“Mi momba’an, a za bo na, môt éziñ a ye bo nyô a bi mia minkôm”!

1. Éyoñ bia lañe Becolossien 2:4, 8, bia yene na Satan a belane jé asu na a bi bia minkôm?

SATAN a yi na bi lume Yéhôva mvus. Asu na a jalé nsôñan ôte, a wô’ô jeñe na a ndamane mfasane wongan, mfa’a ya na ôsimane wé ñwô ô wulu bia. A wô’ô fe jeñe na a dutu bia a mam bia kômbô nlem.​—Lañe’e Becolossien 2:4, 8.

2-3. (a) Amu jé bi nji yiane bi melebe ya kalate Becolossien 2:8 éngbwemese? (b) Jé bia zu yen ayé’é di?

² Te ji’a buni na Satan a vo’o bi wo minkôm. Te vuane na mejô me Paul bia koone me Becolossien 2:8 me nji be asu bôte ya nseñ. A nga tili me asu Bekristene be mbe minwo’an. (Beco. 1:2, 5) Bekristene ya éyoñ éte be mbe ngule ya ku ôlame Satan, a bia fe bi ne ku ôlam ôte den. (1 Bec. 10:12) Amu jé bia jô nalé? Amu nté ane Satan a nga wuabane si, a vebe ze ve na a du’u bebo bisaé be Yéhôva. (Nli. 12:9, 12, 17) Ane ô vaa nalé, bia nyiñ éyoñe mbia be bôt a ‘bebo medu’an be ne ve nenenen.’​—2 Tim. 3:1, 13.

³ Ayé’é di, bia zu yen aval avé Satan a belane “zezé medu’an” asu na a bo na bi yene mam ane nye. Bia zu fe yen mezene melal a belane me na a lame bia. (Beép. 6:11) Wônaa, ayé’é da zu, bia ye yene mam bi ne bo nge é ne na Satan a kôéya bia ñyenane mame wé a zen éziñ. Ve bi tame taté zu yen avale Satan a nga du’u bone b’Israël valé be nyiineya Si ya ntiñetan.

SATAN A TINDI BONE B’ISRAËL NA BE KAÑE BEZAMBE BEFE

4-6. Kalate Deutéronome 11:10-15 a liti na bone b’Israël be mbe be yiane yé’é mfefé jam ôvé Si ya ntiñetan?

⁴ Satan a nga belane fe’e medu’ane jé na a tindi bone b’Israël na be kañe bezambe befe. Nne a nga bo jam ete aya? A mbe a yeme’e na be mbe be yi jôme ya di, ane a nga belane nkômban ôte asu na a wone be. Éyoñ bone b’Israël be nga nyiine Si ya ntiñetan, e nga sili na be tyendé fatane mbéane bidi. Égypte, be mbe be bela’ane mendime ya Nil asu mefube map. Ve Si ya ntiñetane ki, be mbe be yiane yange mveñ nge ke mfô asu na be bi mendime mefup, amu beta b’asôé be nji be wôé. (Lañe’e Deutéronome 11:10-15; És. 18:4, 5) Ajô te, bon b’Israël be nga yiane yé’é mfefé fatane mbéane bidi. Jam ete ki é nji be tyi’ibi, amu bôte be mbe be dañe yem ajô ya bisaé mefup be nga mane wu nkôte si.

⁵ Yéhôva a nga nyoñ éyoñe ya kate bebo bisaé bé na mam me tyendéya. Ane a nga ve be abendé di: “Taba’ane ntye mfa’a wônan, minlem mienan mi za du’uban, a mi yale feñ, a bo bezambe befe bisaé, a kañe be.” (Dt. 11:16, 17) Amu jé Yéhôva a jô be na be tabe ntyel a évus ékaña’a éyoñ a kobô be ajô ya mfefé fatane mbéane bidi?

⁶ Yéhôva a mbe a yeme’e na bone b’Israël be ne sili bôte ya meyoñe me mbe me bôma’ane be avale ba bo asu na be yôô bidi. Bôte ya meyoñe mete be mbe beta bebé mefup, a be mbe ngule ya volô be, ve bone b’Israël be mbe be yiane tabe ntyel. Becananéen be mbe be tôñe’e metum me tii a ékaña’a Baal éyoñ ba bo bisaé mefup. Be mbe be buni’i na Baal nnye a ne Miene ya ñyeme yôp, a na nnye a noo mveñ. Yéhôva a nji be a yi na bebo bisaé bé be du’uban a bikañekañe bite. Ve bone b’Israël be nga tob abui biyoñe na ba kañe Baal. (Nb. 25:3, 5; Bm. 2:13; 1 Bb. 18:18) Éyoñe ji, entame yenané avale Satan a nga kui na a bi bebo bisaé be Yéhôva minkôm.

