1921 Den A nto Mimbu Ntet

“Beta ésaé mbé a boban mise mangan été mbu wu?” Nkume mmombô a bete ya Ngon ôsu 1, mbu 1921, nnye a nga bôône beyé’é Bible nsili ôte. Éyalan é ne Ésaïe 61:1, 2 é nga volô beyé’é Bible na be kôme fas ajô ya ésaé nkañete be nga ve be. A jô na: “Yéhôva a wo’oya me mbone na, me kate bôt be ne minlem ne mieññ mbamba mefoé . . . , me kañete mbu ya mvame Yéhôva, a môse ya akuna’a ya Zambe wongan.”

ANGÔNDÔ YA AYO’O BEKAÑETE

Asu na be bo ésaé éte, e nga sili na beyé’é Bible be bo ayo’o nlem. Ane ô vaa na be mbe na ba kañete bôte be ne minlem ne mieññ “mbamba foé,” be mbe fe na ba kañete “môse ya akuna’a” asu mbia be bôt.

Mojañ J. H. Hoskin a mbe a nyiñe’ e Canada, a nga kañete a ayo’o ese. A nga tôbane ntebe ôsu ya nda Zambe éziñ mbu 1921. Nde Mojañ Hoskin a nga taté minlañ a jô’ô na: “Bia yiane kobô mejô me Zambe évôvoé été, to’o bia bo teke bi ôsimesane wua mfa’a ya mam méziñ. Bia yiane kañese na nalé a ne kui, a bia yiane kandan ane bemvôé.” Ve jé é nga viane boban? Mojañ Hoskin a jô na: “Bi nga tame ke kobô minute tañ aya, ane môt ate a nga bibi mbé ngul aval e ne na, me nga buni na beta éyet a mbe mbé ôte é mane sulane tyia.”

Ane môt ate a nga taté na a bam a jô’ô na: “Kelané kobané ajô Zambe be bôt ba yeme ke nye.” Mojañ Hoskin a nji yalan nye, ve éyoñ a kôlô valé, a mbe a jô’ô émien nlem été na, ‘me mbe me buni’i na ma kobô môta Zambe.’

Mojañ Hoskin a jô na to’o éyoñ môt ate a nga bo ésulan môs ô nga tôé valé, a nga ke ôsu a kobô nye abé: “A nga kate bebuni bé na me ne aval mbia môt be ngenane teke tame yen tisone nyi, a na ma yiane fo’o ve awu.” Ve mojañ a nji koo woñ, a nga ke ôsu a kañete, a ésaé jé é nga wum mbamba bibuma. A nga beta jô na: “Me ngenane teke tame bu’uban ésaé nkañete aval ete éyoñ éfe. Bôte béziñ be nga kam, a jô ma na: ‘Bia yeme na ô ne môta Zambe nde nge wo yi jôm éziñ bi ne volô wo.’”

AYÉ’É ÉTAM A AYÉ’É YA NDA BÔT

Asu na be volô bôte ba nye’e mejô me Zambe na be yaé nsisim, beyé’é Bible be mbe mban ya kabe minsili a biyalan mi mbe bi kui’i Âge d’Or.a Minsili miziñ mi mbe asu na bebiaé be bôône mie bone bap a volô be na be yen éyalan Bible été. Minsili mivo’o ya été mi mbe mi ye’ele’e bongô bone be mam be ne tyi’ibi, ane wu ô mbe na: “Bible a bili bekalate tañeya?” Wu ôvok ô mbe na: “Ye benya Bekristen ba yiane bo nkômesane ya tôban bitibela’a meval mese?” Ô mbe ô kômesane bongô na be bo miñyôyo’o bekañete mbamba foé.

Kalate Le divin Plan des Âges a mbe a bili minsili a biyalan asu bôte be mbe be biya abime ñyeman éziñe ya Bible. Be mbe be koone biyalan ya minsili mite kalate Étude des écritures, ngab ôsu. Minsili mite mi nga volô betoyini be bôte na be yé’é abui mam. Ve Âge d’Or ya Ngone awôm a baa to melu 21, mbu 1921 a mbe a jô’ô na minsili mite mia ye ke beta kui. Jé é nga bo na mam me tyendé avôle nalé?

