Ye wo too ô yemek?

Bôte ya melu mvus be mbe be be’e nduan aya?

Nkañete bia koone wô e kalate Metata’a 22:6 wo kate bia na, éyoñ Abraham a nga ke ve metuna’a e vôm a mbe ôyap, “a nga nyoñe nja’a ya mvean b’adi’i nduan, a beté je Isaac mone wé; émien a nga nyoñe nduan a ôtyeñe mo; nalé be nga ke ôsu bebaane.”

Kalate Zambe a nji kate bia avale be mbe be kôba’ane nduan melu mvus. Ñyeme mam éziñ a nga kobô ajô ya éfus éte, a nga jô na, “e nji be tyi’ibi ya ba’ale nkaba’a nduan ô yôñe,” nté ôse bôt be mbe be kele avale dulu Abraham ba Isaac be nga ke. Éko éziñe na, nduan Kalate Zambe a jô na Abraham a nga nyoñ, é mbe biôm bise bi nga volô nye na a kôba’ane nduan.

Jam afe e ne na, e nji be tyi’ibi ya bo’é nduan melu mvus. Bevôm béziñ, bôte be mbe be yene tyi’ibi ya ke nyoñe nduan be bôte befe, a lôte na bebien be kôba’ane nduane jap. Abui beyeme mam da buni na, Abraham a nga belane mone viek, éko éziñ minkeñe. Minkeñe a mbe a be’e metye’e me nduan ba te nyoñe di, éyoñe nduan ya alu ja kui tyé. (És. 30:14) Be mbe be nyoñe ma’a, a fulane me a metye’e me nduan asu ya na, nduan é bo teke dim. Be mbe be kele ba bo de zene zen.