Ba beta fubu Temple

Yésus a beyé’é bé be lôteya melu melal e Béthanie nté ane be nga so Jéricho. Ba kune ke Jérusalem môse mondé ya Ngone Nisan é too melu 10. Yésus a wô’ô zaé. Nde éyoñ a yene figuier, a ke vôm a ne. Ye figuier ate a bili fo’o befigue?

Bi nto amane Ngone lale, a ba kôane befigue amane Ngone samane. Ve, élé ji é mbili mekaé éko éziñ amu me nga ji’a kui. Nde Yésus a buni na, a ne koone bibuma befigue été. Ve teme na, ébuma éziñ é nji bo été. Mekaé ma te bo na élé é bo v’ane é mbili bibuma. Nde Yésus a jô na: “Môt a ye fe di wo ébuma melu mese ya ôsu.” (Marc 11:14) Été été, élé ja taté na ja kôt, ve beyé’é ba ye wô’ô atinane y’été môse wo tôé valé.

Mvuse ya valé, Yésus a beyé’é bé ba suane Jérusalem. A ke fombô temple, vôm a nga taté ke mame ngô’é ya angô’é. Éyoñe ji, a nji su’u ve na a fombô a fas ane temple a né; a zu bo jam a nga taté bo mimbu mila mvuse ya valé e Pâque ya mbu 30 É.J. (Jean 2:14-16) Yésus a titane “bôt ba kuse biôm e Nda Zambe été.” A sô’ôlô fe “betebele betyendé moné a bito bekuane bezum e si.” (Marc 11:15, Mfefé Nkôñelan) A nji kañese na, e môt a be’e mimbe’e a zu ve’ele tyi’ilane nseñe Temple na a ke tison été.

Amu jé Yésus a nyoñe bôte ba tyendé moné a kuane betit e temple nalé? A jô na: “Ke e ne ntilane na, Be aye loen nda jam nda meyoñe mese me aye’elane Zambe? Ve mia mi maneya bo je nda mimvômvô.” (Marc 11:17) Yésus a loone bôte na mimvômvô amu ba sili beta tañ e be ba ba kômbô kuse tite ja yian asu mveane metuna’a. Yésus a yene mboane wop ane mvôl nge na wup.

Bemie beprêtre, bescribe a betebe ôsu ya meyoñe ba wô’ô jame Yésus a te bo. Nde ba beta jeñe na be wôé nye. Ve be nji yem aval be ne de bo, amu bôt ba so abui na be zu vô’ôlô nye.

Ane ô vaa Bejuif be ne bebialebiale, beprosélyte fe, e bôte be nga su’ulane nyiine ñyebe Bejuif, ba te so abô’ô Pâque ete. Begrec be ne fe été, a ba te so na be zu jem abô’ ete. Nde ba subu Philippe bebé, éko éziñ amu a bili éyolé é ne nkobô Grec; ba sili nye nge be ne yene Yésus. Philippe a vo’o yeme nge ñyenane ba kômbô nye yen wo yian, nde a kate de André. Bôte bete bebaé ba ke kate Yésus jam ete, nnye ate a ngenan a yiane bo e temple.

Yésus a yeme na a li’iya nye ve bone melu na a wu; nde ñhe, sa ke fe éyoñe ya jeñe na a jalé miñyiane mi bôte ba kômbô yene nye, nge bo na abui bôt é yeme nye. A ve minlômane mié éyalan a zene ya nkana a jô’ô na: “Awolo e kpwaneya, Zambe a ye ve Mone môt duma. Me abele fo’o ane me ajô mia na, Nge dise (nge na fese) fôn de abo te taté ku si été a boé, de aye tabe étam; ve nge de aye boé, wôna de aye wum bibuma abui.”​—Jean 12:23, 24.

Fese jia é ne yené zezé. Ve nge ba bé je a na ja “wu” éyoñ ja boé, é ne yaé a su’ulane bo beta tin a ve abui mefes. Avale te fe, Yésus a ne môt a ne teke nsem y’abé. Ve da, mbôle Yésus a ke ôsu a wulu ba’aba’a a Zambe akekui awu, a ye bo zen ja ye ve abui bôte da liti mbamba été nsisim ane nye ényiñe ya nnôm éto. Ajô te Yésus a jô na: “Môt a nye’e ényiñe jé a ye dimeli je; a nyô a ben ényiñe jé si nyô a ye ba’ale je akekui ényiñ ya melu mese.”​—Jean 12:25.

Yésus a nji simesane fo’o ve émien, amu a jô na: “Nge môt a ye bo me ésaé, a za’a tôñe ma; vôm me to, vôm ate fe mbo ésaé wom a ye tabe: nge môt a bo me ésaé, Tate a ye wumu nye.” (Jean 12:26) Aka’a beta ma’a te! E ba Tate a wumu be’ fe ba ye nyoñe ngap a Krist Éjôé Zambe.

Mbôl a simesane minjuk, a mbia awu a yange nye, Yésus a jô na: “Éyoñ ji nleme wom wo kpwemetan m’abum, me ne jô aya? Ye na: A Tat, nyi’i ma été me tele awolo dina ji?” Ve, Yésus a nji kômbô bo te tôé nkômbane Zambe. Nde a beta jô na: “Ve jame te fo’o e nde me nga zuu de a zu kui awolo di.” (Jean 12:27, Mfefé Nkôñelan) Yésus a kañese bo mam mese Zambe a te mane tak, ja’a e ve ényiñe jé ane metuna’a.