Holu mangataka an Ndragnahari karaha akori anga ahazu rehema boka aminazi

Ndragnahari nagnamia holumbelu zawadi tsara : mivulagna ndreki izi, ndreki magnambara izi an hataka raha agnati ni rohundreu. Mutrumi Daudu nangataka : « Anau ampitandrenyi hataka, holu djabi mbu hagnatugnu anau » (Zabura 65:2). Fo holu mwa mangataka an Ndragnahari karaha akori anga tandrignesini ndreki ameni baraka ?

MAGNANOVA HATAKA BOKA AN ROHUNAU NDREKI KAZA MISENGI

Hataka atonau anau tompini, mitahitahi anau hagnabiagna rohunau an Ndragnahari, hagnambara izi raha ankitinyi agnati ni rohunau (Zabura 62:8). Ndragnahari, Maheriheri ni djabi, mitia hataka ankitinyi, boka an rohu.

MANGATAHA AN NDRAGNAHARI AN FAMPIASANA AGNARAGNANAZI

Ndragnahari misi titiri maru (karaha tsara fagnahi au misi imani), fo izi misi agnaragna areki tu. « Zahu Jehovah. Iu ro agnaragnaku » (Izaya 42:8). Agnati ni Soratra masinyi agnaragna Jehovah hita mara kadiri 7 000. Nisi mutrumi maru nampiasa agnaragnan’Ndragnahari wakatini reu nikeiki izi. Mutrumi Ibrahim nivulagna : « Tafadali, Jehovah, ambila ndreki zahu ivulagna [ndreki anau] » (Jenezi 18:30). Atsika kua, lerani atsika mangataka an Ndragnahari, tokutru mampiasa agnaragnanazi, Jehovah.

MANGATAHA AN NDRAGNAHARI AN VULAGNANAU

Lenye vulagna ivulagnatsika ndreki Ndragnahari, izi kwelewa raha an dzeritsika ndreki agnati ni rohutsika. Vulagnanazi magnamia atsika fatukisagna amba izi « tsi mizaha soran’holu, fo amba izi kubali holu djabi matahotru izi ndreki magnanu raha haki, lenye razagnani » (Asa ndri maswahaba 10:34, 35).

Fo, tsi hataka tu ro tokutru ato neka holu mila ahazu baraka boka an Ndragnahari. Raha nisuratana agnati ni shikandra magnaraka, mampizaha raha tokutru ato kua.