Ye wo too ô yemek?

Ye bôte be mbe be kuane betit e temple ya Jérusalem be nga yiane fo’o loobane na ‘mimvômvôl’?

KALATE ya mbamba mefoé Matthieu a nga tili a kañete na: ‘Yésus a nga nyi temple ya Zambe, a titane bôt be nga kuan a kuse biôm temple été, a sô’ôlô betawôlô be bôt be nga bo be fola’ane moné, a bito bi bôt be nga kuan bezum; ane a nga jô be na, e ne ntilane na, be aye loene nda jame na, nda ya be aye’elane Zambe: ve mia mi abo je nda mimvômvôl.’​—Mt. 21:12, 13.

Kalate a kañete avale Bejuif be mbe be nyiñe melu mvus, a jô na bekuane biôm ya temple be mbe mimvômvôl, amu be mbe be bete’e metañ me biôm be mbe be kuan. Éve’an é ne na, kalate ba loene na Mishna, (karètot I, 7.) a jô na, ntete mimbu ôsu ya É.J., be mbe be kuane zum tañe denier gôlôt wua. A mbe abime moné ba ya’ane mbo ésaé a nji bo éwôlô, éyoñ a saéya melu 25. Minzôzoé mi mbe ngule ya ve abeñ, nge ke bezum asu metuna’a; ve bekuane biôm be nga bete tañ anon ete aval e mbe e nto ayaé asu minzôzoé mi bôt na mi kuse de. (Lv. 1:14; 5:7; 12:6-8) Simeon ben Gamaliel, beta ñye’ele Bejuif éziñ, a nga wô’ô mbia mboan ate ôlun, ane a nga sé’é abim biôm ba yiane ve, a nga sili fe tañ be mbe be kuane bezum si nya nsilane.

Mam mete mese ma liti na, Yésus a nga bele éyoñ a nga loone bôte bete na ‘mimvômvôl,’ amu be mbe miñwuwup, a ôzañ akum.