1 Korinti

15 O turang senina, kuingetken ateku kena kerna berita si meriah si kupeseh,+ si enggo aloken kena janah si terus cikep kena alu nteguh. 2 Adi terus cikep kena alu nteguh berita si meriah si kupeseh, kena iselamatken. Adi lang, sia-sia saja kena jadi pengikut Jesus.

3 Kai si pentingna si enggo kualoken, enggo kupeseh man kena, eme: Kristus enggo mate guna dosa-dosata, bagi si itulis bas Kitap si Badia.+ 4 Ia enggo ikuburken,+ janah ipekeke+ bas wari si peteluken,+ bagi si itulis bas Kitap si Badia.+ 5 Jenari cidahkenna dirina man Kepas,*+ kenca si e man 12 rasulna.+ 6 Cidahkenna ka dirina man lebih 500 kalak pengikutna*+ si sangana radu pulung bas sada ingan. Teremen bas kalak e nggeluh denga radu ras kita, tapi si debanna enggo medem bas kematen. 7 Cidahkenna ka dirina man Jakup,+ jenari man kerina rasul-rasul.+ 8 Si terakhir, cidahkenna dirina man bangku,+ si tempa-tempa bagi anak si ilahirken sope waktuna.

9 Aku si rendahna i antara rasul-rasul, janah la aku cocok igelari rasul perban enggo kusiksa mbarenda runggun Dibata.+ 10 Banci aku bagenda gundari perban kiniulin Dibata si luar biasa. KiniulinNa si luar biasa man bangku e labo sia-sia perban buen kerja kerasku bas ngelayani asangken rasul si debanna. Amin pe bage, kerina enda labo perban gegehku, tapi perban kiniulin Dibata si luar biasa. 11 Emaka, ise pe si mberitakenca, la soal aku ntah rasul si deban, seri nge berita si peseh kami janah e si teki kena.

12 Adi siberitaken maka Kristus enggo ipekeke bas si mate nari,+ engkai maka lit piga-piga bas kena si ngataken la lit kekeken man kalak mate? 13 Bicara tuhu la lit kekeken man kalak si enggo mate, Kristus pe mbarenda labo ipekeke mulihi. 14 Adi Kristus la ipekeke, sia-sia kap berita si enggo sipeseh janah kiniteken kena pe sia-sia. 15 Selain si e, adi tuhu kin kalak mate la ipekeke, Kristus pe labo ipekeke Dibata, e ertina sibereken kesaksin palsu kerna Dibata,+ sebap enggo sikataken maka enggo pekekeNa Kristus.+ 16 Adi tuhu kin kalak mate la ipekeke, Kristus pe labo ipekeke. 17 Janah adi Kristus la ipekeke, sia-sia kiniteken kena janah tetap denga kena bas dosa.+ 18 Enda pe ertina maka enggo masap kalak si enggo medem bas kematen selaku kalak si ersada ras Kristus.+ 19 Adi pengarapenta man Kristus guna kegeluhen si gundari enda ngenca, kita kap kalak si mekuahna kel ate arah kerina jelma.

20 Tapi gundari, Kristus enggo ipekeke bas si mate nari janah ia jadi si pertama ipekeke arah kalak si enggo medem bas kematen.+ 21 Bagi kematen reh arah sekalak jelma,+ bage ka pe kekeken man kalak si mate reh arah sekalak jelma.+ 22 Kerina manusia mate perban Adam,+ janah kerina manusia ipekeke mulihi perban Kristus.+ 23 Tiap kalak ipekeke menurut gilirenna:* Si pertama* Kristus,+ kenca si e ipekeke pagi kalak si jadi jang Kristus sanga kerehenna.+ 24 Terakhir, kernepkenna pagi kerina pemerentahen ras kerina si erkuasa, jenari serahkenna Kerajan e man Dibata, eme Bapakna.+ 25 Merentah pagi ia jadi raja seh asa tamaken Dibata kerina musuhna i teruh nahena.+ 26 Musuh terakhir si nandangi ikernepken eme kematen.+ 27 Dibata “erban kerinana jadi patuh i teruh nahe Kristus.”+ Amin pe ikataken maka ‘kerinana enggo iban jadi patuh,’+ enda labo ertina Dibata ikut patuh man Kristus sebap Dibata kap si erban kerina patuh man Kristus.+ 28 Tapi, kenca kerina iban patuh man Kristus, Kristus selaku Anak pe patuh man Dibata si enggo erban kerinana patuh man bana,+ alu bage Dibata ngenca si jadi Penguasa kerinana.+

