Éyoñ ényiñ é nto teke ajibi

Adriana, minga ya Brésil a jô na: “Kom ése me mbe me wô’ôtane v’ane me vo’o beta jibi. Nde me nga yene fo’o na ma yiane jibi wu.”

YE É kuiya na nlem ô bo wo ntya’an aval é ne na, wo kômbô wu wu? Nge nalé, ô ne yeme tebe été Adriana. Nlem ô mbe nye nte’an mbia jam, a mbe fe kom ve éyôé. Bedokita be nga su’ulane ke yene na Adriana a kone dépression.

Bi ne fe kobô ajô mone Japonais ba loene na Kaoru, a mbe a tuñulu bebiaé bé éyoñ be mbe be nto minnôm. A jô na: “Me mbe me yeme a bisaé biyoñ biziñ. Me nji be me kômbô’ô di, me mbe fe me kate’e ke ôyo. Me nga taté na ma simesane na, minju’u miam mi ne man fo’o ve nge ma wu.”

Mone Nigérian ba loone na Ojebode a jô na: “Me mbe éyôé kom ése, a me mbe me yônô’ abui; nde me nga jeñ na me wôé mamien.” Mbamba jam a ne na, Ojebode, Kaoru, a Adriana be nji wôé bebien. Ve mbu ôse, bôte mintete betoyini ba wôé bebien.

VÔM Ô NE YENE MVOLAN

Abui bôt da wôé bebien é ne befam, abui y’été é mbe é wô’ ôsone ya sili mvolan. Yésus ki a nga jô na, môt a kon a yiane ke yene dokita. (Luc 5:31) Nde nge wo fe wo kone nlem, te wô’ ôsone ya jeñe mvolan. Abui bôt da kone nlem é nga yene na, mebiañ bedokita ba ve me ne volô môte na, a boone wô’ôtane mone mvo’é, a na a jibi minju’u mié. Ojebode, Kaoru a Adriana be nga bo de, a den, ba kui na be dañ minju’u ba tôbane mie.

Bedokita be ne ve môt mebiañ, nge laan a nye, nge ke belane mam mete mebaane na be saé nye. Da yiane fe na, bôte ba kone nlem be bi mvolane nda bôte jap a bemvôé bap. Mvôé ja dañ bemvôé bese môt a ne bi é ne Yéhôva Zambe, nnye ate a su’u bia angôndô ya abui a zene ya Mejô mé, Kalate Zambe.

YE NYA BIAÑ A NE FO’O ASU DÉPRESSION?

E wô’ô sili na bôte ba kone dépression be nyoñe mebiañ ayap éyoñ, a na, be tyendé mam méziñ ényiñe jap. Ve nge wo kone dépression, ô ne bem ôsimesane wôé mbamba ényiñ a yange wo melu ma zu, ane Ojebode. A jô na: “Me ne ôjeja’a ya yen ane mejô me ne Ésaïe 33:24 ma tôéban, éyoñe teke môt éziñ si va a ye beta jô na, ‘Ma kon.’” Ane Ojebode, futi’i ndi nleme jôé ngaka’a Zambe a nga bo a lat a “mfefé si,” vôme “mintaé” mia ye ke beta bo. (Nlitan 21:1, 4) Ngaka’a éte ja tinane na, avale mintaé ése da ye man. Mintaé wo wôk mia ye man éyoñe jia ya biyoñe bise. Teke na wo ye beta ‘simesane mintaé mite nge zu nlem wôé.’—Ésaïe 65:17.

Bifuse ya Bible bi ne volô wo

Zambe a yem avale wo wô’ôtan.

“Ma, Yéhôva Zambe wôé, m’aye bi mbo nnôme wôé, me jô’ô wo na, Te ko woñ; m’aye volô wo.”—Ésaïe 41:13.

Yéhôva a yem avale wo wô’ôtan a dañe mona môt ase, a kômbô fe volô wo.

Bindi’i Mejô me Zambe.

“[Élie] a nga ja’é mfa’a wé na, a tame wu, a jô na, . . . A Yéhôva, nyoñe’ ényiñe jam.”—1 Bejô Bôt 19:4.

Ojebode a jô na: “E bindi Mejô me Zambe a nga volô ma. Me nga yemelane na, nkulu mejô Élie fe a nga wô’ôtan avale mintaé me nga wô’ôtan.”

Bindi’i bive’ela ya Kalate Zambe.

“Ve ma [Yésus] me nga ye’elane Zambe ajô dôé [Pierre] na, mbunan wo abuni wo aye bo te man.”—Luc 22:32.

Mvus éyoñ nlômane Pierre ô nga kate Yésus biyoñ bilal, nlem ô nga taé nye, a nga yône fe abui. Kaoru a jô na: “Jam é nga kui Pierre é nga liti ma na, Yéhôva ba Yésus be nga tebe été jé. Nalé a nga ve ma ngule nyul.”

Teke na wo ye beta ‘simesane mintaé mite nge zu nlem [wôé].’—Ésaïe 65:17