Mbamba bifia bi ne ane ciment é ne bo na alu’u denan e libi
ASU BELUK
3 Ésemen
JÔME NALÉ A TINAN
Belu’u be bili ésemen zañe jap ba liti na ba nye’esan, ja’a éyoñ be nji kui tiñe jam éziñ. Kalate Ten Lessons to Transform Your Marriage a jô na: “Belu’u bete be nji tebe môt ase ve ôsimesane wé. Ba viane ke ôsu a laan a lat a jam ete. Môt ase a vô’ôlô nyô mbok a ésemen ése a ba jeñe na be nyoñe ntyi’ane wo ye bo mvo’é asu môt ase ya be be.”
ÑYE’ELANE YA BIBLE: “Nye’an. . . ô ne te jeñe mfi wé ôbien.”—1 Becorinthien 13:4, 5, Mfefé Nkôñelan.
“E semene minga wom a tinane na ma liti nye abim avé a ne dia mise mam, a me teke bo jam éziñ é ne bo nye nleme mintaé nge telé alu’u dangane minju’u été.”—Micah.
AMU JÉ É NE MFI
Nge ésemen é nji bo zañe beluk, minlañe mi ne bo kom ése ve minkomekan, bifia bia balé, a ébiasé: mefulu befase mam ba jô na ma ji’a bôé meluk.
“E yene minga wôé ane zezé jôm, e lume nye mbia bifia, nge ki kpwe’ele nye a ne bo na a ju’u nlem été, a jañele ndi nlem a bili be émien, a ndamane fe alu’u denan.”—Brian.
JAM Ô NE BO
FASE’ WOMIEN
Kôme’e fase milañe miôé a mam wo te bo ngumba sondô. Éyoñ éte sili’i womiene na:
‘Ma te komekane môt bia nye bi ne nlu’an biyoñe tañeya, a ma te se’e nye biyoñe tañeya?’
‘Ma te liti na ma semé nye mimfa’a mivé?
LAAN A MÔTE MIA NYE MI NE NLU’AN
Mam mevé a bifia bivé bi ne volô na môt ase ya be mia a wô’ôtane na nyô mbok a semé nye?
Mam mevé a bifia bivé bi ne bo na môt ase ya be mia a wô’ôtane na nyô mbok a nji semé nye?
MELEP
Tili’i bevôme belale wo yi na be semene wo. Môte mia nye mi ne nlu’an nye’ fe a bo’o avale da. Fola’ané mefep, a môt ase a jeñe na a saé bevôm a yiane liti nyô mbok ésemen.
Tili’i mefulu wo nye’e be môte mia nye mi ne nlu’an. Mvuse ya valé kate nye abim avé wo nye’e mefulu mete.
“E semene nnôme wom a tinane na ma liti a mimboane miam na, ma yene nye dia a na, ma yi na a bo mevak. É nji sili ve beta be mam éyoñ ése; biyoñe biziñ abui bone be mam e ne liti nya ésemene.”—Megan.
Bi ne su’ulane jô na, sa ke womiene wo yiane yene na ô ne ésemen nge momo; môte mia nye mi ne nlu’an émien a yiane yene na wo semene nye.
ÑYE’ELANE YA BIBLE: “Jaéane minleme ya éngôngo, mvam, nje’ebane minlem, évôvoé, abui njiban.”—Becolossien 3:12.