Su’uk ngule Yéhôva a bili na a jôé!

1, 2. Jé môt ase ya be bia a yiane yem? (Fombô’ô fôtô ya atata’a ya ayé’é di.)

AVALE bi nga yen ayé’é ya mvus, Diable a jô na Yéhôva a nji yeme jôé a na, môta binam a ne nyiñe mvo’é fo’o ve nge a jôé émien. Ye Satan a bele? Tame ve’ele simesane nge ba jô na, bôte ba tobe na ba jôé bebien, ba ye nyiñe nnôm éto. Ye ba ye nyiñe mvo’é teke éjôé Zambe? Ye wo ye wô’ô mvaé nge ba jô na, ô nyiñ avale wo kômbô, ô nyiñe fe nnôm éto?

² Teke môt éziñ a ne ve biyalane ya minsili mite señe jôé. Môt ase ya be bia a yiane fas ajô ete. Nalé aye volô bia na bi yeme na éjôé Zambe é ne mvo’é. A ne éjôé ja dañe bijôé bise. Bia yiane su’u je a nleme wongan ôse. Kalate Zambe a volô bia mfa’a ôte. Tame yen aval a liti bia na, Yéhôva nnye a yiane jôé.

YÉHÔVA NNYE A YIANE JÔÉ

3. Amu jé Yéhôva étam nnye a yiane jôé?

³ Yéhôva nnye a yiane jôé émo amu a ne Zambe ya ngul ése, a Nté biôm bise. (1 Mka. 29:11; Mam. 4:24) E kalate Nlitan 4:11, bôte 144 000 ba ye jôé a Yésus ba jô na: “A Tate wongan a Zambe wongan, wo ayiane nyoñe duma a ékaña’a a ngu: amu ô nga té biôm bise, a amu nkômbane wôé bi nga to, a bi nga téban.” Ôwé, Yéhôva a yiane jôé bôt, a beéngele amu a nga té biôm bise.

4. Amu jé bia tebe Yéhôva ngame yat éyoñe bia dimine belane fili jangan ya top?

⁴ Satan a nji té jôm éziñ. Ajô te, a nji yiane jô na nnye a yiane jôé émo. Éyoñe be nga ben éjôé Yéhôva, Satan, Adam, a Ève be nga bo mebun. (Jr. 10:23) E ne été na, mbôle be mbe be bili fili ya top, be mbe ve tobe na ba nyiñ avale ba kômbô. Ve, ye be mbe be yiane de bo? Momo. Fili ya top ja ve bôte ngule ya nyoñe mbamba mintyi’an môs ôse. Ve é nji ve be ngule ya bo Nté wop, a Mvee ényiñe wop éngana’a. Éyoñe bia dimine belane fili jangan ya top, bia tebe Yéhôva ngame yat. Mbôle bi ne bitétéa bi Zambe, susu’a jame bia yiane bo e ne ve na, bi nyiñ éjôé Yéhôva si.

5. Amu jé bi ne tabe ndi na, mintyi’ane mi Zambe mi ne zôsôô?

⁵ Amu mfe a liti bia amu jé Yéhôva nnye a yiane jôé. A jôé a zôsôa ntyi’an. Yéhôva a jô na: “Me ne Yéhôva, nnye ate a bo mvam, zôsôa ntyi’an, a zôsô si nyô; amu m’ayen mvaé mam ma été.” (Jr. 9:24) A nji belane nkobe metiñe bôte be ne bebo mam abé ba telé asu ya na, a kate bia jam e ne zôsôô nge ékotekot. Zôsôa ntyi’ane wé a so be émien, a belane nye na, a ve bone be bôt metiñ. Kalate Zambe a jô na, “Zôsô a mvo’é bi ne mbô’ane si ya éto njôane [jé].” Ajô te, bi ne tabe ndi na, metiñ, miñye’elan, a mintyi’ane mié mi ne zôsôô. (Bs. 89:14; 119:128) Ve Satan ki, a kusa jô na Yéhôva a nji yeme jôé, émien a nji kui na, a bo na émo ji é ke ôsu a bo zôsôô.

