Siusihan aha do na ibahen ham na laho siihutkononni niombahmu?
BANI NAMATORAS
8 Siusihan
AHA DO ARTINI
Namatoras boi gabe siusihan anggo sidea mangkorjahon aha na iajarhon sidea bani niombahni. Umpamani, iajarhon hita bani niombahta ase tongtong jujur. Hape sanggah dong tamu isuruh hita niombah mangkatahon, “Bapa lang i rumah.” Gabe sunsah ma bani niombahta ase ia gabe jolma na jujur.
“Lang boi iarapkon namatoras ase niombahni mangkorjahon aha na ipindo sidea anggo sidea sandiri lang mangkorjahon ai. Usih songon spons na mangossop bah i sekitarni, sonai ma homa dakdanak urah maniru aha na ididah pakon na ihorjahon namatorasni. Mintor protes do sidea anggo lang sosok na ihorjahon pakon na iajarhon hita.”—Si David.
BIBEL MANGKATAHON: “Nasiam do na mangkatahon, ‘Seng bulih manangko,’ tapi mase manangko nasiam?”—Rom 2:21, NW.
MASE PONTING ON
Pengaruh ni ise do na sibanggalan hubani niombah? Tontu namatorasni ma. Marimbangkon hasomanni, banggalan do pengaruhni namatoras bani niombah. Artini, sosokan do namatoras mangajari niombahni. Halani ai, maningon ihorjahon do aha na iajarhonni ai.
“Ra do bahat podah ibere hita, tapi lang na botoh itangar do ai atap lang. Hape sanggah hita lang mangkorjahon aha na ihatahon hita, mintor protes do sidea. Jadi, sasintongni ipardiateihon sidea do aha na ibahen hita.”—Si Nicole.
BIBEL MANGKATAHON: “Ia hauhuron na hun babou ai . . . lang marsipakulah-kulah [munafik].”—Jakobus 3:17.
NA BOI IBAHEN NASIAM
Pareksa ma dirimu. Film na sonaha do na hutonton? Sonaha do parlahouku bani pasangan atap niombah? Halak na sonaha do hasomanku? Ai parduli do ahu bani halak na legan? Laho mangajari niombah, ai huhorjahon do aha na huajarhon ai?
“Anggo ahu pakon suamiku, lang isuruh hanami dakdanak mandalankon aturan na lang idalankon hanami.”—Si Christine.
Mangindo maaf ma anggo nasiam marsalah. Ibotoh dakdanak do anggo nasiam lang sempurna. Anggo nasiam lang maila mangindo maaf hubani pasangan ampa niombah, ai boi mangajari sidea ase jujur ampa martoruh ni uhur.
“Porlu do ibogei niombah hita mangaku salah pakon mangindo maaf. Anggo lang ibahen hita sonai, sidea pe gabe sunsah mangaku salah.”—Si Robin.
“Banggal tumang do pengaruhta hubani niombahta. Siusihan na ibahen hita, ai ma cara na sidearan laho mangajari niombah halani ididah sidea do aha na ihorjahon hita. Usih do ai songon buku parlajaran na totap porlu iparlajari.”—Si Wendell.