Heber

11 Kiniteken eme tek kel maka kai si iarapken pasti terjadi,+ bukti si jelas maka kai si la teridah e tuhu-tuhu lit. 2 Perban erkiniteken, kalak si nggeluh bas jaman si mbarenda banci ndatken ngena ate Dibata.*

3 Perban erkiniteken, siangkai maka doni* enda iciptaken arah kata Dibata, alu bage kai si teridah e lit arah kai si la teridah nari.

4 Perban erkiniteken, persembahken Abil man Dibata korban si ulin asangken korban si persembahken Kain.+ Perban erkiniteken, idat Abil kesaksin maka ia ikataken benar perban aloken Dibata pemerena.+ Amin pe ia enggo mate, ngerana denga ia+ arah kinitekenna.

5 Perban erkiniteken, Enoh+ ipindahken gelah la idahna kematen, i japa pe la banci ia ijumpai perban enggo pindahken Dibata ia.+ Sope ipindahken, datna kesaksin maka enggo meriah banna ukur Dibata. 6 Adi la kin erkiniteken, ise pe la banci erban meriah ukur Dibata perban kalak si reh ndahi Dibata arus tek maka Dibata e lit janah upahiNa kalak situhu-tuhu ndarami Ia.+

7 Perban erkiniteken, kenca dat Nuah+ perentah arah Dibata nari,+ patuh ia man* Dibata janah bangunna bahtra+ guna nelamatken keluargana. Alu kinitekenna, buktikenna maka doni enda patut ihukum,+ janah perban kinitekenna e, ia ikataken benar.

8 Perban erkiniteken, patuh Abraham+ sanga lebuh Dibata janah lawes ia ku ingan si alokenna jadi warisen. Berkat ia amin pe la tehna ku ja ia lawes.+ 9 Perban erkiniteken, tading ia jadi kalak asing bas negri si ijanjiken e,+ tading ia i kemah-kemah+ ras Isak bage pe Jakup, si ikut jadi ahli waris bas janji si seri.+ 10 Si e lakokenna perban timai Abraham kota si paguh pondasina, si iban* Dibata ras si ibangunNa.+

11 Perban erkiniteken, hamil Sara* amin pe ia enggo metua,+ sebap tek ia maka Dibata si mereken janji e setia.* 12 Emaka arah sekalak dilaki si enggo lanai banci lit keturunenna,*+ lahir enterem anak+ bagi bintang i langit ras bagi kersik i pantai si la terkira buena.+

13 Kerina kalak e erkiniteken seh asa mate. Amin pe lenga aloken kalak e si enggo ijanjiken,+ tapi tempa-tempa enggo idahna arah dauh-dauh nari,+ alo-alona, janah katakenna man kalak si deban maka kalak e kalak asing janah ntisik ngenca kalak e tading i negri e. 14 Kalak si bage ngerana, buktikenna maka tuhu-tuhu daramina inganna tading. 15 Bicara lalap inget kalak e ingan si enggo tadingkenna,+ banci saja kalak e mulih. 16 Tapi usahaken kalak e ndatken ingan si terulin, eme si lit hubungenna ras surga. Emaka la mela Dibata igelari jadi Dibata kalak e,+ enggo sikapkenNa sada kota man kalak e.+

17 Perban erkiniteken, sanga Abraham iuji,+ tempa-tempa enggo persembahkenna Isak. Abraham si ngaloken janji-janji e alu ermeriah ukur, nggit ngorbanken anakna si tonggal,+ 18 amin pe enggo ikataken man bana, “Arah Isak pagi rehna keturunenndu.”+ 19 Tapi tek ia maka ngasup Dibata mpegeluh anakna arah si mate nari, alokenna anakna e tempa-tempa arah si mate nari, si enda ncidahken kai si terjadi bas wari si pepagi.+

20 Perban erkiniteken, pasu-pasu Isak ka Jakup+ ras Esau,+ katakenna man kalak e kerna kai si terjadi bas wari si pepagi.

