Ye wo too ô yeme’ek?
Amu jé é mbe mvo’é na Yéhôva a ve bone b’Israël fane ya ve fatan anon abaé asu metuna’a?
ATIÑE Moïse é mbe é kañese’e na be ve Yéhôva bezum bebaé, nge biyel bi ôbeñ bibaé asu metuna’a. Abui bevôm, atiñe Moïse e mbe é jô’ô na be belan anon ete abaé. Nge wua ô mbe ô jemba’an, be mbe ve belane wu ôvok. (Lv. 1:14; 12:8; 14:30) Nalé a mbe mfi amu jé? Amu ôsu a ne na, be nji be be koone biyel bi ôbeñ Israël éyoñ ése. Amu jé?
Éyel ôbeñ
Biyel bi ôbeñ bia tabe ki afôla da. Bi mbe bi kôlô’ô Israël bengon ayôñ é né. Ngon awôm a jia ya mbu ôse, bia kôlô mesi me ne ayôñ, a beta bulane Israël éyoñ ôyôn ô né. (Jia. 2:11, 12; Jr. 8:7) Nalé a tinane na éyoñ ésep é né, mone Israëlite a nji be ve bi biyel bi ôbeñ asu na a ve bie metuna’a.
Zum é tele akok
Ve bezum ki be mbe be tabe’e vôme wua, be mbe ve bi be Israël éyoñ ése. Be mbe fe ve yale be menda map été. (Fombô’ô Jean 2:14, 16.) Kalate Bible Plants and Animals, a jô na: “E minlam a betisone bese ya Palestine, bôte be mbe be yale’e bezum menda map. Mie nda ase a mbe a bili mone abemba bezum.”—Fombô’ô Ésaïe 60:8.
Zum é ne abemba été
Yéhôva a nga liti na a ne nye’an, a na A yeme tebe été bôte bevok éyoñ a nga kañese na mone Israëlite a ve Nye anon e mbe tyi’ibi ya yené éyoñ a kômbô ve metuna’a.