Pertua-Pertua, Usihlah Gideon

1. Menurut 1 Petrus 5:2, hak istimewa kai si ibereken man pertua-pertua?

PERTUA-PERTUA ibere tugas guna ngurus biri-biri Jahwe si meherga. Dilaki-dilaki si enggo ilantik e tuhu-tuhu ngergai hak istimewa guna ngelayani turang seninana janah usahaken kalak e jadi permakan si mehuli. (Jer. 23:4; baca 1 Petrus 5:2.) Pasti ngata bujur kel kita perban lit pertua-pertua si bage bas runggunta.

2. Masalah kai si banci saja iadapi pertua-pertua?

² Mbue masalah si iadapi pertua-pertua bas ndalanken tanggung jawapna. Engkai? Salah sadana perban melala si arus lakoken kalak e guna ngurus runggun. Tony, sekalak pertua i Amerika Serikat, arus erlajar guna meteh bana perban latihsa akapna ndalanken tugas si alokenna. Nina, “Bas awal pandemi COVID-19, sibuk kel aku ngaturken perpulungen ras dahin erberita. Tapi la soal asa kai buena si enggo kulakoken, tempa-tempa lalap lit si arus kulakoken. Dungna, lanai lit waktuku mbaca Pustaka, pelajaren pribadi, ras ertoto.” Ilir, sekalak pertua arah Kosovo, ngadapi masalah si deban. Sanga terjadi perang bas inganna tading, mesera kel akapna ngikutken petunjuk organisasi. Nina, “Sanga bere organisasi tugas man aku guna nampati turang senina si lit bas daerah berbahaya, iuji kuakap sipatku, pang ntah lang aku ngelakokenca. Mbiar kel aku janah la kuakap masuk akal petunjuk si ibereken e.” Tim, sekalak utusen injil i Asia, mesera kapna megenggeng ngelakoken tugasna tiap wari. Nina, “Mon-mon, enggo keri kuakap gegehku janah lanai aku ngasup ngukurisa.” Kai si banci nampati pertua-pertua si sangana ngadapi masalah si bage?

3. Engkai maka usihen arah Hakim Gideon banci erguna man banta kerina?

³ Pertua-pertua banci erlajar arah usihen Hakim Gideon. (Heb. 6:12; 11:32) Enggo ibereken tugas man Gideon guna mpermakani ras ngelindungi umat Dibata. (Hak. 2:16; 1 Kro. 17:6) Bali bagi Gideon, pertua-pertua pe ilantik guna ngurus umat Dibata bas masa si susah enda. (Perb. 20:28; 2 Tim. 3:1) Banci kita erlajar arah Gideon kerna sipat meteh bana, meteruk ukur, ras lalap patuh. Megenggeng ka ia ngelakoken tugasna amin pe mesera. La soal kita pertua ntah lang, perlu sipebelin pengerganta man pertua-pertua. Perlu ka sidukung kalak e perban kerja keras kalak e ngurus kita.​—Heb. 13:17.

METEH BANA RAS METERUK UKURLAH KAM

4. Kai buktina Gideon meteh bana ras meteruk ukur?

⁴ Gideon e kalakna meteh bana ras meteruk ukur.b Bas sada wari, ikataken malekat Jahwe man bana maka ipilih ia guna nelamatken bangsa Israel arah tan kalak Midian si megegeh. Tapi nina Gideon, “Keluarga bapakku kap si kitikna bas suku Manase, janah aku kap si la mehergana bas keluargaku.” (Hak. 6:15) La kapna ia ngasup ndalanken tugas e, tapi teh Jahwe pasti banci ilakokenna. Alu penampat Jahwe, berhasil Gideon ndungi tugasna e.

5. Situasi kai saja si banci erban mesera akap pertua-pertua ncidahken sipat meteh bana ras meteruk ukur?

⁵ Usahaken pertua-pertua kel gelah banci jadi kalak si meteh bana ras meteruk ukur. (Mi. 6:8; Perb. 20:18, 19) Labo ipebelin-belin kalak e kengasupenna ntah pe kai si enggo berhasil ilakoken kalak e. Selain si e, labo ka kitik ukur kalak e perban kelemahenna ntah pe kesalahenna. Tapi, labo lalap nukah akap pertua-pertua bas ncidahken sipat meteh bana ras meteruk ukur. Contohna, banci saja nggit ia ngaloken melala tugas, tapi bas pudi wari latihsa kapna ngelakokenca. Ntah, mesera kapna meteruk ukur sanga ipuji ia paksa ngelakoken sada tugas ntah pe ipandangi paksa ngelakoken tugas si deban. Bas situasi si bage, uga pertua-pertua ngusih Gideon?

