“Môt a n’ésôs a ye bi ébotan”

ASO melu kôa, metuna’a me bili beta ngabe nya ékaña’a. Bone b’Israël be mbe be va’a Yéhôva metuna’a betit, ve Bekristene ba ve “metuna’a ya ékaña’a” azekui den. Ve, avale metuna’a afe da ve Zambe nlem avak. (Beh. 13:15, 16) Avale metuna’a ete da soo mevak a bibotan. Bive’ane bi bia liti nalé.

Anna, mbo ésaé Yéhôva ya melu mvus a mbe a yi mon, ve a mbe nkôkôm. A nga ka’a Yéhôva na, nge a biaé mon, a ye “ve nye Yéhôva melu mese ya ényiñe jé.” (1 Sa. 1:10, 11) Mvuse ya valé nde Anna a nga bo abum a biaé monafam a to jôé na Samuel. Éyoñe Samuel a nga tyi mebé, ane Anna a nga kee nye tabernacle aval a nga ka’a Yéhôva. Yéhôva a nga botan Anna amu, a nga bi nsisime ya nyum émiene mam. A nga bi mvome ya biaé bone betan befe, a Samuel a nga bo nkulu mejô, a ntili Kalate Zambe.—1 Sa. 2:21.

Melu ma, aval ane Anna ba Samuel, bia fe bi bili mvome ya belan ényiñe jangan na bi kañe Nté wongan. Nde fe, Yésus a nga ka’a na, nge bia nyume biabebiene mam asu Yéhôva, bia ye bi bibotan.—Mc. 10:28-30.

Ntete mimbu ôsu, Dorcas a mbe “[nkukum] mfa’a ya mbamba mimboon a mimvolan,” a mbe a volô’ô bôte bevok. Mbia jam a ne na, “a nga kon a wu,” jam ete e nga bo akônda angôndô ya mintaé nlem. Éyoñe bobejañe be nga wô’ô na, Pierre a ne bebé valé, nde be nga loone nye a zu avôl avôl. Tame simesane meva’a be nga wôk, éyoñe Pierre a nga wômôlô Dorcas. E taté yen ane nlômane wo wômôlô môt ve éyoñ éte! (Mam. 9:36-41, Mfefé Nkôñelan) Zambe a nji vuane mbamba mimboane mi Dorcas. (Beh. 6:10) Nkañete wé ô ne Kalate Zambe asu mfi wongan.

Nlômane Paul fe ô nga li’i bia mbamba éve’ela mfa’a ya nyoñe bôte bevo’o ngap. A nga tili bobejañe ya Corinthe a jô’ô na: “Mfa’a wom, ma ye kañese dimili, a ma ye ve mamiene ngumba asu denan.” (2 Bec. 12:15, Mfefé Nkôñelan) Paul a nga yeme na, éyoñe môt a nyum émiene mam asu bôte bevok, sa ke nnye étam a ne mevak, Yéhôva fe a ne mevak, a ye fe botane nye.—Mam. 20:24, 35.

Nalé a liti na, Yéhôva a wô’ô mvaé éyoñe bia belan éyoñe jangan, a ngule jangan asu mam ma fombô Éjôé jé, a asu bobejañ. Ve, ye bi bili fane fe ya su’u mame ya Éjôé? Ôwé bi bili! Nge ô vaa na, bi ne belan éyoñe jangan a ngule jangan, bi ne fe bo mimvean. Ba belane mimveane mite mfa’a ya na be suk ésaé nkañete ja bobane si ése, be su’u bemissionaire a bekpwa’a mefan be ne ngum aval. Mimveane miangan mia volô fe na abui bisaé e boban: ésaé ya kômesan a kôñelane bekalate a bevidéo, ésaé ya su’u bôte be tele minju’u été, a ésaé nlôñane Meba m’Éjôé. Bi ne tabe ndi na, “môt a n’ésôs a ye bi ébotan.” Jam da dañ e ne na, bia ve Yéhôva duma éyoñe bia ve nye biôm bi mo biangan—Min. 3:9; 22:9.