21 Perban erkiniteken, sanga Jakup hampir mate,+ pasu-pasuna anak-anak Jusup,+ sujud ia man Dibata janahna njemak tongkatna.+

22 Perban erkiniteken, sanga Jusup nandangi mate, cakapkenna kerna kalak Israel si ndarat arah Mesir nari janah berena petunjuk* kerna tulan-tulanna.*+

23 Perban erkiniteken, kenca lahir Musa, buniken orang tuana ia telu bulan dekahna,+ sebap mejile kel idah kalak e rupa anakna e+ janah la kalak e mbiar man perentah raja.+ 24 Perban erkiniteken, kenca Musa enggo dewasa,+ la ia nggit ikataken anak putri raja Mesir,*+ 25 padin kapna dat kiniseran ras umat Dibata asangken ngenanami kesenangen si ntisik arah dosa nari, 26 sebap pangen kapna ihina selaku Kalak si Ipilih,* e me si jadi kebayaken si ndauh ulin asangken kerina erta Mesir, semangat kel ia natap pasu-pasu si alokenna pagi. 27 Perban erkiniteken, tadingkenna Mesir,+ labo perban mbiar ia man pernembeh raja.+ Tetap ia paguh, tempa-tempa idahna Dibata si la teridah.+ 28 Perban erkiniteken, rayakenna Paskah ras percikkenna dareh, gelah anak sintua si dilaki arah bangsa Israel la ibunuh* malekat Dibata.+

29 Perban erkiniteken, sebrangi kalak e Laut Merah tempa-tempa erdalan i datas taneh si kerah,+ tapi kalak Mesir e gedap sanga cubakenna ikut nyebrang.+

30 Perban erkiniteken, tembok Jeriho runtuh kenca kelilingi bangsa Israel pitu wari dekahna.+ 31 Perban erkiniteken, diberu si dahinna jadi pelacur eme Rahap, alo-alona mata-mata bangsa Israel alu mehuli, emaka la ia ikut ikernepken ras kalak si la patuh.+

32 Ise nari kin si perlu kuceritaken? La bias waktuku adi kuceritaken kerna Gideon,+ Barak,+ Simson,+ Jepta,+ Daud,+ Samuel,+ bage pe nabi-nabi si deban. 33 Perban erkiniteken, taluken kalak e kerajan-kerajan,+ dalankenna kai si benar, alokenna kai si enggo ijanjiken,+ tutupna babah singa-singa,+ 34 matekenna api si gurlah,+ selamat ia arah pedang nari,+ megegeh dungna ia amin pe ndai ia lemah,+ jadi megegeh ia bas perang, janah pelawesna pasuken musuh si nyerang.+ 35 Aloken diberu-diberu mulihi keluargana si ipegeluh mulihi arah si mate nari,+ tapi kalak si deban isiksa perban la nggit ngaloken keselamaten arah tebusen, gelah aloken kalak e kekeken si terulin. 36 Si debanna icubai alu ihina, icambuk, lit ka si irante+ ras ipenjaraken.+ 37 Lit ka si ibenteri alu batu+ seh asa mate, icubai, ipotong alu gergaji, ibunuh alu pedang,+ janah kulit biri-biri ras kulit kambing ngenca+ si man paken kalak e. Mesera geluhna, dem alu kiniseran,+ janah iban gelah mesui akap kalak e.+ 38 La cocok doni enda jadi ingan kalak e tading. Tading kalak e i gurun, i gunung, i gua,+ bage pe i lubang si lit bas teruh taneh.

39 Amin pe enggo bereken Dibata kesaksin maka ngena ateNa kalak e perban erkiniteken, tapi kerina kalak e la ngaloken kai si enggo ijanjiken, 40 sebap mbarenda nari enggo ersura-sura Dibata mereken si terulin man banta+ gelah la kalak e sempurna adi la kin kita ikut.