6. Kai si banci ipelajari pertua-pertua kerna sipat meteh bana arah Gideon? (Nen ka gambar.)

⁶ Pindolah penampat. Kalak si meteh bana itehna maka lit si la ngasup ilakokenna. Gideon meteh bana alu mindo penampat kalak si deban. (Hak. 6:27, 35; 7:24) Pertua-pertua si pentar pe pasti bage ibanna. Tony, si enggo iceritaken ndai ngataken, “Nggit aku ngaloken melala tugas perban bage kin aku iajari mulai kitik-kitik nari, amin pe labo aku ngasup ngelakoken kerina. Emaka kuputusken guna mbahas topik kerna meteh bana bas ibadah keluarga kami janah kupindo pendapat diberuku. Kutonton ka mulihi video Latih, Percayai, dan Delegasikan Seperti Halnya Yesus.” Mulai me ipindo Tony penampat kalak si deban. Kai hasilna? Nina Tony, “Tugas-tugas bas runggun banci tetap idalanken janah reh buena waktuku guna mpepaguh hubungenku ras Jahwe.”

7. Uga pertua-pertua banci ngusih Gideon sanga ipandangi? (Jakup 3:13)

⁷ Tetaplah tenang sanga ipandangi. Banci saja merawa ate pertua-pertua sanga ia ipandangi kalak. Tapi, usihen arah Gideon banci nampati kalak e. Iteh Gideon ia labo sempurna. Perban si e, tetap ia tenang sanga ipandangi kalak Eperaim ia. (Hak. 8:1-3) La ia merawa man kalak e. Teridah ia meteruk ukur perban nggit ia megiken kalak e jungut-jungut janah mehuli rananna man kalak e. Emaka, kalak Eperaim e pe reh tenangna. Bali bagi Gideon, pertua-pertua si pentar pe perlu begikenna sanga ia ipandangi janah aloina min alu lembut. (Baca Jakup 3:13.) Alu bage, banci ijaga kalak e perdamen bas runggun.

8. Uga arusna tanggapen pertua-pertua sanga kalak e ipuji? Ban contohna.

⁸ Berekenlah pujin man Jahwe. Sanga Gideon ipuji perban berhasil ia naluken kalak Midian, berekenna pujin e man Jahwe. (Hak. 8:22, 23) Uga pertua-pertua banci ngusih Gideon? Banci ikataken kalak e maka Jahwe me si erban kalak e berhasil. (1 Kor. 4:6, 7) Contohna, adi ipuji turang senina sekalak pertua perban beluh ia ngajar, banci katakenna maka banci bage ibanna perban pelatihen arah organisasi Jahwe. Ntah banci katakenna maka si e terjadi perban sumber pengajarenna eme Kata Dibata. Perlu ukuri pertua-pertua carana ngajar gelah ula ia si ipuji kalak. Cuba perdiateken pengalamen sekalak pertua si gelarna Timothy. Sanga mbaru denga ia ilantik jadi pertua, meriah kel kapna mpeseh khotbah man jelma si enterem. Nina, “Kuusahaken erban kata pengantar ras perumpaman si gedang ras menarik. Rusur aku ipuji kalak perban si e. Tapi, si ipuji kalak e lanai Jahwe ntah pe Pustaka.” Bas pudi wari, sadar Timothy maka perlu iubahna carana ngajar gelah labo ia si ipuji kalak. (Kua. 27:21) Kai hasilna? Bagenda nina, “Gundari, ikataken turang senina maka khotbahku nampati kalak e ngadapi masalahna, megenggeng sanga lit tentangen, ntah pe reh rembakna ras Jahwe. Ndauh kuakap riahen megi kata-kata si bage asangken pujin si kualoken ertahun-tahun si lewat.”

TERUSLAH PATUH RAS PERPANG

9. Kai si erban mesera akap Gideon patuh man Jahwe ras perpang? (Nen gambar sampul.)

⁹ Kenca Gideon ilantik jadi hakim, iuji me sipatna, patuh ntah lang ia ras pang ntah lang ia. Idatna tugas si berbahaya eme nutung ingan persembahen man Baal jang bapakna. (Hak. 6:25, 26) Bas pudi wari, kenca ipepulungna prajuritna, dua kali ia isuruh gelah urakina jumlah prajuritna e. (Hak. 7:2-7) Dungna, iperentahken ia nyerang perkemahen musuh bas tengah berngi.​—Hak. 7:9-11.

