Memang mesera perdalanen arah Babilon ku Israel janah perlu waktu kira-kira empat bulan. Tapi erjanji Jahwe, aguiNa kari kai pe si banci ngambati perdalanen kalak e. Iteh kalak Jahudi si setia maka adi mulih kalak e ku Israel, ndauh belinen pasu-pasu si banci dat kalak e asangken pengorbanenna. Pasu-pasu si mbelinna eme banci sembah kalak e Jahwe alu cara si benar. Sada pe la lit i Babilon ingan guna nembah Jahwe. La lit ingan nutung persembahen si banci pake kalak Israel guna mpersembahken korban bagi si ipindo bas Undang-Undang Musa. La ka lit i je imam-imam si banci mpersembahken korban. Selain si e, umat Jahwe ndauh sitiken asangken kalak si nembah berhala, si la ngergai Jahwe bage pe patokenNa. Emaka, puluhen ribu kalak Jahudi si engkelengi Jahwe merhat kel mulih ku negri kalak e gelah banci sembah kalak e Jahwe alu cara si benar. w23.05 14-15 par. 3-4

Gelah banci terus nggeluh “selaku anak-anak terang,” perlu kita penampat kesah si badia. Engkai? Perban labo nukah bersih secara moral bas doni si dem perbahanen seks si salah enda. (1 Tes. 4:​3-5, 7, 8) Kesah si badia banci nampati kita nulak cara rukur doni enda, si la sesuai ras perukuren Jahwe. Kesah si badia pe banci nampati kita gelah terus ngelakoken ‘kerina si mehuli ras si adil’ i lebe-lebe Dibata. (Ep. 5:9) Salah sada carana gelah banci sidat kesah si badia eme alu ertoto. Ikataken Jesus maka pasti ibereken Jahwe “kesah si badia man kalak si mindo man baNa.” (Luk. 11:13) Banci ka sialoken kesah si badia sanga sipuji Jahwe ras turang senina bas perpulungen. (Ep. 5:​19, 20) Alu penampat kesah si badia, banci terus siban meriah ukur Dibata. w24.03 23-24 par. 13-15

Jadi kalak si reh sabarna nge atendu? Adi ue, ertotolah kam. Sipat sabar eme sipat si ihasilken kesah si badia. (Gal. 5:​22, 23) Emaka, banci kita ertoto gelah bereken Jahwe kita kesah si badiaNa guna nampati kita ncidahken sipat si sabar. Perlu ‘terus sipindo’ kesah si badiaNa terlebih sanga lit situasi si nguji kesabarenta. (Luk. 11:13) Perlu ka kita ertoto gelah banci sampati Jahwe kita ngenen sada situasi bagi caraNa ngenenca. Kenca ertoto, perlu siusahaken gelah banci sabar tiap wari. Adi terus kita ertoto janah siusahaken jadi kalak si sabar, reh dekahna sipat e banci rurat bas pusuhta janah jadi bagin arah dirita. Ngukuri usihen si lit bas Pustaka pe banci nampati kita jadi kalak si reh sabarna. Bas Pustaka melala contoh kerna kalak si sabar. Adi siukuri kerna si e, banci kita erlajar uga carana jadi kalak si sabar. w23.08 22-23 par. 10-11