Meve’ele ya Nkôle Carmel

Abui bejôô ya ayoñ Israël e mbe e bo’o mam me ne abé, ve Achab a ne nyô a nga dañ. A nga lu’u Jézabel, njejete minga ô mbe ô kañe’e Baal. Achab ba Jézabel be nga bo na ékaña’a Baal é yametane vôm ase, be mbe fe be wôé bekuli mejô be Yéhôva. Jé Yéhôva a nga bo? A nga lôme nkuli mejô Élie na a kate Achab foé éziñ.

Élie a nga jô njô bôt Achab na, mveñ ja ye bo te noñ amu mbia be mam bé. Mimbu milal mi nga lôt, bidi bi nji faa mefup, bôt be mbe be nga wu zaé. Yéhôva a nga beta lôm Élie be Achab. Ane Achab a nga jô nye na: ‘Ô ne mbia môt! Wo wo soo mbia be mam bese ba.’ Nde Élie a nga yalane nye na: ‘Sa ke ma me ne ajô. Ve wo, amu wo kañe Baal. Bi tame bo jame di. Sula’ane ayoñ ese a bekuli mejô be Baal Nkôle Carmel.’

Ane bôt be nga sulane nkôl. Nde Élie a nga jô na: ‘Toba’ané. Nge Yéhôva nnye ane nya Zambe, tôñané nye. Ve nge a ne Baal, tôñané nye. Bia zu bo jame ji: bekuli mejô be Baal 450 ba zu kômesan metuna’a map a loone zambe wop; ma fe ma zu kômesane metuna’a mam a loone Yéhôva. Zambe a ye yalan a nduan nnye a ne nya Zambe.’ Ane bôt be nga kañese.

Ane bekuli mejô be Baal be nga taté na ba kômesane metuna’a map. Be nga loone zambe wop ngume môs, be jô’ô na: ‘A Baal, vô’ôlô’ô te bia!’ Baal te ke yalan; ane Élie a nga taté na a kpwe’ele be, a jô’ô na: ‘loonané nye yôb été. Amu éko éziñ a ne ôyo melom, da sili na môt a vele nye.’ Ngô’é é nga kui be loon. Ve te ke éyalan.

Ane Élie a nga beté metuna’a mé autel yôp, a sôé fe me mendim. Été été, nduane Yéhôva é nga mane di’i mvean Élie. Ane bôt be nga jô na: ‘Yéhôva nnye a ne nya Zambe.’ Ane Élie a nga jô na: ‘Biané bekuli mejô be Baal!’ Môs ôte, bekuli mejô be Baal 450 be nga wu.

Éyoñe mone nkut a nga yené mañ yôp, Élie a nga jô Achab na: ‘Ôkôs wo vuñ. Bete’e wagoñ wôé, ô ke nda jôé.’ Yôb é nga vin, ôkôs ô nga vuñ, mveñ é taté fe na ja noñ. Ane ésep é nga man. Achab a nga bete wagon, a ke avôl. Yéhôva a nga ve Élie ngule ya ke mbil a lôte wagon. Ve ye nde minju’u mi Élie mi nga su’u valé? Bi tame zu yen.