Yésus a saé bôte môse Sabbat

Bepharisien be mbe be vini’i Yésus; ane be nga jeñe fane ya bi nye. Be nga jô na, a nji yiane saé minkôkon môse Sabbat. Môse Sabbat éziñ, Yésus a nga yen ndindim ô too si njoñ, ô ja’é bôte biôm. Nde a nga jô beyé’é bé na: ‘Yenané aval avé ngule Zambe ja zu volô môte nyi.’ Ane a nga fu’u tyia a mendene mé, a beté je mis me môt ate, a jô nye na: ‘Kele’e sôbe mise môé étame ya Siloam.’ A nga bo de, ane a nga taté na a yen.

Bôte ve zu kam. Be’e na: ‘Ye éfunane nga? Sa ke môte nyina nnye a wô’ô ja’é bôte biôme njoñ?’ Ane môt ate a nga yalane be na: ‘Mamiene le!’ Ane be nga sili nye na: ‘Amu jé ô nji beta bo ndim?’ Éyoñ a nga kate be jam e nga kui nye, be nga kee nye be Bepharisien.

A nga kate Bepharisien na: ‘Yésus a te fu’u tyia, a futi ma je mis, a jô ke me na me ke sôb asu. Ma te bo de, a éyoñe ji me nga yen.’ Bepharisien be’e na: ‘Ngule jé ja so ki be Zambe, amu a saé bôte môse Sabbat.’ Ve bôte bevo’o be mbe be jô’ô na: ‘A nji be ve saé bôt nge ngule jé é nji so be Zambe.’

Ane Bepharisien be nga loone bebiaé be môt ate, a sili be na: ‘Jé ja te bo na mone wônan a yen?’ Bebiaé be mbe be ko woñ amu Bepharisien be nga jô na, nge môt a ve’ele meme Yésus, ba ye titane nye synagogue. Nde be nga yalane na: ‘Bia yeme ki. Sila’ané émien.’ Bepharisien ve zu sili nye abui minsili, akekui a nga jô be na: ‘Me kateya mia abim ma yem. Amu jé mia ndeñele ma a minsili?’ Be’e ve wô’ô ôlun, ane be nga daa nye atan.

Yésus a nga zu koone nye, a sili nye na: ‘Ye wo buni Messie?’ Nye’e na: ‘Ma kômbô buni nye, ve me nji yeme nye.’ Yésus na: ‘Ma me ne Messie.’ Nga ô lôô na Yésus a mbe mbamba nlem? A nga taté saé môt ate, a ve fe nye fane ya bi mbunan.