Ye wo bo fo’o filiya môs ôse?

Ye ô bili fo’o fulu ya lañ éfuse ya Bible a miñye’elane ya nsoé kalate Emfasané éfuse ya môs? Nge nalé momo, ye ô ne taté de den? Bôt abui ba bo filiya mame tyé. Nalé a ve be fane ya fas éfuse ya môs nté ba bo bisaé biap ya môs. (Jos 1:8; Bs 119:97) Aval avé ô ne tu’a bu’uban Éfuse ya môs? Lañe’e bifuse bise bia bôman éfus éte asu na ô yeme jam e nga bo na be tili je. Jeñe’e na ô fase nlañ éziñ ya Bible wo liti aval ô ne tôñe miñye’elan éfus éte ja ve. Fase’e fe avale womien ô ne tôñ ñye’elan ôte. Éyoñe mintyi’ane wo nyoñ mia lu’an a Mejô me Zambe, mia ye ba’ale wo mbamba zen, nalé a ye soo wo abui bibotan.​—Bs 119:105.

Bobejañ ba saé bebéthel ba fas éfuse ya môs nsamba mame tyé ôsusua na ba taté bisaé. Ô ne koon abui befiliya, avale da bobane bebéthel e Télé Bengaa be Yéhôva, vôm a ne ntilane na MAM MA KUI A MINKAÑETE. Éyoñ évé ô nga kandane yene wua ya été? Éko éziñ miñye’elan ô nga bi été mi nga volô wo mbamba éyoñ. Bi tame yen aval avé nkañete Lôt ô ne volô wo na ô nyoñe mbamba mintyi’an.

YENE’E VIDÉO TE MIA NYE’E ÉMO (1JN 2:15), MVUSE YA VALÉ YALA’ANE MINSILI MI:

• Éfus évé ya Bible ja be mbôka’a ya filiya nyi?

• Aval avé nlañe Lot wo ye’ele bia mfi ya bo teke nye’e émo nge ke biôm bi ne été?​—Met 13:12; 14:12; 19:3, 12, 13, 24-26

• Aval avé bi ne liti na bia nye’e Yéhôva, sa ke émo nge ke biôm bi ne été?