AVALE BÔTE BÉZIÑ BA TOBE NA BA SUK ÉSAÉ YA ÉJÔÉ

Aval ane melu me nlômane Paul, abui bôt da ‘naane jôm,’ nge abime moné éziñ, a ke futi de nkop ô ne Aba Éjôé, vôm a ne ntilane na, “Oeuvre Mondiale.” (1 Bec. 16:2) Ngon ése, mekônda ma lôme moné ate wofise ya Béthel Bengaa be Yéhôva ya si jap. Womien ô ne fe lôme mimveane miôé adresse Bengaa be Yéhôva ya si wo nyiñ. Nge wo kômbô yem adresse Bengaa be Yéhôva ya si jôé, tili’i, nge ke na, lo’one wofise ya Béthel. Ô ne fe yene b’adresse e www.pr418.com. Mimveane womien ô ne lôme mmie mi:

MIMVEAN BE VO’O BETA BULANE WO

Ô ne bo mimvean a zene ya bank, carte de crédit, nge ke a zene fe. Bebank béziñ, ô ne fe belane jw.org, nge ke anjeñe mefoé afe.
Ô ne ve moné, mekatak, nge ke biôm bi mo bife bi ne dia. Wo yiane tili kalate a liti na, ba ye ke bulane wo biôm wo ve.

MIMVEAN BE NE BETA BULANE WO

Ô ne bo mvean a kate na, ba ye bulane wo wô nge wo tôbane njuk éziñ.
Wo yiane tili kalate a liti na, ba ye bulane wo mveane wo bo.

AVAL Ô NE BO MIMVEAN

Nge ô vaa mveane moné, a biôm biôé bife bi ne dia, ô ne belane mezene mefe ya bo mimvean na ô suk ésaé ya Éjôé. Bia te lañe mezene mete yôp. Nge wo kômbô belane zen éziñ, nge mezene méziñe ya été, taté’é loon, nge tili wofise ya Béthel ya si jôé, na ô yeme mezen ô ne belane me. Mbôle metiñ, a metiñe ma fombô toya me nji bo avale da mesi mese, e ne mfi na ô yene bôte ba yeme metiñ a mam ma fombô toya, ôsusua na, wo tobe zene wo ye belane je na wo bo mvean.

Contrats d’assurances vie: Éyoñe wo bo mvean, e ne mfi na ô kate na, Bengaa be Yéhôva mbe ba ye nyoñe moné wôé ya assurance, nge nyi ya awo’one bisaé.

Moné a ne wo bank: Ô ne lôme moné wôé compte Bengaa be Yéhôva, ô tôñe’e metiñe ya bank ya vôm ô too. Ô ne fe ta’a mam asu ya na, bank éte é ke ôsu a lôme be moné to’o womien ô wuya.

Moné: Zene fe é ne na, mbu ôse, môt a kômbô suk ésaé ya Éjôé a ne tyi’i na a kuane biyeme bié biziñ, nge abime bidi ya afup dé, moné a ye bi été, nnye a ye ke futi nkop, vôm a ne ntilane na, “Oeuvre Mondiale.”

Menda a mesi: Ô ne ve Bengaa be Yéhôva mimvean ba ye ke bulane wo, ve nge mvean ôte ô ne nda ô too, ô ne ke ôsu a nyiñ été nté ô ngenan ô vee.

Kalate élik: Ô ne ve Bengaa be Yéhôva mesi a menda, nge moné, ve wo yiane de bo a zene ya notaire. Nge na, ô ne tili nkômbane wôé e kalate éli’i wôé. Mboan ôte ô ne volô wo mfa’a ya toya.

Avale bia te jô, môt a bo avale mimvean ete, a yiane ta’a mam méziñ.

Nge wo kômbô yem abui mam afe, ô ne ke anjeñe mefoé dangan ô tobe vôm a ne ntilane na, “Aval ô ne bo mimvean ya suk ésaé ya si ése” nge na, ô ne tili wofise ya Béthel.