6. Amu wua a liti amu jé Yéhôva nnye a yiane jôé émo a ne mbé?

⁶ Nde fe, Yéhôva a yiane jôé amu na, a bili ñyeman a fek bia sili na a ba’ale émo. Tame yene na, Zambe a nga ve Mone wé ngule ya saé akon bedokita be se ngule ya saé. (Mt. 4:23, 24; Mc. 5:25-29) Mfa’a Yéhôva, jam ete e nji be asimba. A yeme mam mese ma ndeñele bôt, a bili fe ngule ya kôme me. A ne wômôlô bewu, a ne fe bo na bitua bi mam bi bo teke kui.

7. Aval avé fe’e Yéhôva ja dañ fe’e ya émo Satan a jôé?

⁷ Émo Satan a jôé ja ke ôsu a jeñe mezene ya kôme mejô me ne zañe meyoñ a mesi. Yéhôva étam nnye a bili fe’e ya soo mvo’é émo. (És. 2:3, 4; 54:13) Éyoñe bia yeme na Yéhôva a bili ñyeman a fek, bia ye wô’ôtan ane nlômane Paul, ñwô ô nga tili na: “Ngo’o aka’ édo’ abui mame ya ñyeman a fe’e Zambe bibaane, é né! Ngo’o te ke afasé mimbôndane mefe’e mié mi né, a mezene mé me ne te ayemelan!”​—Bero. 11:33.

ÉJÔÉ YÉHÔVA JA DAÑE BIJÔÉ BISE

8. Jé ja nambe wo éyoñe wo yen avale Yéhôva a jôé?

⁸ Kalate Zambe a nji kate bia ve na, Yéhôva nnye a yiane jôé. A liti fe bia amu jé éjôé jé ja dañe bijôé bise bivok. Amu wua a ne na, a jôé a nye’an. Nde fe, bi ne mevak éyoñe bia yen aval a tobe na a jôé. A ne Zambe ya “éngôngo a mvam, ôte’ete’e ya yaa, a bili abui mvam a benya mejôô.” (Nk. 34:6) Yéhôva a semé bebo bisaé bé. A nyoñe ngap a bia a lôte abime bia nyoñe ngap a biabebien. Yéhôva a nji bo avale Diable a jô, a nji nyume bebo bisaé bé ba wulu ba’aba’a a nye mbamba be mam. Nga a nga lôm édima Mone jé na, é zu wu asu ya na, bi bi ényiñe ya melu mese!​—Lañe Besam 84:11; Beromain 8:32.

9. Aval avé bia yeme na, Yéhôva a nyoñe môt ase ya be bia ngap?

⁹ Yéhôva a nyoñe ngap a bebo bisaé bé ya si ése. A nyoñe fe môt ase ya be bia ngap. Tame yen éyoñe Yéhôva a mbe a telé’é betyi’i mejô, a va’a fe be ngule ya kôté ayoñ Israël mo besiñe bé. A nga bo de tañe mintete mimbu milal. Akusa bo éyoñ éte é mbe éyoñe njuk asu ayoñe dé, a nga yen ane Ruth, ngone ya Moab, a nyum émiene mam. A nga yene fe ane a nyoñe ntyi’ane ya kañe nya Zambe. Yéhôva a nga botane Ruth, a nga ve nye nnôm a mon. Ve a nji su’u valé. Éyoñe Ruth a ye wômô, a ye yeme na, mone wé a mbe éndane ja ke suane be Messie. Tame simesan avale mevak a ye wô’ô éyoñ a ye yeme na, nkañete ya ényiñe jé ô ne kalate ya Bible a be’e éyôlé jé!​—Ru. 4:13; Mt. 1:5, 16.

10. Amu jé éjôé Yéhôva é nji bo éjôé Jaman?

¹⁰ Éjôé Yéhôva é nji bo éjôé Jaman (éjôé ékôndé ékop). Bôte be ne éjôé jé si be ne fili, a ba nyiñe meva’a été. (2 Bec. 3:17) David a nga liti de éyoñ a nga jô na: “Ékaña’a ba étôtok bi ne asu dé [Zambe]: Ngule ba mevak bi ne vôme wé été.” (1 Mka. 16:7, 27) Ntili Besam Éthan nye fe a nga tili na: “Ébotan a bôt b’ayeme tyiñe meva’ éte: B’awulu éfufube ya asu dôé, A Yéhôva. B’ava’a jôé dôé ngum nté môs; a be nto mbetane yôp zôsô wôé été.”​—Bs. 89:15, 16.