MFEFÉ KALATE!

Kalate Harpe de Dieu

Mon kate a liti môt vôm a yiane lañ

Kat é bili minsili

Bôbejañ ba tebele ésaé nkañete be nga yene na beyé’é Bible ba yiane yé’é benya mejôô ôte’ete’ ôte’etek. Ane be nga kuli kalate Harpe de Dieu, Ngon awôm a jia ya mbu 1921. Môt ase a nga kañese kalate ate a mbe ve taté na a yé’é nye émien étam. Nalé a nga volô be na be tu’a yeme na “Zambe a yi na be nyiñ nnôm éto.” Aval avé meyé’é me mbe me boba’an a kalate ate?

Éyoñ môt a mbe a kañese’e kalate ate, be mbe be va’a nye mone kat. Mone kat ate nnye a mbe a kate’e nye abime mefep a yiane lañ. Sondô a mbe a tôé valé, be mbe be beta nye lôme kat éfe é bili minsili a lat a mam mese a te mane lañ. Kat éte é mbe fe é kate’e nye vôm a yiane lañ sondô a tôé valé.

Akônda e mbe e lôme’e ñyé’é Bible mfefé kat sondô ase, nalé tañe besondô 12. Minnôm mi bôt a ba be nji dañe bi ngule ya kañete mimbé mimbé mbe be mbe be dañe kabe bekat. Éve’an é ne na, Anna K. Gardner a nyiñe Millvale, e Pennsylvanie, États-Unis. A jô na: “Monyañ wom, Thayle, a ne mbômbôk, ve éyoñ Harpe de Dieu a nga kui, a nga bo ésaé nkañete a lôt abim a mbe a bo’o melu mvus. Sondô ase, a mbe a lôme’e bôte bekat be bili minsili.” Éyoñ ayé’é e maneya, akônda e mbe e lôme’e ñyé’é Bible môt é volô nye na a tu’a bi ñyeman ya Bible.

ÉSAÉ ASU MELU MA ZU

Amane mbu, Mojañ J. F Rutherford a nga lôme mekônda mese kalate a jô’ô na: “Ésaé nkañete ja te boban mbu wu ja te nambe abui bevôm, ja te fe wum angôndô ya abui bibuma. Ésaé nkañete é ngenane teke tame boban nalé mbu ôfe.” Nde a nga ke ôsu a jô’ô na: “Abui ésaé e ngenan e yange’e bia melu ma zu. Kata’ané bôte abui na be zu nyoñe ngab ésaé éte, amu ja soo abui bibotan.” Beyé’é Bible be nga tôñe fo’o melebe me Mojañ Rutherford mete, amu mbu 1922, be nga kañete mbamba foé ya Éjôé Zambe a ayo’o ese.

Miñyôyo’o bemvôé

Beyé’é Bible be nga liti na ba nye’esan amu môt ase a nga volô nyo mbok. Be mbe miñyôyo’o bemvôé mi nga ‘bialé éyoñe ya njuk.’ Nlañe wu wo zu bo’olô de.—Min. 17:17.

Môse Tusedé, Ngone tane é too melu 31 ya mbu 1921, be nga wôé bôt éwôéwôé e Tulsa, Oklahoma, États-Unis. E zu koone na be ndôme futi évindi môt mimbôk amu é nga bo minga ntangan éziñe mbia jam. Éyoñe te abui mintangan a lôte 1000 e nga wosane mone doé binvindi. Mewosane ve zu yametane angôndô ya avôl e Greenwood, vôme bivindi bi mbe bi too. Menda a bifatyele a lôte 1400 bi nga mane ndaman, a di’i nduan. Abime mimbim be nga kui na be lañ e mbe 36, ve éko éziñ, bôt mintet be nga wu mewosane mete.

