛɛ ˗n pä ɔ yɩ dɔˈwʋ dlɩ ˈnɩ?
Zɛlɩ Zaa 13:34, 35 ˈn 17:16 ˈmö. ˈN a nɩ yɩlɩ nimïyɩbhäkïbhï ˈlɛ yɔwʋ:
Lagɔgligbï ˗kä ˗mä tʋ ˈmö plɛ, ˗na dɔˈwʋ sɛɛ Zoova pä ɔ dlɩ ˈnɩ?
ˈFʋ a lagɔgligbï ˗wʋ ˗mä ˗lizoku a ˗bɛ zɛmö. Zaa, Lagɔgligbï a nʋnʋlii ˗mi tula ɔ nɩɩ yɩˈɩɛ Lagɔ ˈa ˗wawʋ a gbäpöö ˗gänɩ ˈnɩ?
ˈFʋ a lagɔgligbï ˈnɩɛ Lagɔ ˈa ˗wawʋ a gbäpöö ˗gänɩ
6. Lagɔ yɩbhä ɔ ˈkä nɩkpa kwänɩ wa ˈkä ˗mä ˈfʋ a lagɔgligbï ˈmö ˈwlʋ
Zɛlɩ ’Ylimötulanɩlii 18:4 ˈmö,a ˈn a nɩ yɩlɩ nimïyɩbhäkïbhë ˈlɛ yɔwʋ:
˗N yɩbhlɩnɩɛ sɛ nɩɩ nɩkpaa ˈfʋ a lagɔgligbï nʋä ylʋ, Lagɔ yɩbhä ɔ ˈkʋa kwänɩ, ˈsaa yɩ nʋmö ɔ ˈwlu ˈnɩ?
7. ˈCɩɛ ˗tiamö a Lagɔ a ˗gömö a wɛlɩɩ ˈyize
ˈFʋ a lagɔgligbï a nʋnʋlii ˈn sɛɛ yɩ gbää, ˗n yi ɔ ˈyi ˈtatinɩ yɩ ˈkä sɛɛ ˗n pää Lagɔ a dɔˈwʋ dlɩ ˈmö zigbanɩ ˗a? ˈPää ˗ka dlɩ, ˈyu ˗bhlʋ mɔɔ ˗wʋä ˗lɛ, ɔˈɔɔ ɔ dɩba ˈa wɛlɩɩ ˈklʋkpamö ˈzʋ. ˈYlɩ ˗bhlʋ ˈmö, ɔ yiɛ ˗lɛ ˈligbë ˈmö ˈbhöö, ˈn ɔ yiɛ ˗lizoku ˈkädɩ nʋ. Yuu a nʋnʋlizoku ˈnɩɛ a˗a ɔ dɩba dlɩ yɔwʋ nɛnɩ ˈlɩlɩlɩ. Yu ˈla ˗ɔ ˗sɛɛ ɔ dɩba ˈklʋkpamö, sɛ ɔ ˗suä ˈɔ zɩkpaa a dɔˈwʋ, ˗a yi ɔ yɩ gbʋ ɔ dɩba ˗gömö ˈzʋ ˗a? ˗Yɩ kä ɔ ˈŋlɩ ˈnɩ?
ˈFʋ a lagɔgligbï a nʋnʋlii a za, ˗a yi ɔ Zoova gbʋ ˗gömö ˈzʋ ˗a? ˈN ˗a yi ɔ nɩɩ ˗a ˈnaa ˈkäa sɛ tɛlɩ nzɩ ˗a ˈkä ˈɔ ˗gömö a wɛlɩɩ ˈcɩɛ ˗a?
NƖKPA ˗MUMUË LƐ NƖƖ: “Na gbʋ ˈnɩɛ Lagɔ ˈmö ˗wʋ. Ɛˈɛ ˗bhö ɲɩasɛ, ˗maa lagɔgligbï aˈbhë mii ˗wʋä ˗mä ˗lizoku a ˗bɛ zɛmö.”
˗Sɩbhä ˗n ˈpämö ɔ ˗naa dlɩ ˗a?
ˈFʋ a lagɔgligbï a nʋnʋlii a za, ˗yɩ kä ɔ ˈŋlɩ ˈn ˗aaa ɔ ˗kä ˗a ˈkä Zoova a dɛ zokwësɛ dlɩ ˈpä ˈnɩ?
DƐSƐKÄKÏBHÏ
ˈFʋ a lagɔgligbï Lagɔ ˈa ŋlɩɩ ˈmö yɩ ɲimaa ˗mä ˈyɩ nʋnʋlizoku ˈmö, ˈn ˗mä ˈyɩ ˈcɩawɛlɩɩ ˈmö. Lagɔ yiaˈa ˗pa ˈfʋ a lagɔgligbï ˈyli bhɩa.
ˈWʋligbanɩkïbhï
ˈSaa ˈfʋ a lagɔgligbï ˈcɩaa ˈn sɛ yɩ zʋä, ˈsaa yɩ nʋmö ɔ ˈwlu ˈnɩ?
Sɛɛ Zoova pä ɔ ˈfʋ a lagɔgligbï a dɔˈwʋ dlɩ ˈnɩ?
ˈSaa Lagɔ ˈkä ɔ ˈfʋ a lagɔgligbï ˈwlu nʋ ˈnɩ?
YILII YƆWƲ
˗Lii a ˈki ˈsɔ ˗yɩ ˗ɲuä Lagɔ dlɩ yɔwʋ, lagɔgligbï nʋä, ˈcɩɛ yɩ dɛ.
˗Yɩ kä ɔ ˈŋlɩ ˈn Zoova yɩbhä ɔ nɩɩ ˗a ˗ɲɛ ˗mumuë ˈsɔ ˗a nɩ bʋbɔnɔɔ ˈgämö ˈnɩ?
« Est˗il nécessaire d’appartenir à une religion organisée ? » (Ɛtɛnɛtɩ ˈklʋ a ˈcɩɛcɩɛkïbhë)
ˈPɛlɩ ˗bhlʋ ˈnɩɛ a˗a ˈsaa ˈɔ lagɔgligbëa ˈcɩaa ˈmö ˗wanɩ. Maa, yɩ ˈnɔɔ ˈyio ˈwʋ ˗sɛ ɔ ˈkä Lagɔ ˈa ˈgbëawɛlɩɩ ˈcɩɛmö.
« Pourquoi un prêtre a quitté son Église » (Réveillez˗vous !, février 2015)
ˈYlʋbö a ˗bɛ dɛˈɛ sɛɛ lagɔgligbï ˈcɩaa yiowɛlɩɩ. Nza ˗mumuë nʋä nɩɩ Lagɔ a gbʋ ˈnʋa ˈmö ˗wʋ, ˈkpʋkpʋ ɔ kää. ˈYiowɛlɩɩ a glaˈmö a ˗nɩɩ ta lagɔgligbï ˈcɩaa, ˈcɩɛ sɛɛ Biblë gbää yɩ dɔˈwʋ.
« Des mensonges qui empêchent d’aimer Dieu » (La Tour de Garde, 1er novembre 2013)
a ˗Mä ’Ylimötulanɩlii a ˈbɔgʋʋ ˈmö a ˈŋlɔ ˗bhlʋ wa laa ˗Glɔ ˈkɔdʋʋ Babilɔɔnɩ, ˗yɩ kää ˈŋlɩ ˈn wa pälɔɔ ˈfʋ a lagɔgligbï ˈwʋ, ˗n ˗kä ˗n ˈki ˈmö ˈnʋ, yɩlɩ ˗mä Dlɩgömösɛsɛnɩkïbhë 1 ˈmö.