Raha ampianaran’ndri mutrumi atsika mikasiki Ndragnahari
Taluha teu, Ndragnahari nagnambara hafatra misi fotuni nin’holumbelu tan mutruminazi. Hafatra reu mwa meti mitahitahi atsika ahei modeli ahazuana baraka boka an Ndragnahari ? Iya ! Zahatsika fianarana hazutsika boka an mutrumi telu tsi nivadiki tan Ndragnahari.
MUTRUMI IBRAHIM
Ndragnahari tsi mizaha soran’holu : izi mila magnamia holumbelu djabi baraka.
Ndragnahari nagnamia mutrumi Ibrahim wahadi : « Ri havagna an tani djabi mbu ahazu baraka boka an lalagnanau » (Jenezi 12:3).
Inu raha ianaratsika ? Amba Ndragnahari mitia atsika swafi ndreki amba izi mila magnamia baraka an ndri havagna djabi mitandrenyi izi : lalahi, viavi ndreki tseki.
MUTRUMI MUSA
Ndragnahari misi imani ndreki magnamia baraka an holu mitsakaraka ahei izi.
Ndragnahari, Maheriheri ni djabi, nagnamia mutrumi Musa nguvu hagnanu midjuza maventi. Fo, mutrumi Musa nangataka taminazi : « Ampahiza zahu lalagnanau, anga zahu ahei anau ndreki tsi hitsahatra ahazu rehema » (Exodi 33:13). Hataka ni mutrumi Musa namparavuravu Ndragnahari. Boka eu izi nameni baraka an fahizana ndreki fahazuana marumaru ni lalagnazi ndreki swifanazi. Mfanu, mutrumi Musa nehei amba Ndragnahari nikumba atsika, izi « Ndragnahari misi imani ndreki tsara rohu » (Exodi 34:6, 7).
Inu raha ianaratsika ? Amba Ndragnahari mila magnamia baraka an kila holu mitsakaraka ahei izi tsara, neka lalahi, viavi au tseki. Agnati ni Soratra masinyi, izi mikwaledza modeli hanumpuana izi ndreki mampizaha amba izi shoku hagnamia atsika rehema ndreki barakanazi.
MUTRUMI INSA
Vo mutrumi Insa tsara rohu, izi nahadzanga kalite kalite ni aretinyi maru.
Atsika meti mahazu baraka daima boka an Ndragnahari neka atsika miantra mehei mutrumi Insa ndreki raha natoni ndreki nampianarini.
Soratra masinyi mampiantra atsika raha maru mikasiki maisha ni mutrumi Insa ndreki fianarana nameni. Ndragnahari nagnamia izi nguvu agnanu midjuza maru, karaha mahadzanga holu gua, marenyina ndreki gobu. Mutrumi Insa namelugnu ata holu nati. Yaani, izi nampizaha modeli hagnamezan’Ndragnahari holumbelu djabi baraka amarei ou. Izi nikwaledza raha tokutru aton’kila holu anga ahazu barakareu : « Anga reu ahazu maisha daima : reu tokutru miantra mehei anau, anau, Ndragnahari areki ankitinyi, ndreki Insa Almasi naterinau » (Yuhani 17:3).
Mutrumi Insa nitsara rohu, nisi fitiavana ndreki nitsara fagnahi. Lalahi ndreki viavi, tseki ndreki holu matoyi, maru holu nagnatugnu izi vo izi niravuravu nikeiki reu karaha ti : « Mianara mikasiki zahu anareu, mana zahu malemi rohu wala tsi misengi, ndreki rohunareu mbu kutrulia » (Mata 11:29). Mutrumi Insa nitsara fagnahi ndreki viavi, izi nikustehi reu, tsi karaha holu nikuonda reu tan wakatinazi.
Inu raha ianaratsika ? Amba mutrumi Insa nitia holu swafi. Izi nampizaha mfanu tsara ni modeli tokutru atotsika ndreki ri holu hafa.
MUTRUMI INSA TSI NDRAGNAHARI
Soratra masinyi mampiantra amba « ankitinyi an tsika misi Ndragnahari areki tu » ndreki amba Insa Almasi, izi ampandeyi Vulagnan’Ndragnahari, tsi misengi (1 Reu Korinti 8:6). Mutrumi Insa nivulagna tsara be amba Ndragnahari be mandilatra izi ndreki amba Ndragnahari nagnatitri izi an tania (Yuhani 11:41, 42 ; 14:28).