11. Jé é ne volô bia na, bi tu’a yeme na, éjôé Yéhôva ja dañe bijôé bise?

¹¹ Éyoñe bi ne mbane ya bindi mbamba mimboane mi Yéhôva, bi ne tu’a yeme na, éjôé jé ja dañe bijôé bise. Bia ye wô’ôtan ane ntili Besam a nga tili na: “Môse wua ya tabe bitune menda biôé été w’adañe môse toyini.” (Bs. 84:10) Aval avé jam ete e ne boban? Mbôndé, a Nté wongan Yéhôva a yeme mam ma sili asu ya na, bi nyiñe meva’a été, a jalé fe ñyian ôte nya njalane. Mam a jô bia na bi bo me ne sili na, bi nyume biabebiene mam. Ve bia yeme na, mam mese a yi na bi bo, me ne asu mfi wongan, a me ne ma ma soo bia beta mevak.​—Lañe Ésaïe 48:17.

12. Jé ja tindi wo na, ô su’u ngule Yéhôva a bili na a jôé?

¹² Kalate Zambe a jô na, éyoñ éjôé toyini mimbu Krist ja ye man, bôte béziñ ba ye tobe na, ba bo ngule Yéhôva a bili na a jôé éngana’a. (Nli. 20:7, 8) Jé ja ye tindi be na be bo de? Ba ye kuli Diable mimbôk. A ye jeñe na a du’u bôt a zene ya mebun. A ne jam a jaéya zu a bo. A ne jeñe na a liti bôte na, be ne nyiñe nnôm éto, to’o be nji bo Yéhôva mewôk. Bia yeme na a laa minsos. Ve bia yiane fase nsili wu: Ye bia ye ku ôlame wé? Nge bia nye’e Yéhôva, a kañe nye amu a bo bia mbamba be mam, a amu nnye a yiane jôé émo, bi aye ke ku ôlame Satan ôte. Teke môs éziñ bia ye kômbô nyiñ éjôé éfe si, fo’o ve éjôé Yéhôva si, nje éte é ne zôsôô a nye’an.

SU’UK NGULE YÉHÔVA A BILI NA A JÔÉ NYA NSU’ANE

13. Aval avé mvuane bia vu Zambe wo liti na bia su’u nye?

¹³ Yéhôva a yiane fo’o na, bi su’u ngul a bili na a jôé a nleme wongan ôse. Avale bia te yen, nnye a yiane jôé, nde fe éjôé jé ja dañe bijôé bise. Bi ne su’u ngule Yéhôva a bili na a jôé, éyoñe bia ke ôsu a kañe nye, bi wulu’u ba’aba’a a nye. Jé éfe bi ne bo? Bi ne fe su’u éjôé Yéhôva éyoñe bia bo mam a nye’e. Éyoñe bia kôme mejô avale Yéhôva a nye’e, bia liti na bia nye’e, a su’u fatan éjôé jé.​—Lañe Beéphésien 5:1, 2.

14. Aval avé bemvendé, a minlô ya menda me bôt be ne vu Yéhôva?

¹⁴ Éyoñe bia yé’é Kalate Zambe, bia yene na Yéhôva a jôé a nye’an. Ajô te, minlô ya menda me bôt, a bemvendé ba nye’e éjôé jé, ba yiane bo avale da. Be nji jeñe na be jôé avale ba kômbô. Ve ba vu Yéhôva. Paul a nga vu Zambe ba Mone wé. (1 Bec. 11:1) Paul a nji tindi bôt a ngule na be kôme mejô. Ve a mbe a ye’elane be. (Bero. 12:1; Beép. 4:1; Phm. 8-10) Aval ete nde Yéhôva a yi na bi kôme mejô. Ajô te, a yiane bo zene bôte bese ba nye’e, a su’u fatan éjôé jé ba tôñ.

15. Aval avé ésemé bia liti mfa’a ya mintyi’ane ba nyoñ akônda été, ja liti na bia nye’e fatan éjôé Yéhôva?

¹⁵ Aval avé bia liti na bia nye’e éjôé Yéhôva? Bia liti na bia su’u éjôé Yéhôva éyoñe bia semé mintyi’ane ba nyoñ akônda été. To’o bi nji kôme wôk, nge bo tyiñ a ntyi’an éziñ, bia ye ke ôsu a su’u ékôane Yéhôva. Bôte ya émo be nji bo nalé, ve bôte ba nyiñ éjôé Yéhôva si ba bo de. (Beép. 5:22, 23; 6:1-3; Beh. 13:17) Bia yene mfi ya bo de, a jam ete da bo na, Yéhôva a nyoñe ngap a bia.