10. Banci saja kai si erban mesera akap pertua-pertua patuh?

¹⁰ Pertua-pertua perlu sipat “patuh.” (Jak. 3:17) Sekalak pertua si patuh lalap nggit ngikutken petunjuk Pustaka ras petunjuk arah organisasi Dibata. Alu bage, banci ia jadi usihen man turang senina. Amin pe bage, banci saja mon-mon mesera akapna patuh. Contohna, banci saja mesera akapna ngikutken melala petunjuk ntah pe petunjuk si rusur berubah. Mon-mon, mesera kapna ngikutken petunjuk perban kurang masuk akal akapna ntah pe kurang cocok. Ntah banci saja ipindo ia ngelakoken tugas si banci erban ia ipenjaraken. Bas situasi si bage, uga pertua-pertua ngusih sipat Gideon si patuh?

11. Kai si arus ilakoken pertua sanga aloken kalak e petunjuk?

¹¹ Begikenlah alu mehuli petunjuk si ibereken janah dalankenlah e. Ikataken Dibata man Gideon uga cara ngancurken ingan nutung persembahen bapakna, i ja arus ibanna ingan nutung persembahen man Jahwe, janah binatang kai si arus ipersembahkenna. Labo isungkun Gideon engkai maka bage petunjukna, tapi ilakokenna pas bagi si iperentahken. Gundari, pertua-pertua pe datna petunjuk arah organisasi Jahwe arah erbage-bage surat, pengumumen, ras petunjuk si debanna. Kerina petunjuk e nampati kita gelah tetap aman ras tetap ndeher ras Jahwe. Emaka, pasti keleng kel ateta pertua-pertua. Enggo setia kalak e ngikutken petunjuk arah organisasi janah kerina runggun banci ndatken gunana.​—Ms. 119:112.

12. Sanga lit perubahen bas organisasi, uga pertua-pertua banci ngikutken prinsip bas Heber 13:17?

¹² Ikutkenlah perubahen si iban organisasi. Mbarenda, iperentahken Jahwe Gideon gelah urakina jumlah prajuritna lebih 99 persen buena. (Hak. 7:8) Banci saja bagenda bas ukur Gideon: ‘Perlu kin enda? Banci kin kari berhasil adi bage?’ Amin pe bage, Gideon tetap patuh. Gundari, pertua-pertua banci ngusih Gideon alu erban perubahen si ipindoken organisasi. (Baca Heber 13:17.) Contohna, bas tahun 2014, iubah Badan Pinpinen cara mbiayai proyek pembangunen Bale Kerajan ras Bale Pertemuan. (2 Kor. 8:12-14) Lanai perlu igalari runggun-runggun pinjamen guna pembangunen Bale. Tapi sumbangen arah runggun-runggun i sebelang doni ipersada guna mbiayai pembangunen kerina Bale i ja pe iperluken. Emaka runggun-runggun si sitik ngenca ngasup mere sumbangen banci tetap lit Bale Kerajanna. Sanga ibegi José kerna perubahen e, sempat ia ragu. Nina ukurna, ‘Adi bagenda carana, labo kari lit Bale Kerajan si ibangun. Labo cocok cara e i jenda.’ Kai si nampati José guna ndukung perubahen e? Nina, “Kata-kata bas Kuan-kuanen 3:5, 6 ngingetken aku gelah tek man Jahwe. Kepeken hasilna luar biasa. Reh buena Bale Kerajan si ibangun. Perban pengaturen si mbaru enda, kai si lebih bas sada ingan banci nutupi kai si kurang bas ingan si deban.”

13. (a) Kerna kai nge Gideon tek? (b) Uga pertua-pertua banci ngusih Gideon? (Nen ka gambar.)

