Yésus a saé môt a nga bialé ndim

Yésus a nga’ane Jérusalem asu Sabbat. Nté ba be beyé’é bé ba wulu tison été, ba yene nzezak ô ne ndim a so abialé. Nde beyé’é ba sili Yésus na: “A Rabbi, za a nga bo abé, ye môte nyô, ye bebiaé bé, amu a nga bialé ndim?”​—Jean 9:2.

Beyé’é ba yeme na môt ate a nji tame nyiñe vôme mfe ôsusua na a bialé, ve ba yiane sili bebien nge môt ate a ne ngule ya bo nsem a to abum be nyia wé été. Yésus a yalan a jô’ô na: “Sa môte nyô a nga bo abé, sa ke bebiaé bé: ve amu mimboane mi Zambe mi aye yené be nye.” (Jean 9:3) Nde ñhe, sa ke môt ate nge bebiaé bé, mbe be be’e ayeme ya jam éziñ nge nsem bi nga bo na a tabe ndim. Da viane yené na, mvuse nsem Adam a nga bo, bone be bôte bese ba bialé abé été a ba tôbane mam ane e ku ndim. Ve ndindime wu wo ve Yésus fane ya liti mam Zambe a ne ngule ya bo, aval a tameya zu a bo asu na a saé bôte be ne minkôkon.

Yésus a liti na ésaé éte ja yiane ji’a boban. A jô na: “Bi ayiane bo bisaé môt a nga lôme ma [nté] môs ô ngenan: alu de aye bo, éyoñ môt a se fe ngule ya bo ésaé. Éyoñ me ngenane si nyô, me ne éfufupe ya si nyô.” (Jean 9:4, 5) Ôwé, Yésus a mbeme zu wu, jam ete da ye bo nye na, a bômbô soñ été vôm a se ngule ya bo ésaé éziñ. Ve nté jam ete e ngenane te kui, a ne éfufupe ya si nyô.

Ye Yésus a ye ñhe saé môte nyi? A nge nalé, aval avé? Yésus a tui mendene si a ful éte’e a menden. Nde a wo’o je ndindime mis a jô’ô na: “Kele’ sôp éwobane ya Siloé.” (Jean 9:7) Môt ve té a bo aval a te jô. Ane a sôp, ve taté na a yene mvo’é! Tame simesan abime mevak a ne bi amu a taté na a yen ényiñe jé fo’o ve éyoñ éte ébien!

Bôte ba be nye be too a ba bevo’o be nga yeme nye ane môt a ne ndindim be ne fe’e ne vema. Ba sili na: “Ke môte nyô a nga to si a bo a jaké’é bôte biôm?” Bevo’o na: “Nnye le.” Ve ba bevo’o ba kate kui na be kañese ajô te a jô na: “Koko, a funane nye.” Ane môt émien a jô na: “Me ne nye.”​—Jean 9:8, 9.

Be ve sili nye na: “Mise môé me nga bo mvo’é aya?” Ane a yalane na: “Môt be aloene na Yésus, a te ful étek, a wo’o me je mis, a jô me na, Kele’ sôpe Siloé: ane me ate ke sôp, ve yen mvo’é.” Nde ba jô nye na: “A ne vé?” Nzezak nye na: “Me ayem.”​—Jean 9:10-12.

Bôt ba kee môt ate Bepharisien, be’ fe ba kômbô yem aval avé môt ate a te kui na a yen. A jô be na: “A te wo’o me éte’e mis, ane me ate ke sôp, ve yen.” Da ye yené mvo’é na, Bepharisien be vak amu ba te saé nzezak. Ve, ba bevo’o y’été ba komekane Yésus a jô na: “Môt ate a nji so be Zambe, amu a bo te ba’ale môse sondô (Sabbat).” Ba bevo’o ke na: “Môt a ne mbo mam abé a ne ngule ya bo aka’a beta be mame dina aya?” (Jean 9:15, 16) Jam ete da kandé be.

Mbôle be nto mengam mebaé, nde ba sili môt a nga yene nyu na: “Wo wo ajô aya ajô dé, amu a te saé wo mis?” A nji ve’ele bi bisô biziñ a lat a Yésus, nde a yalane be na: “A ne nkulu mejô.”​—Jean 9:17.

Bejuif ba bene kañese jam ete. Ba yiane simesane na, Yésus ba môt ate ba te bo mon ésok na be du’u bôt. Nde ba tyi’i na, asu na be yeme bebela a lat a ajô te, ba yiane sili bebiaé be nzezak ajô dina, be yem nge a to fo’o ndindim.