29 Adi tuhu kin kalak mate labo ipekeke, uga kerna kalak si iperidiken?+ Guna jadi kalak mate nge ia maka iperidiken? Man kai kalak e iperidiken alu tujun si bage? 30 Man kade kami ka nggeluh bas bahaya tiap wari?+ 31 Tiap wari menam aku mate. Labo aku erbual kerna si e, bagi sanga kukataken man kena maka bangga aku man kena selaku pengikut Kristus Jesus Tuanta. 32 Kai gunana kulawan binatang-binatang buas i Epesus,+ bagi si lakoken kalak si deban?* Adi tuhu kin kalak mate labo ipekeke, “mari kita man ras minem, sebap pagi mate me kita.”+ 33 Ula tertipu. Pergaulen si la mehuli ncedai kebiasan si mehuli.+ 34 Sadarlah kena, lakokenlah kai si benar, ula nai ban dosa, sebap piga-piga bas kena la lit pemetehna kerna Dibata. Kukataken bagenda gelah mela akap kena.

35 Amin pe bage, lit si nungkun, “Uga kalak mate ipekeke? Uga bentuk kalak e pagi kenca ipekeke?”+ 36 Kena la masuk akal! Benih si isuan kena labo banci turah adi la kin mate lebe benih e. 37 Kai si suan kena labo sinuan-sinuan si enggo turah, tapi sada benih saja ngenca, bagi benih gandum ntah benih si debanna. 38 Tapi, ban Dibata benih e turah sesuai ras peratenNa, janah labo seri tiap benih si turah. 39 Labo kerina daging seri. Lit daging manusia, daging asuh-asuhen, daging perik, bage pe ikan. 40 Si tading i surga+ la seri bentukna ras si tading i doni.+ Kemulian si tading i surga la seri ras kemulian si tading i doni. 41 Lain kemulian matawari, lain kemulian bulan,+ lain kemulian bintang-bintang. Tiap bintang lit kemulianna sendiri.

42 Bage ka pe kerna kalak mate si ipekeke. Ikuburken bas keadan si banci masap, ipekeke bas keadan si la banci masap.+ 43 Ikuburken bas keadan si hina, ipekeke bas keadan si mulia.+ Ikuburken bas keadan si lemah, ipekeke bas keadan si megegeh.+ 44 Sanga ikuburken bentuk daging, sanga ipekeke jadi bentuk roh. Lit bentuk daging, lit ka bentuk roh. 45 Bagi lit tertulis, “Manusia si pertama, eme Adam, ia jadi manusia si nggeluh.”+ Adam si terakhir jadi mahluk roh si mereken kegeluhen.+ 46 Tapi si pertama labo bentuk roh. Si pertama bentuk daging, janah kenca si pertama e bentuk roh. 47 Manusia si pertama rehna arah doni nari janah iban arah abu nari,+ tapi manusia si peduaken rehna arah surga nari.+ 48 Kerina si lit bas doni enda seri ras ia si iban arah abu nari, janah kerina si lit bas surga seri ras ia si rehna arah surga nari.+ 49 Bagi kita si seri ras ia si iban arah abu nari,+ pagi pe kita seri ras ia si rehna arah surga nari.+

50 O turang senina, kukataken man kena maka dareh ras daging la banci warisina Kerajan Dibata. Bage ka pe, kai si banci masap la banci warisina kai si la banci masap. 51 Perdiateken rahasia si badia si kupeseh enda: Labo pagi kerina kita medem bas kematen, tapi kerina pagi kita iubah+ 52 bas waktu si ntisik kel, eme bas sengkemirep mata, sedekah trompet si terakhir ersora.+ Sanga trompet e ersora, kalak mate ipekeke bas bentuk si la banci masap, janah iubah pagi kita. 53 Si banci masap arus iubah jadi si la banci masap,+ janah si banci mate arus iubah jadi si la banci mate.+ 54 Sanga si banci masap iubah jadi si la banci masap, janah si banci mate iubah jadi si la banci mate, terjadi ayat enda, “Kematen imasapken seh rasa lalap.”+ 55 “O kematen, i ja kemenangenndu? O kematen, i ja bisandu?”+ 56 Bisa si maba kematen eme dosa,+ janah dosa erkuasa perban Undang-Undang Musa.+ 57 Tapi bujur ninta man Dibata si enggo mere kemenangen man banta arah Tuanta Jesus Kristus!+

58 Emaka, o turang senina si kukelengi, kena arus paguh,+ ula ragu-ragu, teruslah sibuk+ bas ndahiken dahin Tuhan,* sebap teh kena maka kerja keras kena bas ngelayani Tuhan labo sia-sia.+