MAM MELA SATAN A NGA BELANE ME NA A BI BONE B’ISRAËL MINKÔM

7. Aval avé mbunane bone b’Israël ô nga tebe meve’ele Si ya ntiñetan?

⁷ Satan a nga taté belane mbamba nkômbane bone b’Israël be mbe be bili na mveñ é noñ. Ataté memane ya Ngone nyini akekui Ngon ébulu, mveñ é nji be é dañe noñ Si ya ntiñetan. Asu na bone b’Israël be bi jôme ya di a bu’uban ényiñ, be mbe be yiane yange mveñe ya Ngon awômô. Satan a nga bo na be buni na, bidi biabe bi ne vu vengevenge ve ba bo ane meyoñ ma bômane be. Bôte ya meyoñ mete be mbe be buni’i na ba yiane tôñe metum méziñ asu na bezambe bap be noo mveñ. Bone b’Israël béziñ be nga jañele mbunan, ane be nga si’a ko na, nge ba tôñe ki metume me tii a ékaña’a Baal, ésep ja ye ke tebe.

8. Aval avé Satan a nga beta ve’ele bone b’Israël? Timi’in.

⁸ Satan a nga beta belane jam afe na a ve’ele bone b’Israël: mbia minkômbane miabe ya bisôk. Bôte ya meyoñe mefe be mbe be fula’an ékaña’a jab a mam bisôk. Be mbe be bili mingume betemple, vôme befam a binga be mbe be bo’o bijabô. Be mbe fe be yene’e mvo’é na befam befam a binga binga be fulan, mbia jame fo’o! (Dt. 23:17, 18; 1 Bb. 14:24) Be mbe be buni’i na mesi map ma ye bo atek amu bikañekañe bite. Abui bone ya Israël ve zu ku ôlame ya mam bisôk, a taté na ba kañe bivôlevôla bezambe. Nya ajôô a ne na, Satan nnye a nga bi be minkôm.

9. Kalate Osée 2:16, 17 a liti na jé Satan a nga bo asu na bone b’Israël be vuane Yéhôva?

⁹ Satan a nji su’u valé. A nga bo na bone b’Israël be vuane Yéhôva. Melu me nkulu mejô Jérémie, Yéhôva a nga jô na bivuse bekulu mejô bi nga tindi ayoñ dé na é vuane jôé dé ‘étome Baal.’ (Jr. 23:27) A ne ve ane bone b’Israël ya melu mete be nji be be beta belane jôé Yéhôva, be nga taté na ba loone nye na Baali, jôé ja tinane na “Masa” nge ke na “Miene.” Nalé a nga bo na be kate kandé Yéhôva ba Baal; jo’ojo’o a taté ñhe! Metume ya ékaña’a Baal me zu fulan a nya ékaña’a.​—Lañe’ Osée 2:16, 17.

MEZENE SATAN A BELANE ME DEN

10. Melam mevé Satan a belane me den?

¹⁰ Satan a bo ve avale da den. A ke ôsu a belane minkômbane miangan a mam bisôk na a bi bia minkôm; a bo fe na bôte be kate yeme Yéhôva. Bi tame taté la’ase jame lale.

11. Aval avé Satan a bo na bôt be kate tu’a yeme Yéhôva?

¹¹ Satan a bo na bôte be kate yeme Yéhôva. Éyoñe minlômane mi Yésus mi maneya wu, bivuse Bekristen bi nga taté na bia miase bivuse miñye’elan. (Mam. 20:29, 30; 2 Bet. 2:3) Bebiasé Zambe bete be nga solé bôte jôé nya Zambe. Be nga vaa je Bible a fole je a bifia bife ane “Tate.” Nalé a nga bo na môt a lañe Bible a kate yeme kandé Yéhôva, nya “Tate,” a “betate” bese bevo’o ba koone be Kalate Zambe été. (1 Bec. 8:5) Éfia “Tate” éte jia jia nje fe be nga belane je asu Yésus Bebible bap, asu na bôte be kate tu’a yemelane na Yéhôva ba Mone wé be nji bo nkôñe wua. (Jean 17:3) Ane do’oten Zambe wua bôte bela a nga mane yandane miñyebe, Bible ki a nji ye’ele nye vôm éziñ. Jam ete e nga bo fe na bôt abui be buni na Zambe a ne ndimba, a na bôte be vo’o tu’a yeme nye. Momo minsos!​—Mam 17:27.

12. Évuse ñyebe ja yen avale mam avé mvo’é, a Beromain 1:28-31 a liti na mbia bibuma bivé mboan ôte wo wum?

¹² Satan a belane mam bisôk. Melu mvus, Satan a nga bo na mam bisôk me bo beta ngabe wua ya évus ékaña’a. Nne fe a bo nalé melu ma. Dene fe, évuse ñyebe ja yene mam bisôk ane jam é ne mvo’é. E kalate Beromain, Paul a liti mbia bibuma mbia mboan ate a wum. (Lañe’e Beromain 1:28-31.) “Mam me ne te yian” a jôô me éfus éte ma fombô mvite mame ya bisô’ ése, to’o éyoñ befam befam nge ke binga binga ba fulan. (Bero. 1:24-27, 32; Nli. 2:20) Kalate Zambe a kôme kate bia ôsimesane Yéhôva a lat a mam mete, nde e ne nya mfii na bi tôñe miñye’elane mite ényiñe jangan.