¹³ Panglah kam ngelakoken peraten Jahwe. Gideon tetap patuh man Jahwe amin pe arus idalankenna tugas si berbahaya ras si erban ia mbiar. (Hak. 9:17) Kenca ipetetap Jahwe ukur Gideon, lanai ia ragu maka pasti sampati Jahwe ia ngelindungi umatNa. Pertua-pertua si tading bas daerah si ngelarang pendahinta pe perpang bagi Gideon. Kalak e si minpin perpulungen ras dahin erberita amin pe si e banci erban kalak e itangkap, iintrogasi, kebenen pendahin, ntah pe ianiaya.c Bas kiniseran si mbelin pagi, pertua-pertua arus perpang gelah banci ipatuhi kalak e petunjuk arah organisasi, termasuk sanga petunjuk e banci mbahayaken kalak e. Banci saja lit petunjuk kerna uga cara mpeseh berita penghukumen ras uga gelah banci selamat sanga iserang Gog arah Magog.​—Esek. 38:18; Ket. 16:21.

TERUSLAH MEGENGGENG

14. Engkai maka mesera akap Gideon megenggeng ngelakoken tugasna?

¹⁴ Arus kerja keras Gideon ngelakoken tugasna selaku hakim. Sanga erperang ia ngelawan kalak Midian paksa berngi, kiam kalak Midian e. Kenca si e, ayaki Gideon ras 300 prajuritna kalak Midian arah Lembah Jesreel seh ku Lau Jordan. Banci saja peren kel bas ingan e. (Hak. 7:22) Ngadi nge Gideon bas Lau Jordan? Lang. Amin pe latih akap Gideon ras pasukenna, isebrangi kalak e lau e janah terus ayakina musuh. Dungna, banci dat kalak e kalak Midian janah talukenna.​—Hak. 8:4-12.

15. Engkai maka mon-mon mesera akap sekalak pertua ngelakoken tugasna?

¹⁵ Mon-mon banci saja latihsa akap sekalak pertua perban arus ngurus runggun ras keluargana. Si e banci saja erban keri gegehna ras latih kapna rukur. Adi bage si terjadi, uga pertua-pertua ngusih Gideon?

16-17. Kai si nampati Gideon tetap megenggeng, janah pertua-pertua banci tek kerna kai? (Jesaya 40:28-31) (Nen ka gambar.)

¹⁶ Teklah maka pasti ipegegehi Jahwe kam. Tek Gideon maka pasti ipegegehi Jahwe ia, janah bage me si terjadi. (Hak. 6:14, 34) Bas sada wari, ayaki Gideon ras pasuken Israel dua raja kalak Midian. Duana raja e banci saja nangkih unta. (Hak. 8:12, 21) Amin pe bage, alu penampat Jahwe banci ayaki pasuken Israel duana raja e janah talukenna. Gundari pe pertua-pertua banci ngandalken Jahwe perban Jahwe “la pernah latih kapNa ntah pe lemah.” Pasti bereNa kalak e gegeh sanga kalak e perlu.​—Baca Jesaya 40:28-31.

¹⁷ Cuba perdiateken pengalamen Matthew, si kerja keras selaku anggota Panitia Penghubung Rumah Sakit. Kai si nampati ia megenggeng bas tugasna? Nina Matthew, “Enggo kugejapken maka tuhu kata-kata bas Pilipi 4:13. Rusur kel sanga enggo latih kuakap janah keri gegehku, tutus ateku ertoto. Kupindo gelah bere Jahwe aku gegeh ras kengasupen guna nampati turang senina. Bas masa-masa si bage, kugejapken kesah si badia Jahwe mpegegehi aku ras nampati aku megenggeng.” Bali bagi Gideon, pertua-pertua si nggit erkorban banci saja ngadapi tentangen bas mpermakani umat Dibata. Memang perlu teh kalak e maka lit nge si la banci ilakokenna janah mon-mon la banci lakokenna bagi si arapkenna buena. Tapi, banci kalak e tek maka pasti begiken Jahwe pemindon kalak e. BereNa kalak e gegeh gelah banci megenggeng.​—Ms. 116:1; Pil. 2:13.

18. Arah pembahasen enda, uga pertua-pertua banci ngusih Gideon?

¹⁸ Melala kel si banci ipelajari pertua-pertua arah Gideon. Perlu kalak e meteh bana ras meteruk ukur sanga ngukuri asa buena tugas si banci aloken kalak e. Perlu kalak e meteruk ukur sanga ipuji ntah pe ipandangi. Pertua-pertua perlu tetap patuh ras pang, terlebih perban pendungi doni enda enggo reh deherna. Selain si e, perlu kalak e tek maka masalah kai pe si adapi kalak e pasti pegegehi Jahwe kalak e. Payo, pasti keleng kel ateta permakan-permakan si terus kerja keras guna kita janah siergai kel kalak e.​—Pil. 2:29.