Ye môt a ne bo mbamba jam e môse Sabbat?

Yésus a nga saé abui éyoñ a nga bo beta ésaé nkañete wé e Galilée. Ve a nga jô na: “Ma yiane fe kate bitisone bife mbamba foé y’éjôé Zambe.” Yésus a nji simesane na ésaé jé ja yiane su’u ve Galilée étam. Ajô te a ke “kobô mejô me Zambe e meba me Zambe ya [Judée, MN].” (Luc 4:43, 44, Mfefé Nkôñelan) A te fo’o tobe mbamba éyoñ amu bi nto Ngone nyini ya mbu, a beta abôk a zu bobane Jérusalem a nto bebé.

Nge bia ve’e abime mam Minfufup mintilan mia jô a lat a ésaé nkañete Yésus e Galilée, bia ye yene na mia dañe mi mia liti ma a nga bo e Judée. Ja’a abui bôte ya Judée é nji kañese foé jé, nalé ate a nji kamane Yésus na a ke ôsu a kañete a ayôñ ése a bo fe mbamba be mame vôm ate.

Yésus a mbeme ke e Jérusalem, e tison ja dañe wum e si ya Judée asu abô’ô Pâque ya mbu 31 É.J. Afôla ete é ne njalan a bôt. E fefele mbé mintômba, beta ébata a ne valé nje ba loone na Beth-hesda. Abui minkôkon, mindindim, a miñyeyem mia zu ébata éte. Amu jé? Amu ba buni na môt a ne bo mvo’é nge a nyiine memdim éyoñ ma fô’ôsan.

Bi nto môse Sabbat, a Yésus a yene nkôkone môt ô koneya den a nga ke mimbu 38 ô bôô fefel ébata. Yésus a sili nye na: “Ye wo akômbô bo mvo’é?” Nde môt ate a yalane na: “A Tat, me nji bo môt a ke me ébata éyoñ memdim me afô’ôsan: ve éyoñ me ngenan me kelek, môt mfe a viane ke me ôsu.”​—Jean 5:6, 7.

Yésus a jô jôm éziñ ja zu bo na, môt ate a môt ase a wô’ô de a tabe fe’e ne vema: “Kôlô’ô si, ô to’é énoñe jôé, a wulu.” (Jean 5:8) Nye ve bo nalé. Été été môt ate ve bo mvo’é, a to’é ke énoñe jé a taté fe na a wulu!

Éyoñ ba yiane bo mevak amu mbamba jame a ndeme boban, Bejuif ba yene môt ate a ve nye mekua be jô’ô na: “Den a ne môse sondô, wo atyam atiñe Zambe éyoñ wo ato’é énoñe jôé.” Môt ate a yalane be na: “Môt a te saé ma, nnye a te jô me na, Toké’ énoñe jôé ô ke.” (Jean 5:10, 11) Bejuif bete ba ve môt a saé bôte môse Sabbat bijô.

Ba kômbô yem ajô te, nde ba sili nye na: “Môt a te jô wo na, Toké’ énoñe jôé, ô wulu, a ne za?” Amu jé ba sili nye nsili ôte? Amu Yésus a te ‘kôlô, a ékôane bôt é ne vôm ate,’ a môte ba te saé a nji yem éyôlé Yésus. (Jean 5:12, 13) Ve môt ate a zu beta bi fane ya tôbane Yésus. Mvuse ya valé, môt ate a yene Yésus e temple; ane a yemelane za nye ate a ne môt a te saé nye e fefel ébata.

Môte ba te saé a beta yene Bejuif ba te sili nye minsili a lat a nsaébane wé. Ane a kate be na, a mbe Yésus. Éyoñe ba wô’ô jam ete, Bejuif ba ke yene Yesus. Ye ba ke yene nye amu ba kômbô yem a zene fé a kui na a bo mbamba be mame ma? Momo. Ba viane ke koone Yésus na be komekane nye amu a te bo mbamba be mam ba e môse Sabbat. A ba taté fe na ba tibili nye!