Mitahitahi holu, magnamia atsika baraka

Maru holu duniani etu tsisi tragnu wala haninyi. Sasan’holu tsisi kua tama ni amarei ou. Zahatsika karaha akori mitahitahi holu reu, mbu hagnamia atsika rehema ndreki baraka boka an Ndragnahari.

RAHA VULANYINI SORATRA MASINYI

« Holu mitahitahi holu midzali, mampihindragna Jehovah, izi ro mbu hagnefa holu iu raha tsara natoni » (OBULAGNA 19:17).

MANANI FITAHITAHINA HOLU

Mutrumi Insa nagnambara kuragna ni lalahi nipupuhin’ampangalatra ata dzeri nati (Luka 10:29-37). Nisi holu nitsahatra ndreki nitaha izi, ne reu tsi nifankahei wala tsi razagna areki.

Lalahi tsara rohu iu, tsi hei ni holu kumia iu, fo nitaha izi ndreki nagnamia izi raha tokutru hilani, boka eu nikutrulidza izi kua ndreki nitahitahi izi ata dzalinazi nayivagna.

Inu antra hazutsika boka an kuragna iu ? Mutrumi Insa nampizaha eu amba, atsika tokutru magnanu kila raha meti atotsika anga hitahitahi namatsika (Obulagna 14:31). Soratra masinyi mampiantra amba tsi hu ela Ndragnahari mbu hagnadusu usikini ndreki dzali. Fo anau meti magnuntani, umbiana ndreki karaha akori mbu hagnanovan’Ndragnahari zenyi. Raha nisuratana agnati ni shikandra magnaraka, mampizaha baraka mbu hamen’Ndragnahari be fitiavana nikumba atsika.