16. Jé bôte ba su’u ngule Yéhôva a bili na a jôé ba yiane taté bo éyoñe ba nyoñe mintyi’an?

¹⁶ Bi ne fe liti na bia su’u ngule Yéhôva a bili na a jôé éyoñe bia nyoñe mintyi’an. Yéhôva a nji ve ngumba atiñ asu été ése bi ne tebe. Ve a wulu bia éyoñ a kate bia ôsimesane wé. Éve’an é ne na, a nji ve Bekristen nkobe metiñ a lat a mbote wop. Ve a kômbô na bi tobe ngômesane ja yian, a nyi ja liti na bi ne Bekristen. (1 Tim. 2:9, 10) A yi fe na mintyi’ane bia nyoñ, mi bo teke kolé bôte bevo’o ôbak. (1 Bec. 10:31-33) Éyoñe bia nyoñe mintyi’an, bia yiane taté jeñ ôsimesane Yéhôva, sa ke mam bia nye’e. Mboan ôte wo liti na bia nye’e, a su’u fatan éjôé Yéhôva.

17, 18. Aval avé beluk be ne liti na, ba su’u ngule Yéhôva a bili na a jôé?

¹⁷ Tame yen avale beluk be ne su’u mezene me Yéhôva a éjôé jé. Jé ba yiane bo nge ényiñe ya nda aluk é ne ayaé? Tame simesane na, ényiñe ya nda alu’u jôé é nji bo avale wo to ô buni’i. Nyoñek éyoñe ya fas avale Yéhôva a mbe a nyiñe a ayoñ Israël. Yéhôva a nga jô na, a mbe ane nnôm ya ayoñ ete. (És. 54:5; 62:4) Ényiñ é nji be tyi’ibi e “nda aluk” éte! Ve Yéhôva a nji bili atek. A nga ke ôsu a bo mvam a ayoñ ete, a nga ba’ale fe élat a nga bo a de. (Lañe Besam 106:43-45.) Ye avale nye’an ete e nji tindi bia na, bi kômbô subu Yéhôva bebé nga?

¹⁸ Belu’u ba nye’e mezene me Yéhôva ba vu nye. Be nji jeñe mezene mefe asu ya na, be kôme mejô map. Ba yeme na, Yéhôva nnye a nga late be, a na, a yi na be nyiñe “nlatan.” Kalate Zambe a liti na, susu’a jam a ne bo na beluk be tyam alu’u dap a ne mejian. (Mt. 19:5, 6, 9) Beluk ba su’u fatan éjôé Yéhôva éyoñe ba jeñe na be kôme mejô, a nyiñe mvo’é.

19. Nge bia te bo jôm é ne abé mise me Yéhôva, jé bia yiane bo?

¹⁹ Amu bi ne bebo mam abé, da ye kui na bi bo mam Yéhôva a wô’ô abé. A yeme nalé, ajô te a nga mane ta’a mam a zene ya ntañ Krist. Ve éyoñ bia bo ékop éziñ, bia yiane sili Yéhôva njaman. (1 Jn. 2:1, 2) A lôte na bi ke ôsu a ve biabebien mekua, bia yiane nyoñe besikôlô ya bikobe biangan. Nge bia ke ôsu a subu Yéhôva bebé, a ye jamé bia, a ye fe saé bia. A ye volô bia na bi dañ avale minju’u ete melu ma zu.​—Bs. 103:3.

20. Amu jé bia yiane taté éyoñe ji na, bia su’u ngule Yéhôva a bili na a jôé?

²⁰ Mfefé émo, bôte bese ba ye nyiñ éjôé Yéhôva si a yé’é bezôsôô mezene mé. (És. 11:9) Ve bi tatéya na bia yé’é abui mam ya été den. Bia yen ane ajô ya ngule Yéhôva a bili na a jôé ja mane kômban. A nto éyoñe ya su’u ngule Yéhôva a bili na a jôé, a zene ya wulu ba’aba’a a nye, a zene ya ésaé bia bo nye, a mvuane bia vu nye e mezene mese ya ényiñe jangan, a nleme wongan ôse.