Lit nge tentangen arah keluargandu? Ntah, enggo nge korbankenndu sen ras ertandu guna mpelebe Kerajan Dibata? (Mat. 6:33) Adi ue, banci kam tek maka idah Jahwe nge pengorbanenndu e. (Heb. 6:10) Pasti enggo gejapkenndu maka tuhu kata-kata Jesus enda: “Ise pe si enggo nadingken rumahna ntah seninana ntah turangna ntah mamakna ntah bapakna ntah anakna ntah jumana perban aku ras perban berita si meriah, alokenna pagi 100 kali terbuen bas jaman si gundari, eme rumah, senina, turang, mamak, anak, ras juma, tapi rikutken penindasen. Bas jaman si nandangi reh, kegeluhen si rasa lalap.” (Mrk. 10:​29, 30) Jelas me, pasu-pasu si enggo alokenndu ndauh belinen asangken pengorbanen kai pe si enggo ibanndu.—Ms. 37:4. w24.03 9 par. 5

Bas abad pertama, sanga kalak Kristen i Judea ngenanami kelihen si mekelek, turang senina bas runggun i Antiokia ‘ersada arih mere penampat man turang senina si tading i Judea. Penampat si ibereken e menurut kengasupenna sekalak-sekalak.’ (Perb. 11:​27-30) Amin pe ingan turang senina si kelihen e ndauh, turang senina i Antiokia nggit nampati kalak e. (1 Joh. 3:​17, 18) Kita pe banci ncidahken sipat perkuah man turang seninata si kena bencana. Pasti merhat kita nampati kalak e. Banci sisungkun pertua-pertua uga cara nampati turang senina si kena bencana. Selain si e, banci sibereken sumbangen man pendahin i sebelang doni, ntah pe sitotoken kalak e. Banci saja turang seninata perlu penampat guna ncukupi keperlunna. Sanga Rajata eme Jesus Kristus reh pagi guna ngakimi kalak, pasti merhat kita ianggap selaku kalak si perkuah janah iundang kita guna ‘ngaloken Kerajan Dibata.’—Mat. 25:​34-40. w23.07 4 par. 9-10; 6 par. 12

Iusih Jesus sipat Jahwe si masuk akal. Jesus iutus ku doni guna erberita man ‘kalak Israel si bali bagi biri-biri si papak.’ Tapi, sanga lit sekalak diberu si labo kalak Israel mindo man bana gelah pepalemna anakna si “irasuki malekat jahat,” mekuah atena ia, janah nggit ia ngelakokenca. (Mat. 15:​21-28) Perdiateken ka contoh si deban. Bas awal pelayanen Jesus, ikatakenna bagenda, “Ise pe si mersoken aku . . . , kupersoken ka pagi ia.” (Mat. 10:33) Tapi, ipersokenna nge Petrus si enggo telu kali mersoken ia? Lang. Iteh Jesus maka Petrus enggo robah janah ia kalak si erkiniteken. Kenca Jesus ipekeke, ijumpaina Petrus jenari petetapna ukurna maka ia enggo iampuni ras tetap denga nge keleng atena ia. (Luk. 24:​33, 34) Dibata Jahwe ras Jesus Kristus masuk akal. Kita uga? Iarapken Jahwe ka kita gelah masuk akal. w23.07 21 par. 6-7