Mojañ Richard Hill a ne évindi Ñyé’é Bible é too Greenwood. A nga laane jam e nga boban, a jô na: “Alu ete, bi nga bo ésulan avale bi wô’ô jaé zu bia bo. Éyoñ é maneya, bi nga wô’ô ane mengal ma bame tison été. Me nga bame nalé bebé ngume nté alu. Ve mam me nga tu’a bep môse ô nga tôé. “Bôte béziñe be nga zu bia kate na nge bi nji yi na mbia jam a kui bia, bia yiane ke sobô beta nda éjôé é nga lôñ tison été.” Ane Mojañ Hill ba ngal a bone bé betan be nga ke sobô beta nda ate. Bebé bivindi bi bôte 3 000, befam a binga, be nga ke tabe wôé. Éjôé é nga lôme bezimbi na be ke ba’ale nda éte, a véé mise asu na mvo’é é beta so.

Zia biyoñ bite nje Mojañ Arthur Claus, ntangan Ñyé’é Bible, a nga nyoñe ntyi’an éziñ a ayo’o ése. A jô na: “Éyoñe me nga wô’ô na bôte ba wup a di’i menda ya Greenwood, me nga tyi’i na ma ke fombô édima mvôé jam, Mojañ Hill, asu na me yem aval a né.”

Arthur Claus a belane Harpe de Dieu asu na a ye’ele aba sikôlô e bili bongô 14

Éyoñ a mbe a nga zu kui nda Mojañ Hill, nde a nga tôbane ntangan éziñ ô bili ngal. Ntangan ôte ba Mojañ Hill be mbe be too afôla da, ô too fe mvôé jé. Éyoñ a nga yen Arthur, a nga buni na nye fe a kômbô zu bo ézezam. Nde a nga bame nye a jô’ô na. “Jé wo bo nseñe môte nyi?”

Arthur a jô na, “Nge me nji ye ve môt ate mbamba éyalan, a nga ye fo’o ma wôé. Me nga kate nye na Mojañ Hill a ne mvôé jam, a na me wô’ô ke nda jé.” Arthur ba môt ate be nga kui na be kamane biôme bi Hill asu na bebo ézezam be bo teke bie nambe.

Mvuse ya valé, Arthur a nga wô’ô na Mojañ Hill a nda bôte jé be ne beta nda éjôé é nga lôñ asu bôte bese. Arthur a nga wô’ô na nge bivindi bi bôte bia kômbô kôlô nda éte, bia yiane bi ôva’a ngul wo so be Général Barrett, mone bezimbi a mbe a wulu’u ajô dap. Arthur a jô na: “E mbe angôndô ya ayaé na môt a kobô a Général. Éyoñe me nga kate ôvañ wom, ane a nga sili ma na: ‘Wo kômbô nyoñe ngap a nda bôte nyi, a jalé miñyiane miap nga?’ Me nga kañese a meva’a mese.”

Éyoñ Arthur a biya ôva’a ngul, ane a nga ke avôl avôle vôme mojañ a nda bôte jé be mbe. Éyoñ a nga liti mone bezimbi afep ôva’a ngul ôte, mone bezimbi ate ve zu kam, a jô’ô na: “Ye Général émiene nnye fo’o a te san afep di nga! Ye wo yeme na ô ne môt ôsu a taté zu vaa môt nda nyi, nté ane jame di e nga taté?” Mvuse ya valé, Arthur ba mone bezimbi be nga ji’a ke nyoñe Mojañ Hill a nda bôte jé. Ane a nga yemete bese metua wé a kee be nda jé.

Mojañ Claus a nga volô Mojañ Hill a nda bôte jé na be nyiñe mvo’é. Bôte béziñe be mbe fe’e ne vema éyoñe be nga yen abime nye’an a abim ayo’o Mojañ Claus a nga liti. Arthur a jô na: “Môt a mbe a too Mojañ Hill fefel a nga taté na a tu’a semé Bengaa be Yéhôva. Abui bôt e nga taté fe na da nye’e benya mejôô, amu be nga yene na bebo bisaé be Yéhôva ba bo ki nkandane mengam amu nyul ékôp. Bia bese bi ne avale da mise me Zambe.”

a Mbu 1937, be nga loone Âge d’Or na Consolation. Mbu 1946 ki, be nga loone nye na Vee ôyo!