13. Jam avé afe Satan a belane de asu na a du’u bôt?

¹³ Satan a belane minkômbane miangan. Bia bese bia kômbô bi ñyeman ô ne volô bia na bi bo ngule ya toñe biabebien nge ke nda bôte jangan. (1 Tim. 5:8) Asu na bi bi ñyeman ôte e ne sili na bi ke sikôlô, a na bi kôme futi nlô mam bia yé’é. Ve ntyel ôôô! Besikôlô ya abui mesi, ba ye’ele ki bongô ve mam me ne volô be ényiñ, ba ye’ele fe be zezé ñyemane ya émo. Ba ye’ele bongô na Zambe a nji bo, a na be nji yiane buni mam me ne Kalate Zambe été. Ba du’u fe be na, éyoñ môt a ne ñyeman, a vo’o sôane na biôm bise bi nga so atemetem. (Bero. 1:21-23) Miñye’elane mite ki mia wosane a “ñyemane Zambe.”​—1 Bec. 1:19-21; 3:18-20.

14. Ñyemane mam ya émo wo tindi bôt na be bo aya?

¹⁴ Ñyemane mame ya émo ôte wo wosane miñye’elane ya Bible. Wo volô ki bôte na be wum ébuma ya nsisim, wo viane bo na “mimboane mi mame ya minsôn” mmie mi wulu be. (Beg. 5:19-23) Wo bo na bôt be bo ébiasé a mebun, jôm ete nje bia yen abui bôt e “nye’e bebiene” den. (2 Tim. 3:2-4) Kalate Zambe ki a ye’ele bebo bisaé be Yéhôva na be bo éjote nyul a nje’ebane nlem. (2 Sa. 22:28, nwt-F) Bekristen béziñ be nga kee sikôlô ôsu université be nga su’ulane taté na ba yene mam ane émo, sa ke ane Zambe. Bi tame nyoñ ve mon éve’ane wua a liti jam é ne kui môt a biasé fe’e Zambe aval ete.

15-16. Jé jam é nga kui sita éziñ da ye’ele wo?

¹⁵ Sita éziñ a boya ésaé nkpwa’a mefane mimbu 15 a jô na: “Ékôane Jéhôva é jaéya zu ja ve bia meleb a lat beta besikôlô; mamien me nga kôme yé’é a yem amu jé bia yiane tabe ntyel a avale mboane sikôlô te, ve me nga biasé melebe mete. Me mbe me jô’ô na sa ke éndame le.” Ntyi’ane sita ate ô nga soo nye jé? Émien a meme na: “Me mbe me yeme’ a sikôlô aval é mbe na, me nji be me beta bi éyoñ ya ye’elan, nge kañete, nge ke ji ya kômesane bisulan. Nte’e na me nga ji’a nyoñe ntyi’an nné ane me nga yene na élate bia Yéhôva é nga zu ndaman. Ane me nga telé jôm ete.”

¹⁶ Aval avé beta besikôlô be nga ndamane ñyenane mam sita nyi? Émien a jô na: “Ma wô’ô ôsone ya jô de, ve sikôlô ate a nga bo na me dañe bem mis ve bikobe bi bôte bevok a ve mam mese ba bo ve abé abé, e dañedañ bobejañe ya akônda. Me nga taté fe na ma nye’e me too vôme wom étam. E nga sili ma abui éyoñ asu na me tyendé mbia mefulu mete. Ane me nga tu’a wô’ô na, éyoñ môt a biasé memvinda Yéhôva a ve bia a zene ya ékôane jé, nalé a ne soo nye angôndô ya abui minju’ ényiñ. Yéhôva a yeme ma a dañe mamien. Nge me nga yem, ve me nga bo nye mewôk.”

17. (a) Ntyi’an ôvé bia yiane nyoñ? (b) Jé bia ye yen ayé’é da zu?

¹⁷ Te ve’ele kañese na émo Satan é “bi [wo] minkôm amu atyeñe ñyemane . . . a zezé medu’an.” Kele’ ôsu a sa’ale melam me Satan. (1 Bec. 3:18; 2 Bec. 2:11) Te ve’ele kañese na a bo na ô vuane Yéhôva. Tôñe’e memvinda me Yéhôva ényiñe jôé. Te kañese na Satan a wone wo. Ve jé ô ne bo nge wo yene na nsisime ya émo ô biya wo mone jôm? Ayé’é da zu da ye liti bia avale Bible a ne volô môt na a “sô’ôlô” mbia mefulu a mbia mimfasan, to’o mi ntoo nye nlem été ane “alem.”​—2 Bec. 10:4, 5.