Heber

10 Undang-Undang Musa e bayangen ngenca+ kerna kai si mehuli si nandangi reh,+ labo kerna kai si mehuli e. Emaka arah korban-korban si ipersembahken arah tahun ku tahun, undang-undang* e la banci erban kalak si ngerembakken diri ku Dibata jadi sempurna.+ 2 Bicara korban-korban e banci erban kalak e jadi sempurna, korban pe lanai perlu ipersembahken mulihi, perban kenca kalak e ibersihken, lanai akap kalak e salah bana perban dosana. 3 Tapi, arah korban-korban si ipersembahken tahun ku tahun, enda jadi penginget man kalak e kerna dosa-dosana,+ 4 perban dareh lembu jantan bage pe dareh kambing la mungkin nasapken dosa.

5 Emaka sanga reh ia ku doni, nina, “‘Labo korban ras persembahen si arapkenNdu, tapi sikapkenNdu sada daging man bangku. 6 Labo ngena ateNdu persembahen tutungen ras persembahen dosa.’+ 7 Kenca si e ningku, ‘O Dibata, enggo reh aku guna ngelakoken peratenNdu, bagi si tertulis bas gulungen-gulungen* kerna aku.’”+ 8 Tangtangna nina, “Labo arapkenNdu janah labo ngena ateNdu persembahen, persembahen tutungen, ras persembahen dosa,” eme persembahen-persembahen si ibereken sesuai ras Undang-Undang Musa. 9 Jenari nina, “Enggo reh aku guna ngelakoken peratenNdu.”+ Hapusna peraturen si pertama gelah sah peraturen si peduaken. 10 Sesuai ras “peraten” e,+ kita enggo ipebadia arah daging Jesus Kristus, si ipersembahken sekali seh rasa lalap.+

11 Selain si e, tiap wari tiap imam bas inganna ngelakoken pelayanen si badia+ janah rusur persembahkenna korban-korban si seri,+ si la banci tuhu-tuhu nasapken dosa.+ 12 Tapi persembahken Kristus sada korban guna nasapken dosa seh rasa lalap, janah kundul ia i sebelah kanan Dibata,+ 13 janahna nimai seh asa musuh-musuhna itamaken ku teruh nahena.+ 14 Alu sada korban si ipersembahken, banna kerina kalak si ipebadia jadi sempurna+ seh rasa lalap. 15 Selain si e, sidat kesaksin arah kesah si badia alu kata-kata, 16 “‘Enda perjanjin si Kuban pagi ras kalak e kenca masa e,’ nina Jahwe.* ‘Kutama pagi undang-undangKu ku bas pusuh kalak e janah Kutulis bas perukurenna.’”+ 17 Jenari nina, “Dosa-dosa kalak e ras kesalahen-kesalahen kalak e lanai pagi Kuinget.”+ 18 Adi kerina e iampuni, lanai perlu lit persembahen dosa.

19 Emaka o senina-senina, perban dareh Jesus, enggo pang kita ngelewati dalan guna masuk ku ingan si badia.+ 20 Dalan e eme dalan si mbaru si tujunna ku kegeluhen arah tirai e,+ tirai e eme dagingna. 21 Perban lit imamta si mulia si jadi kepala bas rumah Dibata,+ 22 mari sideheri Dibata alu bulat ukur ras dem kiniteken, perban pusuhta enggo ibersihken arah pusuh peraten si jahat nari,+ janah dagingta enggo ibersihken alu lau bersih.+ 23 Mari terus siberitaken arapenta janah la kita sangsi,+ perban si erjanji kerna arapen e setia. 24 Mari siperdiateken sada ras si debanna gelah siiah-iahen kita bas engkelengi ras ncidahken perbahanen si mehuli.+ 25 Ula kita la reh ku perpulungen+ bagi si biasa ilakoken piga-piga kalak, tapi sipegegehilah sada ras si debanna,+ janah reh tutusna kita ngelakoken si e kerina perban siidah wari e enggo reh deherna.+

26 Adi sengaja kita erban dosa kenca sialoken pemeteh si tepat kerna kebenaren,+ lanai lit korban man dosata.+ 27 Si man timan eme penghakimen si erban kita mbiar bage pe rawa Dibata si gurlah si engkernepken kerina kalak si ngelawan Ia.+ 28 Adi lit dua ntah pe telu kalak si jadi saksi, ise pe si la matuhi Undang-Undang Musa ihukum mate janah la lit ampunen.+ 29 Menurut kena, la kin hukumen si ndauh beraten patut ibereken man kalak si enggo merjaki Anak Dibata, bage pe man si la ngergai dareh perjanjin+ si mpebadia ia ras si hinana kesah si badia, padahal kesah si badia nge si mbuktiken kiniulin Dibata si luar biasa?+ 30 Siteh maka nina Dibata, “HakKu kap pembalasen. Kubalas pagi perbahanenna si jahat.” Lit ka tertulis, “Jahwe* pagi si ngakimi umatNa.”+ 31 Seh kel ngerina adi ndabuh ku bas tan Dibata si nggeluh.

32 Tapi tetaplah inget keadan kena mbarenda. Sanga si e, kenca kena iterangi,+ setia kena ngadapi kiniseran bage pe perjuangen si mberat. 33 Mon-mon ihina kena janah adapi kena kiniseran i lebe-lebe jelma si enterem. Mon-mon kena pe ikut dat kiniseran ras kalak si dat kiniseran si bage. 34 Perdiateken kena kalak si ipenjaraken, janah tetap meriah ukur kena amin pe erta-erta kena irampas kalak,+ perban teh kena maka lit erta kena si terulin ras tahan rasa lalap.+

35 Emaka, teruslah kena ngerana alu pang, sebap enda mereken melala pasu-pasu.+ 36 Perlu kena setia,*+ sebap kenca lakoken kena peraten Dibata, aloken kena kai si janjiken e. 37 Sebap “ntisik” nari ngenca+ “seh me Ia si nandangi reh e, labo terlambat.”+ 38 “Kalak si ngelakoken kai si benar, tetap pagi nggeluh perban erkiniteken.”+ Janah, “Adi tadingkenna Aku perban ia mbiar, la Aku senang man bana.”+ 39 Kita labo kalak si nadingken Dibata perban mbiar, sebap kalak si bage ikernepken pagi.+ Tapi kita kalak si erkiniteken sebap kalak si bage terus nggeluh.