Holu mitandrenyi Ndragnahari, mahazu baraka

Mutrumi Musa nivulagna amba neka atsika magnaraka amuri ni Ndragnahari, Ndragnahari mbu hagnamia atsika baraka (Deteronomi 10:13 ; 11:27). Atsika mitia Ndragnahari vo izi misi swifa tsara. Fitiavana iu mandrondzi atsika hitandrenyi izi, tsi hagnanu raha mampalahelu izi. « Ti ro manani fitiavana Ndragnahari : amba hagnaraka amurinazi » (1 Yuhani 5:3). Basi, tsi vo atsika matahutru shahini, ro atsika mitandrenyi Ndragnahari.

Fo wakatini atsika mitandrenyi Ndragnahari, atsika mwa mbu hameni baraka manakori ? Zahatsika modeli aroyi.

1) MITANDRENYI NDRAGNAHARI MAMPAHAZU HIKIMA

« Zahu, Jehovah, Ndragnaharinau, ro mampiantra anau ahazu hatsaragna, ro mandei anau an lalagna tokutru andihananau » (IZAYA 48:17).

Jehovah, Ndragnahari nikumba atsika, mehei atsika ndreki magnamia antra hilatsika. Neka atsika shoku amba izi hitahitahi atsika hifidi raha tsara, atsika tokutru miantra raha hilani atotsika, agnati ni Soratra masinyi, boka eu reu arahitsika.

2) MITANDRENYI NDRAGNAHARI MAMPARAVURAVU

« Tsara [...] reu mitandrenyi vulagnan’Ndragnahari ndreki magnaraka izi ! » (LUKA 11:28).

Ijioti, holu milioni maru ravuravu ankitinyi mana reu mitandrenyi Vulagnan’Ndragnahari. Mfanu, misi lalahi boka Espanyi, nalaki meluku ndreki nashiaka, ata ndreki vadini. Zuva areki izi nidzoru an raha nikwandikani mutrumi Musa amba zanaka ni mutrumi Ankubu kahindreu Yusuf, nalemi rohu. Yusuf nalafu anga havi ndevu boka eu nigadrandreu ata ka izi tsi nagnanu raha rati. Fo izi nalemi rohu fu ndreki nikutrulia, ndreki izi nikubali hikuswamihi (Jenezi, surata 37-45). Lalahi iu nikwaledza : « Mfanu ni Yusuf nagnamia zahu djitihadi huhavi holu malemi rohu, tsara rohu ndreki manindri tegna. Ijioti, zahu an haravuagna. »

Agnati ni Soratra masinyi misi antra maru hafa mikasiki modeli ato ndreki ri namana. Raha nisuratana agnati ni shikandra magnaraka, magnazava zenyi.