Mvo’é ya nlem

AYAA

ÑYE’ELANE YA BIBLE: “Nyô a ne ôtete’e ya yaa, a dañe môt a ne éwôlô.”​—Minkana 16:32.

JÔME NALÉ A TINAN: Éyoñe bi bili fulu ya jôé nleme wongan, biabebiene bia yene mfi y’été. E n’été na môt a ne fo’o wô’ô mbia ôlun amu jam éziñ, ve nge a teke jôé émien, a ne viane bo mbia jam. Befase mam ba jô na, éyoñe môt a wô’ô mbia ôlun, a kôme ke fe beta fase mvo’é, a nalé a ne bo na a jô nge bo jam a ye su’ulane jôban.

JAM Ô NE BO: Jeñe’ na ô yeme jôé womien ôsusua na wo bo akute jam amu wo wô’ô ôlun. Abui bôte da simesane na éyoñe môt a ne ayok nalé a liti na a ne ngul, ve bi bia yeme na mboon ôte wo viane liti na môt a ne atek. Bible a jô na: “Môt a kate jôô émien a funane tison é ntoo ntyaman a mimfin mi maneya ku.” (Minkana 25:28, Mfefé Nkôñelan) Asu ya na bi yeme jôé biabebien, bia yiane jeñe na bi yem jôm ébiene ja te boban ôsusua na bia jô nge bo jam éziñ. Bible a jô na: “Môt a yeme fas a n’ôte’ete’e ya yaa.” (Minkana 19:11, Mfefé Nkôñelan) Bia ye bo fek nge bia taté jeñe na bi vô’ôlô ajô mimfa’a mise, nalé a ne volô bia na bi bi fe’e ya tabe ne séé.

MVEAN AKÉVA

ÑYE’ELANE YA BIBLE: “Mi bo’o minleme ya ve akéva.”​—Becolossien 3:15.

JÔME NALÉ A TINAN: Be wô’ô zu ba jô na, fo’o ve bôte ba yeme ve akéva mbe be ne bo mevak. Ja’a bôte be tôbaneya bibubua bi mam be ne bo’olô mejô mete. Bôte bete ba jô na, e jam é nga volô be na be dañe mintaé ya nlem a ne mvean akéva amu mam be mbe be nga’an be bili, a lôte na be simesane ma me mbe me jañeya.

JAM Ô NE BO: Tili’i môs ôse mam ma bo na ô kômbô ve akéva. É nji sili na a bo beta be mam. Simesa’ane ja’a bone be mam ane, éyoñe jôp da ke bômbô si, mbamba minlañ a môte wo nye’e, nge amu wo te yene tyé. Nge wo ve akéva amu mbamba be mam bete, ô ne beta bi bi abui mevak.

Éyoñe wo fas amu jé wo ve nda bôte jôé a bemvôé bôé akéva, nalé a ne volô wo nya nya abuii. Éyoñ ô yemeya jôm wo nye’e e be be, kate’e be de ô bela’ane bekalate, be e-mail, be sms, nge ke yene bebien. Nalé a ye yemete élate jenan, a volô wo na ô bi ava’a da so éyoñe wo bo bôte bevo’o mam me ne mvaé.​—Mam minlôman 20:35.

MIÑYE’ELANE MIFE YA BIBLE

TUBE’ MINTAÑETE.

“Ntya’ane mewôman ô ne ane wo tyame miek, éyoñ ntañete ô ngenane te bo, taté’é wondé.”​—MINKANA 17:14, Mfefé Nkôñelan.

TE DAÑE TYELE NLEME YÔP ASU MELU MA ZU.

“Ajô te, te tyelane minleme yôp ajô mam me aye boban akiti: amu mame ya mi atyelé minleme yôp akiti, me aye boban akiti. Mam abé ya môse wua me ayiane môs ôte.”​—MATTHIEU 6:34.

TE JI’A YAA AMU AVALE WO WÔ’ÔTAN, TATÉ’É KÔME FAS ÔSUSUA NA WO BO JÔM ÉZIÑ.

“Mfasane wo ye ba’ale wo, nya fe’e a ye lôñe wo nka’alé.”​—MINKANA 2:11.